Aˇ yeˇ huiˬ˗eu tsahˇ˗ahˇ ja sawˇ poˆ

Nawˇ ya dzaw˗euˬ jeˬ˗ahˇ ngehˇ haw maˬ loˇ? Yawˬ gʼaˬ na luꞈ toˆ˗ehˇ pyeuꞈ haw˗euˬ meh. Toˆ˗ehˇ naˇ, aˬ jeˬ caw ba nya˗eu nga? Aˇ yeˇ huiˬ˗eu tsahˇ˗ahˇ ja sawˇ poˆ˗eu heu pyeuꞈ meh.

Pyehˆ tseˇ ngeh, tiˬ kʼehˬ naˬ leˇ˗awˇ aˇ yeˇ huiˬ˗eu tsahˇ˗ahˇ noeˬ taˬ, boꞈ taˬ. Gʼaˬ kʼehˇ Pawˇluˆ aˬ yawꞈ neh boꞈ˗euˬ sahˬ boꞈ laꞈ kʼoeˇ, mehˇ nmˇ deuˬ˗ahˇ heu loꞈ˗ehˇ nui noeˬ nui duˇ biꞈ taˬ˗euˬ meh. Aˬ yawꞈ “aˬ dui ehˇ luꞈ˗eu gaˇ kawˆ heu dawˬ tawˆ luꞈ˗euˬ uˬ dzah˗aˬ” lehˇ ehˇ taˬ˗euˬ meh. (Heˬbyehˇ 8:1) Heu loꞈ˗ehˇ jahˇ˗eu heu naˇ, Pawˇluˆ mehˇ nmˇ deuˬ˗ahˇ shaˇ noeˬ shaˇ sawˇ ni maˬ ehˇ, gaˇ kawˆ deuˬ aˬ joˆ˗ehˇ tsoꞈ tsaꞈ˗eu lehˇ siˬ leˇ ni maˬ ehˇ, caw ba nehˬ˗eu jeˬ pyeuꞈ meh.

Pyehˆ tseˇ˗eu jiˇ leˇ ngeh, naˬ liˬ 10 peu yuˇ doˆ˗awˇ ya dzaw˗euˬ aˇ yeˇ huiˬ˗eu tsahˇ˗ahˇ paˇ ja sawˇ poˆ kʼoꞈ nya meh. Nawˇ maˬ noeˬ taˬ nya naˇ, uˬ dzah zaˬ deuˬ˗ahˇ maˬ ehˇ, aˬ yawꞈ kawˆ yawꞈ˗euˬ dahˬ beh laˇ gaˇ maˬ ehˇ, haw kʼoꞈ˗iˇ nya meh. Nawˇ gaˇ kawˆ yaw shuiꞈ˗ahˇ ya dzaw˗euˬ naˇ, yawˬ ha˗euˬ dawˬ neh ja shaw nehˬ nya ni leh jeh. Aˇ yeˇ huiˬ˗eu tsahˇ˗ahˇ ja sawˇ poˆ˗eu heu naˇ, ya dzaw˗euˬ jeˬ˗ahˇ noeˬ taˬ nya ni maˬ ehˇ, dehꞈ ziˇ laꞈ kʼoeˇ aˬ joˆ˗ehˇ zmˬ˗iˇ nya˗eu nga lehˇ siˬ laˇ ni maˬ ehˇ, caw ba nehˬ˗eu meh.