Yeˬhawˇbaˬ aˬ dui˗ahˇ kamˬ daˬ coeˇ ni aˬ joˆ˗ehˇ caw ba nehˬ˗eu nga?

1. Aˬ dui aˬ jeˬ miˇ neh kamˬ daˬ coeˇ˗eu jeˬ loˬ˗eu nga? Caw ba˗eu jeˬ aˬ suˇ gʼaˬ jawˇ gaˇ neh za nya˗eu nga? (1 Beˬtuˆluˆ 5:10)

Shaˬ dui dui˗eu aˇ saˬ saˬ˗eu aˇ nah aˇ yamˬ heu laꞈ kʼoeˇ Yeˬhawˇbaˬ˗euˬ gaˇ mˇ zaˬ deuˬ kamˬ daˬ coeˇ˗eu jeˬ ya ahˇ˗eu meh. Mehˇ nmˇ tiˬ gʼaˬ na, kʼaˆ dui dui˗eu naˇ gawˇ naˇ˗awˇ, tiˬ gʼaˬ na naˇ gaˬ˗eu gʼaˬ bi shiˇ˗euˬ uˬ taꞈ, tiˬ gʼaˬ na˗aˬ, nymˇ jiˇ laꞈ kʼoeˇ deuˬ neh maˬ ehˇ, miˇ kʼahˬ sahˬ paˬ sahˬ ma deuˬ neh maˬ ehˇ, laˆ tsoeˬ laˇ gaˇ ya daˬ˗eu meh. (Maꞈtehˬ 10:18, 36, 37) Nawˇ aˬ jeˬ˗euˬ shaˬ zahˬ˗ahˇ ya puˬ˗eu maˬ kaˬ, Yeˬhawˇbaˬ nawˬ˗ahˇ kamˬ daˬ coeˇ ni caw ba nehˬ nya meh lehˇ jah ziꞈ luˬ˗uˇ.—1 Beˬtuˆluˆ 5:10-ahˇ gui.

2. Aˬ dui˗euˬ kamˬ daˬ coeˇ˗eu jeˬ, aˬ gaˇ neh oe˗euˬ nga?

² Kamˬ daˬ coeˇ˗eu jeˬ lehˇ ehˇ˗eu heu naˇ, shaˬ˗eu zahˬ˗eu jeˬ, kʼehˬ laˇ kʼaˆ laˇ˗eu jeˬ, lawˬ haw laˇ˗eu jeˬ, heu deuˬ˗ahˇ kamˬ daˬ˗awˇ, Yeˬhawˇbaˬ˗euˬ gaˇ˗ahˇ saˇ jaˇ ziꞈ˗eu laꞈ kʼoeˇ laˬ kʼaˬ tiˬ cehˇ mˇ daˆ leꞈ˗awˇ, mehˬ hu paw muiˬ daˆ laˇ meh lehˇ noeˬ tmˬ gaˇ ehˇ˗eu meh. Kamˬ daˬ coeˇ˗eu jeˬ heu naˇ, aˬ dui yawˬ ha laꞈ kʼoeˇ neh doˆ laˇ˗eu jeˬ maˬ ngeuˇ˗a. Aˬ dui˗ahˇ “huiˬ dui dui˗eu baoˬ” biꞈ˗eu Yeˬhawˇbaˬ jawˇ gaˇ neh oe˗euˬ meh. (2 Gawˇliˬtu 4:7) Heu kawˆ laꞈ kʼoeˇ aˬ dui kamˬ daˬ coeˇ˗eu gʼaˇ duˬ, Yeˬhawˇbaˬ aˬ jeˬ jeˇ lehˬ hmˬ nehˬ taˬ˗euˬ nga? Aˬ dui teu˗ahˇ neh gaˇ dahˇ tsoeˬ˗eu jeˬ za˗eu gʼaˇ duˬ, aˬ jeˬ ya jahˇ˗eu nga? lehˇ haw ma.

Guiˬ lahˬ shaˇ˗eu

3. Guiˬ lahˬ shaˇ˗eu jeˬ heu naˇ, aˬ jeˬ miˇ neh zahˬ leˇ paˬ˗ehˇ gʼeh˗eu jeˬ pyeuꞈ nga?

³ Yeˬhawˇbaˬ aˬ dui˗ahˇ kamˬ daˬ coeˇ˗eu gʼaˇ duˬ, muiˬ dui dui˗eu tiˬ jeˬ lehˬ hmˬ nehˬ taˬ˗euˬ meh. Teu naˇ, guiˬ lahˬ shaˇ˗eu jeˬ heu pyeuꞈ meh. Aˬ dui iˬ baˇ zaˬ pyeuꞈ kʼawꞈ, guiˬ lahˬ shaˇ˗eu heu neh Miˬyehˇ nehˬ˗ehˇ ngehˬ cawˬ nya ni lehˬ hmˬ nehˬ taˬ˗euˬ meh. (Heˬbyehˇ 4:16) Shaˇ noeˬ haw sheˇ, aˬ dui aˬ geu ngeh maˬ kaˬ, aˬ jeˬ˗euˬ gaˇ kawˆ maˬ kaˬ, aˬ jeˬ˗euˬ dawˬ neh maˬ kaˬ, guiˬ lahˬ shaˇ nya˗awˇ, aˬ dui tiˬ gʼaˬ tehꞈ˗ehˇ jawˇ˗eu maˬ ehˇ, tawˬ laꞈ kʼoeˇ uˇ luꞈ˗eu maˬ ehˇ, aˬ geu gaˇ jawˇ˗eu maˬ ehˇ, Yeˬhawˇbaˬ aˬ dui˗euˬ shaˇ dawˬ˗ahˇ gaˬ nya meh. (Yawˇnaˆ 2:1, 2; Gʼaˬkʼehˇ 16:25, 26) Aˬ dui maˬ ngehˬ doˆ nya˗ehˇ shaˬ zahˬ naꞈ dui dui luꞈ ngeh kʼawꞈ, aˬ dui aˬ jeˬ ngehˬ mawꞈ˗eu lehˇ Yeˬhawˇbaˬ siˬ nya meh. (Loˇmaˆ 8:26, 27) Aˬ dui Yeˬhawˇbaˬ˗ahˇ guiˬ lahˬ shaˇ nya˗eu heu naˇ zahˬ dui dui leˇ paˬ˗ehˇ gʼeh˗eu jeˬ pyeuꞈ ngaˇ.

4. Kamˬ daˬ coeˇ ni caw ba nehˬ laꞈ lehˇ shaˇ˗eu heu naˇ, Yeˬhawˇbaˬ nui ma tsaˬ˗eu jeˬ pyeuꞈ˗eu lehˇ aˬ jeˬ miˇ neh ehˇ nya˗eu nga?

⁴ Yeˬhawˇbaˬ “aˬ yawꞈ nui ma tsaˬ˗eu loꞈ˗ehˇ aˬ dui shaˇ naˇ, aˬ dui kʼaˇ shaˇ˗eu jeˬ˗ahˇ aˬ yawꞈ naˇ haˬ nehˬ” ma lehˇ kamˬ taˬ˗euˬ dawˬ Jaˇliꞈ laꞈ kʼoeˇ ahˇ˗eu meh. (1 Yoˇhaˬ 5:14) Toˆ˗ehˇ naˇ aˬ dui kamˬ daˬ coeˇ ni caw ba nehˬ laꞈ lehˇ Yeˬhawˇbaˬ˗ahˇ shaˇ nya ngaˇ laˬ? Shaˇ nya meh. Teu loꞈ˗ehˇ shaˇ˗eu teu naˇ, aˬ yawꞈ nui ma tsaˬ˗eu jeˬ pyeuꞈ meh. Aˬ jeˬ miˇ neh toˆ˗ehˇ ehˇ nya˗eu nga? Aˬ dui shaˬ zahˬ˗ahˇ kamˬ daˬ ngeh, Yeˬhawˇbaˬ aˬ yawꞈ˗ahˇ ja bu ja doeˇ˗eu Saˬdaˬ˗ahˇ ngehˬ kʼoꞈ tmˇ kʼoꞈ nya˗eu meh. (Dawˬdaˬ 27:11) Kʼoeˇ naˇ Jaˇliꞈ laꞈ kʼoeˇ Yeˬhawˇbaˬ˗euˬ baoˬ˗ahˇ zmˬ˗awˇ “aˬ yawꞈ˗ahˇ saˇ jaˇ ziꞈ˗eu deuˬ˗ahˇ gʼaˬ biꞈ luꞈ˗eu meh” lehˇ ehˇ taˬ˗euˬ meh. (2 Laˬsaˬbaˬ 16:9) Teu miˇ neh Yeˬhawˇbaˬ aˬ dui kamˬ daˬ coeˇ ni caw ba nehˬ mawꞈ˗awˇ, caw ba nehˬ nya˗eu baoˬ jiˇ ahˇ meh lehˇ aˬ dui jah ziꞈ˗eu ma.—Iˇsaˬyaˇ 30:18; 41:10; Luˇkaꞈ 11:13.

5. Guiˬ lahˬ shaˇ˗eu heu naˇ, aˬ dui˗ahˇ nui ma saˇ laˇ ni aˬ joˆ˗ehˇ caw ba nehˬ˗eu nga? (Iˇsaˬyaˇ 26:3)

⁵ Aˬ dui noeˬ shaˬ kʼahˬ lahˇ˗eu gaˇ kawˆ nui ma laꞈ kʼoeˇ neh shaˇ naˇ, ‘tsawˇ haˬ zaˬ maˬ noeˬ doˆ coeˇ˗eu Miˬyehˇ˗euˬ nui saˇ oꞈ˗eu jeˬ aˬ dui˗ahˇ caw ba tehꞈ˗a’ lehˇ Jaˇliꞈ laꞈ kʼoeˇ ehˇ taˬ˗euˬ meh. (Piˇliˇpiˆ 4:7) Heu˗euˬ gʼaˇ duˬ guiˬ lahˬ huiˬ dui dui miˇ˗a. Yeˬhawˇbaˬ˗ahˇ maˬ siˬ nya˗eu deuˬ naˇ, shaˬ zahˬ˗ahˇ ya tahˬ puˬ ngeh nui ma bi saˇ laˇ˗eu gʼaˇ duˬ, gʼawˬ mya jeˬ lehˇ jahˇ˗eu meh. Ehˇ kʼawꞈ aˬ yawꞈ maꞈ neh jahˇ˗euˬ tiˬ jeˬ na˗aˬ, nui ma˗ahˇ gʼawˬ mya jeˬ lehˇ bi deuˬ laˇ nya˗awˇ, nehꞈ Saˬdaˬ neh nui ma˗ahˇ bi uˇ lahˇ laˇ˗eu gaˇ ma pah dahˇ nehˬ gaˇ duˇ˗eu meh. (Maꞈtehˬ 12:43-45 nehˬ˗ehˇ sheu cehˆ.) Toˆ˗ehˇ jahˇ˗eu teu naˇ nui saˇ bi za gaˇ duˇ kʼawꞈ, teu naˇ Yeˬhawˇbaˬ jawˇ gaˇ neh za˗euˬ nui saˇ oꞈ˗eu jeˬ nehˬ˗ehˇ maˬ sheu cehˆ laˇ nya˗a. Yeˬhawˇbaˬ˗euˬ nui saˇ oꞈ˗eu jeˬ heu aˬ yawꞈ˗ahˇ gʼoe˗eu deuˬ˗ahˇ tehꞈ˗ehˇ biꞈ˗eu meh. Aˬ yawꞈ maꞈ dehꞈ ziˇ laꞈ kʼoeˇ kʼaˆ dui dui˗eu shaˬ zahˬ˗ahˇ ya puˬ ngeh kʼawꞈ, Yeˬhawˇbaˬ aˬ yawꞈ maꞈ˗ahˇ aˬ myah luꞈ “byah dui dui˗eu nui saˇ oꞈ˗eu jeˬ” biꞈ˗eu meh. (Iˇsaˬyaˇ 26:3-ahˇ gui.) Yeˬhawˇbaˬ aˬ dui˗ahˇ nui ma bi saˇ laˇ ni caw ba nehˬ˗eh tiˬ jeˬ naˇ, gʼaˬ bi ahˇ laˇ˗eu Jaˇliꞈ aˇ deuˆ deuˬ˗ahˇ noeˬ mawˇ nya ni caw ba nehˬ˗eu heu meh. Jaˇliꞈ aˇ deuˆ heu deuˬ naˇ, Yeˬhawˇbaˬ aˬ dui˗ahˇ gaˬ˗awˇ ngehˬ gʼeh nehˬ meh lehˇ bi siˬ laꞈ˗eu miˇ neh, aˬ dui˗ahˇ nui ma bi saˇ laˇ˗eu meh.—Ja ceuˬ 62:1, 2.

6. Aˬ dui guiˬ lahˬ shaˇ ngeh aˬ jeˬ jeˇ lehˇ shaˇ nya˗eu nga? (Aˇ baˇ˗ahˇ jiˇ haw.)

⁶ Jahˇ nya˗eu jeˬ. Shaˬ zahˬ˗ahˇ ya puˬ ngeh, “nawˬ˗euˬ shaˬ zahˬ Sahˬpaˬ Miˬyehˇ jawˇ gaˇ taˬ˗awˬ” nui saˇ oꞈ˗eu jeˬ biꞈ nehˬ laꞈ lehˇ guiˬ lahˬ shaˇ˗awˬ. (Ja ceuˬ 55:22) Kʼoeˇ naˇ ya puˬ˗eu shaˬ zahˬ˗ahˇ kamˬ daˬ coeˇ ni zaˬ siˬ nui gahˇ jiˇ biꞈ nehˬ laꞈ lehˇ guiˬ lahˬ shaˇ˗awˬ. (Dawˬdaˬ 2:10, 11) Kamˬ daˬ coeˇ ni Yeˬhawˇbaˬ˗ahˇ guiˬ lahˬ shaˇ ngeh, aˬ yawꞈ˗ahˇ guiˬ lahˬ huiˬ˗eu jiˇ taˬ ngehˇ. (Piˇliˇpiˆ 4:6) Aˬ yawꞈ nah yawꞈ Yeˬhawˇbaˬ nawˬ˗ahˇ aˬ joˆ˗ehˇ caw ba nga lehˇ haw˗awˇ, teu˗euˬ gʼaˇ duˬ guiˬ lahˬ huiˬ. Ya puˬ luꞈ˗eu shaˬ zahˬ baˬ da neh, za luꞈ˗eu yaw muiˬ jeˬ˗ahˇ maˬ haw mawˇ nya ni taˬ gʼeh.—Ja ceuˬ 16:5, 6.

Jaˇliꞈ

7. Jaˇliꞈ˗ahˇ pyehˆ tseˇ˗eu heu naˇ, aˬ dui˗ahˇ kamˬ daˬ coeˇ ni aˬ joˆ˗ehˇ caw ba nehˬ˗eu nga?

⁷ Yeˬhawˇbaˬ aˬ dui˗ahˇ kamˬ daˬ coeˇ ni caw ba nehˬ˗eu gʼaˇ duˬ, Jaˇliꞈ biꞈ nehˬ taˬ˗euˬ meh. Aˬ yawꞈ aˬ dui˗ahˇ caw ba nehˬ mawꞈ˗eu lehˇ bi siˬ laˇ˗eu Jaˇliꞈ aˇ deuˆ gʼawˬ mya ni jaˆ˗eu meh. Yaw jeˬ ma jeˬ, Maꞈtehˬ 6:8-ahˇ “Naw maꞈ maˬ shaˇ mi naˆ˗ehˇ, kʼaˇ loˬ˗eu jeˬ naw maꞈ˗euˬ Aˬda siˬ nya luꞈ meh” lehˇ ehˇ taˬ˗euˬ meh. Dawˬ heu naˇ, Yeˬhawˇbaˬ˗ahˇ yaw muiˬ˗ehˇ siˬ nya˗eu Yeˬsuˇ˗euˬ dawˬ pyeuꞈ meh. Teu miˇ neh aˬ dui shaˬ zahˬ˗ahˇ ya puˬ ngeh, aˬ dui laꞈ kʼoeˇ loˬ˗eu jeˬ˗ahˇ Yeˬhawˇbaˬ siˬ nya meh lehˇ aˬ dui jah ziꞈ nya meh. Aˬ dui˗ahˇ shaˬ zahˬ˗ahˇ kamˬ daˬ coeˇ ni caw ba nehˬ˗eu heu loꞈ˗ehˇ gʼaˬ biꞈ˗eu Jaˇliꞈ aˇ deuˆ deuˬ gʼawˬ mya ni paˇ jaˆ˗a siˬ.—Ja ceuˬ 94:19.

8. (a) Shaˬ zahˬ˗ahˇ ya puˬ ngeh, Jaˇliꞈ aˬ dui˗ahˇ aˬ joˆ˗ehˇ jahˇ lehˇ ehˇ taˬ˗euˬ nga? (b) Loˬ ngeh aˬ dui˗ahˇ Jaˇliꞈ zahˇ˗ahˇ noeˬ doˆ laˇ ni caw ba nehˬ˗eu jeˬ naˇ, aˬ jeˬ nga?

⁸ Jaˇliꞈ mehˬ˗eu jeˬ aˬ dui˗ahˇ sahˬ zahˬ˗ahˇ kamˬ daˬ coeˇ ni caw ba nehˬ nya˗eu meh. Kʼoeˇ naˇ aˬ dui yaw muiˬ˗ehˇ noeˬ tsehˆ nya ni zaˬ siˬ nui gahˇ jiˇ biꞈ nehˬ laꞈ˗eu meh. (Dawˬdaˬ 2:6, 7) Yaw jeˬ ma jeˬ, pyeuꞈ laˇ maˬ pyeuꞈ laˇ˗eu lehˇ jiˇ maˬ siˬ nya˗eu gaˇ kawˆ deuˬ˗ahˇ aˬ dzehˬ dzeuˇ ni maˬ kʼahˬ lahˇ ni aˬ yawꞈ nah yawꞈ˗euˬ gʼaˇ duˬ tehꞈ˗ehˇ shaˇ noeˬ lehˇ Jaˇliꞈ laꞈ kʼoeˇ ehˇ taˬ˗euˬ meh. (Maꞈtehˬ 6:34) Aˬ dui yawˬ nah na luꞈ Jaˇliꞈ gui˗awˇ shaˇ noeˬ shaˇ sawˇ naˇ, shaˬ zahˬ˗ahˇ ya puˬ ngeh Jaˇliꞈ aˇ deuˆ deuˬ˗ahˇ yaw awˬ˗ehˇ noeˬ doˆ laˇ nya˗eu meh.

9. Jaˇliꞈ laꞈ kʼoeˇ˗euˬ gaˇ kawˆ heu naˇ, Yeˬhawˇbaˬ aˬ dui˗ahˇ caw ba nehˬ laꞈ meh lehˇ aˬ joˆ˗ehˇ bi jah ziꞈ laꞈ˗eu nga?

⁹ Kʼoeˇ naˇ Jaˇliꞈ laꞈ kʼoeˇ Yeˬhawˇbaˬ˗ahˇ nui ma taˬ˗awˇ, aˬ dui loꞈ˗ehˇ Yeˬhawˇbaˬ neh caw ba nehˬ˗eu jeˬ˗ahˇ za˗euˬ gaˇ kawˆ jiˇ boꞈ ahˇ taˬ˗eu meh. (Heˬbyehˇ 11:32-34; Yaˬkoˆ 5:17) Aˬ dui gaˇ kawˆ heu deuˬ˗ahˇ shaˇ noeˬ shaˇ sawˇ˗awˇ gui ngeh, Yeˬhawˇbaˬ “aˬ dui˗euˬ gʼoe duˬ hawˇ˗eu aˬ dui˗euˬ gʼaˬ pyeuꞈ˗awˇ, shaˬ˗eu zahˬ˗eu aˇ yamˬ laꞈ kʼoeˇ, aˬ dui˗ahˇ caw ba nehˬ laꞈ˗eu meh” lehˇ jah ziꞈ dzehˬ laˇ˗eu meh. (Ja ceuˬ 46:1) Shaˬ zahˬ tseˇ jeˬ yaˇ jeˬ laꞈ kʼoeˇ neh, Yeˬhawˇbaˬ˗ahˇ saˇ jaˇ ziꞈ laꞈ˗euˬ gaˇ kawˆ˗ahˇ shaˇ noeˬ shaˇ sawˇ ngeh, aˬ yawꞈ maꞈ˗euˬ nui jah hawˇ˗eu kamˬ daˬ coeˇ˗eu jeˬ˗ahˇ dzaw geuꞈ mawꞈ laˇ˗eu meh.—Yaˬkoˆ 5:10, 11.

10. Jaˇliꞈ˗ahˇ neh gaˇ dahˇ tsoeˬ˗eu jeˬ za˗eu gʼaˇ duˬ, aˬ jeˬ jahˇ nya˗eu nga?

¹⁰ Jahˇ nya˗eu jeˬ. Yawˬ nah na luꞈ Jaˇliꞈ gui. Nawˬ˗ahˇ caw ba nehˬ nya˗eu Jaˇliꞈ aˇ deuˆ deuˬ boꞈ taˬ. Mehˇ nmˇ gʼawˬ mya ni uˬ shawˬ paw yawˬ nah na luꞈ Jaˇliꞈ aˇ deuˆ gui˗eu heu naˇ, nah ga ni Jaˇliꞈ˗ahˇ noeˬ mawˇ nya ni caw ba nehˬ laꞈ nya lehˇ ehˇ˗eu meh. Teu loꞈ˗ehˇ noeˬ˗eu tiˬ gʼaˬ naˇ, mehˇ nmˇ Mehˇliˬa pyeuꞈ meh. Mehˇliˬ˗euˬ aˬ da aˬ ma nyiˬ gʼaˬ luꞈ aˬ yawꞈ tiˬ yamˬ laꞈ kʼoeˇ tehꞈ˗ehˇ kiꞈsaˬ (ma le) naˇ gawˇ naˇ˗eu meh. Mehˇliˬ aˬ yawꞈ˗euˬ aˬ da aˬ ma shiˇ ngeh keuˆ ni haw shaˆ nehˬ˗euˬ meh. Teu ngeh aˬ yawꞈ˗ahˇ kamˬ coeˇ ni caw ba nehˬ˗eu jeˬ naˇ aˬ jeˬ nga? Aˬ yawꞈ heu loꞈ˗ehˇ ehˇ˗eu meh. “Ngaˇ yawˬ shawˬ na luꞈ yawˬ nah na luꞈ˗euˬ Jaˇliꞈ aˇ deuˆ gui˗awˇ shaˇ noeˬ shaˇ sawˇ˗eu ma. Teu naˇ ngaˬ˗ahˇ yawˬ ha˗euˬ shaˬ zahˬ tehꞈ˗ehˇ shaˇ noeˬ shaˇ noeˬ˗ehˇ maˬ jawˇ ni teu naˆ maˬ tseˇ aˇ yeˇ huiˬ˗eu jeˬ pyeuꞈ˗eu Miˬyehˇ˗euˬ gaˇ kawˆ˗ahˇ shaˇ noeˬ ni caw ba nehˬ laꞈ˗euˬ meh.”—Ja ceuˬ 61:2.

Mehˇ nmˇ

11. Shaˬ zahˬ˗ahˇ tiˬ gʼaˬ tehꞈ˗ehˇ ya daˬ˗eu maˬ ngeuˇ˗eu lehˇ ya siˬ˗eu heu naˇ gʼaˬ aˬ joˆ˗ehˇ bi ahˇ laˇ˗eu nga?

¹¹ Yeˬhawˇbaˬ aˬ dui kamˬ daˬ coeˇ˗eu gʼaˇ duˬ, mehˇ nmˇ deuˬ biꞈ nehˬ taˬ˗euˬ meh. ‘Miˇ tsaˬ kʼoeˇ taˆ kʼaˇ jawˇ˗eu Ka li˗ahˇ jah˗eu cawˬ dawˬ tawˆ luꞈ, kʼoeˇ loꞈ˗ehˇ ya daˬ luꞈ meh’ lehˇ siˬ nya taˬ˗eu heu naˇ, shaˬ zahˬ˗ahˇ tiˬ gʼaˬ tehꞈ˗ehˇ ya daˬ luꞈ˗eu maˬ ngeuˇ nya lehˇ bi noeˬ laˇ˗awˇ gʼaˬ bi ahˇ laˇ˗eu meh. (1 Beˬtuˆluˆ 5:9) Maˇ diˇ naˇ, aˬ dui ya puˬ˗eu shaˬ zahˬ heu˗ahˇ mehˇ nmˇ nui deuˬ jiˇ ya puˬ˗awˇ kamˬ daˬ nya˗euˬ meh. Teu miˇ neh aˬ dui jiˇ ziꞈ dah ni kamˬ daˬ nya ngaˇ lehˇ jah nya meh.—Gʼaˬkʼehˇ 14:22.

12. Nui jah taꞈ˗eu mehˇ nmˇ deuˬ tiˬ gʼaˬ tiˇ gʼaˬ aˬ joˆ˗ehˇ caw ba nehˬ nya˗eu nga? (2 Gawˇliˬtu 1:3, 4)

¹² Aˬ dui shaˬ zahˬ ya puˬ luꞈ ngeh, mehˇ nmˇ deuˬ aˬ dui˗ahˇ gʼaˬ biꞈ nehˬ nya meh. Gʼaˬ kʼehˇ Pawˇluˆ gaˇ kawˆ heu˗ahˇ ya puˬ˗euˬ meh. Pawˇluˆ iˇ kahˇ˗ahˇ bi kaꞈ lahˇ taˬ˗euˬ ngeh, mehˇ nmˇ deuˬ aˬ yawꞈ˗ahˇ gʼaˬ biꞈ˗awˇ caw ba nehˬ˗euˬ meh. Pawˇluˆ aˬ yawꞈ˗ahˇ caw ba laˇ˗euˬ mehˇ nmˇ deuˬ˗euˬ tsawˇ myahˇ˗ahˇ ngehˬ keuˆ ngehˬ keuˆ˗ehˇ guiˬ lahˬ huiˬ˗eu meh. (Piˇliˇpiˆ 2:25, 29, 30; Gawˇlawˇsehˇ 4:10, 11) Nymˬ˗mˇ iˬ nah jiˇ shaˬ zahˬ˗ahˇ ya puˬ ngeh, kamˬ daˬ coeˇ˗eu gʼaˇ duˬ, mehˇ nmˇ deuˬ caw ba nehˬ laꞈ˗eu meh. Aˬ yawꞈ maꞈ shaˬ zahˬ puˬ ngeh jiˇ aˬ dui caw ba nehˬ˗eu ma.—2 Gawˇliˬtu 1:3, 4-ahˇ gui.

13. Mehˇ nmˇ Maˬzaˬ aˬ jeˬ baˬ da neh kamˬ daˬ coeˇ laˇ˗euˬ nga?

¹³ Mehˇ nmˇ deuˬ neh gʼaˬ biꞈ˗euˬ jeˬ˗ahˇ za˗euˬ Laˇsiˬ˗yaˬ miˇ kʼahˬ˗ahˇ jawˇ˗eu mehˇ nmˇ Maˬzaˬ˗euˬ gaˇ kawˆ˗ahˇ haw ma. 2020 kʼoꞈ˗ahˇ mehˇ nmˇ Maˬzaˬ˗euˬ iˇ kahˇ˗ahˇ yehˇ deuˬ oe˗awˇ goˬ le˗euˬ meh. Aˇ nah naˇ, aˬ yawꞈ aˬ cawˬ˗ahˇ guiˬ lahˬ dawˬ tsaꞈ gaˬ˗eu baˬ da neh, saˇ naˇ˗ahˇ ya daˆ˗iˇ˗euˬ meh. Maˬzaˬ heu loꞈ˗ehˇ ehˇ˗eu meh. “Teu ngeh ngaˬ˗ahˇ nui ma gʼawˇ mawˇ dawˬ tawˆ luꞈ gʼaˬ doeˇ doeˇ˗eu lehˇ miˇ˗a. Ehˇ kʼawꞈ mehˇ nmˇ deuˬ ngaˬ˗ahˇ naˬ gaˬ ngehˬ laꞈ, sahˬ boꞈ sha laꞈ lehˇ maˬ siˬ˗ehˇ jahˇ jahˇ˗ehˇ ngaˬ˗ahˇ zawˇ˗ehˇ gaˬ nya lehˇ ehˇ˗eu meh. Ngaˇ tiˬ gʼaˬ tiˇ gʼaˬ zawˇ˗ehˇ gaˬ˗eu nymˇ jiˇ jiˇ ma laꞈ kʼoeˇ jawˇ luꞈ˗eu lehˇ yaw beh neh siˬ nya ma. Ehˇ kʼawꞈ 2020 kʼoꞈ˗ahˇ ngaˇ mehˇ nmˇ deuˬ˗euˬ nui gaˬ˗ahˇ paˇ ya mawˇ duˬ dzehˬ˗euˬ ma.”

14. Mehˇ nmˇ deuˬ˗ahˇ neh caw ba˗eu jeˬ za˗eu gʼaˇ duˬ aˬ jeˬ jahˇ nya˗eu nga? (Aˇ baˇ˗ahˇ jiˇ haw.)

¹⁴ Jahˇ nya˗eu jeˬ. Nawˇ ya puˬ˗eu shaˬ zahˬ˗ahˇ kamˬ daˬ coeˇ˗eu gʼaˇ duˬ, mehˇ nmˇ deuˬ nehˬ˗ehˇ aˇ yamˬ biꞈ˗awˇ cawˬ ya cawˬ taꞈ˗eu meh. Aˇ muˇ˗ahˇ sheuˬ gʼeh˗eu deuˬ˗ahˇ caw ba jeˬ shaˇ˗eu maˬ ya nyi naˬ˗a. Aˬ yawꞈ maꞈ naˇ, “jaˬ lehˇ baw ngeh naˬ duˬ loꞈ˗ehˇ pyeuꞈ˗awˇ, mˬ jeˬ jaˬ lehˇ huiˬ ngeh awˆ duˬ˗ahˇ duˇ˗eu meh.” (Iˇsaˬyaˇ 32:2) Mehˇ nmˇ deuˬ jiˇ nawˇ loꞈ˗ehˇ shaˬ zahˬ tiˬ jeˬ maˬ ngeuˇ naˇ tiˬ jeˬ ya puˬ luꞈ meh lehˇ maˬ ya ngehˇ˗a. Caw ba˗eu jeˬ loˬ˗eu mehˇ nmˇ deuˬ˗ahˇ caw ba nehˬ naˇ, nawˬ˗ahˇ laˬ kʼaˬ cehˇ laˇ˗eu meh. Heu naˇ, yawˬ ha˗euˬ shaˬ zahˬ˗ahˇ tehꞈ˗ehˇ maˬ bi haw tsoˆ taˬ˗eu miˇ neh, kamˬ daˬ coeˇ laˇ˗eu meh.—Gʼaˬkʼehˇ 20:35.

Mehˬ hu paw˗euˬ noeˬ tmˬ˗eu jeˬ

15. Noeˬ tmˬ˗eu jeˬ Yeˬsuˇ hawˇ˗eu aˬ dui˗ahˇ aˬ joˆ˗ehˇ caw ba nehˬ˗eu nga? (Heˬbyehˇ 12:2)

¹⁵ Yeˬhawˇbaˬ aˬ dui shaˬ zahˬ˗ahˇ bi kamˬ daˬ coeˇ˗eu gʼaˇ duˬ, mehˬ hu paw noeˬ tmˬ˗eu jeˬ biꞈ nehˬ taˬ˗euˬ meh. (Loˇmaˆ 15:13) Yeˬsuˇ noeˬ tmˬ˗eu jeˬ˗ahˇ haw tsoˆ taˬ˗euˬ miˇ neh, miˇ tsaˬ kʼoeˇ taˆ dehꞈ saˬ saˬ ngeh nah˗ahˇ ya puˬ˗euˬ shaˬ zahˬ deuˬ˗ahˇ aˬ joˆ˗ehˇ ciˬ daˬ nya˗euˬ nga lehˇ noeˬ mawˇ haw. (Heˬbyehˇ 12:2-ahˇ gui.) Yeˬsuˇ aˬ yawꞈ saˇ jaˇ ziꞈ naˇ, Yeˬhawˇbaˬ˗euˬ tsawˇ myahˇ˗ahˇ muiˬ ni shawˇ ni mˇ˗eu jeˬ pyeuꞈ meh lehˇ siˬ nya˗eu meh. Yeˬsuˇ aˬ yawꞈ˗euˬ mˬ taˆ Aˬda nehˬ˗ehˇ ya mawˇ dzoeˇ˗eu aˇ yamˬ˗ahˇ noeˬ mawˇ˗eu meh. Tseˇ doˆ taˬ˗euˬ Ka li zaˬ deuˬ nehˬ˗ehˇ tiˬ kawˆ loꞈ˗ehˇ ya uˆ lahˇ˗eu aˇ yamˬ˗ahˇ noeˬ mawˇ˗eu meh. Teu gaˇ duˇ ni, miˇ shuiꞈ˗ahˇ mˬ maˬ maˬ byaˆ zaˇ ziˇ ya dehꞈ gʼeh˗eu noeˬ tmˬ˗eu jeˬ heu naˇ, aˬ dui˗ahˇ Saˬdaˬ miˇ tsaˬ˗ahˇ ya puˬ˗eu aˬ joˆ˗ehˇ gʼeh˗eu shaˬ zahˬ˗ahˇ maˬ kaˬ, kamˬ daˬ coeˇ ni caw ba nehˬ laꞈ˗eu meh.

16. Noeˬ tmˬ˗eu jeˬ mehˇ nmˇ aˬ buˇ tiˬ gʼaˬ˗ahˇ kamˬ daˬ coeˇ ni aˬ joˆ˗ehˇ caw ba nehˬ˗euˬ nga? Aˬ yawꞈ˗euˬ dawˬ˗ahˇ neh aˬ jeˬ dzaw geuꞈ nya˗eu nga?

¹⁶ Mehˬ hu paw˗euˬ noeˬ tmˬ˗eu jeˬ heu naˇ, Laˇsiˬ˗yaˬ˗euˬ miˇ kʼahˬ˗ahˇ˗euˬ mehˇ nmˇ Aˬlaˬ˗ahˇ aˬ joˆ˗ehˇ caw ba nehˬ˗euˬ nga lehˇ haw ma. Aˬ yawꞈ˗euˬ kʼaˬ dzeˇ zaˬ bi nyehꞈ˗awˇ gaˇ kawˆ maˬ pyehˆ tseˇ mi naˆ˗ehˇ bi kaꞈ lahˇ taˬ˗euˬ meh. Aˬ yawꞈ heu loꞈ˗ehˇ ehˇ˗eu meh. “Guiˬ lahˬ shaˇ˗eu jeˬ hawˇ˗eu mehˬ hu paw˗euˬ noeˬ tmˬ˗eu jeˬ˗ahˇ shaˇ noeˬ shaˇ sawˇ˗eu heu naˇ, ngaˬ˗ahˇ gʼaˬ maˬ bi baˬ ni caw ba nehˬ laꞈ˗euˬ meh. Shaˬ zahˬ tiˬ jeˬ jiˇ naˇ tiˬ jeˬ laˇ meh lehˇ ngaˇ siˬ nya ma. Ehˇ kʼawꞈ uˬ duˬ duˬ leˇ ngeh, Yeˬhawˇbaˬ gʼaˬ leˇ˗eu meh. Aˬ dui jiˇ saˇ jaˇ ziꞈ˗eu laꞈ kʼoeˇ kamˬ daˬ naˇ, laꞈ sawˬ za˗eu yaw duˬ baw meh.”

17. Miˬyehˇ neh biꞈ˗euˬ noeˬ tmˬ˗eu jeˬ gʼaˇ duˬ guiˬ lahˬ huiˬ˗eu lehˇ aˬ joˆ˗ehˇ mˇ mawˇ nya˗eu nga? (Aˇ baˇ˗ahˇ jiˇ haw.)

¹⁷ Jahˇ nya˗eu jeˬ. Mehˬ hu paw˗euˬ noeˬ tmˬ˗eu jeˬ˗euˬ gaˇ kawˆ˗ahˇ aˇ yamˬ yuˇ˗awˇ yaw muiˬ˗ehˇ shaˇ noeˬ shaˇ sawˇ. Miˇ shuiꞈ˗ahˇ za˗eu dehꞈ ziˇ hawˇ˗eu guiˬ lahˬ deuˬ˗ahˇ noeˬ mawˇ haw. Toˆ˗ehˇ jahˇ naˇ, nymˬ˗mˇ mehˬ kʼehˬ˗ahˇ ya puˬ luꞈ˗eu shaˬ zahˬ heu naˇ, ‘tiˬ kʼehˬ tiˬ yamˬ laꞈ kʼoeˇ ya daˬ luꞈ˗eu ehˇ nyaꞈ maˬ nyeuˆ˗eu shaˬ zahˬ’ tehꞈ nya noeˬ laˇ˗eu meh. (2 Gawˇliˬtu 4:17) Kʼoeˇ naˇ, noeˬ tmˬ˗eu jeˬ gaˇ kawˆ aˬ cawˬ deuˬ˗ahˇ jiˇ kʼaˇ gʼeh nya gaˇ neh dzawˇ nehˬ. Miˬyehˇ neh biꞈ˗euˬ mehˬ hu paw˗euˬ noeˬ tmˬ˗eu jeˬ˗ahˇ maˬ siˬ nya ni Saˬdaˬ˗euˬ miˇ tsaˬ˗ahˇ shaˬ luꞈ˗eu deuˬ aˬ joˆ˗ehˇ pyeuꞈ luꞈ paˬ nga lehˇ shaˇ noeˬ haw sheˇ. Aˬ yawꞈ maꞈ˗ahˇ noeˬ tmˬ˗eu jeˬ gaˇ kawˆ ui cuiˆ na tehꞈ˗ehˇ dzawˇ nehˬ˗euˬ kʼawꞈ, aˬ yawꞈ maꞈ gaˇ kawˆ teu˗ahˇ teu naˆ maˬ tseˇ siˬ nya mawꞈ dzehˬ laˇ˗eu kʼawꞈ pyeuꞈ nya meh.

18. Yeˬhawˇbaˬ˗euˬ saˇ jaˇ dawˬ˗ahˇ aˬ jeˬ miˇ neh jah ziꞈ nya˗eu nga?

¹⁸ Yawˇbaˆ shaˬ zahˬ gʼawˬ mya jeˬ˗ahˇ daˬ dzeuˇ gʼaˬ ngeh, Yeˬhawˇbaˬ˗ahˇ “Sahˬpaˬ Miˬyehˇ˗oˇ, nawˇ baoˬ dawˬ tawˆ luꞈ jaˆ˗awˇ, kʼaˇ mˇ mawꞈ˗eu jeˬ mˇ nya meh lehˇ ngaˇ siˬ nya ma” lehˇ ehˇ nehˬ˗euˬ meh. (Yawˇbaˆ 42:2) Yawˇbaˆ˗ahˇ Yeˬhawˇbaˬ neh noeˬ taˬ˗euˬ jeˬ maˬ bi byah laˇ ni tiˬ jeˬ˗i maˬ laˆ tsoeˬ laˇ nya nga lehˇ gʼoˆ shaw leˇ˗euˬ meh. Aˬ dui jiˇ gaˇ kawˆ heu˗ahˇ gʼoˆ shaw naˇ, kamˬ daˬ coeˇ laˇ˗eu meh. Yaw jeˬ ma jeˬ, aˬ buˇ tiˬ gʼaˬ saˬ laˬ gʼoˬ aˇ myaˆ gʼaˬ jawˇ gaˇ iˇ˗euˬ kʼawꞈ, aˬ yawꞈ˗euˬ naˇ gawˇ tiˬ gʼaˬ˗iˬ maˬ laˆ saˆ taˬ nehˬ nya˗eu miˇ neh, nui ma cawˆ luꞈ˗eu lehˇ ehˇ˗awˬ. Aˇ nah naˇ, nya dui dui˗eu saˬ laˬ gʼoˬ tiˬ gʼaˬ˗ahˇ ya mawˇ˗euˬ meh. Saˬ laˬ gʼoˬ teu gʼaˬ aˬ yawꞈ˗ahˇ naˇ gawˇ teu naˇ aˬ joˆ˗ehˇ pyeuꞈ laˇ˗awˇ, byoˆ˗iˇ ni aˬ joˆ˗ehˇ ya laˆ saˆ˗eu lehˇ dzawˇ nehˬ˗euˬ lehˇ ehˇ˗awˬ. Teu˗ahˇ ya siˬ ngeh, naˇ gawˇ byoˆ˗iˇ˗eu gʼaˇ duˬ, tiˬ kʼehˬ ya dawˬ kʼawꞈ aˬ yawꞈ˗ahˇ laˬ kʼaˬ cehˇ dui dui leˇ˗euˬ meh. Aˬ yawꞈ˗euˬ naˇ gawˇ byoˆ˗iˇ˗eu noeˬ tmˬ˗eu jeˬ jaˆ laˇ˗euˬ miˇ neh, kamˬ daˬ coeˇ laˇ˗euˬ meh. Teu gaˇ duˇ ni mehˬ hu paw noeˬ tmˬ˗eu jeˬ˗ahˇ jah ziꞈ˗eu heu naˇ, aˬ dui˗ahˇ kamˬ daˬ coeˇ ni caw ba nehˬ laꞈ˗eu meh.

19. Kamˬ daˬ coeˇ˗eu gʼaˇ duˬ aˬ jeˬ jeˇ loˬ˗eu nga?

¹⁹ Aˬ dui heu kawˆ laꞈ kʼoeˇ Yeˬhawˇbaˬ aˬ dui˗ahˇ kamˬ daˬ coeˇ ni caw ba nehˬ˗eu gʼaˇ duˬ, guiˬ lahˬ shaˇ˗eu jeˬ uˬ taꞈ, Jaˇliꞈ hawˇ˗eu mehˇ nmˇ deuˬ maˬ ehˇ, mehˬ hu paw noeˬ tmˬ˗eu jeˬ maˬ ehˇ, biꞈ nehˬ taˬ˗euˬ lehˇ ya siˬ˗euˬ ma. Aˬ dui Yeˬhawˇbaˬ neh lehˬ hmˬ nehˬ taˬ˗euˬ jeˬ heu deuˬ˗ahˇ yaw muiˬ˗ehˇ zmˬ naˇ, Saˬdaˬ˗euˬ miˇ tsaˬ aˇ saˬ maˬ saˬ˗euˬ kʼoeˇ keuˆ ni ya puˬ˗eu shaˬ zahˬ deuˬ˗ahˇ Yeˬhawˇbaˬ caw ba˗eu jeˬ baˬ da neh kamˬ daˬ coeˇ laˇ˗eu meh.—Piˇliˇpiˆ 4:13.