Ka li zaˬ˗euˬ dehꞈ ziˇ
Dawˬ gʼawˬ mya jeˬ ngehˬ˗eu tsaꞈ gaˬ duˬ˗ahˇ caw ba iˇ
Tsawˇ haˬ deuˬ Miˬyehˇ Miˇkʼahˬ gaˇ kawˆ˗ahˇ aˬ yawꞈ maꞈ˗euˬ dawˬ neh ya gaˬ naˇ ngehˬ˗ehˇ dzehˬ, nui ma ahˇ dzehˬ laˇ˗eu meh. Teu miˇ neh, Beˬdeˬgoˇdeˬ aˇ nah, A.D. 33-ahˇ Yeˬhawˇbaˬ “miˇ kʼahˬ yawˬ kʼahˬ na luꞈ˗ahˇ neh uiˬ laˇ taˬ˗euˬ Miˬyehˇ˗ahˇ yaw zeu baw dui dui˗eu Yuˇdaˆ tsawˇ haˬ deuˬ”˗ahˇ laꞈ kʼaˬ cehˇ˗eu guiˬ lahˬ dawˬ, aˬ yawꞈ maꞈ˗euˬ “tsawˇ jeuˬ˗euˬ dawˬ˗ahˇ neh” bi gaˬ˗eu kʼawꞈ pyeuꞈ nya meh. Teu ngeh, aˬ yawꞈ maꞈ tsawˇ haˬ myaˬ tiˬ paˆ ngehˬ˗eu Heˬbyehˇ dawˬ hawˇ˗eu Gaˬliˇ dawˬ ngehˬ nya kʼawꞈ ni. (Kʼehˇ 2:5, 8) Nymˬ˗mˇ iˬ nah tiˬ gaˇ na, dawˬ gʼawˬ mya jeˬ ngehˬ˗eu meh. Teu miˇ neh, tsawˇ jeuˬ aˬ yawꞈ jeuˬ lehˇ laˆ paˆ˗awˇ bawˬ dzaˬ˗eu kʼawꞈ, tsaꞈ gaˬ duˬ aˬ yawꞈ tiˬ gaˇ jaˆ˗eu kʼawꞈ pyeuꞈ nya meh. Toˆ˗ehˇ naˇ, tsaꞈ gaˬ duˬ yaw muiˬ˗ehˇ biˇ˗awˇ, nymˇ sahˇ deuˬ˗ahˇ jiˇ maˬ laˆ bahˬ ni, aˬ joˆ˗ehˇ tsaꞈ gaˬ doe nya˗eu nga?
Ja uˇ geuꞈ (Dawˬ 15:22): Laꞈ kʼaˬ cehˇ˗eu guiˬ lahˬ dawˬ tsaꞈ gaˬ˗eu gʼaˇ duˬ, aˬ yawꞈ muˇ yawꞈ˗ahˇ jawˇ˗eu tsaꞈ gaˬ˗eu gaˇ˗ahˇ nyehꞈ tehˬ˗eu deuˬ, tiˬ kawˆ loꞈ˗ehˇ ya ja uˇ geuꞈ˗awˇ, mehˬ bawˬ ya gm˗eu meh. Yawˬ jeˬ yawˬ˗euˬ dawˬ˗ahˇ tsaꞈ gaˬ˗eu aˇ muˇ deuˬ, nawˬ˗ahˇ aˬ yawꞈ maꞈ˗euˬ tsaꞈ gaˬ duˬ˗ahˇ bi taˬ dzeˇ yaꞈ mawꞈ˗eu kʼawꞈ pyeuꞈ nya meh. Ehˇ kʼawꞈ, aˬ yawꞈ maꞈ tsaꞈ gaˬ˗eu lehˇ gʼeh˗eu tsawˇ jeuˬ deuˬ, tiˬ gʼaˬ tiˬ gaˇ jawˇ˗awˇ, tsaꞈ gaˬ duˬ yaw huiˬ miˇ neh yawˬ jawˇ na luꞈ maˬ tsaꞈ gaˬ doe nya naˇ, aˬ dui˗ahˇ bi tsaꞈ gaˬ˗awˇ nui ma ahˇ˗eu tsawˇ haˬ mawˇ naˇ, aˬ yawꞈ maꞈ˗ahˇ bi ehˇ nehˬ˗eu kʼawꞈ pyeuꞈ nya meh. (od˗E 93 ¶37) Kʼoeˇ naˇ, aˬ yawꞈ maꞈ poˆ luꞈ˗eu tsawˇ jeuˬ deuˬ aˬ dui˗euˬ aˇ muˇ neh bi poˆ caw˗awˇ, jawˇ duˬ bi ehˇ nehˬ˗eu kʼawꞈ pyeuꞈ nya meh. (km˗E 7/12 5, oeˬ coeˇ oeˬ bawˬ) Ehˇ kʼawꞈ, nymˇ jiˇ tiˬ jiˇ na dawˬ yaw myaˬ jeˬ ngehˬ˗eu lehˇ maˬ ya ngehˇ˗a. Yaw muiˬ˗ehˇ tsaꞈ gaˬ doe˗eu gʼaˇ duˬ lehˬ hmˬ˗eu heu naˇ, tsawˇ haˬ˗ahˇ haw piˇ˗eu lehˇ jahˇ taˬ˗euˬ zahˇ sahˇ kʼoꞈ nehˬ˗ehˇ jiˇ ya bi tsaˬ leˇ˗eu meh.
Mehˬ bawˬ gm (Peˇ 4:16): Tsaꞈ gaˬ˗eu gaˇ˗ahˇ nyehꞈ tehˬ˗eu gʼaˬ neh sheuˬ gʼeh nehˬ laꞈ˗euˬ jeˬ˗ahˇ yaw muiˬ˗ehˇ mˇ caw. Nawˇ nawˬ˗euˬ aˇ muˇ laꞈ kʼoeˇ zmˬ˗eu dawˬ maˬ ngeuˇ˗eu, yawˬ jeˬ yawˬ˗euˬ dawˬ ngehˬ˗eu deuˬ˗ahˇ Jaˇliꞈ dzaw mehˬ nehˬ luꞈ ma loˇ? Gaˇ mahˇ maˬ ka gaˇ jaˆ˗eu aˬ yawꞈ˗euˬ dawˬ ngehˬ˗eu aˇ muˇ neh bi mehˬ naˇ, huiˬ laˇ mahˇ laˇ˗eu kawˇ dzehˬ meh.
Lehˬ hmˬ (Dawˬ 15:28; 16:1): Nawˇ tsaꞈ gaˬ iˇ ngeh, yawˬ jeˬ yawˬ dawˬ ngehˬ˗eu deuˬ˗ahˇ ya mawˇ naˇ, guiˬ lahˬ dawˬ tsaꞈ gaˬ˗eu gʼaˇ duˬ kʼaˇ gʼeh nya gaˇ neh leh jeh luꞈ˗uˇ. Nawˇ aˬ jeˬ jeˇ dawˬ ngehˬ˗eu tsawˇ haˬ˗ahˇ ya mawˇ paˬ˗ehˇ gʼeh nga lehˇ shaˇ noeˬ˗awˇ, lehˬ hmˬ taˬ nya meh. Kʼoeˇ naˇ, aˬ yawꞈ maꞈ dawˬ paw˗euˬ Jaˇliꞈ hawˇ˗eu biˬdiˬoˬ daoˇloˆ taˬ˗awˇ, aˬ yawꞈ maꞈ˗euˬ dawˬ neh dawˬ cawˬ puˬ nya˗eu gʼaˇ duˬ, JW Lehˇgoiꞈ (JW Language) ehˆ˗ahˇ neh dzaw nya meh.