Miˬyehˇ Miˇkʼahˬ gaˇ kawˆ tsaꞈ gaˬ˗eu Dzaw nymˇ˗ahˇ daˆ˗iˇ mawꞈ miˇ˗a loˇ?

Nawˇ aˇ kʼoꞈ 23-ahˇ neh 65 kʼoꞈ keuˆ ni byah laˇ˗awˇ Miˬyehˇ gaˇ aˇ yamˬ tiˬ byah ni mˇ luꞈ ma loˇ? Nawˇ jawˇ saˇ doˆ˗awˇ tsaꞈ gaˬ˗eu tsawˇ haˬ deuˬ loˬ gaˇ Miˬyehˇ gaˇ mˇ iˇ nya ma laˬ? Nawˇ heu gaˇ naˇ haˬ taˬ˗euˬ loꞈ˗ehˇ ngeuˇ naˇ, Miˬyehˇ Miˇkʼahˬ gaˇ kawˆ tsaꞈ gaˬ˗eu Dzaw nymˇ (SKE)˗ahˇ daˆ˗iˇ mawꞈ miˇ˗a loˇ? Aˇ dahˬ beh˗eu poˆ˗ahˇ neh naˇ miˬ sawˇ yo zaˬ deuˬ maˬ ehˇ, maˬ sheuˬ dahˬ dzaˬ˗euˬ mehˇ nmˇ zaˬ yo aˬ li, zaˬ miˬ aˇ buˇ deuˬ maˬ ehˇ, aˇ heˇ gʼaˬ byah ni Dzaw nymˇ heu˗ahˇ daˆ laˇ˗euˬ meh. Ehˇ kʼawꞈ maˬ sheuˬ dahˬ dzaˬ˗euˬ zaˬ yo aˬ li deuˬ˗ahˇ teu naˆ maˬ tseˇ bi daˆ laˇ mawꞈ miˇ˗a. Yeˬhawˇbaˬ nui kʼahˇ shiˇ˗eu jeˬ mˇ mawꞈ dzehˬ laˇ˗awˇ Yeˬsuˇ˗ahˇ dzaw geuꞈ mawꞈ dzehˬ laˇ ni caw ba neh laꞈ lehˇ Yeˬhawˇbaˬ˗ahˇ guiˬ lahˬ shaˇ. (Ja ceuˬ 40:8; Maꞈtehˬ 20:28; Heˬbyehˇ 10:7) Kʼoeˇ naˇ dzaw nymˇ teu˗ahˇ daˆ leˇ nya˗eu gʼaˇ duˬ aˬ jeˬ jeˇ kʼaˆ behˆ laˆ pyaˇ nya nga lehˇ shaˇ noeˬ.

Dzaw nymˇ heu˗ahˇ neh dzaw jiˇ˗euˬ mehˇ nmˇ deuˬ Miˬyehˇ˗euˬ gaˇ aˬ jeˬ jeˇ mˇ nya˗awˇ, aˬ gaˇ gaˇ mˇ nya˗eu nga? Tiˬ gʼaˬ na aˬ cawˬ˗euˬ tsawˇ jeuˬ dawˬ ngehˬ gaˇ ya tsaꞈ gaˬ iˇ˗awˇ, tiˬ gʼaˬ na naˇ, meuˬ meuˬ ma˗ahˇ ya tsaꞈ gaˬ iˇ˗eu meh. Teu gaˇ neh dzaw jiˇ˗euˬ tiˬ deuˬ na aˇ nah naˇ tiˬ poˆ na aˇ maꞈ˗ahˇ sheuˬ gʼeh˗eu gʼaˬ ya geuꞈ˗awˇ, aˇ maꞈ˗ahˇ sheuˬ gʼeh˗eu gʼaˬ ya geuꞈ˗euˬ deuˬ jiˇ jawˇ˗awˇ, miˇshaˬnaˬliˬ ya geuꞈ˗euˬ deuˬ jiˇ jawˇ˗eu meh. Nawˇ Yeˬhawˇbaˬ˗euˬ gaˇ laꞈ kʼoeˇ mˇ nya˗eu jeˬ˗ahˇ shaˇ noeˬ luꞈ naˇ, “Ngaˇ iˇ ma. Ngaˬ˗ahˇ pyehˬ gʼeh˗awˬ” lehˇ bawˇlawˇpeh Iˇsaˬyaˇ neh ehˇ˗eu loꞈ˗ehˇ shaˇ noeˬ luꞈ˗eu jeˬ pyeuꞈ meh.—Iˇsaˬyaˇ 6:8.

Miˇshaˬnaˬliˬ deuˬ yehˬ˗eu gaˇ mˇ lehˇ ehˇ˗eu biˬdiˬoˬ haw gʼaˬ naˇ, naˇ haˬ˗eu jeˬ heu deuˬ˗ahˇ dawˬ kʼoꞈ biꞈ.

• 

  Tsaꞈ gaˬ duˬ˗ahˇ˗euˬ miˇshaˬnaˬliˬ deuˬ˗ahˇ aˬ joˆ˗ehˇ tseˇ˗eu nga?

• 

  Miˇshaˬnaˬliˬ deuˬ tsaꞈ gaˬ duˬ˗ahˇ aˬ joˆ˗ehˇ caw ba luꞈ˗eu nga?

• 

  Miˇshaˬnaˬliˬ deuˬ neh mˇ˗euˬ gaˇ aˬ jeˬ jeˇ muiˬ˗eu nga?