Dzaw˗eu gaˇ kawˆ 14
Dawˬ caˇ 8 Yeˬhawˇbaˬ aˬ dui˗euˬ cehˆ zaꞈ duˬ pyeuꞈ
Miˬyehˇ aˬ geu gʼaˬ˗ahˇ uˬ duˬ tahˬ de lehˇ noeˬ tsehˆ˗awˬ
“Ngaˇ hawˇ˗eu ngaˬ˗eu miˬ sawˇ zaˬ deuˬ law nmˇ˗aˬ, Sahˬpaˬ Miˬyehˇ˗ahˇ uˬ duˬ tahˬ ma.”—Yawˇshuˆ 24:15.
Yaw muiˬ˗ehˇ ya haw˗eu tsahˇ
Heu kawˆ naˇ aˬ dui Yeˬhawˇbaˬ˗ahˇ uˬ duˬ tahˬ˗eu lehˇ aˬ jeˬ miˇ neh tseˇ˗euˬ gaˇ kawˆ˗ahˇ bi noeˬ mawˇ kʼoꞈ laꞈ˗eu meh.
1. Maˇ diˇ laˬ kʼaˬ cehˇ nya˗eu gʼaˇ duˬ aˬ jeˬ ya jahˇ˗eu nga? Aˬ jeˬ miˇ neh? (Iˇsaˬyaˇ 48:17, 18)
Mˬ taˆ Aˬda Yeˬhawˇbaˬ aˬ dui˗ahˇ gaˬ dui dui˗eu meh. Aˬ yawꞈ aˬ dui˗ahˇ nymˬ˗mˇ neh maˬ ehˇ, mehˬ hu paw maˬ ehˇ, laˬ kʼaˬ cehˇ˗eu dehꞈ ziˇ bi za mawꞈ˗eu meh. (Dawˬtsoˆ 3:12, 13) Aˬ yawꞈ aˬ dui˗ahˇ gʼawˬ mya jeˬ zahˬ leˇ paˬ˗ehˇ jahˇ nya ni beh nehˬ taˬ˗euˬ kʼawꞈ, yawˬ haˇ yawˬ ha uˆ lahˇ˗eu hawˇ˗eu aˬ jeˬ tsaˬ˗eu hawˇ˗eu maˬ tsaˬ˗eu lehˇ zahˇ jahˇ doˆ˗eu aˬ kawˬ˗aˬ maˬ biꞈ nehˬ taˬ˗aˬ. (Dawˬtsoˆ 8:9; Yeˬlaˬmiˇ 10:23) Yeˬhawˇbaˬ tsawˇ haˬ deuˬ maˇ diˇ laˬ kʼaˬ cehˇ nya˗eu gʼaˇ duˬ, aˬ yawꞈ˗ahˇ uˬ duˬ ya tahˬ˗awˇ aˬ yawꞈ˗euˬ tsaˬ˗eu dawˇ˗eu zahˇ˗ahˇ ya dehꞈ caw meh lehˇ siˬ nya˗eu meh.—Iˇsaˬyaˇ 48:17, 18-ahˇ gui.
2. Saˬdaˬ aˬ dui˗ahˇ aˬ jeˬ˗ahˇ bi jah mawꞈ˗eu nga? Saˬdaˬ˗euˬ dawˬ maˬ tsaˬ˗a lehˇ bi mawˇ˗eu gʼaˇ duˬ Yeˬhawˇbaˬ aˬ jeˬ jahˇ˗euˬ nga?
2 Saˬdaˬ aˬ dui˗ahˇ Yeˬhawˇbaˬ maˬ jawˇ kʼawꞈ laˬ kʼaˬ cehˇ nya meh. Yawˬ haˇ yawˬ ha uˆ lahˇ nya meh lehˇ bi noeˬ mawꞈ˗eu meh. (Aˇdahˬbeh˗eu 3:4, 5) Yeˬhawˇbaˬ Saˬdaˬ neh ehˇ˗euˬ teu maˬ tsaˬ˗eu lehˇ bi siˬ˗eu gʼaˇ duˬ, aˬ yawꞈ tsawˇ haˬ deuˬ˗ahˇ yawˬ haˇ yawˬ ha uˆ lahˇ˗eu aˬ kawˬ˗aˬ, aˇ yamˬ tiˬ yamˬ˗ahˇ keuˆ ni biꞈ nehˬ˗euˬ meh. Tsawˇ haˬ deuˬ yawˬ haˇ yawˬ ha uˆ lahˇ˗eu miˇ neh, shaˬ zahˬ aˇ naˆ ni keuˆ le taˬ˗euˬ lehˇ maˇ jawˆ ni mawˇ laˇ˗eu meh. Ehˇ kʼawꞈ Jaˇliꞈ laꞈ kʼoeˇ Yeˬhawˇbaˬ˗ahˇ uˬ duˬ tahˬ˗eu miˇ neh laˬ kʼaˬ cehˇ˗awˇ nui saˇ oꞈ˗eu gʼawˬ mya gʼaˬ˗euˬ gaˇ kawˆ ahˇ˗eu meh. Teu deuˬ laꞈ kʼoeˇ neh tiˬ gʼaˬ naˇ, Yeˬsuˇ Ka li meh. Yeˬsuˇ Yeˬhawˇbaˬ˗ahˇ uˬ duˬ tahˬ˗eu lehˇ aˬ jeˬ miˇ neh tseˇ˗euˬ nga? Yeˬhawˇbaˬ aˬ jeˬ miˇ neh aˬ dui neh uˬ duˬ tahˬ˗eu jeˬ˗ahˇ za geuˇ˗eu nga? Heu kawˆ laꞈ kʼoeˇ aˬ dui Yeˬhawˇbaˬ˗ahˇ uˬ duˬ tahˬ˗eu lehˇ aˬ jeˬ baˬ da neh tseˇ˗euˬ gaˇ kawˆ tiˬ kawˆ na˗ahˇ ja sawˇ ma.
Yeˬsuˇ Yeˬhawˇbaˬ˗ahˇ uˬ duˬ tahˬ˗eu lehˇ aˬ jeˬ miˇ neh tseˇ˗euˬ nga?
3. Saˬdaˬ Yeˬsuˇ˗ahˇ aˬ jeˬ ehˇ laˇ˗euˬ nga? Yeˬsuˇ aˬ jeˬ jahˇ˗eu lehˇ tseˇ˗euˬ nga?
3 Yeˬsuˇ miˇ tsaˬ kʼoeˇ taˆ jawˇ ngeh, aˬ suˇ gʼaˬ˗ahˇ uˬ duˬ tahˬ˗eu lehˇ ya tseˇ˗eu meh. Yeˬsuˇ iˇ cuꞈ shawˇ gʼaˬ˗euˬ tiˬ kʼehˬ naˇ, Saˬdaˬ laˇ˗awˇ ngaˬ˗ahˇ uˬ duˬ tiˬ poˆ tehꞈ˗ehˇ ga tahˬ˗euˬ kʼawꞈ miˇ tsaˬ kʼoeˇ taˆ miˇ kʼahˬ heu dawˬ tawˆ luꞈ biꞈ ma lehˇ ehˇ nehˬ˗euˬ meh. Teu ngeh Yeˬsuˇ “Saˬdaˬ˗oˇ, doˆ˗iˇ˗awˬ. ‘Nawˬ˗euˬ Miˬyehˇ pyeuꞈ˗eu Sahˬpaˬ Miˬyehˇ˗ahˇ tehꞈ˗ehˇ nawˇ uˬ duˬ ya tahˬ˗awˇ, aˬ yawꞈ˗euˬ nui kʼahˇ tehꞈ˗ehˇ ya mˇ meh’ lehˇ, Jaˇliꞈ laꞈ kʼoeˇ boꞈ taˬ˗euˬ meh” lehˇ ehˇ nehˬ˗euˬ meh. (Maꞈtehˬ 4:8-10) Yeˬsuˇ Yeˬhawˇbaˬ˗ahˇ uˬ duˬ tahˬ˗eu lehˇ aˬ jeˬ miˇ neh tseˇ˗euˬ nga? Aˬ jeˬ miˇ neh tseˇ˗euˬ gaˇ kawˆ tiˬ kawˆ na˗ahˇ haw kaˇ˗euˇ.
4-5. Yeˬsuˇ Yeˬhawˇbaˬ˗ahˇ aˬ jeˬ miˇ neh uˬ duˬ tahˬ˗eu nga?
4 Yeˬsuˇ Yeˬhawˇbaˬ˗ahˇ aˬ jeˬ miˇ neh uˬ duˬ tahˬ˗euˬ nga? Teu naˇ, aˬ yawꞈ Yeˬhawˇbaˬ˗ahˇ gaˬ dui dui˗eu miˇ neh meh. (Yoˇhaˬ 14:31) Kʼoeˇ uˬ taꞈ, Yeˬhawˇbaˬ˗ahˇ uˬ duˬ tahˬ˗eu heu naˇ tsaˬ˗eu jeˬ pyeuꞈ˗awˇ mˇ paˬ˗ehˇ gʼeh˗eu jeˬ pyeuꞈ˗eu miˇ neh meh. (Yoˇhaˬ 8:28, 29; Pah mehˬ˗eu 4:11) Yeˬhawˇbaˬ naˇ dehꞈ˗eu jeˬ˗euˬ dawˬ pehˬ dawˬ puˇ pyeuꞈ˗awˇ, yawˬ jeˬ na luꞈ biꞈ laꞈ˗euˬ gʼaˬ pyeuꞈ˗eu uˬ taꞈ, nui ma taˬ nya˗eu miˇ neh meh. (Ja ceuˬ 33:4; 36:9; Yaˬkoˆ 1:17) Yeˬhawˇbaˬ Yeˬsuˇ˗ahˇ aˬ myah luꞈ yaw tsaˬ yaw dawˇ jeˬ tehꞈ˗ehˇ ngehˬ nehˬ tmˇ nehˬ˗awˇ, aˬ yawꞈ laꞈ kʼoeˇ kʼaˇ jaˆ˗eu yawˬ jeˬ na luꞈ Yeˬsuˇ˗ahˇ a nehˬ taˬ˗euˬ meh. (Yoˇhaˬ 1:14) Saˬdaˬ naˇ shiˇ˗eu jeˬ bi pyeuꞈ doˆ laˇ˗awˇ, jaˬ myawꞈ mehˇ shuiˇ shuiˇ˗eu, nui kʼahˇ huiˬ˗eu, nui ma huiˬ˗eu gʼaˬ pyeuꞈ meh. (Yoˇhaˬ 8:44) Yeˬsuˇ Yeˬhawˇbaˬ hawˇ˗eu Saˬdaˬ aˇ naˆ ni beu gaˇ˗eu lehˇ siˬ nya˗eu miˇ neh, Saˬdaˬ loꞈ˗ehˇ Yeˬhawˇbaˬ˗ahˇ puiˬ˗eu lehˇ tiˬ jawˇ˗iˬ maˬ shaˇ noeˬ haw˗aˬ.—Piˇliˇpiˆ 2:5-8.
5 Yeˬsuˇ Yeˬhawˇbaˬ˗ahˇ aˬ jeˬ miˇ neh uˬ duˬ tahˬ˗eu dzaˇ˗i tiˬ kawˆ naˇ, aˬ yawꞈ saˇ jaˇ ziꞈ naˇ aˬ jeˬ jeˇ muiˬ˗eu lehˇ siˬ nya˗eu miˇ neh meh. (Heˬbyehˇ 12:2) Yeˬsuˇ saˇ jaˇ ziꞈ naˇ, Yeˬhawˇbaˬ˗euˬ tsawˇ myahˇ laˆ muiˬ laˆ shawˇ nya˗awˇ, nehꞈ Saˬdaˬ neh jahˇ˗euˬ shaˬ˗eu zahˬ˗eu jeˬ dawˬ tawˆ luˆ˗ahˇ laˆ byoˆ nehˬ jiˇ nya˗eu meh.
Yeˬhawˇbaˬ uˬ duˬ tahˬ˗eu jeˬ˗ahˇ aˬ jeˬ miˇ neh za geuˇ˗eu nga?
6-7. Nymˬ˗mˇ iˬ nah tsawˇ haˬ myaˬ tiˬ paˆ aˬ jeˬ miˇ neh Yeˬhawˇbaˬ˗ahˇ uˬ duˬ maˬ tahˬ˗eu nga? Ehˇ kʼawꞈ aˬ jeˬ miˇ neh Yeˬhawˇbaˬ uˬ duˬ tahˬ˗eu jeˬ˗ahˇ za geuˇ˗eu nga?
6 Nymˬ˗mˇ iˬ nah tsawˇ haˬ myaˬ tiˬ paˆ Yeˬhawˇbaˬ˗ahˇ aˬ jeˬ miˇ neh uˬ duˬ maˬ tahˬ˗eu nga? Aˬ yawꞈ maꞈ Yeˬhawˇbaˬ˗euˬ seuˆ dzeuꞈ aˇ gʼehˇ deuˬ˗ahˇ maˬ siˬ nya˗eu uˬ taꞈ, Yeˬhawˇbaˬ aˬ yawꞈ maꞈ˗euˬ gʼaˇ duˬ aˬ jeˬ jeˇ mˇ nehˬ˗euˬ lehˇ maˬ siˬ nya˗eu miˇ neh meh. Gʼaˬ kʼehˇ Pawˇluˆ neh tsaꞈ gaˬ˗iˇ˗euˬ Aˬteˬ meuˬ zaˬ deuˬ jiˇ teu loꞈ˗ehˇ duˇ˗eu meh.—Gʼaˬkʼehˇ 17:19, 20, 30, 34.
7 Pawˇluˆ Aˬteˬ meuˬ zaˬ deuˬ˗ahˇ maˇ maˇ ni gʼeh˗eu Miˬyehˇ naˇ, “tsawˇ haˬ dawˬ tawˆ luꞈ˗ahˇ, dehꞈ˗eu jeˬ, saꞈ gʼawˇ nya˗eu jeˬ hawˇ˗eu, yawˬ jeˬ na luꞈ biꞈ˗eu gʼaˬ” pyeuꞈ meh lehˇ ehˇ nehˬ˗euˬ meh. Kʼoeˇ naˇ “aˬ yawꞈ laꞈ kʼoeˇ aˬ dui dehꞈ luꞈ, jawˇ luꞈ, luˆ luꞈ, laˆ luꞈ˗eu ma” lehˇ jiˇ paˇ ehˇ nehˬ˗euˬ meh. Miˬyehˇ ‘tsawˇ haˬ tiˬ gʼaˬ o neh miˇ kʼahˬ tsawˇ jeuˬ dawˬ tawˆ luꞈ˗ahˇ beh˗euˬ’ miˇ neh, aˬ yawꞈ uˬ duˬ tahˬ˗eu jeˬ˗ahˇ za geuˇ˗eu meh.—Gʼaˬkʼehˇ 17:25, 26, 28.
8. Yeˬhawˇbaˬ tiˬ jawˇ˗i maˬ jahˇ˗eu jeˬ naˇ aˬ jeˬ nga? Aˬ yawꞈ aˬ dui˗ahˇ gaˬ˗eu lehˇ bi siˬ laˇ˗eu aˬ jeˬ jeˇ jaˆ˗eu nga?
8 Yeˬhawˇbaˬ naˇ Beh˗euˬ yaw sahˇ pyeuꞈ˗awˇ, boeˬ boeˬ luˆ luˆ laꞈ kʼoeˇ huiˬ dzehˬ mahˇ dzehˬ˗eu gʼaˬ pyeuꞈ˗eu miˇ neh, tsawˇ haˬ zaˬ˗ahˇ aˬ yawꞈ˗ahˇ uˬ duˬ bi tahˬ laˇ˗eu lehˇ ka tiˇ mawꞈ naˇ ka tiˇ nya meh. Ehˇ kʼawꞈ aˬ yawꞈ toˆ˗ehˇ tiˬ jeˬ gʼeh neh˗iˬ maˬ jahˇ˗a. Miˬyehˇ aˬ yawꞈ maˇ diˇ dehꞈ luꞈ jawˇ luꞈ˗eu gaˇ kawˆ hawˇ˗eu aˬ yawꞈ yawˬ gʼaˬ na luꞈ˗ahˇ maˇ diˇ gaˬ˗eu gaˇ kawˆ haw mawˇ nya ni maˇ jawˆ ni gʼeh˗eu saˇ kiˇ deuˬ biꞈ nehˬ˗eu meh. Aˬ yawꞈ tsawˇ haˬ aˬ geu gʼaˬ˗ahˇ maˬ kaˬ kʼaˇ gʼeh nya gaˇ neh aˬ yawꞈ nehˬ˗ehˇ cawˬ bi pyeuꞈ laˇ mawꞈ˗eu meh. (1 Tiˆmoˇseˬ 2:3, 4) Teu miˇ neh Yeˬhawˇbaˬ aˬ yawꞈ aˬ jeˬ noeˬ taˬ˗awˇ, tsawˇ haˬ zaˬ˗euˬ gʼaˇ duˬ aˬ jeˬ mˇ nehˬ˗eu lehˇ lehˬ hmˬ taˬ˗euˬ gaˇ kawˆ aˬ cawˬ˗ahˇ mehˬ˗iˇ nya ni aˬ dui˗ahˇ dzaw nehˬ luꞈ˗eu meh. (Maꞈtehˬ 10:11-13; 28:19, 20) Aˬ yawꞈ˗ahˇ uˬ duˬ tahˬ˗eu gʼaˇ duˬ jiˇ aˇ muˇ deuˬ lehˬ hmˬ nehˬ taˬ˗euˬ meh. Kʼoeˇ naˇ yaw muiˬ˗ehˇ ngehˬ gʼeh bo saˆ nehˬ˗eu nui gaˬ keuˆ˗eu aˇ muˇ˗ahˇ sheuˬ gʼeh˗eu deuˬ jiˇ biꞈ nehˬ taˬ˗euˬ meh.—Gʼaˬkʼehˇ 20:28.
9. Yeˬhawˇbaˬ nui ga aˬ joˆ˗ehˇ mˇ mawˇ˗eu nga?
9 Yeˬhawˇbaˬ aˬ yawꞈ jawˇ meh lehˇ maˬ jah˗eu tsawˇ haˬ deuˬ˗ahˇ kʼawꞈ, nui gaˬ mˇ mawˇ˗eu meh. Shaˇ noeˬ haw sheˇ, tsawˇ haˬ zaˬ˗euˬ tiˬ ziˇ saˇ˗i tiˬ ziˇ gʼawˬ mya heˇ lam gʼaˬ, aˬ jeˬ tsaˬ˗eu hawˇ˗eu maˬ tsaˬ˗eu yawˬ ha˗euˬ nui noeˬ geuꞈ geuꞈ˗ehˇ dehꞈ laꞈ˗euˬ meh. Ehˇ kʼawꞈ Miˬyehˇ aˬ yawꞈ maꞈ˗ahˇ yaw dehꞈ dehꞈ daˆ leꞈ nya˗eu gʼaˇ duˬ loˬ˗eu jeˬ biꞈ nehˬ taˬ˗awˇ, teu˗ahˇ laˬ kʼaˬ cehˇ nya ni biꞈ luꞈ˗eu meh. (Maꞈtehˬ 5:44, 45; Gʼaˬkʼehˇ 14:16, 17) Aˬ yawꞈ tsawˇ haˬ zaˬ˗ahˇ tiˬ gʼaˬ tiˇ gʼaˬ gʼoeˇ nya gaˬ nya ni maˬ ehˇ, nymˇ dahˬ beh nya ni maˬ ehˇ, yawˬ ha neh leh jeh˗awˇ mˇ˗euˬ gaˇ˗ahˇ laˬ kʼaˬ cehˇ nya ni maˬ ehˇ, lehˬ hmˬ nehˬ taˬ˗euˬ meh. (Ja ceuˬ 127:3; Dawˬtsoˆ 2:24) Heu gaˇ haw ngeh, Yeˬhawˇbaˬ tsawˇ haˬ yawˬ gʼaˬ na luꞈ˗ahˇ gaˬ˗eu lehˇ maˇ jawˆ ni siˬ laˇ˗eu meh. (Doˆ˗iˇ˗eu 34:6) Aˬ dui Yeˬhawˇbaˬ˗ahˇ uˬ duˬ tahˬ˗eu lehˇ aˬ jeˬ miˇ neh tseˇ˗euˬ nga lehˇ ja sawˇ˗awˇ, Yeˬhawˇbaˬ teu loꞈ˗ehˇ tseˇ˗euˬ deuˬ˗ahˇ guiˬ lahˬ aˬ joˆ˗ehˇ biꞈ˗eu nga lehˇ jiˇ ja sawˇ kaˇ˗euˇ.
Aˬ dui Yeˬhawˇbaˬ˗ahˇ uˬ duˬ tahˬ˗eu lehˇ aˬ jeˬ miˇ neh tseˇ˗euˬ nga?
10. (a) Aˬ dui Yeˬhawˇbaˬ˗ahˇ uˬ duˬ tahˬ˗eu aˇ yeˇ kʼaˇ huiˬ˗eu jeˬ naˇ aˬ jeˬ nga? (Maꞈtehˬ 22:37) (b) Yeˬhawˇbaˬ nui ma mahˇ˗eu heu naˇ, nawˬ˗ahˇ aˬ joˆ˗ehˇ gaˇ dahˇ tsoeˬ˗eu nga? (Ja ceuˬ 103:13, 14)
10 Aˬ dui jiˇ Yeˬsuˇ loꞈ˗ehˇ Yeˬhawˇbaˬ˗ahˇ yaw kʼaˆ˗ehˇ gaˬ˗eu miˇ neh uˬ duˬ tahˬ˗eu ma. (Maꞈtehˬ 22:37-ahˇ gui.) Aˬ dui aˬ yawꞈ˗euˬ seuˆ dzeuꞈ aˇ gʼehˇ deuˬ˗ahˇ siˬ nya laˇ ngeh, Yeˬhawˇbaˬ˗ahˇ gaˬ laˇ˗eu ma. Yaw jaˬ ma jeˬ, Yeˬhawˇbaˬ nui ma mahˇ˗eu gaˇ kawˆ˗ahˇ shaˇ noeˬ haw kaˇ˗euˇ. Iˇsaˬleˬlaˆ deuˬ puiˬ ngeh yamˬ˗ahˇ “dehꞈ jeˬ dehꞈ kawˆ paˇ˗awˇ, iˬ baˇ maˬ mˇ ni byehˇ˗awˬ” lehˇ Yeˬhawˇbaˬ shaˇ˗eu meh. (Yeˬlaˬmiˇ 18:11) Aˬ dui maˬ byah kuꞈ˗eu tsawˇ haˬ pyeuꞈ˗awˇ miˇ tsaˬ shaˬ jehˆ pyeuꞈ meh lehˇ Yeˬhawˇbaˬ siˬ nya˗eu meh. (Ja ceuˬ 103:13, 14-ahˇ gui.) Yeˬhawˇbaˬ nui ma mahˇ˗eu gaˇ kawˆ˗ahˇ maˬ ehˇ, aˬ yawꞈ˗euˬ seuˆ dzeuꞈ aˇ gʼehˇ deuˬ˗ahˇ maˬ ehˇ, shaˇ noeˬ haw ngeh, nawˬ˗ahˇ Yeˬhawˇbaˬ˗ahˇ mˬ maˬ maˬ byaˆ zaˇ ziˇ uˬ duˬ maˬ tahˬ gʼeh mawꞈ nya laˬ?
11. Aˬ dui Yeˬhawˇbaˬ˗ahˇ uˬ duˬ tahˬ˗eu aˬ jeˬ baˬ da neh nga siˬ?
11 Kʼoeˇ uˬ taꞈ, aˬ dui Yeˬhawˇbaˬ˗ahˇ uˬ duˬ tahˬ˗eu heu naˇ, tsaˬ˗eu jeˬ pyeuꞈ˗awˇ mˇ paˬ˗ehˇ gʼeh˗eu jeˬ pyeuꞈ˗eu lehˇ siˬ nya˗eu ma. (Maꞈtehˬ 4:10) Kʼoeˇ naˇ aˬ dui saˇ jaˇ ziꞈ˗eu heu naˇ, aˬ jeˬ jeˇ muiˬ˗eu jeˬ pyeuꞈ laˇ˗eu lehˇ siˬ nya˗eu ma. Aˬ dui saˇ jaˇ ziꞈ˗eu heu naˇ, aˬ cawˬ deuˬ Miˬyehˇ˗euˬ tsawˇ myahˇ˗ahˇ aˬ myah luꞈ yaw zeu baw ni mˇ˗eu jeˬ pyeuꞈ˗awˇ, Saˬdaˬ jaˬ myawꞈ mehˇ shuiˇ lehˇ bi siˬ˗eu uˬ taꞈ, Yeˬhawˇbaˬ˗ahˇ laˬ kʼaˬ bi cehˇ leˇ˗eu jeˬ pyeuꞈ meh. Aˬ dui nymˬ˗mˇ neh Yeˬhawˇbaˬ˗ahˇ uˬ duˬ tahˬ˗eu lehˇ tseˇ naˇ, mehˬ hu paw jiˇ mˬ maˬ maˬ byaˆ zaˇ ziˇ aˬ yawꞈ˗ahˇ uˬ duˬ tahˬ gʼeh nya˗eu meh.—Yoˇhaˬ 17:3.
12-13. Aˬ dui Je hawˇ˗eu Pehˬ˗euˬ gaˇ kawˆ˗ahˇ neh aˬ jeˬ ya siˬ˗eu nga?
12 Aˬ dui nyiˇ ngeh neh Yeˬhawˇbaˬ˗ahˇ gaˬ laˇ ni dzaw nya˗awˇ tiˬ nah saˇ˗i tiˬ nah gaˬ dzehˬ laˇ mawꞈ˗eu ma. Je hawˇ˗eu Pehˬ˗euˬ gaˇ kawˆ˗ahˇ haw ma.a Je 11 kʼoꞈ kʼawˆ˗awˇ, Pehˬ 10 kʼoꞈ kʼawˆ ngeh aˬ nyaꞈ nmˇ Jaˇliꞈ dzaw dahˬ beh laˇ˗euˬ meh. Aˬ yawꞈ nyaꞈ˗euˬ aˬ da aˬ ma Jaˇliꞈ maˬ dzaw kʼawꞈ, aˬ yawꞈ nyaꞈ nmˇ aˬ da aˬ ma nehˬ˗ehˇ uˬ duˬ tahˬ nymˇ˗ahˇ kʼaˇ iˇ˗eu kʼoeˇ keuˆ ni Saˇkiˇ nehˬ˗ehˇ Jaˇliꞈ bi dzaw˗eu meh. Je “Mehˇ nmˇ deuˬ neh Jaˇliꞈ˗ahˇ neh mehˬ nehˬ laꞈ˗eu jeˬ heu naˇ, ngaˬ˗ahˇ dzaw nymˇ˗ahˇ ya puˬ˗eu ya piˇ ya maˇ dawˇ˗eu jeˬ˗ahˇ maˬ ehˇ, dehꞈ bahˬ dehꞈ muˆ˗eu jeˬ˗ahˇ maˬ ehˇ, deuˆ gʼaˬ nya ni caw ba nehˬ laꞈ nya” lehˇ ehˇ˗eu meh.
13 Zaˬ guˬ guˬ laˇ ngeh aˬ yawꞈ nyaꞈ nyiˬ gʼaˬ luꞈ tsaꞈ gaˬ˗eu gʼaˬ pyeuꞈ laˇ˗awˇ, aˇ nah naˇ huˬ mehˬ mehˬ˗eu gʼaˬ geuꞈ laˇ˗euˬ meh. Kʼoeˇ naˇ aˬ yawꞈ nyaꞈ aˇ kʼoꞈ kawˆ laˇ˗euˬ aˬ da aˬ ma˗ahˇ jiˇ ngehˬ gʼeh nehˬ˗eu meh. Dzeuˇ laꞈ˗euˬ aˇ yamˬ˗ahˇ haw kʼoꞈ gʼeh ngeh, Je “Ngaˇ, ngaˬ˗euˬ myaˆ neh Yeˬhawˇbaˬ aˬ yawꞈ˗euˬ cawˬ˗ahˇ ngehˬ gʼeh bo saˆ˗eu lehˇ ya mawˇ duˬ˗euˬ ma. 2 Tiˆmoˇseˬ 2:19-ahˇ ehˇ taˬ˗euˬ loꞈ˗ehˇ Yeˬhawˇbaˬ ‘aˬ yawꞈ˗euˬ tsawˇ haˬ deuˬ˗ahˇ siˬ nya meh’” lehˇ ehˇ˗eu meh. Heu gaˇ haw ngeh, Yeˬhawˇbaˬ aˬ yawꞈ˗ahˇ gaˬ˗awˇ uˬ duˬ tahˬ˗eu deuˬ˗ahˇ maˇ diˇ ngehˬ gʼeh nehˬ˗eu lehˇ siˬ laˇ˗eu meh.
14. Aˬ dui Yeˬhawˇbaˬ˗euˬ tsawˇ myahˇ˗ahˇ aˬ joˆ˗ehˇ ngehˬ piˇ nya˗eu nga? (Aˇ baˇ˗ahˇ jiˇ haw.)
14 Aˬ dui tsawˇ haˬ deuˬ˗ahˇ Yeˬhawˇbaˬ nehˬ˗ehˇ taꞈ leˇ˗awˇ jaˬ myawꞈ myawꞈ taˬ˗euˬ heu naˇ, maˬ ngeuˇ˗eu lehˇ bi siˬ mawꞈ˗eu ma. Yaw jeˬ ma jeˬ, nawˇ gaˬ laˇ paˬ˗ehˇ gʼeh˗awˇ, nui ma muiˬ˗eu uˬ taꞈ, nui pehˇ maˬ yuˇ taˬ˗eu gʼoeˇ˗eu cawˬ tiˬ gʼaˬ jawˇ˗eu lehˇ ehˇ˗awˬ. Ehˇ kʼawꞈ tiˬ nah, tiˬ gʼaˬ gʼaˬ nawˬ˗euˬ cawˬ˗ahˇ maˬ muiˬ˗eu tsawˇ haˬ, nui ma maˬ taˬ nya˗eu tsawˇ haˬ lehˇ ja bu laˇ˗eu lehˇ ehˇ˗awˬ. Nawˇ aˬ joˆ˗ehˇ jahˇ de? Nawˇ nawˬ˗euˬ cawˬ˗ahˇ ngehˬ piˇ˗eu yaw duˬ baw meh. Teu gaˇ duˇ ni Saˬdaˬ hawˇ˗eu aˬ yawꞈ paw pyawˬ˗euˬ deuˬ Yeˬhawˇbaˬ˗euˬ gaˇ kawˆ˗ahˇ ja bu ja bu˗ehˇ Yeˬhawˇbaˬ˗euˬ tsawˇ myahˇ laˆ cawˆ˗eu meh. Aˬ dui aˬ cawˬ deuˬ˗ahˇ Yeˬhawˇbaˬ nehˬ˗ehˇ taꞈ leˇ˗awˇ, maˇ maˇ ni gʼeh˗eu gaˇ kawˆ ja nehˬ˗eu heu neh, Yeˬhawˇbaˬ˗euˬ tsawˇ myahˇ˗ahˇ ngehˬ piˇ mawꞈ˗eu ma. (Ja ceuˬ 34:1; Iˇsaˬyaˇ 43:10) Aˬ dui Yeˬhawˇbaˬ˗ahˇ gaˬ˗awˇ uˬ duˬ tahˬ mawꞈ˗eu lehˇ ngehˬ jeˬ ngehˬ kawˆ neh maˬ ehˇ, mˇ jeˬ shaˇ kawˆ neh maˬ ehˇ, bi mawˇ˗eu ma.
Nawˇ Yeˬhawˇbaˬ Miˬyehˇ˗euˬ tsawˇ myahˇ˗ahˇ ngehˬ piˇ ma laˬ? (Aˇ deuˆ 14-ahˇ haw)b
15. Gʼaˬ kʼehˇ Pawˇluˆ aˬ yawꞈ˗euˬ dehꞈ ziˇ dehꞈ poˆ dehꞈ paˇ mˇ˗euˬ gaˇ neh, aˬ jeˬ˗euˬ guiˬ lahˬ za˗euˬ nga? (Piˇliˇpiˆ 3:7, 8)
15 Aˬ dui Yeˬhawˇbaˬ nui kʼahˇ bi shiˇ˗eu gʼaˇ duˬ hawˇ˗eu aˬ yawꞈ˗euˬ gaˇ mˇ nya dzehˬ laˇ˗eu gʼaˇ duˬ, dehꞈ ziˇ laꞈ kʼoeˇ daˬ taˬ˗eu aˇ pyaˇ nui ma keuˆ˗eu laꞈ kʼoeˇ laˆ paˇ˗eu ma. Gʼaˬ kʼehˇ Pawˇluˆ˗euˬ gaˇ kawˆ˗ahˇ haw kaˇ˗euˇ. Pawˇluˆ naˇ Yuˇdaˆ tsawˇ haˬ deuˬ˗euˬ laꞈ kʼoeˇ tsawˇ myahˇ doˆ˗eu tiˬ gʼaˬ pyeuꞈ yaꞈ˗euˬ meh. Ehˇ kʼawꞈ aˇ nah naˇ aˬ yawꞈ Yuˇdaˆ˗euˬ zahˇ˗ahˇ neh doˆ le˗awˇ, Yeˬsuˇ˗euˬ zaˬ lahˇ pyeuꞈ laˇ˗awˇ, Yeˬhawˇbaˬ˗ahˇ uˬ duˬ tahˬ laˇ˗euˬ meh. (Gaˬlaˬtiˆ 1:14) Aˬ yawꞈ˗euˬ dehꞈ ziˇ heu loꞈ˗ehˇ laˆ poˆ laˆ paˇ˗awˇ, Yeˬhawˇbaˬ˗euˬ gaˇ mˇ˗euˬ miˇ neh yaw muiˬ jeˬ˗ahˇ ya puˬ ya mawˇ˗euˬ meh. Heu baˬ da neh aˬ yawꞈ dehꞈ ziˇ laˬ kʼaˬ cehˇ˗awˇ mˬ kʼoeˇ taˆ Yeˬsuˇ nehˬ˗ehˇ tiˬ kawˆ loꞈ˗ehˇ ya uˆ lahˇ leˇ˗eu aˬ kawˬ˗aˬ jiˇ za˗euˬ meh. Pawˇluˆ Yeˬhawˇbaˬ˗ahˇ tseˇ˗euˬ miˇ neh, tiˬ jawˇ˗iˬ nui ma maˬ ya cawˆ haw˗aˬ. Aˬ dui jiˇ Pawˇluˆ loꞈ˗ehˇ jahˇ naˇ, tiˬ jawˇ˗iˬ nui ma maˬ ya cawˆ˗a.—Piˇliˇpiˆ 3:7, 8-ahˇ gui.
16. Juˬliˬ˗yaˬ˗euˬ gaˇ kawˆ˗ahˇ neh aˬ jeˬ dzaw geuꞈ nya˗eu nga? (Aˇ baˇ˗ahˇ jiˇ haw.)
16 Aˬ dui dehꞈ ziˇ laꞈ kʼoeˇ Yeˬhawˇbaˬ˗ahˇ uˬ duˬ tahˬ˗eu jeˬ˗ahˇ naˬ ba tiꞈ taˬ naˇ, nymˬ˗mˇ neh maˬ ehˇ, mehˬ hu paw maˬ ehˇ, laˬ kʼaˬ ya cehˇ˗eu meh. Mehˇ nmˇ Juˬliˬ˗yaˬ˗euˬ gaˇ kawˆ˗ahˇ haw ma. Juˬliˬ˗yaˬ Jaˇliꞈ maˬ dzaw laˇ siˬ ngeh, aˬ yawꞈ yaw nyiˇ ngeh uˬ duˬ tahˬ nymˇ˗ahˇ dawˬ caˇ caˇ caw˗eu tiˬ gʼaˬ pyeuꞈ yaꞈ˗euˬ meh. Oˇpaꞈ˗laˬ dawˬ caˇ caˇ zaˬ tiˬ gʼaˬ Juˬliˬ˗yaˬ dawˬ caˇ zawˇ˗ehˇ caˇ nya gaˇ haw mawˇ˗awˇ dawˬ caˇ caˇ˗eu mehˬ nehˬ˗euˬ meh. Tiˬ kʼehˬ naˇ Juˬliˬ˗yaˬ dawˬ caˇ caˇ zaˬ pyeuꞈ laˇ˗awˇ, tsawˇ myahˇ doˆ˗eu jawˇ duˬ gʼawˬ mya tsahˇ˗ahˇ ya caˇ˗iˇ˗euˬ meh. Juˬliˬ˗yaˬ tsawˇ myahˇ doˆ˗eu dzaw nymˇ tiˬ hmˬ˗ahˇ dzaw luꞈ ngeh, dzaw cawˬ tiˬ gʼaˬ Miˬyehˇ˗euˬ gaˇ kawˆ ja˗awˇ Miˬyehˇ˗euˬ tsawˇ myahˇ naˇ Yeˬhawˇbaˬ lehˇ kuˇ˗a lehˇ ehˇ˗eu meh. Teu gaˇ neh tiˬ kʼehˬ naˇ, Juˬliˬ˗yaˬ Jaˇliꞈ dzaw laˇ˗euˬ meh. Aˬ yawꞈ tiˬ jaw˗ahˇ nyiˬ poˆ dzaw laˇ˗awˇ uˬ duˬ duˬ leˇ ngeh, dawˬ caˇ caˇ zaˬ maˬ pyeuꞈ ni Yeˬhawˇbaˬ˗ahˇ uˬ duˬ tahˬ gaˇ leh jeh laˇ˗euˬ meh. Ehˇ kʼawꞈ teu loꞈ˗ehˇ noeˬ tsehˆ˗eu jiˇ yaw awˬ maˬ ngeuˇ˗a. Juˬliˬ˗yaˬ “Gʼawˬ mya gʼaˬ ngaˬ˗ahˇ yawˬ ha laꞈ kʼoeˇ dehꞈ ahˇ le˗euˬ jeˬ byehˇ dzeh ngaˬ lehˇ ehˇ˗eu meh. Ehˇ kʼawꞈ ngaˬ˗euˬ dehꞈ ziˇ ziˇ lah ni Yeˬhawˇbaˬ˗euˬ gʼaˇ duˬ dehꞈ mawꞈ nya” lehˇ ehˇ˗eu meh. Nymˬ˗mˇ iˬ nah naˇ aˬ yawꞈ dzeuˇ laꞈ˗euˬ 30 kʼoꞈ˗ahˇ aˬ yawꞈ neh noeˬ tsehˆ˗euˬ jeˬ˗ahˇ aˬ joˆ˗ehˇ noeˬ˗eu nga? Aˬ yawꞈ “Nymˬ˗mˇ ngaˬ˗ahˇ laˬ kʼaˬ cehˇ˗awˇ nui saˇ oꞈ˗eu lehˇ miˇ˗a. Mehˬ hu paw Yeˬhawˇbaˬ ngaˬ˗ahˇ ngaˇ kʼaˇ mˇ mawꞈ˗eu jeˬ bi mˇ meh lehˇ jah ziꞈ miˇ˗a” lehˇ ehˇ˗eu meh.—Ja ceuˬ 145:16.
Aˬ dui˗euˬ dehꞈ ziˇ laꞈ kʼoeˇ Yeˬhawˇbaˬ˗ahˇ uˬ duˬ tahˬ˗eu jeˬ˗ahˇ jeˬ hu taˬ naˇ, maˇ maˇ ni laˬ kʼaˬ cehˇ meh (Aˇ deuˆ 16-ahˇ haw)c
Yeˬhawˇbaˬ˗ahˇ uˬ duˬ tahˬ daˆ leꞈ
17. Nymˬ˗mˇ Yeˬhawˇbaˬ˗ahˇ uˬ duˬ tahˬ˗eu lehˇ tseˇ dzeuˇ˗euˬ deuˬ hawˇ˗eu maˬ ya tseˇ dah˗euˬ deuˬ˗euˬ gʼaˇ duˬ aˬ jeˬ˗ahˇ ehˇ mawꞈ˗eu nga?
17 Nymˬ˗mˇ aˬ dui miˇ tsaˬ aˇ saˬ saˬ˗eu jiˇ leˇ dzaˬ˗ahˇ dehꞈ luꞈ˗eu ma. Gʼaˬ kʼehˇ Pawˇluˆ “Aˇ yamˬ tiˬ kʼehˇ laˇ kʼehˬ dzeuˇ naˇ, oe˗eu lehˇ gʼeh luꞈ˗eu kʼoeˇ gʼaˬ, maˬ nyi naˬ ni oe keuˆ tehꞈ˗a” lehˇ ehˇ˗eu meh. (Heˬbyehˇ 10:37) Heu aˬ jeˬ˗ahˇ ehˇ mawꞈ˗eu nga? Yeˬhawˇbaˬ˗ahˇ uˬ duˬ tahˬ˗eu lehˇ tseˇ˗eu aˇ yamˬ ui cuiˆ maˬ ngeuˇ naˇ maˬ paˇ jaˆ mehˬ. (1 Gawˇliˬtu 7:29) Ehˇ kʼawꞈ Yeˬhawˇbaˬ˗ahˇ uˬ duˬ tahˬ˗eu lehˇ tseˇ dzeuˇ˗euˬ deuˬ˗euˬ gʼaˇ duˬ naˇ, aˬ dui ya tahˬ puˬ luꞈ˗eu shaˬ zahˬ heu˗aˬ, “tiˬ kʼehˇ laˇ kʼehˬ” jaˆ˗eu tehꞈ meh lehˇ siˬ nya˗eu ma.
18. Yeˬhawˇbaˬ hawˇ˗eu Yeˬsuˇ aˬ dui˗ahˇ aˬ jeˬ bi jahˇ mawꞈ˗eu nga?
18 Yeˬsuˇ aˬ yawꞈ˗euˬ zaˬ lahˇ deuˬ˗ahˇ aˬ yawꞈ˗euˬ mehˬ nah caw teh laˇ˗eu tehꞈ˗ehˇ maˬ gʼaˬ ni, aˬ myah luꞈ caw teh daˆ leꞈ lehˇ gʼaˬ biꞈ˗eu meh. (Maꞈtehˬ 16:24) Teu miˇ neh Yeˬhawˇbaˬ˗ahˇ uˬ duˬ tahˬ˗eu myahˇ laˇ˗euˬ kʼawꞈ, gʼaˬ byehˆ maˬ byehˆ ni Yeˬhawˇbaˬ˗ahˇ uˬ duˬ tahˬ daˆ leꞈ nya˗eu gʼaˇ duˬ kʼaˇ gʼeh nya gaˇ neh ya leh jeh˗eu meh. Teu loꞈ˗ehˇ jahˇ˗eu yaw awˬ maˬ ngeuˇ kʼawꞈ, aˬ dui leh jeh naˇ nymˬ˗mˇ neh guiˬ lahˬ za˗awˇ laˬ kʼaˬ cehˇ nui saˇ oꞈ meh.—Ja ceuˬ 35:27.
19. Mehˇ nmˇ Jiˬ neh ya puˬ ya mawˇ˗euˬ gaˇ kawˆ˗ahˇ neh, aˬ dui aˬ jeˬ ya siˬ˗euˬ nga?
19 Tiˬ deuˬ na Yeˬhawˇbaˬ˗ahˇ uˬ duˬ tahˬ laˇ˗eu gʼaˇ duˬ, yaw myaˬ jeˬ ya byehˇ dzeh nya lehˇ noeˬ˗eu meh. Nawˇ zaˬ guˬ tiˬ gʼaˬ pyeuꞈ naˇ, Yeˬhawˇbaˬ˗ahˇ uˬ duˬ tahˬ laˇ˗eu miˇ neh, tiˬ jeˬ na ya byehˇ dzeh gaˇ kʼahˬ lahˇ miˇ˗a laˬ? Jiˬ lehˇ kuˇ˗eu mehˇ nmˇ zaˬ guˬ tiˬ gʼaˬ heu loꞈ˗ehˇ ehˇ˗eu meh. “Yeˬhawˇbaˬ˗euˬ Saˇ kiˇ tiˬ gʼaˬ pyeuꞈ˗eu heu˗aˬ, ngaˬ˗euˬ gʼaˇ duˬ zawˇ˗ehˇ shaˬ nya. Ngaˬ˗euˬ cawˬ deuˬ˗aˬ, bawˬ˗iˬ jahˇ gaˇ iˇ, zaˬ kʼaˬ taˬ, diˬ˗eu ceh˗eu sehꞈ˗eu biˬdiˬoˬ keˆ lawˬ muˇ mui lehˇ zawˇ˗ehˇ byawˬ gaˇ duˇ˗a. Ngaˬ˗euˬ aˇ yamˬ naˇ mehˬ bawˬ˗ahˇ iˇ, tsaꞈ gaˬ˗iˇ gaˇ jiˇ˗eu tehꞈ meh.” Teu loꞈ˗ehˇ gʼeh˗eu nui noeˬ ahˇ laˇ˗euˬ baˬ da neh, Jiˬ aˬ joˆ˗ehˇ gʼeh˗euˬ nga? “Ngaˇ mehˇ nmˇ deuˬ˗euˬ mehˬ shi tiˬ jeˬ aˬ yawꞈ maꞈ maˬ mawˇ gaˇ naˇ tiˬ jeˬ lehˇ dehꞈ˗euˬ ma. Toˆ˗ehˇ dehꞈ˗eu teu, yaw beh ngeh yaw byawˬ miˇ˗a. Ehˇ kʼawꞈ byawˬ˗eu jeˬ teu gʼawˬ myahˇ ni maˬ kamˬ nya. Aˇ nah naˇ ngaˇ, ngaˬ neh aˇ poeˬ maˬ taˬ bawˬ˗euˬ Jaˇliꞈ mehˬ˗eu jeˬ˗ahˇ paˇ shaˇ noeˬ kʼoꞈ laˇ˗awˇ, ngaˬ˗euˬ nui ma dawˬ tawˆ luꞈ Yeˬhawˇbaˬ˗ahˇ uˬ duˬ tahˬ ma lehˇ noeˬ tsehˆ˗euˬ ma. Kʼoeˇ gaˇ neh taꞈ naˇ, ngaˬ neh guiˬ lahˬ shaˇ˗euˬ tiˬ jeˬ˗iˬ maˬ bi dzeuˇ˗iˇ ni Yeˬhawˇbaˬ naˇ haˬ nehˬ laꞈ nga lehˇ noeˬ laˇ nya” lehˇ Jiˬ ehˇ˗eu meh.
20. Aˬ dui aˬ jeˬ noeˬ tsehˆ taˬ paˬ˗ehˇ gʼeh˗eu nga?
20 “Nawˬ˗euˬ muiˬ˗eu shawˇ˗eu jawˇ duˬ˗ahˇ bi jawˇ˗euˬ, nawˬ neh tseˇ doˆ˗euˬ tsawˇ haˬ kʼoeˇ deuˬ, laˬ kʼaˬ cehˇ luꞈ˗uˇ” lehˇ Ja ceuˬ sahˬ boꞈ boꞈ˗eu tiˬ gʼaˬ caˇ taˬ˗euˬ meh. (Ja ceuˬ 65:4) Aˬ dui jiˇ Yawˇshuˆ loꞈ˗ehˇ “Ngaˇ hawˇ˗eu ngaˬ˗euˬ miˬ sawˇ zaˬ deuˬ law nmˇ˗aˬ, Sahˬpaˬ Miˬyehˇ˗ahˇ uˬ duˬ tahˬ ma” lehˇ noeˬ tsehˆ taˬ kaˇ˗euˇ.—Yawˇshuˆ 24:15.
Dawˬ caˇ 28 Yeˬhawˇbaˬ˗euˬ cawˬ ya pyeuꞈ
a Tsawˇ myahˇ tiˬ myahˇ na tsawˇ myahˇ myahˇ maˇ maˬ ngeuˇ˗a.
b Aˇ baˇ˗euˬ gaˇ kawˆ: Aˇ baˇ deuˬ: 1. Zaˬ miˬ aˬ buˇ tiˬ g’aˬ huiˬ-eu mehˬ bawˬ jahˇ-eu mehˬ shi, laˆ tsoeˬ-eu tsawˇ haˬ aˇ maꞈ deuˬ guˇ guˇ-ehˇ jawˇ luꞈ gaˇ ya mawˇ. 2. Aˇ nah naˇ, aˬ yawꞈ laˆ lawˬ neh tsaꞈ gaˬ luꞈ˗eu mehˇ nmˇ nyiˬ gʼaˬ nehˬ˗ehˇ ngehˬ cawˬ˗iˇ.
c Aˇ baˇ˗euˬ gaˇ kawˆ: Juˬliˬ˗yaˬ Yeˬhawˇbaˬ˗ahˇ uˬ duˬ tahˬ˗eu gʼaˇ duˬ, laˆ poˆ laˆ paˇ˗euˬ gaˇ kawˆ jahˇ byaˬ taˬ˗euˬ aˇ baˇ.