Yeˬhawˇbaˬ˗euˬ nui gaˬ aˬ dui˗ahˇ gaˇ dahˇ aˬ joˆ˗ehˇ tsoeˬ˗eu nga?

1. Yeˬhawˇbaˬ˗ahˇ laˬ kʼaˬ bi cehˇ leˇ˗eu gʼaˇ duˬ aˬ dui aˬ jeˬ ya jahˇ˗eu nga?

Nawˇ nawˇ gaˬ˗eu tiˬ gʼaˬ˗ahˇ haw muiˬ˗awˇ, maˇ diˇ zmˬ nya˗eu laꞈ sawˬ tiˬ hmˬ biꞈ˗euˬ lehˇ ehˇ˗awˬ. Aˬ yawꞈ laꞈ sawˬ teu˗ahˇ aˇ poeˬ maˬ taˬ baw ni ngehˇ byoˆ˗euˬ naˇ nawˬ˗ahˇ nui ma maˬ muiˬ˗eu yaw duˬ baw meh. Ehˇ kʼawꞈ aˬ yawꞈ laꞈ sawˬ teu˗ahˇ yaw muiˬ˗ehˇ zmˬ˗awˇ aˇ poeˬ taˬ baw ma lehˇ mˇ mawˇ luꞈ naˇ, nawˬ˗ahˇ laˬ kʼaˬ cehˇ˗eu yaw duˬ baw meh. Laꞈ sawˬ pyeuꞈ˗eu ka kʼoꞈ˗eu jeˬ naˇ tawˇ neh? Yeˬhawˇbaˬ aˬ yawꞈ˗euˬ Zaˬmaˇ aˬ dui˗ahˇ bi ka kʼoꞈ le˗euˬ meh. Aˬ dui laꞈ sawˬ heu˗ahˇ hawˇ˗eu aˬ yawꞈ˗euˬ nui gaˬ˗ahˇ aˇ poeˬ taˬ baw naˇ Yeˬhawˇbaˬ laˬ kʼaˬ cehˇ˗eu yaw duˬ baw meh.—Yoˇhaˬ 3:16; Loˇmaˆ 5:7, 8.

2. Aˬ dui heu kawˆ laꞈ kʼoeˇ aˬ jeˬ jeˇ˗euˬ gaˇ kawˆ˗ahˇ ja sawˇ˗eu nga?

² Ehˇ kʼawꞈ myahˇ laˇ ngeh aˬ dui ka kʼoꞈ˗eu jeˬ˗ahˇ yaw beh loꞈ˗ehˇ aˇ poeˬ maˬ paˇ taˬ baw˗eu kʼawꞈ pyeuꞈ nya meh. Teu naˇ aˬ dui dahˬ beh ngeh laꞈ sawˬ teu˗euˬ gʼaˇ duˬ laˬ kʼaˬ cehˇ˗euˬ kʼawꞈ, aˇ nah naˇ guiˬ lahˬ huiˬ˗eu nui ma teˬ le˗awˇ Miˬyehˇ neh biꞈ˗euˬ laꞈ sawˬ teu˗ahˇ jeˬ˗iˬ maˬ ngeuˇ˗eu loꞈ˗ehˇ yuˇ taˬ byoˆ˗euˬ gaˇ duˇ˗eu meh. Teu loꞈ˗ehˇ maˬ bi pyeuꞈ laˇ˗eu gʼaˇ duˬ aˬ dui Yeˬhawˇbaˬ hawˇ˗eu Yeˬsuˇ neh kʼaˇ mˇ nehˬ laꞈ˗euˬ jeˬ˗euˬ gʼaˇ duˬ guiˬ lahˬ huiˬ˗eu nui ma ahˇ laˇ ni tiˬ kʼehˬ maˬ kaˬ ya shaˇ noeˬ ya shaˇ sawˇ˗eu meh. Teu loꞈ˗ehˇ aˬ joˆ˗ehˇ jahˇ nya˗eu nga lehˇ heu kawˆ laꞈ kʼoeˇ ya siˬ meh. Kʼoeˇ naˇ aˬ dui ka kʼoꞈ˗eu jeˬ˗ahˇ neh nymˬ˗mˇ neh maˬ ehˇ, mehˬ hu paw maˬ ehˇ, aˬ jeˬ˗euˬ gaˇ dahˇ tsoeˬ˗eu jeˬ za˗eu nga lehˇ ja sawˇ ma. Kʼoeˇ naˇ aˬ dui Yeˬhawˇbaˬ˗euˬ nui gaˬ˗ahˇ aˇ poeˬ aˬ joˆ˗ehˇ taˬ baw nya˗awˇ, Noeˬ mawˇ˗eu mehˬ bawˬ aˇ yamˬ˗ahˇ ngehˬ˗ehˇ dzehˬ aˬ joˆ˗ehˇ taˬ baw nya˗eu nga lehˇ ja sawˇ ma.

Ka kʼoꞈ˗eu jeˬ nymˬ˗mˇ aˬ joˆ˗ehˇ gaˇ dahˇ tsoeˬ˗eu nga?

3. Ka kʼoꞈ˗eu jeˬ˗ahˇ neh nymˬ˗mˇ gaˇ dahˇ tsoeˬ˗eu jeˬ za luꞈ˗eu tiˬ jeˬ naˇ, aˬ jeˬ nga?

³ Aˬ dui Yeˬsuˇ˗euˬ ka kʼoꞈ˗eu jeˬ˗ahˇ neh nymˬ˗mˇ neh gaˇ dahˇ tsoeˬ˗eu jeˬ za luꞈ˗eu ma. Yaw jeˬ ma jeˬ, ka kʼoꞈ˗eu jeˬ baˬ da neh Yeˬhawˇbaˬ aˬ dui˗ahˇ iˬ baˇ pyehˬ nehˬ laꞈ˗eu meh. Maˇ diˇ naˇ Yeˬhawˇbaˬ aˬ dui˗ahˇ iˬ baˇ maˬ pyehˬ nehˬ˗eu kʼawꞈ za meh. Ehˇ kʼawꞈ aˬ yawꞈ aˬ dui˗ahˇ iˬ baˇ pyehˬ nehˬ mawꞈ˗eu meh. Ja ceuˬ˗eu sahˬ boꞈ boꞈ˗eu tiˬ gʼaˬ guiˬ lahˬ huiˬ˗eu nui ma neh “Nawˇ nga maꞈ kʼoeˇ taˆ muiˬ˗awˇ iˬ baˇ pyehˬ˗eu” meh lehˇ ehˇ˗eu meh.—Ja ceuˬ 86:5; 103:3, 10-13.

4. Yeˬhawˇbaˬ aˬ geu deuˬ˗euˬ gʼaˇ duˬ ka kʼoꞈ˗eu jeˬ lehˬ hmˬ nehˬ˗euˬ nga? (Luˇkaꞈ 5:32; 1 Tiˆmoˇseˬ 1:15)

⁴ Tiˬ gʼaˬ na˗aˬ, Yeˬhawˇbaˬ neh iˬ baˇ pyehˬ nehˬ laꞈ˗eu jeˬ˗ahˇ za˗eu maˬ geuˇ nya lehˇ noeˬ˗eu meh. Maˇ diˇ ya ehˇ naˇ, aˬ dui yawˬ gʼaˬ na luꞈ tiˬ gʼaˬ˗iˬ za˗eu maˬ geuˇ˗a. Gʼaˬ kʼehˇ Pawˇluˆ gaˇ kawˆ heu˗ahˇ yaw muiˬ˗ehˇ gʼoˆ shaw˗awˇ, aˬ yawꞈ “gʼaˬ kʼehˇ lehˇ bi kuˇ˗eu kʼawꞈ maˬ geuˇ nya” lehˇ ehˇ˗eu meh. Toˆ˗ehˇ kʼawꞈ Pawˇluˆ ‘Miˬyehˇ˗euˬ gʼawˬ shaˬ gaˬ˗eu jeˬ baˬ da neh iˬ nah ngaˇ heu loꞈ˗ehˇ ya pyeuꞈ laˇ˗euˬ ma’ lehˇ ehˇ˗eu meh. (1 Gawˇliˬtu 15:9, 10) Aˬ dui iˬ baˇ noeˬ poˆ noeˬ paˇ ngeh Yeˬhawˇbaˬ aˬ dui˗ahˇ iˬ baˇ pyehˬ nehˬ laꞈ˗eu meh. Aˬ jeˬ miˇ neh nga? Teu naˇ aˬ dui iˬ baˇ pyehˬ nehˬ laꞈ˗eu jeˬ˗ahˇ za geuˇ˗eu miˇ neh maˬ ngeuˇ ni Yeˬhawˇbaˬ aˬ dui˗ahˇ gaˬ˗eu miˇ neh meh. Teu miˇ neh nawˬ˗ahˇ Yeˬhawˇbaˬ neh iˬ baˇ pyehˬ nehˬ laꞈ˗eu jeˬ˗ahˇ za˗eu maˬ geuˇ nya lehˇ noeˬ laˇ naˇ, Yeˬhawˇbaˬ ka kʼoꞈ˗eu jeˬ byah kuꞈ˗eu tsawˇ haˬ deuˬ˗euˬ gʼaˇ duˬ maˬ ngeuˇ ni iˬ baˇ noeˬ poˆ noeˬ paˇ˗euˬ deuˬ˗euˬ gʼaˇ duˬ lehˬ hmˬ nehˬ taˬ˗euˬ lehˇ taˬ ngehˇ.—Luˇkaꞈ 5:32; 1 Tiˆmoˇseˬ 1:15-ahˇ gui.

5. Miˬyehˇ neh iˬ baˇ pyehˬ nehˬ laꞈ˗eu jeˬ˗ahˇ za geuˇ ma lehˇ ehˇ nya˗eu gʼaˬ jawˇ meh laˬ?

⁵ Aˬ dui Miˬyehˇ˗euˬ gaˇ˗ahˇ mˇ myahˇ laꞈ˗euˬ miˇ neh Miˬyehˇ aˬ dui˗ahˇ gʼawˬ shaˬ gaˬ˗awˇ iˬ baˇ pyehˬ nehˬ˗eu geuˇ meh lehˇ noeˬ paˬ˗ehˇ maˬ gʼeh˗a. Aˬ dui Miˬyehˇ˗euˬ gaˇ˗ahˇ saˇ jaˇ ziꞈ˗eu laꞈ kʼoeˇ mˇ laꞈ˗euˬ gaˇ Yeˬhawˇbaˬ aˇ poeˬ taˬ baw˗eu meh. (Heˬbyehˇ 6:10) Ehˇ kʼawꞈ Yeˬhawˇbaˬ ka kʼoꞈ˗eu jeˬ lehˬ hmˬ nehˬ˗euˬ heu naˇ, aˬ dui aˬ yawꞈ˗euˬ gaˇ mˇ˗euˬ miˇ neh biꞈ˗euˬ maˬ ngeuˇ˗a. Laꞈ sawˬ lehˇ sawˇ˗awˇ aˬ dui˗ahˇ yawˬ ngehꞈ˗ehˇ biꞈ˗euˬ meh. Teu miˇ neh aˬ dui ngaˇ Miˬyehˇ˗euˬ gaˇ˗ahˇ mˇ myahˇ laꞈ˗euˬ miˇ neh iˬ baˇ pyehˬ nehˬ laꞈ˗eu jeˬ˗ahˇ za geuˇ ma lehˇ noeˬ naˇ, Ka li maˬ loˬ gaˇ kamˇ shiˇ le˗euˬ nga lehˇ ehˇ gaˇ duˇ˗eu meh.—Gaˬlaˬtiˆ 2:21 nehˬ˗ehˇ sheu cehˆ.

6. Pawˇluˆ aˬ jeˬ miˇ neh leh jeh˗awˇ Miˬyehˇ˗euˬ gaˇ mˇ˗eu nga?

⁶ Pawˇluˆ Miˬyehˇ neh iˬ baˇ pyehˬ nehˬ laꞈ˗eu jeˬ˗ahˇ za˗eu gʼaˇ duˬ yawˬ ha jawˇ paw neh mˇ nya˗eu jeˬ tiˬ jeˬ˗iˬ maˬ jaˆ˗eu lehˇ siˬ nya˗eu meh. Toˆ˗ehˇ naˇ Pawˇluˆ Miˬyehˇ˗euˬ gaˇ˗ahˇ leh jeh˗awˇ aˬ jeˬ miˇ neh mˇ˗euˬ nga? Teu naˇ, aˬ yawꞈ Yeˬhawˇbaˬ jawˇ gaˇ neh iˬ baˇ pyehˬ nehˬ laꞈ˗eu jeˬ˗ahˇ za geuˇ ma lehˇ mˇ mawˇ˗eu gʼaˇ duˬ maˬ ngeuˇ ni, Yeˬhawˇbaˬ neh gʼawˬ shaˬ gaˬ nehˬ laꞈ˗euˬ jeˬ˗ahˇ guiˬ lahˬ huiˬ miˇ˗a lehˇ mˇ mawˇ˗eu gʼaˇ duˬ meh. (Eˇpeˇsu 3:7) Pawˇluˆ loꞈ˗ehˇ duˇ ni aˬ dui jiˇ Miˬyehˇ˗euˬ gaˇ˗ahˇ leh jeh˗awˇ mˇ˗eu heu naˇ, iˬ baˇ bi pyehˬ nehˬ mawꞈ˗eu miˇ neh maˬ ngeuˇ ni Yeˬhawˇbaˬ neh gʼawˬ shaˬ gaˬ nehˬ laꞈ˗euˬ jeˬ˗ahˇ guiˬ lahˬ huiˬ˗eu lehˇ mˇ mawˇ˗eu gʼaˇ duˬ ma.

7. Ka kʼoꞈ˗eu jeˬ baˬ da neh nymˬ˗mˇ aˬ dui gaˇ dahˇ tsoeˬ˗eu jeˬ za luꞈ˗eu dzaˇ˗i tiˬ jeˬ naˇ aˬ jeˬ nga? (Loˇmaˆ 5:1; Yaˬkoˆ 2:23)

⁷ Ka kʼoꞈ˗eu jeˬ˗ahˇ neh nymˬ˗mˇ neh gaˇ dahˇ tsoeˬ˗eu jeˬ za˗eu dzaˇ˗i tiˬ jeˬ naˇ, Yeˬhawˇbaˬ nehˬ˗ehˇ gʼoeˇ leˇ nya˗eu heu meh.a Dzeuˇ yaꞈ˗euˬ kawˆ˗ahˇ ya siˬ˗euˬ loꞈ˗ehˇ aˬ dui dehꞈ le ngeh neh Yeˬhawˇbaˬ nehˬ˗ehˇ muiˬ˗eu cawˬ cawˬ˗eu jeˬ jaˆ˗eu maˬ ngeuˇ˗a. Ehˇ kʼawꞈ ka kʼoꞈ˗eu jeˬ baˬ da neh aˬ dui “Miˬyehˇ˗ahˇ tsaˬ leˇ tsahˇ leˇ” nya˗awˇ, Miˬyehˇ nehˬ˗ehˇ gʼoeˇ leˇ nya˗eu meh.—Loˇmaˆ 5:1; Yaˬkoˆ 2:23-ahˇ gui.

8. Aˬ dui Yeˬhawˇbaˬ˗ahˇ guiˬ lahˬ shaˇ keuˆ nya˗eu jeˬ heu˗ahˇ aˬ jeˬ miˇ neh aˇ poeˬ taˬ baw paˬ˗ehˇ gʼeh˗eu nga?

⁸ Yeˬhawˇbaˬ nehˬ˗ehˇ gʼoeˇ˗eu miˇ neh za˗euˬ muiˬ˗eu aˬ kawˬ˗aˬ tiˬ jeˬ naˇ, guiˬ lahˬ shaˇ˗eu heu pyeuꞈ meh. Yeˬhawˇbaˬ aˬ dui mehˇ nmˇ deuˬ nehˬ˗ehˇ tiˬ kawˆ loꞈ˗ehˇ guiˬ lahˬ shaˇ ngeh tehꞈ˗ehˇ naˇ haˬ nehˬ laꞈ˗eu maˬ ngeuˇ˗a. Aˬ dui aˬ yawꞈ gʼaˬ yawꞈ shaˇ ngeh jiˇ naˇ haˬ nehˬ laꞈ˗eu meh. Aˬ dui guiˬ lahˬ shaˇ ngeh kʼahˬ lahˇ˗eu jeˬ teˬ˗iˇ˗awˇ nui ma saˇ laˇ˗eu tehꞈ˗ehˇ maˬ gʼaˬ ni Yeˬhawˇbaˬ nehˬ˗ehˇ jiˇ bi gʼoeˇ dzehˬ leˇ˗eu meh. (Ja ceuˬ 65:2; Yaˬkoˆ 4:8; 1 Yoˇhaˬ 5:14) Yeˬsuˇ miˇ tsaˬ kʼoeˇ taˆ jawˇ ngeh Aˬda Yeˬhawˇbaˬ aˬ yawꞈ˗euˬ shaˇ dawˬ˗ahˇ naˇ haˬ nehˬ laꞈ meh. Guiˬ lahˬ shaˇ˗eu heu naˇ Yeˬhawˇbaˬ nehˬ˗ehˇ bi gʼoeˇ dzehˬ leˇ meh lehˇ siˬ nya˗eu miˇ neh Yeˬsuˇ tiˬ kʼehˬ maˬ kaˬ guiˬ lahˬ shaˇ˗eu meh. (Luˇkaꞈ 5:16) Aˬ dui Yeˬhawˇbaˬ nehˬ˗ehˇ gʼoeˇ leˇ nya˗awˇ, guiˬ lahˬ shaˇ˗awˇ aˬ yawꞈ nehˬ˗ehˇ ngehˬ cawˬ nya˗eu heu˗aˬ, aˇ naˆ ni guiˬ lahˬ huiˬ paˬ˗ehˇ gʼeh˗eu nga? Heu naˇ ka kʼoꞈ˗eu jeˬ baˬ da neh za˗euˬ muiˬ˗eu laꞈ sawˬ pyeuꞈ meh.

Mehˬ hu paw aˬ jeˬ˗euˬ gaˇ dahˇ tsoeˬ˗eu jeˬ za˗eu nga?

9. Yeˬhawˇbaˬ˗euˬ gaˇ mˇ zaˬ deuˬ mehˬ hu paw ka kʼoꞈ˗eu jeˬ˗ahˇ neh aˬ jeˬ˗euˬ gaˇ dahˇ tsoeˬ˗eu jeˬ za˗eu nga?

⁹ Yeˬhawˇbaˬ˗euˬ saˇ jaˇ ziꞈ˗eu gaˇ mˇ zaˬ deuˬ mehˬ hu paw ka kʼoꞈ˗eu jeˬ˗ahˇ neh aˬ jeˬ˗euˬ gaˇ dahˇ tsoeˬ˗eu jeˬ za˗eu nga? Aˬ yawꞈ maꞈ mˬ maˬ maˬ byaˆ zaˇ ziˇ dehꞈ˗eu jeˬ za˗eu meh. Ehˇ kʼawꞈ gʼawˬ mya gʼaˬ gaˇ kawˆ heu naˇ, maˬ pyeuꞈ leˇ nya˗a lehˇ noeˬ˗eu meh. Aˬ jeˬ miˇ neh ehˇ naˇ, tsawˇ haˬ yawˬ gʼaˬ na luꞈ dehꞈ le˗awˇ ya shiˇ˗eu miˇ neh. Toˆ˗ehˇ kʼawꞈ Yeˬhawˇbaˬ tsawˇ haˬ zaˬ˗ahˇ mˬ maˬ maˬ byaˆ zaˇ ziˇ bi dehꞈ mawꞈ˗eu heu naˇ, aˬ yawꞈ neh yaw beh neh noeˬ taˬ˗euˬ jeˬ pyeuꞈ meh. Aˬdaˬ iˬ baˇ maˬ mˇ˗euˬ law nmˇ˗aˬ, mˬ maˬ maˬ byaˆ zaˇ ziˇ dehꞈ˗eu jeˬ heu naˇ maˬ pyeuꞈ leˇ nya˗a lehˇ tiˬ gʼaˬ˗iˬ maˬ noeˬ˗a. Nymˬ˗mˇ mehˬ kʼehˬ˗ahˇ mˬ maˬ maˬ byaˆ zaˇ ziˇ dehꞈ˗eu jeˬ lehˇ ehˇ˗eu heu naˇ, aˇ dzehˬ˗ehˇ muiˬ dzeuˇ˗eu miˇ neh pyeuꞈ leˇ nya gaˇ maˬ duˇ kʼawꞈ aˬ dui gaˇ kawˆ teu˗ahˇ jah ziꞈ nya meh. Aˬ jeˬ miˇ neh ehˇ naˇ, Yeˬhawˇbaˬ aˬ dui˗ahˇ ka kʼoꞈ˗eu gʼaˇ duˬ aˇ poeˬ kʼaˆ dui dui˗eu aˬ yawꞈ˗euˬ Zaˬmaˇ˗euˬ ziˇ neh biꞈ˗euˬ miˇ neh meh.—Loˇmaˆ 8:32.

10. Tseˇ doˆ taˬ˗euˬ Ka li zaˬ deuˬ hawˇ˗eu yawˇ nui deuˬ aˬ jeˬ˗ahˇ noeˬ tmˬ luꞈ˗eu nga?

¹⁰ Mˬ maˬ maˬ byaˆ zaˇ ziˇ dehꞈ˗eu jeˬ heu naˇ, mehˬ pu paw pyeuꞈ laˇ˗eu guiˬ lahˬ pyeuꞈ kʼawꞈ, Yeˬhawˇbaˬ aˬ dui˗ahˇ nymˬ˗mˇ neh noeˬ tmˬ˗eu jeˬ teu˗ahˇ bi noeˬ mawˇ mawꞈ˗eu meh. Tseˇ doˆ taˬ˗euˬ Ka li zaˬ deuˬ naˇ, Ka li nehˬ˗ehˇ mˬ kʼoeˇ taˆ ya uˆ lahˇ leˇ gaˇ noeˬ tmˬ luꞈ˗eu meh. (Pah mehˬ˗eu 20:6) Yawˇ nui deuˬ naˇ, naˇ˗eu gawˇ˗eu jeˬ hawˇ˗eu nui ma cawˆ˗eu jeˬ maˬ paˇ jaˆ˗eu miˇ shuiꞈ˗ahˇ ya dehꞈ gaˇ noeˬ tmˬ luꞈ˗eu meh. (Pah mehˬ˗eu 21:3, 4) Nawˇ miˇ tsaˬ kʼoeˇ taˆ mˬ maˬ maˬ byaˆ zaˇ ziˇ dehꞈ gʼeh˗eu noeˬ tmˬ˗eu jeˬ jaˆ˗eu yawˇ nui deuˬ laꞈ kʼoeˇ neh tiˬ gʼaˬ pyeuꞈ de loˇ? Heu naˇ mˬ taˆ gʼoꞈ dehꞈ leˇ˗eu deuˬ taꞈ˗ehˇ teˬ˗eu laꞈ sawˬ maˬ ngeuˇ˗a. Maˇ diˇ naˇ Yeˬhawˇbaˬ tsawˇ haˬ zaˬ˗ahˇ beh ngeh neh miˇ tsaˬ kʼoeˇ taˆ bi jawˇ˗eu lehˇ beh˗euˬ meh. Teu miˇ neh miˇ tsaˬ kʼoeˇ taˆ mˬ maˬ maˬ byaˆ zaˇ ziˇ dehꞈ˗eu heu naˇ, aˬ dui˗ahˇ laˬ kʼaˬ bi cehˇ dzehˬ laˇ˗eu yaw duˬ baw meh.

11-12. Aˬ dui miˇ shuiꞈ˗ahˇ aˬ jeˬ jeˇ˗euˬ guiˬ lahˬ za˗eu nga? (Aˇ baˇ˗ahˇ jiˇ haw.)

¹¹ Nawˇ miˇ shuiꞈ˗ahˇ jawˇ luꞈ˗eu lehˇ shaˇ noeˬ haw sheˇ. Nawˇ naˇ˗eu gawˇ˗eu jeˬ hawˇ˗eu shiˇ˗eu jeˬ baˬ da neh kʼahˬ lahˇ˗eu maˬ paˇ loˬ meh. (Iˇsaˬyaˇ 25:8; 33:24) Yeˬhawˇbaˬ nawˬ˗euˬ nui kʼahˇ tiˬ shiˇ mˇ byeh nehˬ˗eu meh. Miˇ shuiꞈ˗ahˇ nawˬ˗ahˇ aˬ jeˬ˗euˬ gaˇ kawˆ dzaw mawꞈ nya? Jeˬ zaˬ˗euˬ gaˇ kawˆ laˬ? Deuˇ˗mˬ diˬ˗eu gaˇ kawˆ laˬ? Aˇ baˇ boꞈ˗eu gaˇ kawˆ laˬ? Miˇ shuiꞈ˗ahˇ tsoˆ˗eu paw maˬ ehˇ, ka dzaˬ ka dawˇ˗eu paw maˬ ehˇ, mˇ nya˗eu deuˬ loˬ˗eu yaw duˬ baw meh. Kʼoeˇ naˇ dzaˬ˗eu dawˇ˗eu lehˬ hmˬ˗eu deuˬ, tsoˆ˗eu gaˇ maˬ ehˇ, yaˇ kmˇ mˇ gaˇ maˬ ehˇ, zmˬ˗eu keu ka deuˬ jahˇ doˆ˗eu deuˬ hawˇ˗eu yaˇ kmˇ laˆ saˆ nya˗eu deuˬ loˬ˗eu yaw duˬ baw meh. (Iˇsaˬyaˇ 35:1; 65:21) Nawˇ mˬ maˬ maˬ byaˆ zaˇ ziˇ ya dehꞈ˗eu miˇ neh nawˬ neh kʼaˇ shaˇ noeˬ taˬ˗euˬ jeˬ teu˗ahˇ dzaw˗eu aˇ yamˬ gʼawˬ mya ni jaˆ˗eu meh.

¹² Kʼoeˇ naˇ gʼoꞈ dehꞈ laˇ˗eu deuˬ˗ahˇ ya ha˗eu heu aˇ naˆ ni laˬ kʼaˬ cehˇ laˇ paˬ˗ehˇ gʼeh˗eu nga? (Gʼaˬkʼehˇ 24:15) Kʼoeˇ naˇ Miˬyehˇ neh beh taˬ˗euˬ laꞈ zaˇ gʼawˬ mya jeˬ˗ahˇ poˆ tseˇ naˇ, Yeˬhawˇbaˬ˗ahˇ siˬ nya dzehˬ laˇ˗eu meh. (Ja ceuˬ 104:24; Iˇsaˬyaˇ 11:9) Kʼaˇ muiˬ˗eu jeˬ naˇ, aˬ dui tiˬ jeˬ˗iˬ iˬ baˇ maˬ paˇ ahˇ ni Yeˬhawˇbaˬ˗ahˇ uˬ duˬ tahˬ nya˗eu meh. Nawˇ muiˬ dui dui˗eu guiˬ lahˬ heu deuˬ˗ahˇ “iˬ baˇ˗ahˇ tiˬ kʼehˇ laˇ kʼehˬ byawˬ gʼa muˆ gʼa˗eu” jeˬ nehˬ˗ehˇ paˇ ma laˬ? (Heˬbyehˇ 11:25) Maˬ paˇ˗eu yaw duˬ baw meh. Nymˬ˗mˇ aˬ dui aˬ jeˬ ya byehˇ dzeh˗euˬ kʼawꞈ, aˬ dui neh byehˇ˗euˬ jeˬ naˆ maˬ tseˇ mehˬ hu paw za˗eu guiˬ lahˬ deuˬ dzehˬ meh. Miˇ shuiꞈ˗ahˇ ya dehꞈ˗eu gaˇ kawˆ heu naˇ, maˬ pyeuꞈ laˇ gaˇ noeˬ tmˬ noeˬ tmˬ˗ehˇ jawˇ˗eu jeˬ tehꞈ maˬ ngeuˇ˗a. Maˇ diˇ pyeuꞈ laˇ˗eu jeˬ pyeuꞈ meh. Yeˬhawˇbaˬ aˬ yawꞈ˗euˬ Zaˬmaˇ bi kamˇ shiˇ le gaˇ keuˆ ni aˬ dui˗ahˇ maˬ gaˬ law nmˇ˗aˬ, aˬ dui guiˬ lahˬ heu tiˬ hmˬ˗iˬ maˬ za nya˗a.

Yeˬhawˇbaˬ˗euˬ nui gaˬ˗ahˇ guiˬ lahˬ kʼoꞈ

13. Yeˬhawˇbaˬ˗euˬ nui gaˬ˗ahˇ guiˬ lahˬ aˬ joˆ˗ehˇ kʼoꞈ nya˗eu nga? (2 Gawˇliˬtu 6:1)

¹³ Ka kʼoꞈ˗eu jeˬ biꞈ nehˬ laꞈ˗euˬ Yeˬhawˇbaˬ˗ahˇ guiˬ lahˬ huiˬ˗eu lehˇ aˬ joˆ˗ehˇ mˇ mawˇ nya˗eu nga? Miˬyehˇ˗euˬ gaˇ˗ahˇ dehꞈ ziˇ laꞈ kʼoeˇ jeˬ hu taˬ˗eu heu neh mˇ mawˇ nya˗eu meh. (Maꞈtehˬ 6:33) “Dehꞈ luꞈ˗eu tsawˇ haˬ deuˬ kʼawꞈ yawˬ ha gʼaˇ duˬ dehꞈ luꞈ˗eu jeˬ maˬ bi pyeuꞈ˗ehˇ, aˬ yawꞈ maꞈ gʼaˇ duˬ shiˇ dah˗awˇ paˇ bi gʼoꞈ dehꞈ laˇ˗euˬ gʼaˬ˗euˬ gʼaˇ duˬ tehꞈ˗ehˇ dehꞈ luꞈ˗eu jeˬ bi pyeuꞈ ni” Yeˬsuˇ shiˇ dah˗euˬ meh. (2 Gawˇliˬtu 5:15) Yeˬhawˇbaˬ neh gʼawˬ shaˬ gaˬ nehˬ laꞈ˗euˬ jeˬ˗ahˇ yawˬ ngehꞈ˗ehˇ maˬ bi pyeuꞈ ni kʼaˇ gʼeh nya gaˇ neh aˬ yawꞈ˗euˬ gaˇ mˇ˗eu heu neh guiˬ lahˬ huiˬ ma lehˇ mˇ kʼoꞈ nehˬ mawꞈ˗eu ma.—2 Gawˇliˬtu 6:1-ahˇ gui.

14. Yeˬhawˇbaˬ neh sheuˬ hehˇ nehˬ laꞈ˗euˬ jeˬ˗ahˇ jah ziꞈ˗eu laꞈ kʼoeˇ aˬ joˆ˗ehˇ mˇ caw nya˗eu nga?

¹⁴ Aˬ dui Yeˬhawˇbaˬ neh sheuˬ hehˇ nehˬ laꞈ˗euˬ jeˬ˗ahˇ jah ziꞈ˗awˇ mˇ caw˗eu heu neh jiˇ guiˬ lahˬ kʼoꞈ nehˬ nya˗eu meh. Yaw jeˬ ma jeˬ, sahˬ boꞈ aˇ naˆ ni dzaw goˇ˗eu, aˬ jeˬ˗euˬ gaˇ mˇ˗eu lehˇ noeˬ tsehˆ˗eu lehˇ ehˇ˗awˬ. Teu ngeh Yeˬhawˇbaˬ aˬ dui˗ahˇ aˬ jeˬ bi jahˇ mawꞈ˗eu nga lehˇ jeˬ hu ya shaˇ noeˬ˗eu meh. (1 Gawˇliˬtu 10:31; 2 Gawˇliˬtu 5:7) Aˬ dui Yeˬhawˇbaˬ neh sheuˬ hehˇ nehˬ˗euˬ loꞈ˗ehˇ noeˬ tsehˆ ngeh, aˬ dui˗euˬ nui jah ziꞈ dzehˬ laˇ˗awˇ, Yeˬhawˇbaˬ nehˬ˗ehˇ gʼoeˇ dzehˬ leˇ˗eu uˬ taꞈ, mˬ maˬ maˬ byaˆ zaˇ ziˇ dehꞈ gʼeh˗eu noeˬ tmˬ˗eu jeˬ jiˇ ziꞈ dzehˬ laˇ˗eu meh.—Loˇmaˆ 5:3-5; Yaˬkoˆ 2:21, 22.

15. Noeˬ mawˇ˗eu mehˬ bawˬ aˇ yamˬ˗ahˇ Yeˬhawˇbaˬ˗euˬ nui gaˬ˗ahˇ guiˬ lahˬ aˬ joˆ˗ehˇ kʼoꞈ nya˗eu nga?

¹⁵ Yeˬhawˇbaˬ˗euˬ nui gaˬ˗ahˇ guiˬ lahˬ kʼoꞈ nya˗eu dzaˇ˗i tiˬ kawˆ paˇ jaˆ˗a siˬ. Teu naˇ ka kʼoꞈ˗eu jeˬ˗euˬ gʼaˇ duˬ guiˬ lahˬ huiˬ miˇ˗a lehˇ Noeˬ mawˇ˗eu mehˬ bawˬ aˇ yamˬ laꞈ kʼoeˇ kʼaˇ mˇ nya˗eu jeˬ mˇ˗eu heu neh meh. Noeˬ mawˇ˗eu mehˬ bawˬ˗ahˇ yawˬ ha iˇ˗eu tehꞈ˗ehˇ maˬ gʼaˬ ni, aˬ cawˬ deuˬ jiˇ mehˬ bawˬ heu˗ahˇ laˇ ni kuˇ˗eu ma. (1 Tiˆmoˇseˬ 2:4) Nawˇ aˬ yawꞈ maꞈ˗ahˇ Noeˬ mawˇ˗eu mehˬ bawˬ˗ahˇ laˇ lehˇ kuˇ ngeh, mehˬ bawˬ heu laꞈ kʼoeˇ aˬ jeˬ jeˇ jahˇ˗eu nga lehˇ ja sawˇ nehˬ nya˗eu meh. Nawˇ aˬ yawꞈ maꞈ˗ahˇ jw.org gʼoeˇsaiˇ laꞈ kʼoeˇ˗euˬ Yeˬsuˇ aˬ jeˬ miˇ neh ya shiˇ˗euˬ nga? hawˇ˗eu Yeˬsuˇ shiˇ˗euˬ gaˇ noeˬ mawˇ˗eu lehˇ ehˇ˗eu biˬdiˬoˬ bi haw nya meh. Tsaꞈ gaˬ˗eu gaˇ naˬ leˇ taˬ˗euˬ deuˬ˗ahˇ aˇ muˇ˗ahˇ sheuˬ gʼeh˗eu deuˬ maˬ ngehˇ ni kuˇ paˬ˗ehˇ gʼeh˗eu meh. Byoˆ˗iˇ taˬ˗euˬ yawˇ deuˬ Yeˬhawˇbaˬ jawˇ gaˇ gʼoꞈ kʼoꞈ laˇ ngeh mˬ taˆ maˬ ehˇ, miˇ tsaˬ kʼoeˇ taˆ maˬ ehˇ, aˇ naˆ ni laˬ kʼaˬ cehˇ paˬ nga lehˇ shaˇ noeˬ haw sheˇ. (Luˇkaꞈ 15:4-7) Noeˬ mawˇ˗eu mehˬ bawˬ˗ahˇ iˇ ngeh aˬ dui yawˬ ha˗euˬ mehˇ nmˇ deuˬ˗ahˇ tehꞈ˗ehˇ dawˬ cawˬ puˬ˗eu maˬ ngeuˇ ni laˇ˗euˬ yaw shuiꞈ deuˬ hawˇ˗eu mehˬ bawˬ˗ahˇ maˬ laˇ˗eu myahˇ laˇ˗euˬ deuˬ˗ahˇ jiˇ dawˬ cawˬ ya puˬ˗eu meh. Aˬ dui aˬ yawꞈ maꞈ˗ahˇ yaw muiˬ˗ehˇ ha nehˬ laꞈ ngaˇ lehˇ bi noeˬ leˇ mawꞈ˗eu ma.—Loˇmaˆ 12:13.

16. Noeˬ mawˇ˗eu mehˬ bawˬ aˇ yamˬ laꞈ kʼoeˇ Miˬyehˇ˗euˬ gaˇ˗ahˇ aˬ myah mayh naˆ maˬ tseˇ aˬ jeˬ miˇ neh mˇ dzehˬ paˬ˗ehˇ gʼeh˗eu nga?

¹⁶ Nawˇ Noeˬ mawˇ˗eu mehˬ bawˬ aˇ yamˬ˗ahˇ Miˬyehˇ˗euˬ gaˇ˗ahˇ aˬ myah myah naˆ maˬ tseˇ mˇ nya maˇ laˬ? Heu naˇ Miˬyehˇ hawˇ˗eu Ka li neh nawˬ˗euˬ gʼaˇ duˬ mˇ nehˬ˗euˬ jeˬ˗ahˇ guiˬ lahˬ kʼoꞈ˗eu lehˇ mˇ mawˇ˗eu muiˬ dui dui˗eu tiˬ jeˬ pyeuꞈ meh. Aˬ dui Miˬyehˇ˗euˬ gaˇ˗ahˇ ngehˬ˗ehˇ kʼaˆ gʼa naˇ ngehˬ˗ehˇ aˬ yawꞈ neh caw ba nehˬ laꞈ˗euˬ jeˬ˗ahˇ ya mawˇ dzehˬ laˇ˗awˇ, heu naˇ aˬ dui˗ahˇ Miˬyehˇ˗ahˇ bi jah ziꞈ dzehˬ laˇ˗awˇ nui ma bi taˬ dzehˬ laˇ˗eu meh. (1 Gawˇliˬtu 3:9) Kʼoeˇ naˇ nawˇ Yawˬ nah na luꞈ Jaˇliꞈ˗ahˇ pyehˆ tseˇ˗eu lehˇ ehˇ˗eu paˇ dmˬ laꞈ kʼoeˇ hawˇ˗eu jawˇ nah yaw kaˬ mehˬ bawˬ˗ahˇ˗euˬ sahˬ boꞈ aˇ taꞈ laꞈ kʼoeˇ ahˇ˗eu Noeˬ mawˇ˗eu mehˬ bawˬ˗euˬ gʼaˬ duˬ bi gui taˬ˗euˬ Jaˇ liꞈ aˇ deuˆ deuˬ˗ahˇ gui miˇ nya ni leh jeh˗awˬ. Kʼoeˇ naˇ Jaˇliꞈ aˇ deuˆ teu deuˬ˗ahˇ yawˬ haˇ yawˬ ha Jaˇliꞈ pyehˆ tseˇ˗eu jeˬ jahˇ ngeh pyehˆ tseˇ nya˗eu meh.

17. Yeˬhawˇbaˬ˗ahˇ nui kʼahˇ bi shiˇ˗eu jeˬ naˇ, aˬ jeˬ nga? (“Yeˬhawˇbaˬ˗euˬ nui gaˬ˗ahˇ guiˬ lahˬ kʼoꞈ nya˗eu jeˬ” lehˇ ehˇ˗eu oeˬ coeˇ oeˬ bawˬ˗ahˇ jiˇ haw.)

¹⁷ Nymˬ˗mˇ nawˇ heu kawˆ laꞈ kʼoeˇ kʼaˇ ehˇ taˬ˗euˬ nui noeˬ nui duˇ˗ahˇ maˬ mˇ caw jiˇ nya˗eu kʼawꞈ pyeuꞈ nya meh. Ehˇ kʼawꞈ nawˇ mˇ nya˗eu jeˬ hawˇ˗eu aˬ cawˬ mˇ nya˗eu jeˬ˗ahˇ Yeˬhawˇbaˬ maˬ sheu cehˆ˗a lehˇ taˬ ngehˇ. Yeˬhawˇbaˬ nawˇ aˬ yawꞈ˗ahˇ gaˬ˗eu lehˇ aˬ yawꞈ siˬ nya˗eu meh. Nawˇ aˇ poeˬ baw dui dui˗eu laꞈ sawˬ pyeuꞈ˗eu ka kʼoꞈ˗eu jeˬ˗euˬ gʼaˇ duˬ guiˬ lahˬ huiˬ miˇ˗a lehˇ mˇ mawˇ gaˇ ya mawˇ ngeh Yeˬhawˇbaˬ nui kʼahˇ shiˇ˗eu meh.—1 Saˬmeuˬlaˆ 16:7; Maˬkuˆ 12:41-44.

18. Aˬ dui Yeˬhawˇbaˬ hawˇ˗eu Yeˬsuˇ˗ahˇ aˬ jeˬ miˇ neh guiˬ lahˬ ya huiˬ˗eu nga?

¹⁸ Ka kʼoꞈ˗eu jeˬ baˬ da neh tehꞈ˗ehˇ aˬ dui iˬ baˇ pyehˬ nehˬ laꞈ˗eu jeˬ˗ahˇ za nya˗eu uˬ taꞈ, Yeˬhawˇbaˬ nehˬ˗ehˇ gʼoeˇ leˇ nya˗awˇ, mˬ maˬ maˬ byaˆ zaˇ ziˇ dehꞈ gʼeh˗eu noeˬ tmˬ˗eu jeˬ jiˇ za nya˗eu meh. Heu naˇ Yeˬhawˇbaˬ aˬ dui˗ahˇ gaˬ˗eu miˇ neh za˗euˬ guiˬ lahˬ deuˬ pyeuꞈ meh. Teu miˇ neh Yeˬhawˇbaˬ˗euˬ nui gaˬ˗euˬ gʼaˇ duˬ guiˬ lahˬ huiˬ miˇ˗a lehˇ aˬ myah luꞈ mˇ mawˇ gʼeh kaˇ˗euˇ. (1 Yoˇhaˬ 4:19) Dehꞈ ziˇ biꞈ nehˬ laꞈ gaˇ keuˆ ni aˬ dui˗ahˇ gaˬ dui dui˗eu Yeˬsuˇ˗ahˇ jiˇ guiˬ lahˬ huiˬ miˇ˗a lehˇ mˇ mawˇ kaˇ˗euˇ.—Yoˇhaˬ 15:13.