Tsaꞈ gaˬ iˇ˗eu gʼaˇ duˬ bawˬ dzaˬ gaˇ zmˬ˗eu nui noeˬ nui duˇ

Tsaꞈ gaˬ iˇ˗eu gʼaˇ duˬ bawˬ dzaˬ˗eu jeˬ heu jiˇ, aˬ dui˗ahˇ tiˬ gʼaˬ tiˇ gʼaˬ gʼoeˇ nya gaˬ nya˗awˇ, yaw muiˬ jeˬ mˇ nehˬ nya ni laˆ noeˬ nehˬ˗eu, Yeˬhawˇbaˬ neh lehˬ hmˬ nehˬ laꞈ˗euˬ mehˬ bawˬ nui deuˬ˗ahˇ duˇ˗eu meh. (Heˬbyehˇ 10:24, 25) Tsaꞈ gaˬ iˇ˗eu gʼaˇ duˬ bawˬ dzaˬ ngeh, aˇ yamˬ 5 peu˗ahˇ neh 7 peu ehˇ gʼaˬ ni tehꞈ˗ehˇ zmˬ paˬ˗ehˇ gʼeh˗awˇ, aˇ yamˬ teu laꞈ kʼoeˇ tsaꞈ gaˬ˗eu aˇ muˇ biˇ˗eu, tsaꞈ gaˬ duˬ ehˇ nehˬ˗eu, guiˬ lahˬ shaˇ˗eu, heu deuˬ jahˇ paˬ˗ehˇ gʼeh˗eu meh. (Tsaꞈ gaˬ iˇ˗eu gʼaˇ duˬ bawˬ dzaˬ˗eu jeˬ, mehˬ bawˬ nui deuˬ˗euˬ jeˬ nah jahˇ naˇ, aˇ yamˬ teu naˆ maˬ tseˇ ya laˆ nymˇ˗eu meh.) Mehˬ bawˬ teu˗ahˇ sheuˬ gʼeh˗eu gʼaˬ, teu ngeh nah˗ahˇ zmˬ iˇ nya˗eu nui noeˬ nui duˇ yaw muiˬ˗ehˇ lehˬ hmˬ taˬ paˬ˗ehˇ gʼeh˗eu meh. Yaw jeˬ ma jeˬ, kʼoꞈ nah ngeh nah˗ahˇ, tiˬ nah˗ahˇ neh ngaˬ nah yaw kaˬ˗ahˇ maˬ tsaꞈ gaˬ iˇ nya˗eu mehˇ nmˇ deuˬ jiˇ laˇ˗eu miˇ neh, tsawˇ haˬ yaw myaˬ meh. Teu miˇ neh sheuˬ gʼeh˗eu gʼaˬ, aˬ joˆ˗ehˇ ya tsaꞈ gaˬ iˇ˗eu lehˇ ehˇ nehˬ naˇ yaw muiˬ meh. Sheuˬ gʼeh˗eu gʼaˬ aˬ jeˬ jeˇ paˇ jahˇ nya nga siˬ?

• Ka li zaˬ˗euˬ dehꞈ ziˇ hawˇ˗eu tsaꞈ gaˬ˗eu gaˇ mˇ˗eu sahˬ boꞈ aˇ taꞈ laꞈ kʼoeˇ˗euˬ ngehˬ jeˬ ngehˬ kawˆ˗ahˇ ngehˬ keuˆ

• Nymˬ˗mˇ pyeuꞈ luꞈ˗eu gaˇ kawˆ˗ahˇ zmˬ˗awˇ, aˬ joˆ˗ehˇ ngehˬ dahˬ beh nya nga lehˇ ehˇ nehˬ

• Tiˬ kʼehˬ maˬ taˬ pyehˇ laˇ˗eu gaˇ kawˆ˗ahˇ aˬ joˆ˗ehˇ ehˇ kʼoꞈ nehˬ paˬ nga lehˇ ehˇ nehˬ

• Miˬyehˇ˗ahˇ maˬ jah˗eu deuˬ˗ahˇ maˬ ehˇ, tiˬ jeˬ˗ahˇ neh tiˬ jeˬ pyeuꞈ laˇ˗euˬ lehˇ jah˗eu deuˬ˗ahˇ maˬ ehˇ, aˬ cawˬ˗euˬ tsawˇ jeuˬ deuˬ˗ahˇ maˬ ehˇ, tsaꞈ gaˬ duˬ˗ahˇ yaw kʼaˆ˗ehˇ maˬ ya mawˇ˗eu zahˇ tawˬ luꞈ˗eu deuˬ˗ahˇ maˬ ehˇ, aˬ joˆ˗ehˇ ya ngehˬ cawˬ˗eu lehˇ ehˇ nehˬ

• jw.org gʼoeˇsaiˇ hawˇ˗eu JW Laiˇbaˬliˬ maˬ ehˇ, Jaˇliꞈ laꞈ kʼoeˇ ahˇ˗eu jeˬ˗ahˇ maˬ ehˇ, aˬ joˆ˗ehˇ zmˬ nya˗eu lehˇ ehˇ nehˬ

• JW Laiˇbaˬliˬ ehˆ laꞈ kʼoeˇ, Mehˬ˗eu Keu ka bawˬ keuˆ laꞈ kʼoeˇ ahˇ˗eu jeˬ˗ahˇ aˬ joˆ˗ehˇ zmˬ˗iˇ nya˗eu lehˇ ehˇ nehˬ

• Naˬ gaˬ paw neh tsaꞈ gaˬ˗eu, tsaꞈ gaˬ˗eu sahˬ boꞈ boꞈ˗eu, tsawˇ haˬ uiˬ gaˇ tsaꞈ gaˬ˗eu, gʼa kʼoꞈ iˇ˗eu, Jaˇliꞈ mehˬ˗eu, heu deuˬ aˬ joˆ˗ehˇ ya jahˇ˗eu lehˇ ehˇ nehˬ

• Lehˬ laˇ ca laˇ nya˗eu jeˬ, haw tsaˬ˗awˇ ya laˆ paˇ˗eu jeˬ, aˬ cawˬ˗ahˇ yaw zeu baw˗eu jeˬ, yaw muiˬ paw shaˇ noeˬ˗eu jeˬ, hawˇ˗eu gaˇ kawˆ nui jeˬ ehˇ nehˬ

• Gui gaˇ mehˬ gaˇ leh jeh lehˇ ehˇ˗eu paˇ dmˬ laꞈ kʼoeˇ˗euˬ gaˇ kawˆ maˬ ngeuˇ naˇ biˬdiˬoˬ˗ahˇ neh dzaw geuꞈ nya˗eu jeˬ ehˇ nehˬ

• Aˬ dui nehˬ˗ehˇ tsaꞈ gaˬ luꞈ˗eu mehˇ nmˇ deuˬ˗ahˇ gʼaˬ aˬ joˆ˗ehˇ biꞈ nya˗awˇ, aˬ joˆ˗ehˇ caw ba nya nga lehˇ ehˇ nehˬ

• Tsaꞈ gaˬ gaˇ nehˬ˗ehˇ taꞈ˗eu Jaˇliꞈ aˇ deuˆ, maˬ ngeuˇ naˇ gʼaˬ bi ahˇ laˇ˗eu puˬ haw mawˇ haw laꞈ˗euˬ gaˇ kawˆ ja nehˬ