Miˬyehˇ˗euˬ nui gaˬ mˬ maˬ maˬ byaˆ zaˇ ziˇ ziꞈ

1-2. Kʼaˆ˗eu shaˬ zahˬ˗ahˇ ya puˬ ngeh aˬ dui˗ahˇ aˬ joˆ˗ehˇ bi gʼeh laˇ nya˗eu nga?

Iˬ ma laˆ shaˆ˗ahˇ cah luꞈ˗eu saˇ baoˬ tiˬ laˇ˗ahˇ noeˬ mawˇ haw sheˇ. Jaˬ lehˇ lehˇ ma baw laˇ ngeh, saˇ baoˬ iˇ lu kʼoeˇ taˆ nyeh nyeh˗ehˇ jaˆ luꞈ˗eu meh. Ehˇ kʼawꞈ shmˇ kuˆ seuˬ baꞈ ka ngeh, saˇ baoˬ nyeh˗eu naˬ leˇ˗awˇ, iˇ lu dzeh laˇ kʼawꞈ maˬ paˇ iˇ jiˆ meh.

² Aˬ dui kʼaˆ dui dui˗eu shaˬ zahˬ˗ahˇ ya puˬ ngeh, aˬ dui˗ahˇ saˇ baoˬ teu laˇ loꞈ˗ehˇ bi gʼeh laˇ nya meh. Iˬ nah nawˇ Yeˬhawˇbaˬ nawˬ˗ahˇ gaˬ˗awˇ caw ba nehˬ˗eu yaw duˬ baw meh lehˇ jah kʼawꞈ, dzaˇ˗i tiˬ nah naˇ nawˇ ya puˬ˗eu shaˬ zahˬ˗ahˇ Yeˬhawˇbaˬ mawˇ luꞈ meh laˬ leˇ heu lehˇ noeˬ laˇ nya meh. (Ja ceuˬ 10:1; 13:1) Cawˬ tiˬ gʼaˬ nawˬ˗ahˇ gʼaˬ biꞈ laˇ ngeh nui ma saˇ laˇ nya meh. (Dawˬdaˬ 17:17; 25:11) Ehˇ kʼawꞈ tiˬ kʼehˬ naˇ, nawˬ˗ahˇ nui ma maˬ jah coeˇ ni oˇ loˬ maˇ laˬ˗ehˇ paˇ bi gʼeh laˇ nya˗eu meh. Yeˬhawˇbaˬ ngaˬ˗ahˇ byehˇ dzeh˗euˬ ngaˇ lehˇ keuˆ ni bi noeˬ laˇ nya meh. Dehꞈ ziˇ laꞈ kʼoeˇ jaˬ lehˇ lehˇ ma loꞈ˗ehˇ gʼeh˗eu shaˬ zahˬ˗ahˇ ya puˬ ngeh, nawˇ shmˇ kuˆ seuˬ seuˬ ma aˬ joˆ˗ehˇ baꞈ ka nya˗eu nga? Yawˬ jeˬ yawˬ˗ahˇ ya ehˇ naˇ, Yeˬhawˇbaˬ nawˬ˗ahˇ gaˬ˗awˇ caw ba nehˬ meh lehˇ aˬ myah luꞈ aˬ joˆ˗ehˇ jah ziꞈ nya nga?

3. Ja ceuˬ 31:7 hawˇ˗eu 136:1 Yeˬhawˇbaˬ˗euˬ nui gaˬ hawˇ˗eu saˇ jaˇ ziꞈ˗eu jeˬ nehˬ˗ehˇ taꞈ leˇ˗awˇ aˬ jeˬ bi siˬ laꞈ˗eu nga? Yeˬhawˇbaˬ loꞈ˗ehˇ ziꞈ dah ni gʼeh˗eu nui gaˬ mˇ mawˇ nya˗eu tiˬ gʼaˬ˗iˬ maˬ jawˇ˗a lehˇ aˬ jeˬ miˇ neh ehˇ nya nga? (Aˬ baˇ˗ahˇ jiˇ haw.)

³ Aˬ dui shaˬ zahˬ ya puˬ ngeh ziꞈ dah ni gʼeh˗eu gʼaˇ duˬ jahˇ nya˗eu tiˬ jeˬ naˇ, Yeˬhawˇbaˬ˗euˬ maˬ tsehˆ leˇ˗eu ziꞈ dah ni gʼeh˗eu nui gaˬ˗ahˇ noeˬ mawˇ˗eu heu meh. (Ja ceuˬ 31:7; 136:1-ahˇ gui.) “Maˬ tsehˆ leˇ ni gaˬ˗eu” lehˇ ehˇ˗eu heu naˇ, tiˬ gʼaˬ gʼaˬ˗ahˇ naꞈ suiˇ ni aˬ myah luꞈ gaˬ gaˇ ehˇ˗eu meh. Yeˬhawˇbaˬ loꞈ˗ehˇ maˬ tsehˆ leˇ˗eu nui gaˬ mˇ mawˇ nya˗eu tiˬ gʼaˬ˗iˬ maˬ jawˇ˗a. Jaˇliꞈ˗ahˇ Yeˬhawˇbaˬ Miˬyehˇ˗aˬ “gʼoeˇ˗eu gaˬ˗eu jeˬ tiˬ byah ni ahˇ” meh lehˇ ehˇ taˬ˗euˬ meh. (Doˆ˗iˇ˗eu 34:6, 7) Kʼoeˇ naˇ ‘aˬ yawꞈ˗ahˇ guiˬ lahˬ shaˇ˗eu tsawˇ haˬ deuˬ˗ahˇ, maˬ tsehˆ leˇ ni gaˬ˗eu meh’ lehˇ jiˇ ehˇ taˬ˗euˬ meh. (Ja ceuˬ 86:5) Jaˇliꞈ aˇ deuˆ heu deuˬ naˇ Yeˬhawˇbaˬ aˬ yawꞈ˗ahˇ saˇ jaˇ ziꞈ˗eu deuˬ˗ahˇ tiˬ jawˇ˗iˬ maˬ byehˇ dzeh˗a lehˇ bi mawˇ laˇ˗eu meh. Aˬ dui teu˗ahˇ noeˬ taˬ naˇ, dehꞈ ziˇ shaˬ zahˬ˗ahˇ ya puˬ ngeh nui ma ziꞈ dah ni gʼeh nya meh.—Ja ceuˬ 23:4.

Yeˬhawˇbaˬ˗euˬ nui gaˬ Jaˇliꞈ laꞈ kʼoeˇ˗euˬ ya dzaw dahˬ beh˗eu gaˇ kawˆ pyeuꞈ˗eu lehˇ taˬ ngehˇ

4. Jaˇliꞈ laꞈ kʼoeˇ˗euˬ ya dzaw dahˬ beh˗euˬ gaˇ kawˆ tiˬ kawˆ na˗ahˇ ehˇ haw˗awˇ, aˬ dui teu˗ahˇ aˬ jeˬ miˇ neh jah nya˗eu nga lehˇ ehˇ haw.

⁴ Aˬ dui shaˬ zahˬ˗ahˇ ya puˬ ngeh nui ma ziꞈ dah ni bi gʼeh˗eu gʼaˇ duˬ jahˇ nya˗eu dzaˇ˗i tiˬ jeˬ naˇ, Yeˬhawˇbaˬ˗euˬ nui gaˬ Jaˇliꞈ laꞈ kʼoeˇ˗euˬ ya dzaw dahˬ beh˗euˬ gaˇ kawˆ pyeuꞈ˗eu lehˇ noeˬ taˬ˗eu heu meh. “Jaˇliꞈ laꞈ kʼoeˇ˗euˬ ya dzaw dahˬ beh˗euˬ gaˇ kawˆ” lehˇ ehˇ naˇ, nawˬ˗ahˇ aˬ jeˬ˗ahˇ noeˬ doˆ laˇ nya? Nawˬ neh ya dzaw˗euˬ Jaˇliꞈ laꞈ kʼoeˇ˗euˬ yaw tsaˬ yaw dawˇ gaˇ kawˆ˗ahˇ noeˬ mawˇ laˇ˗eu kʼawꞈ pyeuꞈ nya meh. Yaw jeˬ ma jeˬ, Miˬyehˇ˗euˬ tsawˇ myahˇ naˇ Yeˬhawˇbaˬ lehˇ meh. Yeˬsuˇ naˇ Miˬyehˇ˗euˬ Zaˬmaˇ pyeuꞈ meh. Shiˇ˗euˬ deuˬ tiˬ jeˬ˗iˬ maˬ paˇ siˬ meh. Miˇ tsaˬ heu siˬ Baˬlaˬdiˇsuˆ pyeuꞈ laˇ˗awˇ, tsawˇ haˬ deuˬ mˬ maˬ maˬ byaˆ zaˇ ziˇ ya dehꞈ meh lehˇ ehˇ˗eu gaˇ kawˆ heu deuˬ pyeuꞈ meh. (Ja ceuˬ 83:18; Dawˬtsoˆ 9:5; Yoˇhaˬ 3:16; Pah mehˬ˗eu 21:3, 4) Gaˇ kawˆ heu deuˬ˗ahˇ nawˇ tiˬ byah tiˬ loꞈ jah˗eu meh. Aˬ jeˬ miˇ neh nga? Aˬ jeˬ miˇ neh ehˇ naˇ, aˬ dui gaˇ kawˆ teu deuˬ maˇ diˇ ngeuˇ˗eu gaˇ kawˆ˗ahˇ dawˬ pehˬ taˬ˗eu lehˇ siˬ nya˗eu miˇ neh ma. Nymˬ˗mˇ aˬ dui Yeˬhawˇbaˬ˗euˬ nui gaˬ Jaˇliꞈ laꞈ kʼoeˇ˗euˬ ya dzaw dahˬ beh˗eu gaˇ kawˆ pyeuꞈ˗eu lehˇ noeˬ taˬ˗eu heu naˇ, Yeˬhawˇbaˬ ngaˬ˗ahˇ maˬ gaˬ˗a, ngaˇ ya puˬ luꞈ˗eu shaˬ zahˬ˗ahˇ myaˆ haw maˬ cawˬ˗a lehˇ ehˇ˗eu nui noeˬ˗ahˇ deuˆ gʼaˬ nya ni aˬ joˆ˗ehˇ caw ba nehˬ nga lehˇ haw ma.

5. Mehˬ bahˬ˗eu jeˬ˗ahˇ aˬ joˆ˗ehˇ byehˇ dzeh nya˗eu nga?

⁵ Nawˇ Jaˇliꞈ dzaw dahˬ beh laˇ ngeh mehˬ bahˬ˗eu gaˇ kawˆ˗ahˇ byehˇ dzeh nya ni aˬ joˆ˗ehˇ jahˇ deˬ? Nawˇ Jaˇliꞈ mehˬ˗eu jeˬ hawˇ˗eu nawˬ neh jah laꞈ˗euˬ zahˇ neh mehˬ˗euˬ jeˬ˗ahˇ sheu cehˆ haw˗euˬ kʼawꞈ pyeuꞈ nya meh. Yaw jeˬ ma jeˬ, nawˇ Yeˬsuˇ˗aˬ Miˬyehˇ pyeuꞈ meh lehˇ jah haw˗euˬ lehˇ ehˇ˗awˬ. Ehˇ kʼawꞈ Jaˇliꞈ dzaw laˇ ngeh ‘Heu˗aˬ maˇ diˇ ngeuˇ ngaˇ laˬ?’ lehˇ shaˇ noeˬ laˇ˗euˬ meh. Nawˇ gaˇ kawˆ teu nehˬ˗ehˇ taꞈ leˇ˗awˇ Jaˇliꞈ mehˬ˗eu jeˬ˗ahˇ ya dzaw gʼaˬ ngeh Yeˬsuˇ˗aˬ, Miˬyehˇ maˬ ngeuˇ nga lehˇ ya siˬ˗euˬ meh. Kʼoeˇ naˇ nawˇ mehˬ bahˬ˗eu jeˬ˗ahˇ byehˇ˗awˇ, Yeˬsuˇ˗aˬ “kʼaˇ beh taˬ˗euˬ jeˬ dawˬ tawˆ luꞈ kʼoeˇ taˆ huiˬ dzehˬ mahˇ dzehˬ˗eu dehꞈ beh beh le˗euˬ gʼaˬ” pyeuꞈ˗awˇ, tiˬ gʼaˬ tehꞈ˗ehˇ gʼeh˗eu “Miˬyehˇ˗euˬ Zaˬmaˇ” lehˇ jah laˇ˗euˬ meh. (Gawˇlawˇsehˇ 1:15; Yoˇhaˬ 3:18) Mehˬ bahˬ˗eu jeˬ heu naˇ ‘ziꞈ dah ni gʼeh˗eu taˆ˗ahˇ’ duˇ˗awˇ, byehˇ dzeh˗eu yaw shaˬ meh. (2 Gawˇliˬtu 10:4, 5) Ehˇ kʼawꞈ mehˬ bahˬ˗eu jeˬ teu˗ahˇ byehˇ dzeh nya shaw˗euˬ naˇ, teu˗ahˇ maˬ paˇ jah kʼoꞈ˗iˇ meh.—Piˇliˇpiˆ 3:13.

6. Yeˬhawˇbaˬ˗euˬ “gʼoeˇ˗eu gaˬ˗eu jeˬ mˬ maˬ maˬ byaˆ zaˇ ziˇ ziꞈ˗eu” lehˇ aˬ jeˬ miˇ neh jah ziꞈ nya nga?

⁶ Yeˬhawˇbaˬ˗euˬ nui gaˬ gaˇ kawˆ nehˬ˗ehˇ taꞈ leˇ˗awˇ Jaˇliꞈ mehˬ˗eu jeˬ˗ahˇ jah ziꞈ laˇ ni jiˇ teu loꞈ˗ehˇ jahˇ nya meh. Yaw jeˬ ma jeˬ, nawˇ shaˬ zahˬ˗ahˇ ya puˬ˗awˇ, Yeˬhawˇbaˬ˗euˬ nui gaˬ˗ahˇ maˬ jah coeˇ ni gʼeh laˇ naˇ yawˬ ha˗ahˇ ‘Ngaˬ˗euˬ nui noeˬ heu tsaˬ ngaˇ laˬ?’ lehˇ naˇ haˬ haw. Kʼoeˇ naˆ heu kawˆ˗euˬ Jaˇliꞈ aˇ deuˆ daˬ ma hmˬ pyeuꞈ˗eu Ja ceuˬ 136:1-ahˇ gui haw. Yeˬhawˇbaˬ aˬ yawꞈ˗euˬ gʼoeˇ˗eu gaˬ˗eu jeˬ “mˬ maˬ maˬ byaˆ zaˇ ziˇ ziꞈ˗eu” lehˇ aˬ jeˬ miˇ neh ehˇ taˬ˗euˬ nga lehˇ shaˇ noeˬ haw. Ja ceuˬ 136 laꞈ kʼoeˇ tehꞈ˗ehˇ “aˬ yawꞈ gʼoeˇ˗eu gaˬ˗eu jeˬ mˬ maˬ maˬ byaˆ zaˇ ziˇ ziꞈ” lehˇ aˬ jeˬ miˇ neh 26 poˆ ngehˬ keuˆ taˬ˗euˬ nga? Aˬ jeˬ miˇ neh ehˇ naˇ, aˬ dui neh ja sawˇ laꞈ˗euˬ loꞈ˗ehˇ Yeˬhawˇbaˬ˗euˬ ziꞈ dah ni gʼeh˗eu nui gaˬ heu naˇ, aˬ dui neh ya dzaw˗awˇ jah˗euˬ Jaˇliꞈ laꞈ kʼoeˇ˗euˬ ya dzaw dahˬ beh˗euˬ gaˇ kawˆ deuˬ laꞈ kʼoeˇ neh tiˬ kawˆ pyeuꞈ˗eu miˇ neh meh. Teu miˇ neh Yeˬhawˇbaˬ nawˬ˗ahˇ aˇ poeˬ maˬ taˬ baw˗a, maˬ gaˬ˗a lehˇ ehˇ˗eu nui noeˬ heu naˇ, maˬ tsaˬ˗a. Nawˇ mehˬ bahˬ˗eu nui jeˬ˗ahˇ byehˇ dzeh nya˗euˬ loꞈ˗ehˇ, nui noeˬ teu˗ahˇ jiˇ byehˇ dzeh˗awˬ.

7. Yeˬhawˇbaˬ˗euˬ nui gaˬ˗ahˇ bi jah ziꞈ laˇ˗eu Jaˇliꞈ aˇ deuˆ tiˬ deuˆ na˗ahˇ ehˇ haw.

⁷ Jaˇliꞈ laꞈ kʼoeˇ Yeˬhawˇbaˬ aˬ dui˗ahˇ gaˬ˗eu lehˇ bi jah ziꞈ laꞈ˗eu gaˇ kawˆ nui jeˬ gʼawˬ mya ni paˇ ahˇ˗a siˬ. Yaw jeˬ ma jeˬ, Yeˬsuˇ aˬ yawꞈ˗euˬ zaˬ lahˇ deuˬ˗ahˇ “Myaˬ dui dui˗eu jaˇ tseuˆ baˬ maꞈ naˆ maˬ tseˇ, Miˬyehˇ mehˬ shi naw maꞈ poeˬ dzehˬ˗eu meh” lehˇ ehˇ nehˬ˗euˬ meh. (Maꞈtehˬ 10:31) Kʼoeˇ naˇ, Yeˬhawˇbaˬ jiˇ aˬ yawꞈ˗euˬ tsawˇ haˬ deuˬ˗ahˇ “Ngaˇ gʼaˬ biꞈ˗awˇ caw ba nehˬ ma. Nawˬ maꞈ˗ahˇ ngaˇ haw piˇ˗awˇ ka kʼoꞈ ma” lehˇ ehˇ˗eu meh. (Iˇsaˬyaˇ 41:10) Dawˬ heu˗aˬ, maˇ jawˆ ni gʼeh ngaˇ. Yeˬsuˇ ‘Naw maꞈ poeˬ dzehˬ˗eu paˬ’ lehˇ maˬ ehˇ˗aˬ. Yeˬhawˇbaˬ jiˇ ‘Caw ba nehˬ tehꞈ˗a’ lehˇ maˬ ehˇ˗aˬ. “Naw maꞈ poeˬ dzehˬ˗eu meh”, “Caw ba nehˬ ma” lehˇ maˇ jawˆ ni ehˇ˗eu meh. Aˬ dui shaˬ zahˬ ya puˬ˗awˇ Yeˬhawˇbaˬ ngaˬ˗ahˇ gaˬ˗eu maˬ siˬ lehˇ noeˬ laˇ ngeh, Jaˇliꞈ aˇ deuˆ heu deuˬ naˇ Yeˬhawˇbaˬ aˬ dui˗ahˇ gaˬ˗eu lehˇ bi noeˬ laˇ˗eu tehꞈ˗ehˇ maˬ gʼaˬ ni, aˬ dui˗ahˇ maˇ diˇ gaˬ˗eu lehˇ jah ziꞈ laˇ ni caw ba nehˬ laꞈ meh. Jaˇliꞈ aˇ deuˆ heu deuˬ naˇ, nui ma taˬ nya˗eu maˇ diˇ ngeuˇ˗eu gaˇ kawˆ pyeuꞈ meh. Aˬ dui yaw muiˬ˗ehˇ guiˬ lahˬ shaˇ˗awˇ, Jaˇliꞈ aˇ deuˆ heu deuˬ˗ahˇ shaˇ noeˬ shaˇ sawˇ naˇ, 1 Yoˇhaˬ 4:16-ahˇ “Miˬyehˇ neh aˬ dui˗ahˇ gaˬ˗euˬ gʼoeˇ˗eu gaˬ˗eu jeˬ kʼoeˇ˗ahˇ aˬ dui siˬ nya˗awˇ jah˗eu ma” lehˇ ehˇ taˬ˗euˬ loꞈ˗ehˇ ehˇ nya˗eu meh.a

8. Yeˬhawˇbaˬ˗euˬ nui gaˬ˗ahˇ maˬ jah coeˇ ni gʼeh luꞈ siˬ naˇ, aˬ jeˬ jahˇ nya˗eu nga?

⁸ Ehˇ kʼawꞈ tiˬ poˆ na Yeˬhawˇbaˬ˗euˬ nui gaˬ˗ahˇ maˬ jah coeˇ ni paˇ gʼeh luꞈ siˬ naˇ tawˇ neh? Nawˬ˗euˬ nui noeˬ˗ahˇ Yeˬhawˇbaˬ nehˬ˗ehˇ taꞈ leˇ˗awˇ nawˇ siˬ nya taˬ˗euˬ jeˬ nehˬ˗ehˇ sheu cehˆ haw. Nui noeˬ heu naˇ, aˬ geu ngeh kʼawꞈ poˆ laˇ paˇ laˇ nya meh. Ehˇ kʼawꞈ Jaˇliꞈ laꞈ kʼoeˇ˗euˬ yaw tsaˬ yaw dawˇ jeˬ naˇ, maˬ poˆ maˬ paˇ laˇ˗a. Teu miˇ neh aˬ dui aˬ geu jeˬ lehˇ noeˬ kʼawꞈ, Miˬyehˇ˗aˬ gʼoeˇ˗eu gaˬ˗eu jeˬ pyeuꞈ meh lehˇ ehˇ˗eu yaw tsaˬ yaw dawˇ jeˬ heu maˬ poˆ maˬ paˇ laˇ˗a. Nui gaˬ heu naˇ, Miˬyehˇ˗euˬ seuˆ dzeuꞈ aˇ gʼehˇ daˬ ma hmˬ pyeuꞈ meh.—1 Yoˇhaˬ 4:8.

Yeˬhawˇbaˬ “naw maꞈ˗ahˇ gaˬ˗eu” gaˇ kawˆ˗ahˇ shaˇ noeˬ shaˇ sawˇ

9-10. “Aˬ da naw maꞈ˗ahˇ gaˬ˗eu mehˇ” lehˇ ehˇ ngeh, Yeˬsuˇ zaˬ lahˇ deuˬ nehˬ˗ehˇ aˬ jeˬ˗euˬ gaˇ kawˆ ehˇ luꞈ˗eu nga? (Yoˇhaˬ 16:26, 27) (Aˇ baˇ˗ahˇ jiˇ haw.)

⁹ Aˬ dui Yeˬsuˇ neh aˬ yawꞈ˗euˬ zaˬ lahˇ deuˬ˗ahˇ “Aˬda naw maꞈ˗ahˇ gaˬ˗eu meh” lehˇ ehˇ nehˬ˗euˬ dawˬ˗ahˇ neh Yeˬhawˇbaˬ˗euˬ nui gaˬ gaˇ kawˆ˗ahˇ paˇ ya siˬ˗eu meh. (Yoˇhaˬ 16:26, 27-ahˇ gui.) Yeˬsuˇ dawˬ teu˗ahˇ aˬ yawꞈ˗euˬ zaˬ lahˇ deuˬ nui ma bi saˬ laˇ˗eu gʼaˇ duˬ ngehˬ˗eu tehꞈ maˬ ngeuˇ˗a. Maˇ diˇ naˇ teu ngeh Yeˬsuˇ aˬ yawꞈ maꞈ˗euˬ nui noeˬ gaˇ kawˆ ja sawˇ luꞈ˗eu maˬ ngeuˇ ni guiˬ lahˬ shaˇ˗eu gaˇ kawˆ ja sawˇ luꞈ˗eu meh.

¹⁰ Yeˬsuˇ aˬ yawꞈ˗euˬ zaˬ lahˇ deuˬ˗ahˇ guiˬ lahˬ shaˇ ngeh, aˬ yawꞈ˗ahˇ shaˇ˗eu maˬ ngeuˇ˗eu, aˬ yawꞈ˗euˬ tsawˇ myahˇ laꞈ kʼoeˇ neh shaˇ lehˇ ehˇ nehˬ˗euˬ meh. (Yoˇhaˬ 16:23, 24) Heu naˇ, aˬ yawꞈ maꞈ ya siˬ nya˗eu aˇ yeˇ huiˬ˗eu gaˇ kawˆ pyeuꞈ meh. Yeˬsuˇ gʼoꞈ dehꞈ laˇ ngeh, aˬ yawꞈ maꞈ Yeˬsuˇ˗ahˇ guiˬ lahˬ shaˇ mawꞈ˗eu kʼawꞈ pyeuꞈ nya meh. Yeˬsuˇ˗aˬ, aˬ yawꞈ maꞈ˗euˬ gʼoeˇ dui dui˗eu cawˬ pyeuꞈ˗awˇ, aˬ yawꞈ maꞈ˗ahˇ jiˇ gaˬ˗eu meh. Teu miˇ neh Yeˬsuˇ aˬ yawꞈ maꞈ˗euˬ guiˬ lahˬ shaˇ dawˬ˗ahˇ naˇ haˬ mawꞈ˗awˇ, Aˬda˗ahˇ dzawˇ nehˬ leˇ meh lehˇ noeˬ˗eu miˇ neh kʼawꞈ pyeuꞈ nya meh. Ehˇ kʼawꞈ Yeˬsuˇ aˬ yawꞈ maꞈ˗ahˇ teu loꞈ˗ehˇ maˬ bi noeˬ mawꞈ˗a. Aˬ jeˬ miˇ neh nga? Yeˬsuˇ aˬ yawꞈ maꞈ˗ahˇ “Aˬda naw maꞈ˗ahˇ gaˬ˗eu meh” lehˇ ehˇ nehˬ˗euˬ miˇ neh meh. Heu naˇ Yeˬsuˇ, Yeˬhawˇbaˬ aˬ yawꞈ maꞈ˗euˬ shaˇ dawˬ˗ahˇ naˇ haˬ mawꞈ˗eu lehˇ mehˬ luꞈ˗eu jeˬ pyeuꞈ meh. Yaw tsaˬ yaw dawˇ jeˬ gaˇ kawˆ heu naˇ, guiˬ lahˬ shaˇ˗eu gaˇ kawˆ nehˬ˗ehˇ taꞈ leˇ˗awˇ Jaˇliꞈ laꞈ kʼoeˇ˗euˬ ya dzaw dahˬ beh˗eu gaˇ kawˆ deuˬ pyeuꞈ meh. Heu naˇ nawˬ˗euˬ gʼaˇ duˬ aˬ jeˬ ehˇ mawꞈ˗eu nga lehˇ shaˇ noeˬ haw sheˇ. Jaˇliꞈ pyehˆ tseˇ˗euˬ baˬ da neh nawˇ Yeˬsuˇ˗ahˇ siˬ nya laˇ˗awˇ, gaˬ dzehˬ laˇ˗euˬ meh. (Yoˇhaˬ 14:21) Ehˇ kʼawꞈ dahˬ beh˗euˬ Ka li zaˬ deuˬ loꞈ˗ehˇ duˇ ni aˬ dui jiˇ “Aˬda naw maꞈ˗ahˇ gaˬ˗eu meh” lehˇ jah ziꞈ˗eu laꞈ kʼoeˇ, Miˬyehˇ˗ahˇ guiˬ lahˬ shaˇ nya meh. Nawˇ Yeˬhawˇbaˬ˗ahˇ guiˬ lahˬ kʼaˇ shaˇ ngeh, dawˬ teu˗ahˇ jah miˇ˗a lehˇ mˇ mawˇ˗eu jeˬ pyeuꞈ meh.—1 Yoˇhaˬ 5:14.

Aˬ jeˬ miˇ neh maˬ jah coeˇ ni pyeuꞈ laˇ˗euˬ lehˇ siˬ nya

11. Aˬ dui Yeˬhawˇbaˬ˗euˬ nui gaˬ˗ahˇ maˬ jah coeˇ ni gʼeh naˇ, Saˬdaˬ aˬ jeˬ miˇ neh laˬ kʼaˬ cehˇ˗eu nga?

¹¹ Yeˬhawˇbaˬ˗euˬ nui gaˬ˗ahˇ maˬ jah coeˇ ni aˬ jeˬ miˇ neh gʼeh laˇ nya˗eu nga? Saˬdaˬ baˬ da neh lehˇ ehˇ˗eu kʼawꞈ pyeuꞈ nya meh. Teu jiˇ tsaˬ meh. Saˬdaˬ aˬ dui˗ahˇ “kawꞈ sehꞈ dzaˬ˗eu” lehˇ jawˬ luꞈ˗awˇ, aˬ dui Yeˬhawˇbaˬ˗euˬ nui gaˬ˗ahˇ maˬ jah coeˇ ni gʼeh naˇ, aˬ yawꞈ laˬ kʼaˬ cehˇ˗eu meh. (1 Beˬtuˆluˆ 5:8) Yeˬhawˇbaˬ aˬ dui˗ahˇ gaˬ˗eu miˇ neh ka kʼoꞈ˗eu jeˬ lehˬ hmˬ nehˬ˗euˬ meh. Ehˇ kʼawꞈ Saˬdaˬ aˬ dui teu˗ahˇ maˬ za geuˇ˗a lehˇ bi noeˬ mawꞈ˗eu meh. (Heˬbyehˇ 2:9) Aˬ dui Yeˬhawˇbaˬ˗euˬ nui gaˬ˗ahˇ maˬ jah coeˇ ni gʼeh naˇ, aˬ suˇ gʼaˬ laˬ kʼaˬ cehˇ nga? Saˬdaˬ meh. Aˬ dui Miˬyehˇ˗euˬ gaˇ maˬ paˇ mˇ ni nui ma cawˆ˗awˇ gʼaˬ baˬ naˇ tawˇ neh, aˬ suˇ gʼaˬ laˬ kʼaˬ cehˇ nga? Saˬdaˬ meh. Saˬdaˬ aˬ dui˗ahˇ Yeˬhawˇbaˬ aˬ dui˗ahˇ maˬ gaˬ˗a lehˇ bi noeˬ mawꞈ˗eu meh. Teu naˇ maˬ tsaˬ˗a. Maˇ diˇ naˇ, Yeˬhawˇbaˬ maˬ gaˬ˗eu gʼaˬ naˇ, Saˬdaˬ meh. Saˬdaˬ tiˬ kʼehˬ maˬ ka zmˬ˗eu “tsawˬ gahˇ” naˇ, Yeˬhawˇbaˬ aˬ dui˗ahˇ maˬ gaˬ˗a, maˬ ha geuꞈ˗a lehˇ noeˬ leˇ ni jahˇ˗eu heu meh. (Eˇpeˇsu 6:11) Aˬ dui˗ahˇ muiˇ˗eu gʼaˬ pyeuꞈ˗eu Saˬdaˬ heu loꞈ˗ehˇ leh jeh˗eu lehˇ siˬ nya˗eu miˇ neh, kʼaˇ gʼeh nya gaˇ neh “Nehꞈ sahˬ paˬ˗ahˇ muiˇ˗awˬ.”—Yaˬkoˆ 4:7.

12-13. Jeˬ biˇ za taˬ˗euˬ iˬ baˇ heu naˇ, aˬ dui˗ahˇ Yeˬhawˇbaˬ˗euˬ nui gaˬ˗ahˇ maˬ jah coeˇ ni aˬ joˆ˗ehˇ bi gʼeh laˇ nya˗eu nga?

¹² Yeˬhawˇbaˬ˗euˬ nui gaˬ˗ahˇ maˬ jah coeˇ ni bi gʼeh laˇ˗eu aˬ jeˬ paˇ jaˆ nga siˬ? Teu naˇ, aˬ dui neh jeˬ biˇ za taˬ˗euˬ iˬ baˇ heu pyeuꞈ meh. (Ja ceuˬ 51:5; Loˇmaˆ 5:12) Iˬ baˇ heu naˇ, tsawˇ haˬ zaˬ hawˇ˗eu Miˬyehˇ yaw kaˬ jaˆ˗eu cawˬ cawˬ˗eu jeˬ˗ahˇ laˆ cawˆ˗awˇ, aˬ dui˗euˬ nui noeˬ nui ma hawˇ˗eu gʼawˇ mawˇ˗ahˇ jiˇ deuˬ˗eu meh.

¹³ Iˬ baˇ heu naˇ, aˬ dui˗ahˇ maˬ muiˬ paw dzeˇ dzaˬ˗ahˇ bi noeˬ laˇ nya meh. Aˬ dui iˬ baˇ mˇ ngeh, aˬ dui˗ahˇ iˬ baˇ ahˇ˗eu nui ma, noeˬ shaˬ kʼahˬ lahˇ˗eu nui ma, shaꞈ dawˇ˗eu nui ma bi ahˇ laˇ nya meh. Ehˇ kʼawꞈ aˬ dui tiˬ jeˬ˗iˬ, iˬ baˇ maˬ mˇ˗euˬ kʼawꞈ, aˬ jeˬ miˇ neh toˆ˗ehˇ noeˬ laˇ nya˗eu nga? Aˬ dui yawˬ gʼaˬ na luꞈ iˬ baˇ zaˬ pyeuꞈ˗eu miˇ neh meh. Maˇ diˇ naˇ, Yeˬhawˇbaˬ tsawˇ haˬ zaˬ˗ahˇ iˬ baˇ zaˬ bi pyeuꞈ˗eu lehˇ beh˗euˬ maˬ ngeuˇ˗a. (Loˇmaˆ 8:20, 21) Yaw jeˬ ma jeˬ heu˗ahˇ shaˇ noeˬ haw sheˇ. Lawˬ liˬ aˇ beuˆ jaˬ lehˇ maˬ ahˇ naˇ, jaˬ lehˇ ahˇ ngeh loꞈ˗ehˇ maˬ yeuꞈ muiˬ˗a. Teu gaˇ duˇ ni, aˬ dui jiˇ iˬ baˇ zaˬ pyeuꞈ˗iˇ˗euˬ miˇ neh Yeˬhawˇbaˬ neh tsawˇ haˬ zaˬ˗ahˇ beh beh beh ngeh loꞈ˗ehˇ maˬ duˇ˗a. Teu miˇ neh tiˬ poˆ na Yeˬhawˇbaˬ˗euˬ nui gaˬ˗ahˇ maˬ jah coeˇ ni gʼeh˗eu heu naˇ, zahˬ leˇ paˬ˗ehˇ gʼeh˗eu jeˬ maˬ ngeuˇ˗a. Teu loꞈ˗ehˇ kʼaˇ noeˬ laˇ ngeh Yeˬhawˇbaˬ˗aˬ, ‘huiˬ dui mahˇ dui dui˗awˇ, aˬ yawꞈ˗ahˇ gaˬ˗awˇ aˬ yawꞈ neh kʼaˇ ehˇ taˬ˗euˬ loꞈ˗ehˇ mˇ˗eu tsawˇ haˬ deuˬ˗ahˇ aˬ yawꞈ dawˬ ma saˇ jaˇ ziꞈ˗eu meh’ lehˇ taˬ ngehˇ.—Neˬhaˬmiˇ 1:5.

14. Ka kʼoꞈ˗eu jeˬ˗euˬ gaˇ kawˆ˗ahˇ shaˇ noeˬ shaˇ sawˇ˗eu heu naˇ, aˬ dui˗ahˇ Yeˬhawˇbaˬ gaˬ meh lehˇ jah ziꞈ laˇ ni aˬ joˆ˗ehˇ caw ba nehˬ nga? (Loˇmaˆ 5:8) (“‘Iˬ baˇ mehˇ shuiˇ˗ahˇ’ yahˇ” lehˇ ehˇ˗eu oeˬ coeˇ oeˬ bawˬ˗ahˇ haw.)

¹⁴ Tiˬ poˆ na, aˬ dui˗ahˇ Yeˬhawˇbaˬ˗euˬ nui gaˬ˗ahˇ za˗eu maˬ geuˇ nya lehˇ bi noeˬ laˇ nya meh. Maˇ diˇ ya ehˇ naˇ, aˬ dui Yeˬhawˇbaˬ˗euˬ nui gaˬ˗ahˇ za˗eu maˬ geuˇ˗a. Yeˬhawˇbaˬ˗euˬ nui gaˬ˗ahˇ za˗eu maˬ geuˇ kʼawꞈ, aˬ yawꞈ aˬ dui˗ahˇ gaˬ nehˬ laꞈ˗eu miˇ neh aˬ yawꞈ˗euˬ nui gaˬ naˇ naꞈ suiˇ ni gʼeh˗eu meh. Kʼoeˇ naˇ aˬ dui yaw muiˬ tiˬ jeˬ na mˇ˗euˬ baˬ da neh maˬ ngeuˇ ni Yeˬhawˇbaˬ aˬ dui˗ahˇ gaˬ˗eu miˇ neh aˬ dui˗euˬ iˬ baˇ˗ahˇ dehˬ kaˬ zaꞈ˗eu gʼaˇ duˬ ka kʼoꞈ˗eu jeˬ lehˬ hmˬ nehˬ˗euˬ meh. (1 Yoˇhaˬ 4:10) Kʼoeˇ naˇ Yeˬsuˇ byah kuꞈ˗eu tsawˇ haˬ deuˬ˗ahˇ maˬ ngeuˇ˗eu iˬ baˇ zaˬ deuˬ˗ahˇ ka kʼoꞈ˗eu gʼaˇ duˬ shiˇ dah le˗euˬ lehˇ jiˇ taˬ ngehˇ. (Loˇmaˆ 5:8-ahˇ gui.) Tsawˇ haˬ tiˬ gʼaˬ˗iˬ yawˬ jeˬ na luꞈ ehˇ kʼaˇ maˬ za ni maˬ mˇ nya˗a. Kʼoeˇ naˇ Yeˬhawˇbaˬ jiˇ aˬ dui teu loꞈ˗ehˇ mˇ nya gaˇ maˬ noeˬ tmˬ˗a. Iˬ baˇ heu naˇ, aˬ dui˗ahˇ Yeˬhawˇbaˬ˗euˬ nui gaˬ˗ahˇ za˗eu maˬ geuˇ nya lehˇ bi noeˬ laˇ˗eu lehˇ gʼoˆ shaw laˇ ngeh, aˬ dui˗ahˇ nui noeˬ teu˗ahˇ deuˆ ceh ceh˗eu gʼaˇ duˬ paˇ bi noeˬ tsoˆ taˬ dzehˬ laˇ˗eu meh.—Loˇmaˆ 7:24, 25.

Aˬ myah luꞈ saˇ jaˇ ziꞈ˗awˬ

15-16. Aˬ dui Yeˬhawˇbaˬ˗ahˇ saˇ jaˇ kʼaˇ ziꞈ˗eu kʼoeˇ keuˆ ni aˬ jeˬ˗ahˇ jah ziꞈ nya˗eu nga? Aˬ jeˬ miˇ neh? (2 Saˬmeuˬlaˆ 22:26)

¹⁵ Yeˬhawˇbaˬ aˬ dui “aˬ yawꞈ˗ahˇ saˇ jaˇ ziꞈ˗eu” heu neh yaw muiˬ˗ehˇ bi noeˬ tsehˆ mawꞈ˗eu meh. (Dawˬmehˬmehˬ˗eu 30:19, 20) Aˬ dui Yeˬhawˇbaˬ˗ahˇ saˇ jaˇ ziꞈ naˇ, Yeˬhawˇbaˬ jiˇ aˬ dui˗ahˇ saˇ jaˇ ziꞈ meh lehˇ jah ziꞈ nya meh. (2 Saˬmeuˬlaˆ 22:26-ahˇ gui.) Aˬ dui Yeˬhawˇbaˬ˗ahˇ saˇ jaˇ kʼaˇ ziꞈ˗eu kʼoeˇ keuˆ ni, aˬ dui ya puˬ˗eu shaˬ zahˬ dawˬ tawˆ luꞈ˗ahˇ dzeuˇ˗iˇ nya ni Yeˬhawˇbaˬ caw ba nehˬ meh lehˇ aˬ dui jah ziꞈ nya meh.

¹⁶ Aˬ dui neh ja sawˇ laꞈ˗euˬ loꞈ˗ehˇ shaˬ zahˬ˗ahˇ ya puˬ ngeh, aˬ dui˗ahˇ ziꞈ dah ni bi gʼeh laˇ˗eu gʼawˬ mya jeˬ jaˆ˗eu meh. Yeˬhawˇbaˬ aˬ dui˗ahˇ gaˬ˗awˇ, caw ba nehˬ meh lehˇ siˬ nya˗eu ma. Heu naˇ Jaˇliꞈ mehˬ˗eu jeˬ pyeuꞈ meh. Aˬ dui˗ahˇ Yeˬhawˇbaˬ˗euˬ nui gaˬ˗ahˇ maˬ jah coeˇ ni gʼeh laˇ naˇ, yawˬ ha˗euˬ nui noeˬ nui ma˗ahˇ maˬ ngeuˇ˗eu yaw tsaˬ yaw dawˇ jeˬ pyeuꞈ˗eu aˬ dui neh ya siˬ˗euˬ jeˬ˗ahˇ shaˇ noeˬ shaˇ sawˇ. Yeˬhawˇbaˬ˗euˬ nui gaˬ mˬ maˬ maˬ byaˆ zaˇ ziˇ ziꞈ meh lehˇ ehˇ˗eu Jaˇliꞈ laꞈ kʼoeˇ˗euˬ ya dzaw dehˬ beh˗euˬ gaˇ kawˆ heu˗ahˇ aˬ myah luꞈ jah ziꞈ luˬ˗uˇ.