Ka li zaˬ˗euˬ dehꞈ ziˇ
Aˬ da aˬ ma deuˬ, nawˬ˗euˬ zaˬ˗ahˇ yawˬ haˇ yawˬ ha haw piˇ nya ni mehˬ nehˬ
Aˬ dui tsawˇ haˬ deuˬ yaw doeˇ˗ahˇ yaw muiˬ noeˬ˗eu miˇ tsaˬ˗ahˇ jawˇ luꞈ˗eu ma. (Iˇsaˬyaˇ 5:20) Tiˬ deuˬ na Yeˬhawˇbaˬ bye˗eu jeˬ˗ahˇ mˇ˗eu meh. Teu naˇ aˬ li cawˬ cawˬ aˬ buˇ cawˬ cawˬ maˬ tsaˬ maˬ dawˇ˗eu jeˬ mˇ gaˇ jiˇ ehˇ mawꞈ˗eu meh. Sahˬ boꞈ dzaw cawˬ deuˬ hawˇ˗eu nui deuˬ aˬ dui˗euˬ zaˬ˗ahˇ aˬ yawꞈ maꞈ loꞈ˗ehˇ bi mˇ mawꞈ˗eu meh. Zaˬ deuˬ˗ahˇ gaˇ kawˆ teu˗ahˇ yahˇ nya ni aˬ joˆ˗ehˇ ya lehˬ hmˬ nehˬ˗eu nga?
Zaˬ deuˬ˗ahˇ Yeˬhawˇbaˬ˗euˬ tsaˬ˗eu dawˇ˗eu zahˇ mehˬ˗eu heu neh lehˬ hmˬ nehˬ. (Uˬduˬtahˬ˗eu 18:3) Zaˬ aˬ yawꞈ shehˆ yawꞈ˗ahˇ haw˗awˇ yuꞈ taꞈ jawˇ taꞈ˗eu gaˇ kawˆ˗ahˇ Jaˇliꞈ aˬ joˆ˗ehˇ ehˇ nga lehˇ a lawˆ lawˆ˗ehˇ mehˬ. (Dawˬmehˬmehˬ˗eu 6:7) Yawˬ ha˗ahˇ heu loꞈ˗ehˇ naˇ haˬ. ‘Ngaˇ zaˬ˗ahˇ nui gaˬ tsaˬ tsaˬ ni mˇ mawˇ˗eu heu naˇ aˬ joˆ˗ehˇ gʼeh˗awˇ, mehˬ tsoeˬ haw muiˬ paˬ˗ehˇ dm˗eu aˇ naˆ ni aˇ yeˇ huiˬ˗eu lehˇ mehˬ miˇ˗a laˬ? Ngaˇ zaˬ˗ahˇ aˬ cawˬ deuˬ nawˬ˗euˬ gaˇ kawˆ˗ahˇ yaw zeu ya baw˗eu lehˇ mehˬ miˇ˗a laˬ? Tiˬ gʼaˬ paˬ zaˬ˗ahˇ maˬ muiˬ˗eu aˇ baˇ bi haw˗awˇ, Yeˬhawˇbaˬ˗euˬ mehˬ shi yaw lehˬ jeˬ˗ahˇ bi mˇ laˇ naˇ aˬ joˆ˗ehˇ jahˇ˗eu lehˇ zaˬ deuˬ siˬ nya meh loˇ?’ Zaˬ deuˬ˗ahˇ yaw nyiˇ ngeh neh mehˬ˗eu heu naˇ, yaw haiˬ yaw doeˇ jeˬ˗ahˇ neh haw piˇ nehˬ˗eu meh. (Dawˬdaˬ 27:12; Dawˬtsoˆ 7:12) Nawˇ zaˬ˗ahˇ mehˬ˗eu heu naˇ Yeˬhawˇbaˬ neh biꞈ˗euˬ laꞈ sawˬ˗ahˇ gaˬ˗eu lehˇ mˇ mawˇ˗eu jeˬ pyeuꞈ˗eu meh.—Ja ceuˬ 127:3.
Nymˇ jiˇ ziꞈ dah ni tsoˆ—Nawˬ˗euˬ zaˬ˗ahˇ ‘haiˬ˗eu’ jeˬ˗ahˇ neh haw piˇ lehˇ ehˇ˗eu biˬdiˬoˬ haw gʼaˬ naˇ, naˇ haˬ˗eu jeˬ heu deuˬ˗ahˇ dawˬ kʼoꞈ biꞈ.
Aˬ da aˬ ma tiˬ deuˬ na yuꞈ taꞈ gaˇ kawˆ nehˬ˗ehˇ taꞈ leˇ˗awˇ, zaˬ˗ahˇ maˬ mehˬ nehˬ ni aˬ jeˬ miˇ neh nyi naˬ˗eu nga?
Aˬ da aˬ ma deuˬ zaˬ˗ahˇ aˬ jeˬ miˇ neh ‘Yeˬhawˇbaˬ˗euˬ zahˇ sahˇ kʼoꞈ ya mehˬ nehˬ tsoˆ nehˬ’˗eu nga?—Eˇpeˇsu 6:4
Zaˬ siˬ nui gahˇ, haw piˇ nehˬ˗eu jeˬ pyeuꞈ
Yuꞈ taꞈ˗eu gaˇ kawˆ nehˬ˗ehˇ taꞈ leˇ˗awˇ zaˬ deuˬ˗ahˇ mehˬ˗eu gʼaˇ duˬ, Yeˬhawˇbaˬ˗euˬ aˇ maꞈ aˇ muˇ aˬ da aˬ ma deuˬ˗ahˇ aˬ jeˬ jeˇ lehˬ hmˬ nehˬ taˬ˗euˬ nga?—w19.05 12, oeˬ coeˇ oeˬ bawˬ
Doeˇ dui dui˗eu gaˇ kawˆ maˬ pyeuꞈ laˇ mi naˆ˗ehˇ zaˬ nehˬ˗ehˇ aˬ jeˬ miˇ neh aˬ myah luꞈ ngehˬ cawˬ paˬ˗ehˇ gʼeh˗eu nga?