Miˬyehˇ˗euˬ gaˇ mˇ paw bym laˇ— Ngehˬ cawˬ dahˬ beh˗eu jeˬ, tsaꞈ gaˬ˗eu yehꞈ laˇ

Yeˬsuˇ Saˬmaˬliˆ zaˬ miˬ zaˬ˗ahˇ ya tsaꞈ gaˬ˗euˬ teu naˇ, Yeˬsuˇ aˬ yawꞈ˗ahˇ jeˬ hu ngehˬ cawˬ˗euˬ miˇ neh meh. Aˬ dui maˬ siˬ nya˗eu tsawˇ haˬ nehˬ˗ehˇ ngehˬ cawˬ˗eu jeˬ, aˬ joˆ˗ehˇ bi huiˬ bi mahˇ laˇ nya˗eu nga?

• Nawˇ ya mawˇ˗eu tsawˇ haˬ deuˬ˗ahˇ yaw bya bya˗ehˇ ngehˬ cawˬ. Yeˬsuˇ gʼaˬ doeˇ doeˇ kʼawꞈ, iˇ cuꞈ shaˇ dawˇ˗eu heu neh yaw awˬ awˬ lehˇ jeˬ hu ngehˬ cawˬ˗euˬ meh. Teu gaˇ duˇ ni aˬ dui kʼawꞈ, aˬ cawˬ˗ahˇ yaw gʼoeˇ gʼoeˇ lehˇ dawˬ cawˬ puˬ˗awˇ, uˬ jeˬ jaˬ lehˇ˗euˬ gaˇ kawˆ neh maˬ ehˇ, maˬ myahˇ laˇ˗euˬ heu kaˬ˗ahˇ pyeuꞈ laˇ˗euˬ gaˇ kawˆ neh maˬ ehˇ, ngehˬ cawˬ dahˬ beh nya meh. Dahˬ beh˗eu dawˬ heu naˇ, aˬ yawꞈ maꞈ bi ngehˬ cawˬ kʼoꞈ laˇ˗eu gʼaˇ duˬ tehꞈ ma lehˇ noeˬ taˬ. Teu miˇ neh, aˬ yawꞈ maꞈ siˬ nya mawꞈ˗eu gaˇ kawˆ˗ahˇ ngehˬ keuˆ. Aˬ yawꞈ maˬ ngehˬ cawˬ laˇ naˇ kʼawꞈ, tiˬ jeˬ˗iˬ maˬ ngeuˇ˗a. Yawˬ gʼaˬ yawˬ nehˬ˗ehˇ ngehˬ cawˬ iˇ. Nui kʼaˬ biꞈ nehˬ laꞈ lehˇ Yeˬhawˇbaˬ˗ahˇ shaˇ.—Neˬ 2:4; Kʼehˇ 4:29.

• Muiˬ˗eu gaˇ kawˆ tsaꞈ gaˬ˗eu leh jeh kʼawꞈ aˬ tehˬ taˬ tehˬ. Lawˬ ka ni aˬ myah myah loꞈ˗ehˇ ngehˬ cawˬ. Nawˇ tehˬ gʼa naˇ, nawˬ nehˬ˗ehˇ ngehˬ cawˬ luꞈ˗eu deuˬ nui ma maˬ saˇ ni pyeuꞈ laˇ nya˗awˇ maˬ paˇ ngehˬ cawˬ mawꞈ ni kʼawꞈ pyeuꞈ laˇ nya meh. Nawˇ maˬ ya tsaꞈ gaˬ mi na˗ehˇ ngehˬ cawˬ gʼaˬ naˇ kʼawꞈ nui ma taˬ cawˆ. Kʼaˇ yehꞈ laˇ ngeh tsaꞈ gaˬ˗eu yaw shaˬ nya lehˇ noeˬ naˇ, tsaꞈ gaˬ luꞈ le lehˇ maˬ noeˬ ni ngehˬ haw. [Biˬdiˬoˬ 1 pah˗awˇ naˇ haˬ.]

• Nawˬ˗euˬ nui jah gaˇ kawˆ nui ma laꞈ kʼoeˇ neh yaw muiˬ˗ehˇ dzawˇ nehˬ˗eu heu neh tsaꞈ gaˬ˗eu yehꞈ laˇ ni leh jeh. Teu loꞈ˗ehˇ jahˇ naˇ aˬ dui nehˬ˗ehˇ ngehˬ cawˬ luꞈ˗eu gʼaˬ, siˬ nya mawꞈ˗eu miˇ neh naˇ haˬ laˇ nya meh. Yeˬsuˇ, zaˬ miˬ zaˬ kʼoeˇ gʼaˬ naˇ haˬ laˇ paˬ˗ehˇ gʼeh˗eu jeˬ ngehˬ˗eu meh. Kʼoeˇ naˇ, aˬ yawꞈ dawˬ kʼoꞈ biꞈ ngeh, muiˬ˗eu gaˇ kawˆ tsaꞈ gaˬ luꞈ˗eu jeˬ pyeuꞈ meh. [Biˬdiˬoˬ 2 pah˗awˇ naˇ haˬ gʼaˬ naˇ, biˬdiˬoˬ 3 pah˗awˇ paˇ naˇ haˬ.]