Yeˬhawˇbaˬ nawˬ˗ahˇ iˬ baˇ pyehˬ meh lehˇ jah

1-2. Yeˬhawˇbaˬ aˬ dui˗ahˇ iˬ baˇ pyehˬ˗eu lehˇ ya siˬ ngeh aˬ dui˗ahˬ aˬ joˆ˗ehˇ gʼeh laˇ˗eu nga? (Sahˬ boꞈ baˆ kʼoˆ˗euˬ aˇ baˇ˗ahˇ jiˇ haw.)

Sahˬ paˬ Daˬbiˇ iˬ baˇ mˇ˗euˬ miˇ neh nui ma cawˆ˗eu jeˬ heu naˇ, aˇ naˆ ni doeˇ˗eu lehˇ siˬ nya˗eu meh. (Ja ceuˬ 40:12; 51:3) Aˬ yawꞈ huiˬ˗eu iˬ baˇ tiˬ jeˬ na mˇ˗euˬ meh. Ehˇ kʼawꞈ aˬ yawꞈ maˇ diˇ noeˬ poˆ noeˬ paˇ ngeh Yeˬhawˇbaˬ aˬ yawꞈ˗ahˇ iˬ baˇ pyehˬ nehˬ˗euˬ meh. (2 Saˬmeuˬlaˆ 12:13) Teu miˇ neh Daˬbiˇ Yeˬhawˇbaˬ neh iˬ baˇ pyehˬ nehˬ laꞈ˗euˬ jeˬ heu naˇ, aˇ naˆ ni nui ma bi saˇ laˇ˗awˇ laˬ kʼaˬ bi cehˇ laˇ˗eu lehˇ ya siˬ˗euˬ meh.—Ja ceuˬ 32:1.

² Aˬ dui jiˇ Yeˬhawˇbaˬ neh iˬ baˇ pyehˬ˗eu jeˬ˗ahˇ za ngeh, Daˬbiˇ loꞈ˗ehˇ nui ma saˇ nya˗awˇ laˬ kʼaˬ cehˇ nya˗eu meh. Aˬ dui yawˬ ha˗euˬ iˬ baˇ ja doˆ˗awˇ, maˇ diˇ noeˬ poˆ noeˬ paˇ naˇ, maˬ mˇ kʼoꞈ˗iˇ˗eu gʼaˇ duˬ kʼaˇ gʼeh nya gaˇ neh leh jeh naˇ, aˇ naˆ ni huiˬ˗eu iˬ baˇ pyeuꞈ kʼawꞈ, Yeˬhawˇbaˬ nui ma keuˆ˗eu laꞈ kʼoeˇ iˬ baˇ pyehˬ nehˬ˗eu lehˇ ya siˬ˗eu heu naˇ, aˬ dui˗ahˇ gʼaˬ za laˇ dui dui miˇ˗a. (Dawˬdaˬ 28:13; Gʼaˬkʼehˇ 26:20; 1 Yoˇhaˬ 1:9) Kʼoeˇ naˇ Yeˬhawˇbaˬ aˬ dui˗ahˇ iˬ baˇ pyehˬ nehˬ laꞈ ngeh, aˬ dui iˬ baˇ tiˬ jawˇ˗iˬ maˬ mˇ haw˗euˬ loꞈ˗ehˇ maˇ diˇ pyehˬ nehˬ˗eu lehˇ ya siˬ˗eu miˇ neh jiˇ laˬ kʼaˬ cehˇ miˇ˗a.—Yeˬsaˬgeˬlaˇ 33:16.

3-4. Jehˇniˬpeuˬ iˇ cuꞈ shawˇ dzeuˇ˗euˬ kʼawꞈ aˬ joˆ˗ehˇ noeˬ luꞈ˗eu nga? Aˬ dui heu kawˆ laꞈ kʼoeˇ aˬ jeˬ˗euˬ gaˇ kawˆ˗ahˇ ja sawˇ˗eu nga?

³ Tiˬ gʼaˬ na˗aˬ, Yeˬhawˇbaˬ aˬ yawꞈ maꞈ˗ahˇ maˇ diˇ iˬ baˇ pyehˬ meh lehˇ jah˗eu yaw shaˬ kʼawꞈ pyeuꞈ nya meh. Yeˬhawˇbaˬ˗euˬ Saˇ kiˇ˗euˬ nymˇ jiˇ laꞈ kʼoeˇ huiˬ laˇ˗euˬ mehˇ nmˇ Jehˇniˬpeuˬ˗euˬ gaˇ kawˆ˗ahˇ haw ma. Aˬ yawꞈ zaˬ guˬ guˬ dzawˇ dzawˇ laˇ ngeh mehˬ shi naˇ kʼah tiˬ jeˬ lehˇ dehꞈ˗awˇ, huiˬ˗eu iˬ baˇ mˇ˗euˬ meh. Ehˇ kʼawꞈ myaˆ kʼoꞈ naˇ, aˬ yawꞈ dehꞈ poˆ dehꞈ paˇ˗awˇ Yeˬhawˇbaˬ˗ahˇ a nehˬ˗awˇ iˇ cuꞈ shawˇ˗euˬ meh. Aˬ yawꞈ heu loꞈ˗ehˇ ehˇ˗eu meh. “Dzeuˇ yaꞈ ngeh ngaˇ yehˬ bawˬ sehˇ lu˗ehˇ dehꞈ yaꞈ˗euˬ ma. Ngaˇ nui ma pehˇ˗eu aˇ dzehˬ˗ehˇ kawˆ˗awˇ, nah doˆ le ngeh jiˇ baˬ tehꞈ˗ehˇ dawˇ˗euˬ ma. Pyuˇ poˆ gaˇ tehꞈ˗ehˇ kaꞈ gʼa˗awˇ, dehꞈ bahˬ dehꞈ muˆ yaꞈ˗euˬ ma. Ngaˇ guiˬ lahˬ shaˇ˗awˇ dehꞈ poˆ dehꞈ paˇ˗awˇ iˬ baˇ shaˇ pyehˬ naˇ, Yeˬsuˇ˗euˬ ka kʼoꞈ˗eu jeˬ˗ahˇ gʼoe˗awˇ Yeˬhawˇbaˬ iˬ baˇ pyehˬ nehˬ meh lehˇ siˬ nya ma. Ehˇ kʼawꞈ ya ehˇ naˇ, Yeˬhawˇbaˬ ngaˬ˗ahˇ maˇ diˇ iˬ baˇ pyehˬ meh laˬ leˇ heu lehˇ bi noeˬ laꞈ nya.”

⁴ Tiˬ poˆ na nawˬ˗ahˇ dzeuˇ yaꞈ ngeh mˇ˗euˬ iˬ baˇ˗ahˇ Yeˬhawˇbaˬ maˇ diˇ iˬ baˇ pyehˬ meh lehˇ jah˗eu yaw shaˬ miˇ˗a laˬ? Yeˬhawˇbaˬ aˬ dui˗ahˇ aˬ yawꞈ naˇ gʼawˬ shaˬ gaˬ˗awˇ, iˬ baˇ pyehˬ˗eu lehˇ lehˬ hmˬ deuˇ taˬ˗euˬ lehˇ Daˬbiˇ jah ziꞈ˗euˬ loꞈ˗ehˇ bi jah ziꞈ mawꞈ˗eu meh. Heu kawˆ laꞈ kʼoeˇ aˬ dui Yeˬhawˇbaˬ aˬ dui˗ah maˇ diˇ iˬ baˇ pyehˬ meh lehˇ aˬ jeˬ miˇ neh ya jah˗eu nga? Teu loꞈ˗ehˇ jah nya ni aˬ jeˬ caw ba nehˬ˗eu nga lehˇ ja sawˇ ma.

Yeˬhawˇbaˬ aˬ dui˗ahˇ iˬ baˇ myehˬ meh lehˇ aˬ jeˬ miˇ neh ya jah˗eu nga?

5. Saˬdaˬ aˬ dui˗ahˇ aˬ jeˬ lehˇ bi jah mawꞈ˗eu nga?

⁵ Yeˬhawˇbaˬ aˬ dui˗ahˇ iˬ baˇ pyehˬ meh lehˇ jah naˇ, aˬ dui Saˬdaˬ˗euˬ lahˇ ju˗ahˇ yahˇ pawˇ nya. Aˬ dui Yeˬhawˇbaˬ nehˬ˗ehˇ gʼawˬ˗iˇ ni Saˬdaˬ gʼawˬ mya jeˬ lehˇ zmˬ˗awˇ, kʼaˇ gʼeh nya gaˇ neh leh jeh meh lehˇ taˬ ngehˇ. Saˬdaˬ zmˬ˗eu tiˬ jeˬ naˇ, aˬ dui neh mˇ˗euˬ iˬ baˇ˗ahˇ Yeˬhawˇbaˬ iˬ baˇ maˬ pyehˬ˗a lehˇ noeˬ leˇ ni jahˇ˗eu heu meh. Gawˇliˬtu aˇ muˇ˗ahˇ pyeuꞈ laˇ˗euˬ jeˬ˗ahˇ shaˇ noeˬ haw sheˇ. Mehˇ nmˇ tiˬ gʼaˬ dehꞈ bahˬ dehꞈ muˆ˗euˬ baˬ da neh aˇ muˇ˗ahˇ neh bi teh doˆ˗euˬ meh. (1 Gawˇliˬtu 5:1, 5, 13) Ehˇ kʼawꞈ aˇ nah naˇ aˬ yawꞈ iˬ baˇ noeˬ poˆ noeˬ paˇ ngeh Saˬdaˬ Gawˇliˬtu aˇ muˇ laꞈ kʼoeˇ˗euˬ deuˬ˗ahˇ aˬ yawꞈ˗ahˇ ha kʼoꞈ geuꞈ˗eu maˬ geuˇ˗a, iˬ baˇ pyehˬ nehˬ˗eu maˬ geuˇ˗a lehˇ bi noeˬ mawꞈ˗eu meh. Iˬ baˇ noeˬ poˆ noeˬ paˇ˗euˬ gʼaˬ˗ahˇ jiˇ iˬ baˇ pyehˬ˗eu jeˬ˗ahˇ za˗eu maˬ geuˇ˗a lehˇ bi noeˬ mawꞈ˗eu meh. Saˬdaˬ aˬ yawꞈ˗ahˇ “aˇ dzehˬ dzeuˇ ni noeˬ shaˬ˗awˇ” Yeˬhawˇbaˬ nehˬ˗ehˇ bi gʼawˬ˗iˇ mawꞈ˗eu meh. Nymˬ˗mˇ iˬ nah keuˆ ni Saˬdaˬ neh noeˬ taˬ˗euˬ jeˬ hawˇ˗eu aˬ yawꞈ˗euˬ bawˬ toˆ maˬ paˇ laˇ˗aˬ. Ehˇ kʼawꞈ “aˬ yawꞈ˗euˬ bawˬ toˆ aˬ dui siˬ nya luꞈ ma.”—2 Gawˇliˬtu 2:5-11.

6. Nui ma maˬ saˇ maˇ saˇ˗ehˇ maˬ paˇ gʼeh ni aˬ joˆ˗ehˇ jahˇ nya˗eu nga?

⁶ Yeˬhawˇbaˬ aˬ dui˗ahˇ iˬ baˇ pyehˬ meh lehˇ jah naˇ, aˬ dui nui ma maˬ saˇ ni maˬ paˇ gʼeh. Aˬ myah myah naˇ aˬ dui iˬ baˇ mˇ ngeh nui ma maˬ saˇ ni gʼeh˗eu meh. (Ja ceuˬ 51:17) Teu loꞈ˗ehˇ gʼeh laˇ˗eu teu jiˇ yaw muiˬ meh. Aˬ jeˬ miˇ neh ehˇ naˇ, siˬ nya˗eu nui ma aˬ dui˗ahˇ laˆ poˆ laˆ paˇ mˇ ni laˆ noeˬ nehˬ˗eu miˇ neh. (2 Gawˇliˬtu 7:10, 11) Ehˇ kʼawꞈ aˬ dui iˬ baˇ noeˬ poˆ noeˬ paˇ dzeuˇ˗euˬ kʼawꞈ, nui ma cawˆ cawˆ˗ehˇ jawˇ daˆ leꞈ naˇ gʼaˬ baˬ laˇ˗awˇ Yeˬhawˇbaˬ˗ahˇ byehˇ dzeh laˇ nya˗eu meh. Aˬ dui Yeˬhawˇbaˬ iˬ baˇ pyehˬ meh lehˇ jah coeˇ naˇ, gaˇ hu mˇ lehˬ yaꞈ˗euˬ gaˇ kawˆ byehˇ dzeh yaꞈ nya˗eu meh. Toˆ˗ehˇ naˇ, aˬ dui iˬ baˇ˗euˬ kʼaˆ behˆ yaw kah pi pi˗ehˇ maˬ paˇ ya shaˬ˗eu miˇ neh maˇ diˇ laˬ kʼaˬ cehˇ nya˗eu meh. Yeˬhawˇbaˬ aˬ dui˗ahˇ teu loꞈ˗ehˇ bi gʼeh mawꞈ˗eu meh. (Gawˇlawˇsehˇ 1:10, 11; 2 Tiˆmoˇseˬ 1:3) Toˆ˗ehˇ naˇ Yeˬhawˇbaˬ aˬ dui˗ahˇ iˬ baˇ pyehˬ meh lehˇ jah laˇ ni caw ba nehˬ˗eu jeˬ naˇ aˬ jeˬ nga?

Yeˬhawˇbaˬ iˬ baˇ pyehˬ meh lehˇ jah nya ni a jeˬ ya jahˇ˗eu nga?

7-8. Yeˬhawˇbaˬ Moˇseˬ˗ahˇ aˬ yawꞈ˗aˬ, aˬ joˆ˗ehˇ gʼeh˗eu Miˬyehˇ pyeuꞈ˗eu lehˇ ehˇ nehˬ˗euˬ nga? Heu naˇ aˬ dui˗ahˇ aˬ jeˬ bi jah ziꞈ laꞈ˗eu nga? (Doˆ˗iˇ˗eu 34:6, 7)

⁷ Yeˬhawˇbaˬ aˬ yawꞈ˗euˬ gaˇ kawˆ aˬ joˆ˗ehˇ pah mehˬ taˬ˗euˬ nga lehˇ shaˇ noeˬ haw. Yaw jeˬ ma jeˬ, Yeˬhawˇbaˬ Siˇnaˆ gawˬ jawˬ˗ahˇ Moˇseˬ˗ahˇ aˬ jeˬ ngehˬ nehˬ˗euˬ nga lehˇ haw.a (Doˆ˗iˇ˗eu 34:6, 7-ahˇ gui.) Yeˬhawˇbaˬ muiˬ˗eu seuˆ dzeuꞈ aˇ gʼehˇ gʼawˬ mya ni jaˆ kʼawꞈ, aˬ yawꞈ Moˇseˬ˗ahˇ “Sahˬpaˬ Miˬyehˇ pyeuꞈ˗eu ngaˇ˗aˬ, gʼawˬ shaˬ gaˬ nya˗eu” ma lehˇ ehˇ nehˬ˗euˬ meh. Yeˬhawˇbaˬ gʼawˬ shaˬ gaˬ nya˗eu Miˬyehˇ pyeuꞈ˗eu miˇ neh iˬ baˇ noeˬ poˆ noeˬ paˇ˗euˬ deuˬ˗ahˇ iˬ baˇ maˬ pyehˬ nehˬ˗a lehˇ ehˇ˗eu heu pyeuꞈ leˇ nya ngaˇ laˬ? Yeˬhawˇbaˬ iˬ baˇ maˬ pyehˬ nehˬ naˇ, aˬ yawꞈ˗aˬ gʼawˬ shaˬ maˬ gaˬ˗eu Miˬyehˇ pyeuꞈ meh. Yeˬhawˇbaˬ˗aˬ teu loꞈ˗ehˇ gʼeh˗eu Miˬyehˇ maˬ ngeuˇ˗a.

⁸ Yeˬhawˇbaˬ aˬ yawꞈ˗aˬ gʼawˬ shaˬ gaˬ nya˗eu Miˬyehˇ pyeuꞈ ma lehˇ ehˇ naˇ, teu loꞈ˗ehˇ maˇ diˇ ngeuˇ meh. Aˬ jeˬ miˇ neh ehˇ naˇ, aˬ yawꞈ˗aˬ, yaw tsaˬ yaw dawˇ Miˬyehˇ pyeuꞈ˗awˇ, jaˬ myawꞈ maˬ myawꞈ nya˗a. (Ja ceuˬ 31:5) Teu miˇ neh aˬ dui Yeˬhawˇbaˬ˗euˬ dawˬ˗ahˇ jah nya meh. Aˬ dui aˇ dzehˬ dzeuˇ ni nui ma cawˆ cawˆ˗ehˇ jawˇ luꞈ naˇ, yawˬ ha˗ahˇ heu loꞈ˗ehˇ naˇ haˬ. ‘Ngaˇ gʼawˬ shaˬ gaˬ nya˗eu Yeˬhawˇbaˬ, iˬ baˇ noeˬ poˆ noeˬ paˇ˗euˬ yawˬ gʼaˬ na luꞈ˗ahˇ maˇ diˇ iˬ baˇ pyehˬ meh lehˇ jah miˇ˗a laˬ? Jah naˇ, Yeˬhawˇbaˬ ngaˬ˗ahˇ kʼawꞈ iˬ baˇ pyehˬ meh lehˇ ya jah meh.’

9. Ja ceuˬ 32:5-ahˇ ehˇ taˬ˗euˬ iˬ baˇ pyehˬ˗eu lehˇ ehˇ˗eu heu naˇ, aˬ jeˬ˗ahˇ ehˇ mawꞈ˗eu nga?

⁹ Jaˇliꞈ boꞈ˗eu deuˬ Yeˬhawˇbaˬ iˬ baˇ pyehˬ˗eu jeˬ nehˬ˗ehˇ taꞈ leˇ˗awˇ aˬ joˆ˗ehˇ ngehˬ keuˆ taˬ˗euˬ nga lehˇ shaˇ noeˬ shaˇ sawˇ. Yaw jeˬ ma jeˬ, Daˬbiˇ Yeˬhawˇbaˬ iˬ baˇ pyehˬ˗eu jeˬ nehˬ˗ehˇ taꞈ leˇ˗awˇ aˬ joˆ˗ehˇ ngehˬ taˬ˗euˬ nga lehˇ haw ma. (Ja ceuˬ 32:5-ahˇ gui.) Daˬbiˇ “nawˇ iˬ baˇ pyehˬ nehˬ laꞈ˗euˬ meh” lehˇ ehˇ˗eu meh. “Iˬ baˇ pyehˬ” lehˇ ehˇ˗eu heu dawˬ˗ahˇ Heˬbyehˇ dawˬ paw “ciˬ diˇ˗eu” maˬ ngeuˇ naˇ “baꞈ gʼeh˗eu” lehˇ dawˬ tsuiꞈ jaˆ˗eu meh. Teu miˇ neh Yeˬhawˇbaˬ Daˬbiˇ˗ahˇ iˬ baˇ pyehˬ nehˬ ngeh, aˬ yawꞈ Daˬbiˇ˗euˬ iˬ baˇ˗ahˇ baꞈ diˇ˗awˇ biˬ dzeh gʼeh˗euˬ gaˇ duˇ˗eu meh. Teu baˬ da neh Daˬbiˇ nui ma cawˆ cawˆ˗ehˇ maˬ jawˇ ni nui ma saˇ laˇ nya˗euˬ meh. (Ja ceuˬ 32:2-4) Aˬ dui jiˇ maˇ diˇ iˬ baˇ noeˬ poˆ noeˬ paˇ naˇ teu loꞈ˗ehˇ gʼeh˗eu nui ma saˇ˗eu jeˬ za nya meh. Kah˗eu kʼaˆ behˆ loꞈ˗ehˇ duˇ˗eu huiˬ˗eu iˬ baˇ˗ahˇ Yeˬhawˇbaˬ yuˇ dzeh gʼeh˗euˬ miˇ neh nui ma cawˆ cawˆ˗ehˇ maˬ jawˇ ni nui ma saˇ laˇ nya˗eu meh.

10-11. “Iˬ baˇ pyehˬ˗eu” lehˇ ehˇ˗eu heu dawˬ Yeˬhawˇbaˬ nehˬ˗ehˇ taꞈ leˇ˗awˇ aˬ jeˬ bi siˬ laꞈ˗eu nga? (Ja ceuˬ 86:5)

¹⁰ Ja ceuˬ 86:5-ahˇ gui. Daˬbiˇ Yeˬhawˇbaˬ “iˬ baˇ pyehˬ” meh lehˇ ehˇ taˬ˗euˬ meh. Heu naˇ, aˬ dui mˇ bahˬ ngeh Yeˬhawˇbaˬ nui ma pehˇ˗eu maˬ tehˬ ni iˬ baˇ noeˬ poˆ noeˬ paˇ naˇ iˬ baˇ pyehˬ˗eu gʼaˇ duˬ lehˬ hmˬ deuˇ taˬ˗euˬ lehˇ ehˇ mawꞈ˗eu meh. Aˬ jeˬ miˇ neh toˆ˗ehˇ ehˇ nya˗eu nga? Jaˇliꞈ teu deuˆ˗euˬ jiˇ leˇ dzaˬ˗ahˇ “Nawˬ˗ahˇ guiˬ lahˬ shaˇ˗eu tsawˇ haˬ˗ahˇ maˬ tsehˆ leˇ ni gaˬ˗eu meh” lehˇ ehˇ taˬ˗euˬ meh. Aˬ dui dzeuˇ yaꞈ˗euˬ kawˆ˗ahˇ Yeˬhawˇbaˬ aˬ yawꞈ˗ahˇ gaˬ˗awˇ saˇ jaˇ ziꞈ˗eu deuˬ˗ahˇ ziꞈ dah ni gʼeh˗eu maˬ tsehˆ leˇ˗eu nui gaˬ neh gaˬ meh lehˇ ya siˬ˗euˬ ma. Heu loꞈ˗ehˇ gʼeh˗eu nui gaˬ baˬ da neh Yeˬhawˇbaˬ iˬ baˇ noeˬ poˆ noeˬ paˇ˗euˬ yawˬ gʼaˬ na luꞈ˗ahˇ iˬ baˇ dawˬ tawˆ luꞈ˗ahˇ iˬ baˇ pyehˬ nehˬ˗eu meh. (Iˇsaˬyaˇ 55:7) Yeˬhawˇbaˬ nawˬ˗ahˇ iˬ baˇ pyehˬ meh lehˇ jah˗eu yaw shaˬ naˇ, yawˬ ha˗ahˇ heu loꞈ˗ehˇ naˇ haˬ. ‘Ngaˇ Yeˬhawˇbaˬ iˬ baˇ noeˬ poˆ noeˬ paˇ˗awˇ iˬ baˇ shaˇ pyehˬ˗eu yawˬ gʼaˬ na luꞈ˗ahˇ iˬ baˇ pyehˬ nehˬ˗eu gʼaˇ duˬ lehˬ hmˬ deuˇ taˬ˗euˬ lehˇ jah miˇ˗a laˬ? Jah naˇ, ngaˇ iˬ baˇ shaˇ pyehˬ ngeh jiˇ Yeˬhawˇbaˬ iˬ baˇ pyehˬ meh lehˇ ya jah meh.’

¹¹ Aˬ dui maˬ byah kuꞈ˗a lehˇ Yeˬhawˇbaˬ yaw muiˬ˗ehˇ gʼoˆ shaw nehˬ laꞈ˗eu heu naˇ, aˬ dui˗ahˇ gʼaˬ bi za laˇ˗eu meh. (Ja ceuˬ 139:1, 2) Aˬ dui gaˇ kawˆ heu˗ahˇ Daˬbiˇ neh boꞈ˗euˬ Ja ceuˬ sahˬ boꞈ dzaˇ˗i tiˬ deuˆ˗ahˇ ya mawˇ˗eu meh. Teu deuˆ jiˇ Yeˬhawˇbaˬ aˬ dui˗ahˇ iˬ baˇ pyehˬ meh lehˇ jah laˇ ni caw ba nehˬ˗eu meh.

Yeˬhawˇbaˬ maˬ ngehˇ˗eu jeˬ˗ahˇ nawˇ jiˇ taˬ ngehˇ

12-13. Ja ceuˬ 103:14-ahˇ haw ngeh, Yeˬhawˇbaˬ aˬ jeˬ˗ahˇ maˬ ngehˇ˗eu nga? Teu baˬ da neh Yeˬhawˇbaˬ aˬ dui˗ahˇ aˬ joˆ˗ehˇ mˇ nehˬ˗eu nga?

¹² Ja ceuˬ 103:14-ahˇ gui. Daˬbiˇ Yeˬhawˇbaˬ “aˬ dui miˇ tsaˬ pyeuꞈ˗eu aˬ yawꞈ maˬ ngehˇ˗a” lehˇ ehˇ taˬ˗euˬ meh. Dawˬ heu˗ahˇ haw ngeh, Daˬbiˇ Yeˬhawˇbaˬ iˬ baˇ noeˬ poˆ noeˬ paˇ˗euˬ deuˬ˗ahˇ aˬ jeˬ miˇ neh iˬ baˇ pyehˬ˗eu gaˇ kawˆ tiˬ kawˆ˗ahˇ bi siˬ laꞈ˗eu meh. Teu naˇ Yeˬhawˇbaˬ aˬ dui maˬ byah kuꞈ˗eu tsawˇ haˬ pyeuꞈ˗eu lehˇ aˬ yawꞈ siˬ nya˗eu heu meh. Gaˇ kawˆ heu˗ahˇ, heu naˆ maˬ tseˇ gʼoˆ shaw dzehˬ laˇ˗eu gʼaˇ duˬ Daˬbiˇ˗euˬ dawˬ˗ahˇ yaw muiˬ˗ehˇ haw kaˇ˗euˇ.

¹³ Daˬbiˇ Yeˬhawˇbaˬ “Aˬ dui˗ahˇ aˬ jeˬ neh beh˗euˬ aˬ yawꞈ siˬ nya meh” lehˇ ehˇ˗eu meh. Yeˬhawˇbaˬ Aˬdaˬ˗ahˇ ‘miˇ tsaˬ shaˬ jehˆʼ neh beh˗euˬ meh. Byah kuꞈ˗eu tsawˇ haˬ pyeuꞈ kʼawꞈ, miˇ tsaˬ shaˬ jehˆ neh beh˗euˬ miˇ neh yaw dehꞈ dehꞈ nya˗eu gʼaˇ duˬ dzaˇ ya dzaˬ˗awˇ, ya yuꞈ˗eu meh. Saꞈ ya gʼawˇ meh lehˇ siˬ nya˗eu meh. (Aˇdahˬbeh˗eu 2:7) Ehˇ kʼawꞈ Aˬdaˬ hawˇ˗eu Eˇbaˆ iˬ baˇ mˇ ngeh, aˬ dui miˇ tsaˬ shaˬ jehˆ pyeuꞈ˗eu lehˇ ehˇ˗eu heu naˇ, dehꞈ le ngeh neh iˬ baˇ jeˬ biˇ za˗awˇ, mˇ bahˬ mawꞈ˗eu nui ma myaˬ laˇ˗euˬ gaˇ jiˇ ehˇ mawꞈ˗eu meh. Yeˬhawˇbaˬ aˬ dui maˬ byah kuꞈ˗eu tsawˇ haˬ pyeuꞈ˗eu lehˇ siˬ nya˗eu tehꞈ maˬ ngeuˇ˗a. Ehˇ kʼawꞈ aˬ yawꞈ gaˇ kawˆ heu˗ahˇ “maˬ ngehˇ˗a.” Teu miˇ neh aˬ yawꞈ aˬ dui˗ahˇ aˬ myah luꞈ gʼawˬ shaˬ gaˬ˗eu laꞈ kʼoeˇ mˇ nehˬ laꞈ˗eu meh. Yeˬhawˇbaˬ aˬ dui tiˬ poˆ na mˇ lehˬ nya meh lehˇ siˬ nya meh. Teu miˇ neh aˬ dui mˇ lehˬ ngeh iˬ baˇ noeˬ poˆ noeˬ paˇ naˇ, aˬ yawꞈ gʼawˬ shaˬ gaˬ˗eu laꞈ kʼoeˇ aˬ dui˗ahˇ iˬ baˇ pyehˬ nehˬ laꞈ˗eu meh.—Ja ceuˬ 78:38, 39.

14. (a) Ja ceuˬ 103:12-ahˇ haw ngeh, Yeˬhawˇbaˬ iˬ baˇ pyehˬ˗eu jeˬ nehˬ˗ehˇ taꞈ leˇ˗awˇ aˬ jeˬ ya siˬ˗eu nga? (b) Daˬbiˇ Yeˬhawˇbaˬ maˇ diˇ iˬ baˇ pyehˬ˗eu lehˇ aˬ joˆ˗ehˇ bi siˬ laꞈ˗eu nga? (“Yeˬhawˇbaˬ iˬ baˇ pyehˬ gʼaˬ shaw naˇ ngehˇ byoˆ” lehˇ ehˇ˗eu oeˬ coeˇ oeˬ bawˬ˗ahˇ haw.)

¹⁴ Yeˬhawˇbaˬ iˬ baˇ pyehˬ˗eu jeˬ nehˬ˗ehˇ taꞈ leˇ˗awˇ Ja ceuˬ 103:12 (Gui.)˗ahˇ neh aˬ jeˬ ya siˬ˗eu nga? Daˬbiˇ Yeˬhawˇbaˬ aˬ dui˗euˬ iˬ baˇ pyehˬ ngeh, aˬ dui˗euˬ iˬ baˇ˗ahˇ “mˬ dzeˇ miˇ dzehˇ” keuˆ ni sha dzeh˗iˇ˗eu meh lehˇ ehˇ˗eu meh. Mˬ dzeˇ miˇ dzeˇ heu naˇ, kaˬ dui dui˗eu miˇ neh nahˇ ma doˆ kʼehˬ hawˇ˗eu ga kʼehˬ tiˬ gaˇ maˬ tahˬ dzoeˇ laˇ nya˗a. Heu naˇ Yeˬhawˇbaˬ iˬ baˇ pyehˬ˗eu jeˬ nehˬ˗ehˇ taꞈ leˇ˗awˇ aˬ jeˬ bi siˬ laꞈ˗eu nga? Jaˇliꞈ heu deuˆ nehˬ˗ehˇ taꞈ leˇ˗awˇ paˇ dmˬ tiˬ dmˬ˗ahˇ “Miˬyehˇ aˬ dui˗euˬ iˬ baˇ teu naˆ naˆ˗ehˇ kaˬ gaˇ biˬ dzeh gʼeh˗euˬ miˇ neh yaw saꞈ jiˇ maˬ paˇ jaˆ meh. Pehˬ zaˇ jiˇ maˬ paˇ siˬ laˇ meh. Miˬyehˇ aˬ dui˗euˬ iˬ baˇ˗ahˇ maˬ paˇ noeˬ mawˇ meh” lehˇ ehˇ taˬ˗euˬ meh. Gaˇ kawˆ heu˗ahˇ shaˇ noeˬ haw sheˇ. Yaw saꞈ behꞈ laꞈ laˇ naˇ, tiˬ jeˬ jeˬ˗ahˇ noeˬ mawˇ laˇ˗eu meh. Ehˇ kʼawꞈ Yeˬhawˇbaˬ iˬ baˇ pyehˬ nehˬ ngeh iˬ baˇ˗ahˇ bi noeˬ mawˇ laˇ˗eu yaw saꞈ jiˇ maˬ dzeˇ ni pyeuꞈ˗iˇ˗eu meh. Iˬ baˇ˗ahˇ maˬ paˇ noeˬ mawˇ˗eu miˇ neh nyaˆ taꞈ poˆ ja poˆ laˇ˗awˇ daˇ˗eu lehˇ maˬ paˇ jaˆ meh.—Yeˬsaˬgeˬlaˇ 18:21, 22; Gʼaˬkʼehˇ 3:19.

15. Aˬ dui neh mˇ˗euˬ iˬ baˇ˗ahˇ maˬ ngehˇ leˇ ni shaˬ luꞈ naˇ, aˬ joˆ˗ehˇ ya jahˇ˗eu nga?

¹⁵ Yeˬhawˇbaˬ˗euˬ iˬ baˇ pyehˬ˗eu jeˬ˗ahˇ jah coeˇ laˇ ni Ja ceuˬ yaw huiˬ 103 laꞈ kʼoeˇ˗euˬ Daˬbiˇ˗euˬ dawˬ, aˬ dui˗ahˇ aˬ joˆ˗ehˇ caw ba nehˬ˗eu nga? Dzeuˇ yaꞈ ngeh mˇ˗euˬ iˬ baˇ baˬ da neh nui ma˗ahˇ aˇ dzehˬ˗ehˇ deuˬ luꞈ naˇ, yawˬ ha˗ahˇ heu loꞈ˗ehˇ naˇ haˬ. ‘Ngaˇ Yeˬhawˇbaˬ maˬ ngehˇ˗eu gaˇ kawˆ˗ahˇ ngehˇ nya laˬ? Yaw jeˬ ma jeˬ, Miˬyehˇ ngaˇ miˇ tsaˬ shaˬ jehˆ pyeuꞈ˗eu lehˇ maˬ ngehˇ˗eu gaˇ kawˆ hawˇ˗eu noeˬ poˆ noeˬ paˇ˗euˬ deuˬ˗ahˇ maˇ diˇ iˬ baˇ pyehˬ nehˬ˗eu gaˇ kawˆ. Kʼoeˇ naˇ ngaˇ Yeˬhawˇbaˬ ngehˇ˗euˬ jeˬ˗ahˇ maˬ ngehˇ ni pyeuꞈ luꞈ nya laˬ? Yaw jeˬ ma jeˬ, Yeˬhawˇbaˬ aˬ dui neh mˇ˗euˬ iˬ baˇ˗ahˇ ngehˇ byoˆ˗awˇ, maˬ paˇ noeˬ mawˇ˗eu gaˇ kawˆ.’ Yeˬhawˇbaˬ aˬ dui˗euˬ iˬ baˇ˗ahˇ ngehˇ tsehˆ tsehˆ˗euˬ meh. Teu miˇ neh aˬ dui jiˇ noeˬ mawˇ noeˬ mawˇ˗ehˇ jawˇ paˬ˗ehˇ maˬ paˇ gʼeh meh. (Ja ceuˬ 130:3) Yeˬhawˇbaˬ aˬ dui˗ahˇ iˬ baˇ pyehˬ nehˬ˗eu gaˇ kawˆ˗ahˇ jah coeˇ laˇ naˇ, aˬ dui jiˇ yawˬ ha˗ahˇ iˬ baˇ pyehˬ nehˬ nya˗awˇ, nui ma maˬ saˇ ni maˬ paˇ gʼeh meh.

16. Dzeuˇ yaꞈ ngeh mˇ˗euˬ iˬ baˇ˗ahˇ tehꞈ˗ehˇ shaˇ noeˬ shaˇ noeˬ˗ehˇ jawˇ˗eu heu naˇ, aˬ joˆ˗ehˇ lehˬ laˇ ca laˇ nya˗eu nga? (Aˇ baˇ˗ahˇ jiˇ haw.)

¹⁶ Yaw jeˬ ma jeˬ gaˇ kawˆ heu˗ahˇ shaˇ noeˬ haw sheˇ. Aˬ dui neh mˇ lehˬ˗euˬ dzeuˇ yaꞈ˗euˬ iˬ baˇ˗ahˇ tehꞈ˗ehˇ shaˇ noeˬ shaˇ noeˬ˗ehˇ jawˇ naˇ, lawˬ liˬ yeuꞈ yeuꞈ˗ehˇ cah ngeh naˇ kʼah paw haw˗eu aˇ baˇ kʼaw teuꞈ˗ahˇ tehꞈ˗ehˇ haw gaˇ duˇ˗eu meh. Tiˬ poˆ na, naˇ kʼah paw haw kʼoꞈ˗eu yaw muiˬ kʼawꞈ, aˬ myah luꞈ naˇ kʼah paw tehꞈ˗ehˇ haw haw˗ehˇ cah naˇ lehˬ laˇ ca laˇ nya˗eu meh. Maˬ lehˬ maˬ ca laˇ ni iˇ mawꞈ naˇ, mehˬ shi paw tehꞈ˗ehˇ ya haw tsoˆ taˬ˗eu meh. Teu gaˇ duˇ ni nymˬ˗mˇ aˬ dui miˇ shuiꞈ˗ahˇ iˇ˗eu gaˇ ma˗ahˇ cah luꞈ˗eu ma. Tiˬ poˆ na dzeuˇ yaꞈ ngeh mˇ˗euˬ iˬ baˇ˗ahˇ haw kʼoꞈ˗eu jiˇ yaw muiˬ meh. Teu loꞈ˗ehˇ haw kʼoꞈ˗eu teu naˇ, nyaˆ taꞈ poˆ maˬ paˇ mˇ lehˬ ni yaw muiˬ˗ehˇ haw tsoˆ taˬ ni caw ba nehˬ˗eu meh. Ehˇ kʼawꞈ aˬ dui dzeuˇ yaꞈ ngeh mˇ˗euˬ iˬ baˇ˗ahˇ tehꞈ˗ehˇ haw tsoˆ taˬ˗awˇ jawˇ naˇ, iˬ baˇ ahˇ nya siˬ lehˇ noeˬ noeˬ˗ehˇ Miˬyehˇ˗euˬ gaˇ˗ahˇ maˬ mˇ nya ni pyeuꞈ laˇ nya˗eu meh. Teu miˇ neh mehˬ hu paw yaw muiˬ˗ehˇ haw tsoˆ taˬ paˬ˗ehˇ gʼeh˗eu meh. Aˬ dui miˇ shuiꞈ˗ahˇ le keuˆ shaw naˇ, pyeuꞈ yaꞈ˗euˬ maˬ muiˬ˗eu yaw doeˇ dawˬ tawˆ luꞈ “ya ngehˇ byoˆ jiˇ” meh.—Iˇsaˬyaˇ 65:17; Dawˬdaˬ 4:25.

Aˬ myah luꞈ jah coeˇ

17. Aˬ dui Yeˬhawˇbaˬ˗euˬ nui gaˬ hawˇ˗eu iˬ baˇ pyehˬ˗eu jeˬ˗ahˇ aˬ jeˬ miˇ neh jah coeˇ˗eu loˬ nga?

¹⁷ Aˬ dui Yeˬhawˇbaˬ˗euˬ nui gaˬ hawˇ˗eu iˬ baˇ pyehˬ˗eu jeˬ˗ahˇ jah coeˇ˗eu loˬ meh. (1 Yoˇhaˬ 3:19) Aˬ jeˬ miˇ neh? Aˬ jeˬ miˇ neh ehˇ naˇ, Saˬdaˬ aˬ dui˗ahˇ Yeˬhawˇbaˬ˗euˬ nui gaˬ hawˇ˗eu iˬ baˇ pyehˬ˗eu jeˬ˗ahˇ za˗eu maˬ geuˇ nya lehˇ noeˬ laˇ ni aˬ myah luꞈ leh jeh˗eu miˇ neh meh. Aˬ geu jeˬ lehˇ jahˇ kʼawꞈ, aˬ yawꞈ neh aˇ pyaˇ daˬ taˬ˗euˬ jeˬ naˇ, aˬ dui˗ahˇ Yeˬhawˇbaˬ nehˬ˗ehˇ bi gʼawˬ˗iˇ˗eu gʼaˇ duˬ meh. Nymˬ˗mˇ poˆ naˇ ngehˬ˗ehˇ dzehˬ Saˬdaˬ aˬ yawꞈ˗euˬ aˇ yamˬ ui cuiˆ maˬ ngeuˇ naˇ maˬ paˇ jaˆ meh lehˇ siˬ nya˗eu miˇ neh paˇ leh jeh dzehˬ laˇ˗euˬ meh. (Pah mehˬ˗eu 12:12) Ehˇ kʼawꞈ aˬ dui Saˬdaˬ neh bi gʼaˬ leˇ˗awˇ neh maˬ geuꞈ nya˗a.

18. Yeˬhawˇbaˬ nawˬ˗ahˇ gaˬ˗awˇ iˬ baˇ pyehˬ meh lehˇ jah coeˇ laˇ ni aˬ joˆ˗ehˇ ya jahˇ˗eu nga?

¹⁸ Yeˬhawˇbaˬ nawˬ˗ahˇ gaˬ˗eu lehˇ jah coeˇ laˇ˗eu gʼaˇ duˬ, dzeuˇ yaꞈ˗euˬ kawˆ˗ahˇ biꞈ taˬ˗euˬ nui noeˬ nui duˇ˗ahˇ mˇ caw nya meh. Kʼoeˇ naˇ Yeˬhawˇbaˬ nawˬ˗ahˇ iˬ baˇ pyehˬ meh lehˇ jah coeˇ laˇ˗eu gʼaˇ duˬ, Yeˬhawˇbaˬ aˬ yawꞈ˗euˬ gaˇ kawˆ˗ahˇ aˬ joˆ˗ehˇ ngehˬ keuˆ taˬ˗euˬ nga lehˇ shaˇ noeˬ. Kʼoeˇ naˇ Yeˬhawˇbaˬ iˬ baˇ pyehˬ˗eu gaˇ kawˆ˗ahˇ Jaˇliꞈ boꞈ˗eu deuˬ aˬ joˆ˗ehˇ ngehˬ keuˆ taˬ˗euˬ nga lehˇ jiˇ shaˇ noeˬ. Nawˇ maˬ byah kuꞈ˗eu gaˇ kawˆ˗ahˇ Yeˬhawˇbaˬ siˬ nya˗awˇ gʼawˬ shaˬ gaˬ meh lehˇ maˬ ya ngehˇ˗a. Kʼoeˇ naˇ Yeˬhawˇbaˬ iˬ baˇ pyehˬ nehˬ ngeh tiˬ pawꞈ˗iˬ maˬ noeˬ taˬ ni maˇ diˇ iˬ baˇ pyehˬ nehˬ˗eu gaˇ kawˆ˗ahˇ jiˇ maˬ ya ngehˇ˗a. Nawˇ heu loꞈ˗ehˇ jahˇ naˇ, Yeˬhawˇbaˬ gʼawˬ shaˬ gaˬ dui dui˗eu gaˇ kawˆ Daˬbiˇ loꞈ˗ehˇ jah coeˇ laˇ˗eu meh. Toˆ˗ehˇ naˇ nawˇ Yeˬhawˇbaˬ˗ahˇ “‘Nawˇ ngaˬ˗ahˇ iˬ baˇ pyehˬ nehˬ laꞈ˗euˬ’ miˇ neh guiˬ lahˬ huiˬ ma Yeˬhawˇbaˬ˗oˇ” lehˇ maˆ jawˆ ni ehˇ nya meh.—Ja ceuˬ 32:5.