Ka li zaˬ˗euˬ dehꞈ ziˇ
Gʼoeˬ siˬ ba la˗ahˇ Jaˇliꞈ mehˬ dahˬ beh˗eu gʼaˇ duˬ, aˬ myah myah˗ahˇ maˬ duˇ˗eu tsaꞈ gaˬ˗eu jeˬ
Gʼoeˬ siˬ ba la˗ahˇ Aˬ dui mˬ maˬ maˬ byaˆ zaˇ ziˇ laˬ kʼaˬ cehˇ nya lehˇ ehˇ˗eu boˬloˬshaˬ zmˬ˗awˇ, tsawˇ haˬ deuˬ˗ahˇ Jaˇliꞈ mehˬ dahˬ beh˗eu gʼaˇ duˬ leh jeh˗eu ma. Tsaꞈ gaˬ˗eu deuˬ tiˬ poˆ na huˬ mehˬ mehˬ gʼaˬ geuꞈ˗eu gʼaˇ duˬ, naˬ liˬ 30 laꞈ tseˇ nya˗eu meh. Aˬ myah myah˗ahˇ maˬ duˇ˗eu tsaꞈ gaˬ˗eu heu poˆ˗ahˇ aˬ dui aˬ jeˬ jeˇ jahˇ nya˗eu nga?
Tsaꞈ gaˬ iˇ ngeh: Boˬloˬshaˬ˗euˬ naˇ kʼah kʼah saˬ tsahˇ˗ahˇ zmˬ nya˗awˇ, nymˇ sahˇ gʼaˬ˗ahˇ siˬ nya mawꞈ laˇ ni laˆ noeˬ˗eu gʼaˇ duˬ, Jaˇliꞈ aˬ joˆ˗ehˇ dzaw˗eu lehˇ dzawˇ nehˬ nya meh. Dzeuˇ yaꞈ ngeh, aˬ dui gʼa kʼoꞈ iˇ˗eu deuˬ hawˇ˗eu nui ma ahˇ˗eu deuˬ˗ahˇ shaˇ noeˬ haw. Yaw beh ngeh aˬ yawꞈ maꞈ Jaˇliꞈ maˬ dzaw mawꞈ kʼawꞈ, nymˬ˗mˇ doˆ laˇ˗euˬ boˬloˬshaˬ yaw shuiꞈ heu dmˬ hawˇ˗eu aˬ dui˗euˬ mehˬ jeˬ mehˬ kawˆ yaw shuiꞈ heu˗ahˇ ya leˇ˗eu kʼawꞈ pyeuꞈ nya meh. Boˬloˬshaˬ heu dmˬ iˇ kahˇ maˬ jawˇ˗eu deuˬ˗ahˇ biꞈ taˬ yaꞈ paˬ˗ehˇ maˬ gʼeh˗a. Nui ma maˬ ahˇ˗eu deuˬ˗ahˇ jiˇ maˬ ya sha nehˬ˗a. Ba la heu siˬ laꞈ kʼoeˇ aˬ myah myah naˆ maˬ tseˇ tsaꞈ gaˬ˗eu gʼaˇ duˬ, Tsaꞈ gaˬ˗eu gaˇ˗ahˇ nyehꞈ tehˬ˗eu gʼaˬ mehˬ bawˬ mˇ nya meh.
Yawˬ yamˬ yawˬ: Nawˬ˗euˬ aˇ muˇ sahˬ boꞈ byaˬ˗eu laˆ lawˬ neh tsaꞈ gaˬ naˇ, boˬloˬshaˬ heu dmˬ jiˇ byaˬ taˬ. Nui ma ahˇ˗eu deuˬ˗ahˇ boˬloˬshaˬ heu yuˇ nya˗awˇ, Jaˇliꞈ jiˇ yawꞈ ngehˬ˗ehˇ dzaw nya meh lehˇ ehˇ nehˬ. Gʼeh nya naˇ Jaˇliꞈ aˬ joˆ˗ehˇ dzaw˗eu gaˇ kawˆ yaw nymˇ nymˇ lehˇ dzawˇ nehˬ. Maˬ yehꞈ naˇ jiˇ yawˬ poˆ yawˬ dzawˇ nehˬ ma lehˇ ehˇ nehˬ. Tsaꞈ gaˬ˗eu gaˇ˗ahˇ nyehꞈ tehˬ˗eu gʼaˬ, noeˬ dahˇ doe laˇ˗euˬ mehˇ nmˇ tiˬ gʼaˬ na˗ahˇ kʼehˇ˗awˇ, jeˬ gaꞈ jeˬ ka mˇ˗eu jawˇ duˬ˗ahˇ bi tsaꞈ gaˬ iˇ, Jaˇliꞈ dzaw˗eu gaˇ kawˆ bi dzawˇ nehˬ iˇ nya meh. Kʼoeˇ naˇ, aˬ dui˗euˬ gaˇ mˇ cawˬ hawˇ˗eu kʼaˇ yehꞈ laˇ˗eu loꞈ˗ehˇ aˬ dui neh tsaꞈ gaˬ˗euˬ deuˬ˗ahˇ jiˇ Jaˇliꞈ mehˬ dahˬ beh nya meh.
Yeˬsuˇ aˬ dui˗ahˇ ‘zaˬ lahˇ pyeuꞈ laˇ ni mˇ iˇ’ lehˇ dawˬ biꞈ taˬ˗euˬ meh. (Maꞈtehˬ 28:19, 20) Aˬ dui Yeˬsuˇ neh biꞈ taˬ yaꞈ˗euˬ dawˬ˗ahˇ mˇ byah nya˗eu gʼaˇ duˬ, Aˬ dui mˬ maˬ maˬ byaˆ zaˇ ziˇ laˬ kʼaˬ cehˇ nya lehˇ ehˇ˗eu boˬloˬshaˬ zmˬ˗awˇ, yaw kʼaˆ˗ehˇ leh jeh˗awˇ tsaꞈ gaˬ luꞈ˗uˇ.