Gui˗eu deuˬ naˇ haˬ˗eu jeˬ

Maꞈtehˬ sahˬ boꞈ hawˇ˗eu Luˇkaꞈ sahˬ boꞈ aˬ jeˬ miˇ neh Yeˬsuˇ yaw zaˬ ngeh dehꞈ˗euˬ gaˇ kawˆ˗ahˇ maˬ boꞈ duˇ taˬ˗euˬ nga?

Maꞈtehˬ hawˇ˗eu Luˇkaꞈ Yeˬsuˇ dehꞈ le ngeh hawˇ˗eu Yeˬsuˇ yaw zaˬ ngeh˗euˬ gaˇ kawˆ˗ahˇ boꞈ˗euˬ maˬ duˇ leˇ˗eu heu naˇ aˬ yawꞈ nyaꞈ tiˬ gʼaˬ tiˬ pyawˬ˗ahˇ haw˗awˇ tsawˇ haˬ aˬ yawꞈ tiˬ gʼaˬ˗euˬ gaˇ kawˆ˗ahˇ tehꞈ˗ehˇ boꞈ˗euˬ maˬ ngeuˇ˗eu miˇ neh meh.

Maꞈtehˬ naˇ myaˬ myaˬ ni Yoˇsehˆ˗euˬ gaˇ kawˆ˗ahˇ boꞈ˗euˬ meh. Yoˇsehˆ Maˬliˇ zaˬ tsehˆ leˇ˗euˬ lehˇ ya siˬ ngeh aˬ joˆ˗ehˇ noeˬ˗awˇ aˬ yawꞈ yuꞈ maˆ maˆ ngeh mˬ taˆ gʼaˬ kʼehˇ aˬ jeˬ ehˇ nehˬ le˗euˬ aˬ yawꞈ aˬ joˆ˗ehˇ mˇ caw˗eu gaˇ kawˆ boꞈ taˬ˗euˬ meh. (Maꞈtehˬ 1:19-25) Kʼoeˇ naˇ Iˇjiˇtuˆ miˇ kʼahˬ˗ahˇ cehˆ iˇ˗eu gʼaˇ duˬ mˬ taˆ gʼaˬ kʼehˇ Yoˇsehˇ˗ahˇ aˬ joˆ˗ehˇ ehˇ nehˬ le˗awˇ Yoˇsehˆ aˬ joˆ˗ehˇ mˇ caw˗euˬ gaˇ kawˆ jiˇ boꞈ taˬ˗euˬ meh. Kʼoeˇ tehꞈ˗ehˇ maˬ gʼaˬ ni yuꞈ maˆ maˆ˗eu laꞈ kʼoeˇ mˬ taˆ gʼaˬ kʼehˇ Yoˇsehˆ˗ahˇ Iˇsaˬleˬlaˆ miˇ kʼahˬ˗ahˇ gʼoꞈ leˇ lehˇ ehˇ nehˬ˗awˇ Yoˇsehˆ gʼoꞈ keuˆ leˇ gʼaˬ naˇ Naˬzaˬlehˇ meuˬ˗ahˇ jawˇ˗euˬ meh lehˇ paˇ boꞈ taˬ˗euˬ meh. (Maꞈtehˬ 2:13, 14, 19-23) Maꞈtehˬ neh boꞈ˗euˬ sahˬ boꞈ gaˬ naˇ yaw huiˬ 1-2-ahˇ Yoˇsehˆ˗ahˇ 8 poˆ ngehˬ keuˆ taˬ˗euˬ kʼawꞈ Maˬliˇ˗ahˇ naˇ 4 poˆ ngehˬ keuˆ taˬ˗euˬ tehꞈ meh.

Ehˇ kʼawꞈ Luˇkaꞈ naˇ myaˬ myaˬ ni Maˬliˇ˗ahˇ ngehˬ keuˆ taˬ˗euˬ meh. Luˇkaꞈ mˬ taˆ gʼaˬ kʼehˇ Gaˬbeˬlaˇ Maˬliˇ jawˇ gaˇ oe˗euˬ gaˇ kawˆ Maˬliˇ Eˇliˇsaˬbehˆ jawˇ gaˇ gʼaˬ iˇ˗euˬ gaˇ kawˆ hawˇ˗eu Maˬliˇ neh Yeˬhawˇbaˬ˗ahˇ ja ceuˬ˗eu dawˬ boꞈ taˬ˗euˬ meh. (Luˇkaꞈ 1:26-56) Kʼoeˇ naˇ Suˇmoˬ Maˬliˇ˗ahˇ Yeˬsuˇ mehˬ hu paw shaˬ˗eu zahˬ˗eu jeˬ˗ahˇ ya tahˬ puˬ meh lehˇ ehˇ nehˬ˗eu gaˇ kawˆ jiˇ boꞈ˗awˇ Yeˬsuˇ 12 kʼoꞈ kʼawˆ ngeh aˬ yawꞈ pehˬ uˬ duˬ tahˬ nymˇ˗ahˇ iˇ˗euˬ gaˇ kawˆ jiˇ boꞈ taˬ˗euˬ meh. Luˇkaꞈ gaˇ kawˆ heu boꞈ ngeh jiˇ Yoˇsehꞈ neh ngehˬ dawˬ˗eu maˬ ngeuˇ˗eu Maˬliˇ neh ngehˬ˗euˬ dawˬ˗ahˇ boꞈ taˬ˗awˇ Maˬliˇ gaˇ kawˆ heu deuˬ˗ahˇ ya leˇ dui dui˗eu meh lehˇ boꞈ taˬ˗euˬ meh. (Luˇkaꞈ 2:19, 34, 35, 48, 51) Luˇkaꞈ neh boꞈ˗euˬ gaˬ naˇ yaw huiˬ 1-2-ahˇ Maˬliˇ˗euˬ tsawˇ myahˇ 12 poˆ boꞈ taˬ˗euˬ kʼawꞈ Yoˇsehˆ˗euˬ tsawˇ myahˇ 3 poˆ ahˇ tehꞈ meh. Teu miˇ neh Maꞈtehˬ naˇ Yoˇsehˆ neh noeˬ˗awˇ mˇ˗eu jeˬ boꞈ taˬ˗awˇ Luˇkaꞈ naˇ Maˬliˇ neh noeˬ˗awˇ ya tahˬ puˬ˗euˬ jeˬ˗ahˇ boꞈ taˬ˗euˬ meh.

Guiˬ lahˬ dawˬ heu nyiˬ dmˬ˗ahˇ Yeˬsuˇ pehˬ˗euˬ tsuiꞈ boꞈ taˬ˗euˬ maˬ duˇ leˇ˗a. Maꞈtehˬ Yoˇsehˆ pehˬ˗euˬ tsuiꞈ˗ahˇ ngehˬ keuˆ˗awˇ Yeˬsuˇ Yoˇsehˆ neh cu˗eu zaˬ pyeuꞈ˗eu miˇ neh zahˇ sahˇ kʼoꞈ paw neh ehˇ naˇ sahˬ paˬ Daˬbiˇ˗euˬ dzoeˬ dzaˬ nuiˇ mahˬ˗ahˇ nuiˇ˗eu aˬ kawˬ˗aˬ jaˆ ngaˇ lehˇ siˬ laˇ˗eu meh. Aˬ jeˬ miˇ neh? Yoˇsehˆ sahˬ paˬ Daˬbiˇ˗euˬ aˬ li Sawˇlaˬmoˬ˗euˬ oeˬ paˬ oeˬ ma pyeuꞈ˗eu miˇ neh meh. (Maꞈtehˬ 1:6, 16) Luˇ kaꞈ naˇ Maˬliˇ pehˬ˗euˬ tsuiꞈ˗ahˇ ngehˬ keuˆ taˬ˗awˇ Yeˬsuˇ aˇ jeuˬ aˇ ca paw neh Daˬbiˇ˗euˬ nuiˇ mahˬ˗ahˇ nuiˇ leˇ˗eu aˬ kawˬ˗aˬ jaˆ˗eu lehˇ bi siˬ laˇ˗eu meh. Aˬ jeˬ miˇ neh? Maˬliˇ Daˬbiˇ˗euˬ aˬ li Naˬdaˬ˗euˬ oeˬ paˬ oeˬ ma pyeuꞈ˗eu miˇ neh meh. (Luˇkaꞈ 3:31) Yeˬsuˇ˗aˬ “Daˬbiˇ˗euˬ zaˬ deuˬ uˆ deuˬ laꞈ kʼoeˇ dehꞈ le˗euˬ meh” (Loˇmaˆ 1:3) Kʼoeˇ naˇ Yoˇsehˆ˗aˬ Iˇliˇ˗euˬ aˬ li meh lehˇ Luˇkaꞈ paˇ ehˇ˗eu meh. Aˬ yawꞈ aˬ jeˬ miˇ neh toˆ˗ehˇ ehˇ˗eu nga maˇ diˇ naˇ Iˇliˇ Maˬliˇ˗euˬ aˬ daˬ pyeuꞈ gaˇ neh? Aˬ jeˬ miˇ neh ehˇ naˇ aˬ myah myah luꞈ naˇ poeˬ piˬ deuˬ˗euˬ tsuiꞈ˗ahˇ kʼaˬ dzeˇ zaˬ deuˬ˗euˬ tsawˇ myahˇ tehꞈ˗ehˇ ahˇ˗eu miˇ neh meh. Teu miˇ neh Yoˇsehˇ Iˇliˇ˗euˬ aˬ li˗a lehˇ Luˇkaꞈ ehˇ ngeh maˇ diˇ naˇ Yoˇsheˆ˗aˬ Iˇliˇ˗euˬ aˬ zaˬ pyeuꞈ˗eu lehˇ ehˇ mawꞈ˗eu lehˇ yawˬ gʼaˬ na luꞈ siˬ nya˗eu meh.—Luˇkaꞈ 3:23.

Maꞈtehˬ hawˇ˗eu Luˇkaꞈ˗euˬ sahˬ boꞈ laꞈ kʼoeˇ ahˇ˗eu Yeˬsuˇ˗euˬ poeˬ piˬ deuˬ˗euˬ tsuiꞈ heu naˇ Yeˬsuˇ˗aˬ Miˬyehˇ neh saˇ jaˇ dzaˬ taˬ˗euˬ Meˬsiˇya ngaˇ lehˇ maˇ jawˆ ni siˬ laˇ˗eu meh. Maˇ maˇ ni kʼawꞈ Yeˬsuˇ˗aˬ tsawˇ haˬ zaˬ deuˬ siˬ nya˗eu loꞈ˗ehˇ Daˬbiˇ˗euˬ oeˬ paˬ oeˬ ma pyeuꞈ meh. Paˬliˬsehˇ hawˇ˗eu Saˬduˬgehˇ deuˬ kʼawꞈ gaˇ kawˆ heu ahˇ laꞈ daˬ˗eu meh. Maꞈtehˬ hawˇ˗eu Luˇkaꞈ˗euˬ sahˬ boꞈ laꞈ kʼoeˇ ahˇ˗eu Yeˬsuˇ˗euˬ poeˬ piˬ deuˬ˗euˬ tsuiꞈ˗ahˇ gui˗eu heu naˇ aˬ dui˗ahˇ jah˗eu jeˬ ziꞈ laˇ ni caw ba nehˬ laꞈ˗awˇ Miˬyehˇ˗euˬ dawˬ maˬ saˇ jaˇ maˇ diˇ pyeuꞈ laˇ meh lehˇ jah coeˇ ni jiˇ caw ba nehˬ˗eu meh.