Aˬ myah luꞈ ziꞈ˗eu meuˬ˗ahˇ dawˬ

1. Yeˬsuˇ Yeˬluˇsaˬlehˬ meuˬ nehˬ˗ehˇ taꞈ leˇ˗awˇ, aˬ jeˬ˗euˬ maˬ keuˆ laˇ miˇ ehˇ taˬ˗euˬ nga?

Yeˬsuˇ aˬ yawꞈ maˬ shiˇ mi naˆ˗ehˇ myaˆ nah ca ngeh, aˬ yawꞈ˗euˬ mehˬ nah caw teh˗eu deuˬ˗ahˇ mehˬ hu paw aˬ jeˬ pyeuꞈ laˇ˗eu lehˇ ehˇ nehˬ˗euˬ meh. Yeˬsuˇ neh ehˇ˗euˬ maˬ keuˆ laˇ miˇ ehˇ taˬ˗euˬ dawˬ teu Yeˬluˇsaˬlehˬ meuˬ hawˇ˗eu uˬ duˬ tahˬ nymˇ nymˇ ma bi laˆ cawˆ ngeh aˇ dahˬ beh˗eu poˆ byah laˇ˗euˬ meh. Tiˬ nah Yeˬluˇsaˬlehˬ meuˬ˗ahˇ “guiˇ maꞈ deuˬ jawˬ lahˇ le˗euˬ gaˇ ya mawˇ” meh lehˇ Yeˬsuˇ ehˇ˗eu meh. (Luˇkaꞈ 21:20) Yeˬsuˇ aˬ yawꞈ˗euˬ zaˬ lahˇ deuˬ˗ahˇ guiˇ maꞈ deuˬ jawˬ lahˇ laˇ gaˇ ya mawˇ ngeh, taˆ lehˇ cehˆ lehˇ ehˇ nehˬ˗euˬ meh. Yeˬluˇsaˬlehˬ meuˬ˗ahˇ Loˇmaˆ guiˇ maꞈ deuˬ jawˬ lahˇ laˇ ngeh, Yeˬsuˇ˗euˬ dawˬ teu byah laˇ˗euˬ meh.—Luˇkaꞈ 21:21, 22.

2. Gʼaˬ kʼehˇ Pawˇluˆ Yuˇdaˆ miˇ kʼahˬ hawˇ˗eu Yeˬluˇsaˬlehˬ meuˬ˗ahˇ jawˇ˗eu Ka li zaˬ deuˬ˗ahˇ aˬ jeˬ˗euˬ nui noeˬ nui duˇ biꞈ˗euˬ nga?

² Yeˬluˇsaˬlehˬ meuˬ˗ahˇ Loˇmaˆ guiˇ maꞈ deuˬ maˬ jawˬ lahˇ laˇ mi naˆ˗ehˇ myaˆ kʼoꞈ ca ngeh, Pawˇluˆ aˇ yeˇ huiˬ˗eu sahˬ boꞈ boꞈ˗euˬ meh. Sahˬ boꞈ teu˗ahˇ nymˬ˗mˇ Heˬbyehˇ sahˬ boꞈ lehˇ kuˇ˗eu meh. Sahˬ boꞈ teu laꞈ kʼoeˇ Pawˇluˆ Yuˇdaˆ miˇ kʼahˬ hawˇ˗eu Yeˬluˇsaˬlehˬ meuˬ˗ahˇ jawˇ˗eu Ka li zaˬ deuˬ˗ahˇ mehˬ hu paw˗euˬ gʼaˇ duˬ lehˬ hmˬ dah taˬ nya ni caw ba nehˬ˗eu nui noeˬ nui duˇ biꞈ taˬ˗euˬ meh. Mehˬ hu paw aˬ jeˬ pyeuꞈ laˇ˗eu nga? Yeˬluˇsaˬlehˬ meuˬ bi laˆ cawˆ˗eu meh. Aˬ yawꞈ maꞈ dehꞈ ziˇ buˬ˗iˇ mawꞈ naˇ, aˬ yawꞈ maꞈ˗euˬ iˇ kahˇ deuˬ hawˇ˗eu jeˬ gaꞈ jeˬ ka mˇ˗eu jeˬ dawˬ tawˆ luꞈ˗ahˇ ya byehˇ dzeh yaꞈ˗eu meh. Teu miˇ neh Yeˬluˇsaˬlehˬ meuˬ nehˬ˗ehˇ taꞈ leˇ˗awˇ, Pawˇluˆ “miˇ tsaˬ heu kʼoeˇ taˆ aˬ dui gʼaˇ duˬ ziꞈ˗eu meuˬ maˬ jaˆ˗a. Aˬ kaˇ keuˆ le˗eu meuˬ˗ahˇ aˬ dui noeˬ tmˬ luꞈ˗eu ma” lehˇ ehˇ˗eu meh.—Heˬbyehˇ 13:14.

3. “Mˬ maˬ maˬ byaˆ zaˇ ziˇ ziꞈ˗eu meuˬ” naˇ aˬ jeˬ˗ahˇ ehˇ mawꞈ˗eu nga? Aˬ dui meuˬ teu˗ahˇ aˬ jeˬ miˇ neh dawˬ luꞈ˗eu nga?

³ Ka li zaˬ deuˬ Yeˬluˇsaˬlehˬ meuˬ hawˇ˗eu Yuˇdaˆ miˇ kʼahˬ˗ahˇ byehˇ dzeh yaꞈ˗eu lehˇ noeˬ tsehˆ ngeh, tsawˇ haˬ deuˬ aˬ yawꞈ maꞈ˗ahˇ maˬ gahˇ nga lehˇ ehˇ˗awˇ, cehꞈ lehꞈ ka˗eu meh. Ehˇ kʼawꞈ aˬ yawꞈ maꞈ toˆ˗ehˇ noeˬ tsehˆ˗euˬ miˇ neh dehꞈ ziˇ ya buˬ˗iˇ˗euˬ meh. Nymˬ˗mˇ iˬ nah˗euˬ tsawˇ haˬ deuˬ jiˇ aˬ dui miˇ tsaˬ kʼoeˇ taˆ pyeuꞈ luꞈ˗eu gaˇ kawˆ deuˬ˗ahˇ laˆ piˇ˗eu gʼaˇ duˬ, tsawˇ haˬ deuˬ˗ahˇ maˬ ehˇ, pyuˇ shuiˇ˗ahˇ maˬ ehˇ, maˬ gʼoe˗eu miˇ neh aˬ dui˗ahˇ cehꞈ lehꞈ ka laˇ˗eu meh. Aˬ dui aˬ jeˬ miˇ neh toˆ˗ehˇ maˬ jahˇ˗eu nga? Aˬ dui miˇ tsaˬ heu aˬ myah luꞈ maˬ ziꞈ˗a. Tiˬ kʼehˬ jaˆ˗eu tehꞈ meh lehˇ siˬ nya taˬ˗euˬ miˇ neh ma. Aˬ dui “mˬ maˬ maˬ byaˆ zaˇ ziˇ ziꞈ˗eu meuˬ” pyeuꞈ˗eu “aˬ kaˇ keuˆ” le˗eu Miˬyehˇ Miˇkʼahˬ˗ahˇ tehꞈ˗ehˇ dawˬ luꞈ˗eu ma.a (Heˬbyehˇ 11:10; Maꞈtehˬ 6:33) Aˬ dui heu kawˆ laꞈ kʼoeˇ naˇ haˬ˗eu jeˬ heu smˇ hmˬ˗ahˇ ja sawˇ ma. (1) Pawˇluˆ neh biꞈ˗euˬ nui noeˬ nui duˇ heu naˇ, dahˬ beh˗euˬ Ka li zaˬ saˇ ka˗ahˇ˗euˬ deuˬ˗ahˇ “aˬ kaˇ keuˆ” le˗eu meuˬ˗ahˇ dawˬ nya ni aˬ joˆ˗ehˇ caw ba nehˬ˗euˬ nga? (2) Pawˇluˆ aˬ yawꞈ maꞈ˗ahˇ mehˬ hu paw pyeuꞈ laˇ˗eu jeˬ˗euˬ gʼaˇ duˬ aˬ joˆ˗ehˇ lehˬ hmˬ dah nehˬ˗euˬ nga? (3) Pawˇluˆ˗euˬ nui noeˬ nui duˇ heu naˇ, aˬ dui˗ahˇ aˬ joˆ˗ehˇ caw ba nehˬ˗eu nga?

Aˬ dui˗ahˇ tiˬ jawˇ˗iˬ maˬ byehˇ dzeh˗eu Yeˬhawˇbaˬ˗ahˇ nui ma taˬ

4. Yeˬluˇsaˬlehˬ meuˬ heu naˇ, Ka li zaˬ deuˬ˗euˬ gʼaˇ duˬ aˬ jeˬ miˇ neh aˇ yeˇ huiˬ˗eu nga?

⁴ Yeˬluˇsaˬlehˬ meuˬ heu naˇ, teu ngeh saˇ ka˗ahˇ˗euˬ Ka li zaˬ deuˬ˗euˬ gʼaˇ duˬ aˇ yeˇ huiˬ˗eu meh. Aˬ jeˬ miˇ neh ehˇ naˇ, teu gaˇ A.D. 33-ahˇ Ka li zaˬ aˇ muˇ aˇ dahˬ beh˗awˇ, uˆ lahˇ˗eu aˇ muˇ jiˇ teu gaˇ jawˇ˗eu meh. Kʼoeˇ uˬ taꞈ, Ka li zaˬ yaw myaˬ gʼaˬ aˬ yawꞈ maꞈ˗euˬ iˇ kahˇ hawˇ˗eu yawˬ jeˬ na luꞈ meuˬ teu meuˬ˗ahˇ jaˆ˗eu meh. Ehˇ kʼawꞈ Yeˬsuˇ aˬ yawꞈ˗euˬ mehˬ nah caw teh˗eu deuˬ˗ahˇ Yeˬluˇsaˬlehˬ meuˬ˗ahˇ neh tehꞈ˗ehˇ maˬ ngeuˇ˗eu Yuˇdaˆ miˇ kʼahˬ˗ahˇ neh jiˇ cehˆ doˆ lehˇ ehˇ nehˬ˗euˬ meh.—Maꞈtehˬ 24:16.

5. Pawˇluˆ Yeˬluˇsaˬlehˬ meuˬ˗ahˇ˗euˬ Ka li zaˬ deuˬ˗ahˇ mehˬ hu paw pyeuꞈ laˇ˗eu jeˬ˗euˬ gʼaˇ duˬ aˬ joˆ˗ehˇ lehˬ hmˬ dah nehˬ˗euˬ nga?

⁵ Pawˇluˆ Ka li zaˬ deuˬ˗ahˇ mehˬ hu paw pyeuꞈ laˇ˗eu jeˬ˗euˬ gʼaˇ duˬ lehˬ hmˬ dah taˬ nya ni, Yeˬhawˇbaˬ Yeˬluˇsaˬlehˬ meuˬ˗ahˇ aˬ joˆ˗ehˇ haw˗eu lehˇ siˬ nya ni caw ba nehˬ˗euˬ meh. Aˬ yawꞈ maꞈ˗ahˇ Yeˬhawˇbaˬ Yeˬluˇsaˬlehˬ meuˬ˗ahˇ˗euˬ uˬ duˬ tahˬ nymˇ nymˇ ma˗ahˇ maˬ ehˇ, piˇ ma deuˬ˗ahˇ maˬ ehˇ, aˬ yawꞈ maꞈ neh lawˇ˗euˬ shehˇ˗euˬ jeˬ˗ahˇ maˬ ehˇ, maˬ paˇ ha geuꞈ˗eu lehˇ saˇ tiˇ biꞈ nehˬ˗euˬ meh. (Heˬbyehˇ 8:13) Meuˬ teu meuˬ laꞈ kʼoeˇ˗euˬ tsawˇ haˬ myaˬ tiˬ paˆ Yeˬsuˇ˗ahˇ Meˬsiˇya lehˇ maˬ ha geuꞈ˗a. Kʼoeˇ naˇ Yeˬluˇsaˬlehˬ meuˬ˗ahˇ˗euˬ uˬ duˬ tahˬ nymˇ nymˇ ma muiˬ˗eu shawˇ˗eu uˬ duˬ tahˬ˗eu jeˬ˗euˬ dawˬ pehˬ maˬ paˇ pyeuꞈ˗euˬ uˬ taꞈ, bi laˆ cawˆ˗eu meh.—Luˇkaꞈ 13:34, 35.

6. Heˬbyehˇ 13:5, 6 laꞈ kʼoeˇ˗euˬ Pawˇluˆ neh biꞈ˗euˬ nui noeˬ nui duˇ heu naˇ, teu ngeh saˇ ka˗ahˇ˗euˬ Ka li zaˬ deuˬ˗euˬ gʼaˇ duˬ aˬ jeˬ miˇ neh yamˬ law tsaˬ˗eu nga?

⁶ Pawˇluˆ Heˬbyehˇ Ka li zaˬ deuˬ˗ahˇ sahˬ boꞈ boꞈ nehˬ ngeh, Yeˬluˇsaˬlehˬ meuˬ naˇ tsawˇ myahˇ doˆ dui dui˗eu meh. Teu ngeh saˇ ka˗ahˇ˗euˬ Loˇmaˆ sahˬ boꞈ boꞈ zaˬ tiˬ gʼaˬ Yeˬluˇsaˬlehˬ meuˬ naˇ, “teu kaˬ teu kaˇ˗euˬ miˇ kʼahˬ deuˬ laꞈ kʼoeˇ neh tsawˇ myahˇ kʼaˇ doˆ˗eu meuˬ pyeuꞈ meh” lehˇ ehˇ˗eu meh. Miˇ kʼahˬ yaw myaˬ kʼahˬ˗ahˇ˗euˬ Yuˇdaˆ tsawˇ haˬ deuˬ yawˬ kʼoꞈ na luꞈ Yeˬluˇsaˬlehˬ meuˬ˗ahˇ bawˬ˗i gʼeh laˇ˗eu miˇ neh teu gaˇ jeˬ gaꞈ jeˬ ka mˇ˗eu aˇ dzehˬ˗ehˇ muiˬ˗awˇ, teu gaˇ˗euˬ Ka li zaˬ tiˬ deuˬ na jiˇ dehꞈ dzaˬ˗eu meh. Teu miˇ neh Pawˇluˆ aˬ yawꞈ maꞈ˗ahˇ “Pyuˇ shuiˇ myawˬ gahˬ˗ahˇ mehˇ juiˇ taˬ juiˇ. Yawˬ ha kʼaˇ jaˆ˗eu myaˆ ni nui kʼahˇ shiˇ˗awˬ” lehˇ ehˇ nehˬ˗euˬ meh. Kʼoeˇ naˇ “Ngaˇ naw maꞈ˗ahˇ tiˬ jawˇ˗iˬ maˬ taˬ yaꞈ. Tiˬ jawˇ˗iˬ maˬ byehˇ dzeh” lehˇ Yeˬhawˇbaˬ neh kamˬ taˬ˗euˬ dawˬ˗ahˇ ngehˬ keuˆ˗euˬ meh. (Heˬbyehˇ 13:5, 6-ahˇ gui; Dawˬmehˬmehˬ˗eu 31:6; Ja ceuˬ 118:6) Yeˬluˇsaˬlehˬ meuˬ hawˇ˗eu Yuˇdaˆ miˇ kʼahˬ˗ahˇ jawˇ˗eu Ka li zaˬ deuˬ tiˬ nah dawˬ heu˗ahˇ ya noeˬ mawˇ˗eu meh. Aˬ jeˬ miˇ neh? Aˬ jeˬ miˇ neh ehˇ naˇ, sahˬ boꞈ teu za˗awˇ tiˬ kʼehˬ naˇ, aˬ yawꞈ maꞈ yawˬ ha˗euˬ iˇ kahˇ, gaˇ deuˬ, yawˬ ha kʼaˇ jaˆ˗eu yawˬ jeˬ na luꞈ byehˇ dzeh yaꞈ jiˇ˗awˇ jawˇ duˬ yaw shuiꞈ˗ahˇ aˇ dahˬ ya beh paˇ˗iˇ˗eu miˇ neh meh.

7. Aˬ dui nymˬ˗mˇ neh aˬ jeˬ miˇ neh Yeˬhawˇbaˬ˗ahˇ nui ma ya taˬ˗eu nga?

⁷ Dzaw geuꞈ nya˗eu jeˬ. Gʼawˬ myahˇ maˬ gʼeh˗ehˇ aˬ jeˬ pyeuꞈ laˇ˗eu nga? Gʼawˬ myahˇ maˬ gʼeh˗ehˇ “guˆ dui dui laˇ paˬ˗ehˇ gʼeh˗eu” huiˬ dui dui˗eu shaˬ zhaˬ aˇ yamˬ beh˗awˇ, haiˬ˗eu miˇ tsaˬ heu bi laˆ cawˆ˗eu meh. (Maꞈtehˬ 24:21) Dahˬ beh˗euˬ Ka li zaˬ saˇ ka˗ahˇ˗euˬ deuˬ loꞈ˗ehˇ aˬ dui jiˇ yaw beuˇ beuˇ˗ehˇ ya jawˇ˗awˇ ya lehˬ hmˬ dah taˬ˗eu meh. (Luˇkaꞈ 21:34-36) Huiˬ dui dui˗eu shaˬ zahˬ aˇ yamˬ laꞈ kʼoeˇ aˬ dui jaˆ˗eu tiˬ jeˬ na, maˬ ngeuˇ naˇ yawˬ jeˬ na luꞈ˗ahˇ ya byehˇ dzeh yaꞈ˗eu kʼawꞈ pyeuꞈ nya meh. Ehˇ kʼawꞈ, Yeˬhawˇbaˬ aˬ dui˗ahˇ tiˬ jawˇ˗i maˬ byehˇ dzeh˗a lehˇ tiˬ byah tiˬ loꞈ jah ziꞈ˗eu ma. Aˬ dui huiˬ dui dui˗eu shaˬ zahˬ maˬ keuˆ le mi naˆ˗ehˇ nymˬ˗mˇ neh kʼawꞈ, aˬ jeˬ˗ahˇ nui ma taˬ˗eu lehˇ mˇ mawˇ nya meh. Yawˬ ha˗ahˇ heu loꞈ˗ehˇ naˇ haˬ. ‘Ngaˬ neh mˇ˗euˬ jeˬ hawˇ˗eu noeˬ taˬ˗euˬ jeˬ heu naˇ, ngaˇ pyuˇ shuiˇ myawˬ gahˬ˗ahˇ maˬ ngeuˇ˗eu ngaˬ˗ahˇ haw piˇ nehˬ ma lehˇ saˇ jaˇ dzaˬ taˬ˗euˬ Miˬyehˇ˗ahˇ nui ma taˬ˗eu lehˇ bi mawˇ laˇ ngaˇ laˬ?’ (1 Tiˆmoˇseˬ 6:17) Aˬ dui dahˬ beh˗euˬ Ka li zaˬ saˇ ka˗ahˇ pyeuꞈ yaꞈ˗euˬ jeˬ˗ahˇ neh gʼawˬ mya jeˬ dzaw geuꞈ nya meh. Ehˇ kʼawꞈ mehˬ hu paw keuˆ le˗eu huiˬ dui dui˗eu shaˬ zahˬ naˇ teu ngeh naˆ maˬ tseˇ gʼawˬ naˆ ni shaˬ dzehˬ˗eu meh. Toˆ˗ehˇ naˇ, huiˬ dui dui˗eu shaˬ zahˬ dahˬ beh laˇ ngeh aˬ jeˬ ya jahˇ˗eu lehˇ aˬ joˆ˗ehˇ siˬ nya nmˇ?

Sheuˬ gʼeh˗eu deuˬ˗euˬ ehˇ dawˬ naˇ haˬ

8. Yeˬsuˇ aˬ yawꞈ˗euˬ zaˬ lahˇ deuˬ˗ahˇ aˬ jeˬ ehˇ˗euˬ nga?

⁸ Pawˇluˆ˗euˬ sahˬ boꞈ˗ahˇ Heˬbyehˇ Ka li zaˬ deuˬ za˗euˬ myaˆ kʼoꞈ naˇ, Loˇmaˆ guiˇ maꞈ deuˬ Yeˬluˇsaˬlehˬ meuˬ˗ahˇ jawˬ lahˇ laˇ gaˇ ya mawˇ˗euˬ meh. Teu naˇ aˬ yawꞈ maꞈ ya cehˆ˗eu aˇ yamˬ pyeuꞈ ngaˇ, Yeˬluˇsaˬlehˬ meuˬ bi laˆ cawˆ˗eu lehˇ gʼeh ngaˇ lehˇ bi siˬ laꞈ˗eu jeˬ pyeuꞈ meh. (Maꞈtehˬ 24:3; Luˇkaꞈ 21:20, 24) Ehˇ kʼawꞈ aˬ yawꞈ maꞈ aˬ gaˇ ya cehˇ˗eu nga? Yeˬsuˇ “Yuˇdaˆ miˇ kʼahˬ˗ahˇ jawˇ˗eu tsawˇ haˬ deuˬ gawˬ jawˬ paw ya cehˆ daˆ” meh lehˇ ehˇ˗eu meh. (Luˇkaꞈ 21:21) Teu kaˬ teu kaˇ˗ahˇ gawˬ jawˬ gʼawˬ mya jawˬ jaˆ˗eu meh. Toˆ˗ehˇ naˇ aˬ yawꞈ maꞈ gawˬ jawˬ aˬ geu jawˬ˗ahˇ cehˆ gʼeh nmˇ?

9. Ka li zaˬ deuˬ˗ahˇ aˬ jeˬ miˇ neh gawˬ jawˬ aˬ geu jawˬ˗ahˇ cehˆ paˬ maˬ siˬ miˇ˗a lehˇ noeˬ leˇ nya˗eu nga? (Miˇ kʼahˬ˗euˬ aˇ baˇ˗ahˇ jiˇ haw.)

⁹ Ka li zaˬ deuˬ cehˆ gʼeh nya˗eu gawˬ jawˬ tiˬ jawˬ na˗ahˇ shaˇ noeˬ haw kaˇ˗euˇ. Teu gaˇ Saˬmaˬliˆ gawˬ jawˬ, Gaˬliˬlehˇ gawˬ jawˬ, Heˬlaˬmoˬ gawˬ jawˬ, Leˬbaˬnawˬ gawˬ jawˬ, Yawˇdaˬ lawˇ baˬ kʼoeˇ paw baˬ˗ahˇ jaˆ˗eu gawˬ jawˬ, heu deuˬ jaˆ˗eu meh. (Miˇ kʼahˬ˗euˬ aˇ baˇ˗ahˇ haw.) Gawˬ jawˬ teu deuˬ˗ahˇ jaˆ˗eu meuˬ tiˬ meuˬ na kʼahˬ lahˇ duˬ maˬ jaˆ˗eu meuˬ pyeuꞈ gaˇ duˇ˗eu meh. Yaw jeˬ ma jeˬ, Gamˇlaˬ meuˬ naˇ gawˬ jawˬ goˇ dui dui gaˇ jaˆ˗awˇ, iˇ keuˆ laˇ keuˆ˗eu yaw shaˬ meh. Teu miˇ neh Yuˇdaˆ tsawˇ haˬ tiˬ deuˬ na Gamˇlaˬ meuˬ naˇ kʼahˬ lahˇ duˬ maˬ jaˆ nga lehˇ noeˬ˗eu meh. Ehˇ kʼawꞈ Gamˇlaˬ meuˬ naˇ, Yuˇdaˆ tsawˇ haˬ deuˬ hawˇ˗eu Loˇmaˆ tsawˇ haˬ deuˬ guiˇ deuˆ dui dui˗eu jawˇ duˬ pyeuꞈ˗iˇ˗euˬ miˇ neh teu gaˇ˗euˬ meuˬ zaˬ deuˬ gʼawˬ mya ni shiˇ˗euˬ meh.b

10-11. (a) Yeˬhawˇbaˬ teu ngeh˗euˬ saˇ ka˗ahˇ˗euˬ Ka li zaˬ deuˬ˗ahˇ aˬ joˆ˗ehˇ sheuˬ gʼeh˗euˬ nga? (Heˬbyehˇ 13:7, 17) (b) Sheuˬ gʼeh˗eu deuˬ˗euˬ ehˇ dawˬ naˇ haˬ˗eu Ka li zaˬ deuˬ aˬ jeˬ za˗euˬ nga? (Aˇ baˇ˗ahˇ jiˇ haw.)

¹⁰ Yeˬhawˇbaˬ aˇ muˇ˗ahˇ sheuˬ gʼeh˗eu deuˬ˗ahˇ zmˬ˗awˇ, Ka li zaˬ deuˬ˗ahˇ sheuˬ gʼeh˗euˬ gaˇ duˇ˗eu meh. Gaˇ hu˗euˬ gaˇ kawˆ˗ahˇ poˆ tseˇ˗eu Yuˬsiˇbiˬyaˬ heu loꞈ˗ehˇ ehˇ˗eu meh. “Miˬyehˇ Yeˬluˇsaˬlehˬ meuˬ˗ahˇ jawˇ˗eu Ka li zaˬ deuˬ˗ahˇ guiˇ maˬ deuˆ laˇ mi naˆ˗ehˇ meuˬ teu meuˬ˗ahˇ neh cehˆ˗awˇ, . . . Beˬliˇ miˇ kʼahˬ Pehˬlaˬ meuˬ˗ahˇ jawˇ˗iˇ lehˇ sheuˬ gʼeh˗eu deuˬ˗ahˇ zmˬ˗awˇ pah mehˬ nehˬ˗euˬ meh.” Pehˬlaˬ meuˬ naˇ, Yeˬluˇsaˬlehˬ meuˬ nehˬ˗ehˇ yaw kʼaˆ˗ehˇ maˬ kaˬ˗eu uˬ taꞈ, iˇ˗eu yaw awˬ miˇ neh Ka li zaˬ deuˬ jawˇ˗iˇ mawꞈ paˬ˗ehˇ gʼehˇ˗eu meuˬ pyeuꞈ gaˇ duˇ˗eu meh. Kʼoeˇ uˬ taꞈ, Pehˬlaˬ meuˬ zaˬ myaˬ tiˬ paˆ naˇ Yuˇdaˆ tsawˇ haˬ maˬ ngeuˇ˗eu miˇ neh aˬ yawꞈ maꞈ Loˇmaˆ tsawˇ haˬ deuˬ nehˬ˗ehˇ guiˇ maˬ deuˆ˗a.—Miˇ kʼahˬ˗euˬ aˇ baˇ˗ahˇ haw.

¹¹ “Naw maꞈ kʼoeˇ taˆ aˬ yuiꞈ aˬ tsu geuꞈ˗eu deuˬ˗euˬ ehˇ dawˬ yaw muiˬ paˬ˗ehˇ naˇ haˬ geuꞈ˗awˬ” lehˇ Pawˇluˆ neh biꞈ˗euˬ nui noeˬ nui duˇ˗ahˇ mˇ caw˗euˬ deuˬ Pehˬlaˬ meuˬ˗ahˇ cehˆ˗euˬ meh. (Heˬbyehˇ 13:7, 17-ahˇ gui.) Teu miˇ neh aˬ yawꞈ maꞈ ya buˬ ya law˗iˇ˗euˬ meh. Gaˇ hu pyeuꞈ yaꞈ˗euˬ gaˇ kawˆ˗ahˇ haw ngeh, “mˬ maˬ maˬ byaˆ zaˇ ziˇ ziꞈ˗eu meuˬ” pyeuꞈ˗eu Miˬyehˇ Miˇkʼahˬ˗ahˇ dawˬ˗eu deuˬ˗ahˇ Miˬyehˇ maˬ byehˇ dzeh˗eu lehˇ mawˇ laˇ˗eu meh.—Heˬbyehˇ 11:10.

12-13. Shaˬ zahˬ aˇ yamˬ laꞈ kʼoeˇ Yeˬhawˇbaˬ aˬ yawꞈ˗euˬ tsawˇ haˬ deuˬ˗ahˇ aˬ joˆ˗ehˇ sheuˬ gʼeh˗eu nga?

¹² Dzaw geuꞈ nya˗eu jeˬ. Yeˬhawˇbaˬ sheuˬ gʼeh˗eu deuˬ˗ahˇ zmˬ˗awˇ aˬ yawꞈ˗euˬ tsawˇ haˬ deuˬ˗ahˇ maˇ jawˆ ni gʼeh˗eu nui noeˬ nui duˇ biꞈ˗eu meh. Jaˇliꞈ laꞈ kʼoeˇ shaˬ dui zahˬ dui dui˗eu aˇ yamˬ˗ahˇ Yeˬhawˇbaˬ saˇ jaˇ ziꞈ˗eu aˬ li deuˬ˗ahˇ zmˬ˗awˇ, aˬ yawꞈ˗euˬ tsawˇ haˬ deuˬ˗ahˇ aˬ joˆ˗ehˇ sheuˬ gʼeh˗euˬ gaˇ kawˆ yaw myaˬ kawˆ ahˇ˗eu meh. (Dawˬmehˬmehˬ˗eu 31:23; Ja ceuˬ 77:20) Nymˬ˗mˇ iˬ nah jiˇ Yeˬhawˇbaˬ sheuˬ gʼeh˗eu deuˬ˗ahˇ zmˬ˗awˇ aˬ yawꞈ˗euˬ tsawˇ haˬ deuˬ˗ahˇ sheuˬ gʼeh luꞈ˗eu lehˇ maˇ jawˆ ni mawˇ laˇ˗eu meh.

¹³ Yaw jeˬ ma jeˬ, Koˇbiˬ 19 yaw jaw naˇ gawˇ jaˆ ngeh “aˬ yuiꞈ aˬ tsu deuˬ” aˬ dui loˬ˗eu nui noeˬ nui duˇ deuˬ biꞈ˗eu meh. Aˇ muˇ˗ahˇ sheuˬ gʼeh˗eu deuˬ aˇ yamˬ teu laꞈ kʼoeˇ mehˬ bawˬ aˬ joˆ˗ehˇ ya jahˇ˗eu jeˬ nehˬ˗ehˇ taꞈ leˇ˗awˇ nui noeˬ nui duˇ za˗euˬ meh. Yaw jaw naˇ gawˇ teu jaˆ laˇ˗awˇ tiˬ kʼehˬ naˇ, smˬ nah mehˬ bawˬ jahˇ˗euˬ meh. Mehˬ bawˬ teu˗ahˇ tsawˇ jeuˬ˗euˬ dawˬ 500 jeˬ˗euˬ dawˬ dzehˬ ni Iˇteuꞈnehꞈ, tiˬbiˬ hawˇ˗eu Leˬdiˬ˗oˬ paw neh jahˇ˗euˬ meh. Aˬ dui yaw jaw naˇ gawˇ teu jaˆ˗eu aˇ yamˬ laꞈ kʼoeˇ tiˬ jawˇ˗iˬ nui jah paw˗euˬ dzaˇ maˬ za ni maˬ gʼeh haw˗aˬ. Teu miˇ neh aˬ dui aˬ myah luꞈ mehˬ bawˬ gm˗eu ma. Mehˬ hu paw aˬ jeˬ˗euˬ shaˬ zahˬ˗ahˇ ya tahˬ puˬ˗eu maˬ kaˬ, Yeˬhawˇbaˬ sheuˬ gʼeh˗eu deuˬ˗ahˇ yaw muiˬ˗ehˇ noeˬ tsehˆ nya ni caw ba nehˬ meh lehˇ aˬ dui jah ziꞈ nya meh. Aˬ dui huiˬ dui dui˗eu shaˬ zahˬ gʼaˇ duˬ dah laˇ taˬ ni maˬ ehˇ, shaˬ zahˬ aˇ yamˬ teu laꞈ kʼoeˇ yaw muiˬ˗ehˇ noeˬ tsehˆ˗awˇ mˇ nya ni maˬ ehˇ, Yeˬhawˇbaˬ˗ahˇ ya gʼoe˗awˇ aˬ yawꞈ˗euˬ ehˇ dawˬ ya naˇ haˬ˗eu meh. Kʼoeˇ naˇ aˬ dui aˬ jeˬ˗euˬ seuˆ dzeuꞈ aˇ gʼehˇ deuˬ paˇ loˬ nga siˬ.

Mehˇ nmˇ yaw kaˬ gaˬ˗eu loꞈ˗ehˇ gaˬ˗awˇ daˬ yah ha

14. Heˬbyehˇ 13:1-3-ahˇ haw ngeh, Yeˬluˇsaˬlehˬ meuˬ bi laˆ cawˆ˗eu peh laˇ ngeh Ka li zaˬ deuˬ aˬ jeˬ˗euˬ seuˆ dzeuꞈ aˇ gʼehˇ mˇ mawˇ˗euˬ nga?

¹⁴ Huiˬ dui dui˗eu shaˬ zahˬ keuˆ laˇ ngeh aˬ dui tiˬ gʼaˬ tiˇ gʼaˬ aˬ myah myah naˆ maˬ tseˇ ya gaˬ˗eu meh. Teu ngeh aˬ dui Yeˬluˇsaˬlehˬ meuˬ hawˇ˗eu Yuˇdaˆ miˇ kʼahˬ˗ahˇ jawˇ˗eu Ka li zaˬ deuˬ˗ahˇ dzaw geuꞈ˗eu loˬ meh. Aˬ yawꞈ maꞈ aˬ myah luꞈ tiˬ gʼaˬ tiˇ gʼaˬ gaˬ˗eu meh. (Heˬbyehˇ 10:32-34) Ehˇ kʼawꞈ Yeˬluˇsaˬlehˬ meuˬ bi laˆ cawˆ˗eu peh laˇ ngeh naˇ, aˬ yawꞈ maꞈ aˬ myah myah naˆ maˬ tseˇ “aˬ yuiꞈ aˬ nyiˇ Ka li zaˬ loꞈ˗ehˇ tiˬ gʼaˬ tiˇ gʼaˬ aˬ myah luꞈ gaˬ”˗awˇ, “daˬ yah yaw muiˬ˗ehˇ ha”˗euˬmeh. (Heˬbyehˇ 13:1-3-ahˇ gui.) Aˬ dui jiˇ miˇ tsaˬ heu siˬ aˇ saˬ saˬ˗eu aˇ yamˬ ngehˬ˗ehˇ peh laˇ naˇ ngehˬ˗ehˇ tiˬ gʼaˬ tiˇ gʼaˬ aˬ myah myah naˆ maˬ tseˇ nui gaˬ mˇ mawˇ˗eu loˬ meh.

15. Heˬbyehˇ Ka li zaˬ deuˬ cehˆ ngeh aˬ jeˬ miˇ neh tiˬ gʼaˬ tiˇ gʼaˬ ya gaˬ˗awˇ daˬ yah ya ha˗eu nga?

¹⁵ Yeˬluˇsaˬlehˬ meuˬ˗ahˇ Loˇmaˆ guiˇ maꞈ deuˬ jawˬ lahˇ laˇ˗awˇ, maˬ noeˬ˗euˬ gaˇ aˬ yawꞈ maꞈ naˇ kʼah paw jiꞈ kʼoꞈ gʼeh ngeh Ka li zaˬ deuˬ cehˆ˗eu aˇ yamˬ jaˆ˗eu meh. Ehˇ kʼawꞈ aˬ yawꞈ maꞈ myawˬ deuˬ gʼawˬ mya ni maˬ yuˇ gʼeh nya˗a. (Maꞈtehˬ 24:17, 18) Aˬ yawꞈ maꞈ gawˬ jawˬ˗ahˇ ya cehˆ ngeh maˬ ehˇ, Pehˬlaˬ meuˬ˗ahˇ ya jawˇ˗iˇ ngeh maˬ ehˇ, tiˬ gʼaˬ tiˇ gʼaˬ ya gʼoe˗eu meh. Teu ngeh mehˇ nmˇ deuˬ “maˇ maˇ ni loˬ”˗eu gʼawˬ mya jeˬ jaˆ˗eu miˇ neh, aˬ yawꞈ maꞈ tiˬ gʼaˬ tiˇ gʼaˬ nui gaˬ mˇ mawˇ˗eu, daˬ yah ha˗eu, myawˬ lawˬ muˇ biˇ paˆ nehˬ˗eu, aˬ kawˬ˗aˬ za˗eu meh.—Tiˇtuˆ 3:14.

16. Caw ba˗eu jeˬ loˬ˗eu mehˇ nmˇ deuˬ˗ahˇ aˬ dui nui gaˬ aˬ joˆ˗ehˇ mˇ mawˇ nya˗eu nga? (Aˇ baˇ˗ahˇ jiˇ haw.)

¹⁶ Dzaw geuꞈ nya˗eu jeˬ. Nui gaˬ heu naˇ, aˬ dui˗ahˇ mehˇ nmˇ deuˬ loˬ˗eu jeˬ˗ahˇ ngehˬ gʼeh nehˬ ni laˆ noeˬ nehˬ laꞈ˗eu meh. Aˬ dui˗euˬ mehˇ nmˇ deuˬ guiˇ deuˆ˗eu baˬ da neh maˬ ehˇ, uˬ jeˬ jaˬ lehˇ˗euˬ shaˬ zahˬ baˬ da neh maˬ ehˇ, ya cehˆ˗euˬ mehˇ nmˇ deuˬ˗ahˇ nui jah paw hawˇ˗eu shiˬ shaˬ jiˇ paw loˬ˗eu jeˬ˗ahˇ nui ma keuˆ˗eu laꞈ kʼoeˇ caw ba luꞈ˗eu meh. Guiˇ deuˆ˗eu baˬ da neh ya cehˆ˗euˬ Yu ke˗le miˇ kʼahˬ˗ahˇ jawˇ˗eu mehˇ nmˇ aˬ buˇ tiˬ gʼaˬ heu loꞈ˗ehˇ ehˇ˗eu meh. “Yeˬhawˇbaˬ mehˇ nmˇ deuˬ˗ahˇ zmˬ˗awˇ nga maꞈ˗ahˇ sheuˬ gʼeh luꞈ˗awˇ, caw ba nehˬ luꞈ˗eu lehˇ ya mawˇ˗euˬ ma. Yu ke˗le hawˇ˗eu Haˇgaˬliˬ˗ahˇ jawˇ˗eu mehˇ nmˇ deuˬ maˬ ehˇ, nymˬ˗mˇ ngaˇ jawˇ luꞈ˗eu Jeˬmaˬniˬ miˇ kʼahˬ˗ahˇ˗euˬ mehˇ nmˇ deuˬ maˬ ehˇ, nga maꞈ˗ahˇ laˬ kʼaˬ tiˬ cehˇ ha nehˬ laꞈ˗awˇ caw ba nehˬ laꞈ˗euˬ meh.” Aˬ dui mehˇ nmˇ deuˬ loˬ˗eu jeˬ˗ahˇ caw ba nehˬ˗awˇ, daˬ yah ha˗eu heu naˇ Yeˬhawˇbaˬ neh bi zmˬ luꞈ˗eu jeˬ pyeuꞈ meh.—Dawˬdaˬ 19:17; 2 Gawˇliˬtu 1:3, 4.

17. Aˬ dui nymˬ˗mˇ neh tiˬ gʼaˬ tiˇ gʼaˬ gaˬ˗awˇ daˬ yah ha˗eu heu aˬ jeˬ miˇ neh aˇ yeˇ huiˬ˗eu nga?

¹⁷ Huiˬ dui dui˗eu shaˬ zahˬ aˇ yamˬ laꞈ kʼoeˇ aˬ dui nymˬ˗mˇ naˆ maˬ tseˇ tiˬ gʼaˬ tiˇ gʼaˬ caw ba˗eu loˬ meh. (Haˬbaˬkuˆ 3:16-18) Yeˬhawˇbaˬ aˬ dui˗ahˇ nymˬ˗mˇ neh teu ngeh yamˬ˗ahˇ loˬ dui dui˗eu seuˆ dzeuꞈ aˇ gʼehˇ deuˬ pyeuꞈ˗eu mehˇ nmˇ yaw kaˬ gaˬ˗eu nui gaˬ hawˇ˗eu daˬ yah ha˗eu jeˬ mˇ mawˇ nya ni dzaw nehˬ luꞈ˗eu meh.

Mehˬ hu paw aˬ jeˬ pyeuꞈ laˇ˗eu nga?

18. Aˬ dui Heˬbyehˇ Ka li zaˬ deuˬ˗ahˇ aˬ joˆ˗ehˇ dzaw geuꞈ nya˗eu nga?

¹⁸ Ehˇ dawˬ naˇ haˬ˗awˇ gawˬ jawˬ˗ahˇ cehˆ˗euˬ Ka li zaˬ deuˬ Yeˬluˇsaˬlehˬ meuˬ bi laˆ cawˆ ngeh buˬ˗iˇ nya˗euˬ meh. Aˬ yawꞈ maꞈ yawˬ ha kʼaˇ jaˆ˗eu yawˬ jeˬ na luꞈ ya byehˇ dzeh yaꞈ˗euˬ kʼawꞈ, Yeˬhawˇbaˬ aˬ yawꞈ maꞈ˗ahˇ tiˬ jawˇ˗iˬ maˬ byehˇ dzeh˗aˬ. Nymˬ˗mˇ iˬ nah aˬ dui tawˇ neh? Aˬ dui mehˬ hu paw pyeuꞈ laˇ˗eu gaˇ kawˆ deuˬ dawˬ tawˆ luꞈ˗ahˇ maˬ siˬ jiˇ nya˗a. Ehˇ kʼawꞈ aˬ dui Yeˬsuˇ neh lehˬ hmˬ dah taˬ˗awˬ lehˇ saˇ tiˇ biꞈ taˬ˗euˬ dawˬ jaˆ˗eu ma. (Luˇkaꞈ 12:40) Kʼoeˇ naˇ nymˬ˗mˇ iˬ nah aˬ dui maˇ diˇ zmˬ˗iˇ nya˗eu Pawˇluˆ neh Heˬbyehˇ Ka li zaˬ deuˬ˗ahˇ boꞈ nehˬ˗euˬ sahˬ boꞈ laꞈ kʼoeˇ˗euˬ nui noeˬ nui duˇ jiˇ jaˆ˗eu ma. Kʼoeˇ uˬ taꞈ, Yeˬhawˇbaˬ aˬ dui˗ahˇ tiˬ jawˇ˗iˬ maˬ byehˇ dzeh lehˇ kamˬ taˬ˗euˬ dawˬ jiˇ jaˆ˗eu ma. (Heˬbyehˇ 13:5, 6) Teu miˇ neh aˬ dui mˬ maˬ maˬ byaˆ zaˇ ziˇ ziꞈ˗eu meuˬ pyeuꞈ˗eu Miˬyehˇ Miˇkʼahˬ˗ahˇ haw tsoˆ taˬ˗awˇ dawˬ kaˇ˗euˇ. Toˆ˗ehˇ naˇ mˬ maˬ maˬ byaˆ zaˇ ziˇ guiˬ lahˬ za˗eu meh.—Maꞈtehˬ 25:34.