Uˬ jeˬ jaˬ lehˇ˗euˬ shaˬ zahˬ pyeuꞈ dzeuˇ gʼaˬ ngeh, aˬ joˆ˗ehˇ caw ba nya˗eu nga?

Nymˬ˗mˇ iˬ nah uˬ jeˬ jaˬ lehˇ˗euˬ shaˬ zahˬ myaˬ laˇ luꞈ˗eu meh. Uˬ jeˬ jaˬ lehˇ˗euˬ shaˬ zahˬ pyeuꞈ laˇ ngeh, yaw muiˬ˗ehˇ caw ba nya˗eu gʼaˇ duˬ, tiˬ gʼaˬ tiˇ gʼaˬ ya ngehˬ cawˬ taˬ˗awˇ aˬ yawꞈ jeˬ yawꞈ yaw luiˆ luiˆ˗ehˇ ya mˇ˗eu meh. Teu miˇ neh Uˆ lahˇ˗eu aˇ muˇ mehˇ nmˇ deuˬ˗ahˇ caw ba˗eu gʼaˇ duˬ, Beˬdeˬlaˇ yawˬ gaˇ na luꞈ Shaˬ zahˬ caw pi˗eu paw mˇ˗eu deuˬ bi jawˇ taˬ˗euˬ meh.

Shaˬ zahˬ caw pi˗eu gaˇ mˇ˗eu mehˇ nmˇ deuˬ, uˬ jeˬ jaˬ lehˇ˗euˬ shaˬ zahˬ aˬ gaˇ pyeuꞈ laˇ˗euˬ lehˇ ya siˬ ngeh, mehˇ nmˇ deuˬ aˬ jeˬ jeˇ caw ba˗eu jeˬ loˬ nga lehˇ siˬ nya˗eu gʼaˇ duˬ, jawˇ kʼahˬ˗ahˇ jawˇ˗eu aˇ muˇ˗ahˇ sheuˬ gʼeh˗eu deuˬ˗ahˇ taˆ lehˇ ngehˬ cawˬ˗eu meh. Uˬ jeˬ jaˬ lehˇ˗euˬ shaˬ zahˬ gʼawˬ naˆ ni kʼaˆ˗awˇ, mehˇ nmˇ deuˬ yawˬ haˇ yawˬ ha maˬ laˆ piˇ nya naˇ, Beˬdeˬlaˇ mehˇ nmˇ tiˬ gʼaˬ na˗ahˇ kʼehˇ˗awˇ bi haw le˗eu meh. Mehˇ nmˇ heu deuˬ nui ma keuˆ˗awˇ caw ba˗eu mawꞈ˗eu deuˬ˗ahˇ kuˇ nya˗awˇ, loˬ˗eu myawˬ tiˬ jeˬ na shaˇ nya˗eu uˬ taꞈ, mehˇ nmˇ deuˬ loˬ˗eu jeˬ jiˇ zeuˇ nehˬ nya˗eu meh.

Heu loꞈ˗ehˇ jahˇ taˬ˗euˬ heu naˇ, mehˇ nmˇ deuˬ yawˬ haˇ yawˬ ha caw ba iˇ˗eu naˆ maˬ tseˇ muiˬ dzehˬ meh. Aˬ jeˬ miˇ neh ehˇ naˇ, gaˇ mˇ taꞈ˗ehˇ maˬ paˇ ya mˇ poˆ˗eu uˬ taꞈ, mehˇ nmˇ deuˬ neh biꞈ laꞈ˗euˬ myawˬ deuˬ hawˇ˗eu pyuˇ jiˇ maˇ diˇ gaˇ dahˇ tsoeˬ gaˇ zmˬ˗iˇ nya˗eu meh.

Beˬdeˬlaˇ neh kʼehˇ leꞈ˗euˬ mehˇ nmˇ deuˬ, shaˬ zahˬ caw pi˗eu gaˇ˗ahˇ pyuˇ aˇ myaˆ ni zmˬ˗awˇ, aˇ myaˆ gʼaˬ bi caw ba laˇ˗eu lehˇ noeˬ tsehˆ nya˗eu meh. Shaˬ zahˬ caw pi˗eu gaˇ˗ahˇ yaw muiˬ˗ehˇ mˇ nya˗eu gʼaˇ duˬ, jawˇ kʼahˬ˗ahˇ˗euˬ yaw huiˬ yaw mahˇ deuˬ nehˬ˗ehˇ siˬ nya taˬ paˬ˗ehˇ gʼeh˗eu meh. Teu miˇ neh Beˬdeˬlaˇ nawˬ˗ahˇ maˬ kʼehˇ taˬ˗euˬ naˇ, mehˇ nmˇ deuˬ˗ahˇ caw ba˗eu gʼaˇ duˬ, pyuˇ hawˇ˗eu myawˬ taꞈ uiˬ˗awˇ sha nehˬ paˬ˗ehˇ maˬ gʼeh˗a. Teu gaˇ jiˇ yawˬ haˇ yawˬ ha taˬ˗iˇ.

Uˬ jeˬ jaˬ lehˇ˗euˬ shaˬ zahˬ pyeuꞈ laˇ ngeh, aˬ dui caw ba mawꞈ˗eu nmˇ ngeuˇ meh. (Heˬbyehˇ 13:16) Aˬ dui mehˇ nmˇ deuˬ˗ahˇ gaˬ˗eu ma. Toˆ˗ehˇ naˇ, aˬ joˆ˗ehˇ caw ba nya˗eu nga? Jahˇ nya˗eu dahˬ beh˗eu jeˬ naˇ, uˬ jeˬ jaˬ lehˇ˗euˬ shaˬ zahˬ˗ahˇ ya daˬ luꞈ˗eu mehˇ nmˇ deuˬ hawˇ˗eu shaˬ zahˬ caw pi˗eu gaˇ mˇ˗eu mehˇ nmˇ deuˬ˗euˬ gʼaˇ duˬ guiˬ lahˬ shaˇ caw nehˬ nya˗awˇ, aˬ yawꞈ maꞈ˗euˬ gʼaˇ duˬ pyuˇ damˬ jiˇ dawˆ nya˗eu meh. Beˬdeˬlaˇ deuˬ pyuˇ damˬ gaˇ dahˇ tsoeˬ˗eu jeˬ˗ahˇ zmˬ nya˗eu gʼaˇ duˬ, Uˆ lahˇ˗eu aˇ muˇ neh biꞈ˗euˬ nui noeˬ nui duˇ˗ahˇ mˇ caw˗eu meh. Aˬ dui caw ba mawꞈ˗eu lehˇ Beˬdeˬlaˇ˗ahˇ bi siˬ mawꞈ naˇ, Nawˬ˗euˬ jawˇ kʼahˬ˗ahˇ Tsoˆ˗eu paw hawˇ˗eu aˇ baˇ mawˇ kawˇ jahˇ doˆ˗eu paw, jaˇ laˇ dawˆ˗eu sahˬ boꞈ (DC-50) boꞈ˗awˇ sha nya˗eu meh.

Ba˗la zi˗u miˇ kʼahˬ˗ahˇ iˇ cuꞈ dahˬ laˇ ngeh lehˇ ehˇ˗eu biˬdiˬoˬ haw gʼaˬ naˇ, naˇ haˬ˗eu jeˬ heu deuˬ˗ahˇ dawˬ kʼoꞈ biꞈ.

2020 kʼoꞈ˗ahˇ Ba˗la zi˗u miˇ kʼahˬ˗ahˇ iˇ cuꞈ dahˬ laˇ ngeh, Yeˬhawˇbaˬ˗euˬ Saˇ kiˇ deuˬ neh caw ba iˇ˗euˬ gaˇ kawˆ nehˬ˗ehˇ taꞈ leˇ˗awˇ, nawˬ˗ahˇ aˬ geu jeˬ˗ahˇ ya leˇ nya?