Nawˇ za˗eu laꞈ sawˬ tiˬ jeˬ neh˗iˬ taˬ bi lehˬ iˇ

1, 2. (a) Miˬyehˇ˗euˬ gaˇ mˇ zaˬ deuˬ aˬ jeˬ˗euˬ laꞈ sawˬ˗ahˇ haw tsoˆ taˬ˗euˬ nga? (b) Aˬ dui laꞈ sawˬ˗ahˇ haw tsoˆ taˬ nya ni caw ba nehˬ˗eu aˬ jeˬ nga? (Dahˬ beh˗eu baˇ˗ahˇ haw.)

Tseˇ doˆ taˬ˗euˬ Ka li zaˬ deuˬ mˬ kʼoeˇ taˆ zawˇ˗ehˇ muiˬ˗eu noeˬ tmˬ˗eu jeˬ jaˆ˗eu meh. Aˬ yawꞈ maꞈ mˬ kʼoeˇ taˆ ya dehꞈ˗eu jeˬ˗ahˇ haw tsoˆ taˬ˗euˬ meh. Pawˇluˆ noeˬ tmˬ˗eu jeˬ heu˗ahˇ “mˬ kʼoeˇ taˆ ya jawˇ ni . . . Miˬyehˇ aˬ dui˗ahˇ kuˇ luꞈ˗eu” laꞈ sawˬ lehˇ kuˇ˗eu meh. (Piˇliˇpiˆ 3:14) Aˬ yawꞈ maꞈ mˬ kʼoeˇ taˆ Yeˬsuˇ nehˬ˗ehˇ Miˬyehˇ Miˇkʼahˬ laꞈ kʼoeˇ uˆ lahˇ˗awˇ tsawˇ haˬ zaˬ deuˬ byah kuꞈ kʼoꞈ laˇ ni caw ba nehˬ˗eu meh. (Pah mehˬ˗eu 20:6) Heu aˇ naˆ ni muiˬ˗eu noeˬ tmˬ jeˬ pyeuꞈ nga! Yawˇ nui deuˬ naˇ noeˬ tmˬ˗eu nui jeˬ˗ahˇ loꞈ luꞈ˗eu meh. Aˬ yawꞈ maꞈ miˇ tsaˬ kʼoeˇ taˆ baˬlaˬdiˇsuˆ˗ahˇ mˬ maˬ maˬ byaˆ zaˇ ziˇ ya dehꞈ˗eu noeˬ tmˬ jeˬ jaˆ˗awˇ noeˬ tmˬ jeˬ heu aˬ yawꞈ maꞈ˗ahˇ maˇ diˇ laꞈ kʼaˬ bi cehˇ˗eu meh.—2 Beˬtuˆluˆ 3:13.

² Pawˇluˆ tseˇ doˆ taˬ˗euˬ Ka li zaˬ deuˬ˗ahˇ saˇ jaˇ ziꞈ nya˗awˇ laꞈ sawˬ za nya ni caw ba nehˬ mawꞈ˗eu meh. Aˬ yawꞈ maꞈ˗ahˇ “mˬ kʼoeˇ taˆ jaˆ˗eu jeˬ˗ahˇ naw maꞈ˗euˬ nui ma noeˬ tsoˆ taˬ˗awˬ” lehˇ ehˇ nehˬ˗euˬ meh. (Gawˇlawˇsehˇ 3:2) Aˬ yawꞈ maꞈ zawˇ˗ehˇ muiˬ˗eu mˬ taˆ laꞈ saw˗ahˇ ya haw tsoˆ taˬ˗eu meh. (Gawˇlawˇsehˇ 1:4, 5) Yeˬhawˇbaˬ neh biꞈ˗eu guiˬ lahˬ˗ahˇ shaˇ noeˬ˗eu heu naˇ Miˬyehˇ˗euˬ gaˇ mˇ˗eu mˬ taˆ ya jawˇ leˇ˗eu deuˬ˗ahˇ maˬ ehˇ miˇ tsaˬ kʼoeˇ taˆ ya jawˇ˗eu deuˬ˗ahˇ maˬ ehˇ laꞈ sawˬ˗ahˇ haw tsoˆ taˬ nya ni caw ba nehˬ˗eu meh.—1 Gawˇliˬtu 9:24.

3. Pawˇluˆ Ka li zaˬ deuˬ˗ahˇ aˬ jeˬ˗euˬ gaˇ kawˆ saˇ tiˇ biꞈ˗euˬ nga?

³ Pawˇluˆ Ka li zaˬ deuˬ˗ahˇ laꞈ sawˬ maˬ bi za ni laˆ cawˆ laˇ˗eu jeˬ˗ahˇ yahˇ lehˇ saˇ tiˇ biꞈ taˬ˗euˬ meh. Yaw jeˬ ma jeˬ Yeˬsuˇ Ka li˗ahˇ maˬ jah ni Moˇseˬ˗euˬ Zahˇ dawˬ kʼoꞈ dawˬ˗ahˇ caw teh˗awˇ Miˬyehˇ nui kʼahˇ bi shiˇ ni leh jeh˗eu Ka li zaˬ aˇ kʼawꞈ deuˬ nehˬ˗ehˇ taꞈ˗eu gaˇ kawˆ˗ahˇ boꞈ taˬ˗euˬ meh. (Gawˇlawˇsehˇ 2:16-18) Kʼoeˇ naˇ nymˇ iˬ nah aˬ dui˗ahˇ laꞈ sawˬ maˬ bi za ni laˆ tsoeˬ laˇ˗eu guˆ laˇ paˬ˗ehˇ gʼeh˗eu jeˬ˗ahˇ jiˇ boꞈ taˬ˗awˇ maˬ muiˬ˗eu jeˬ mˇ mawꞈ˗eu nui ma˗ahˇ aˬ joˆ˗ehˇ gʼaˬ leˇ nya˗awˇ mehˇ nmˇ deuˬ nehˬ˗ehˇ gaˇ kawˆ doˆ laˇ ngeh aˬ joˆ˗ehˇ ya jahˇ˗eu lehˇ jiˇ boꞈ taˬ˗euˬ meh. Pawˇluˆ neh mehˬ˗euˬ zawˇ˗ehˇ muiˬ˗eu dawˬ mehˬ dawˬ tsoˆ heu nymˇ iˬ nah aˬ dui˗ahˇ jiˇ gaˇ dahˇ tsoeˬ dui dui˗eu meh. Nymˇ aˬ dui Pawˇluˆ neh Gawˇlawˇsehˇ meuˬ˗ahˇ nui gaˬ keuˆ˗eu laꞈ kʼoeˇ boꞈ nehˬ˗euˬ sahˬ boꞈ laꞈ kʼoeˇ ahˇ˗eu dawˬ mehˬ dawˬ tsoˆ tiˬ hmˬ na˗ahˇ haw kaˇ˗euˇ.

Kʼaˬ miˬ sheu mawꞈ˗eu nui ma˗ahˇ laˆ sehꞈ

4. Kʼaˬ miˬ sheu mawꞈ˗eu nui ma aˬ jeˬ miˇ neh laꞈ sawˬ˗ahˇ maˬ bi za nya˗eu nga?

⁴ Pawˇluˆ mehˇ nmˇ deuˬ˗ahˇ zawˇ˗ehˇ muiˬ˗eu noeˬ tmˬ˗eu jeˬ˗ahˇ noeˬ mawˇ leˇ ni paˇ ja poˆ nehˬ gʼaˬ naˇ “Naw maꞈ laꞈ kʼoeˇ gaˇ mˇ luꞈ˗eu jeˬ pyeuꞈ˗eu miˇ tsaˬ shiˬ shaˬ jiˇ˗ahˇ nui kʼahˇ jaˆ˗eu laꞈ kʼoeˇ jawꞈ dui dui˗eu kʼaˬ miˬ sheu˗eu gʼawˬ mya jeˬ mˇ˗eu yaw haiˬ jeˬ mˇ˗eu nui kʼahˇ huiˬ˗eu heu deuˬ˗ahˇ naw maꞈ ya laˆ sehꞈ jiˇ meh” lehˇ paˇ ehˇ nehˬ˗euˬ meh. (Gawˇlawˇsehˇ 3:5) Kʼaˬ miˬ sheu mawꞈ˗eu nui ma heu naˇ gʼaˬ kʼaˆ dui dui˗awˇ Yeˬhawˇbaˬ nehˬ˗ehˇ cawˬ cawˬ˗eu jeˬ hawˇ˗eu mehˬ hu paw noeˬ tmˬ˗eu jeˬ˗ahˇ laˆ cawˆ˗eu meh. Aˬ cawˬ nehˬ˗ehˇ dehꞈ bahˬ˗awˇ aˇ muˇ laꞈ kʼoeˇ oꞈ kʼoꞈ laˇ˗euˬ mehˇ nmˇ aˬ li tiˬ gʼaˬ aˬ yawꞈ˗euˬ kʼaˬ miˬ sheu mawꞈ˗eu nui ma gʼaˬ kʼaˆ dui dui˗awˇ “jeˬ nah ga iˇ gaˇ tehꞈ˗ehˇ noeˬ kʼoꞈ laˇ nya” lehˇ ehˇ˗eu meh.

5. Aˬ dui lehˬ laˇ ca laˇ nya˗eu jeˬ˗ahˇ yahˇ nya ni aˬ joˆ˗ehˇ ya jahˇ˗eu nga?

⁵ Yeˬhawˇbaˬ neh aˬ dui˗ahˇ kʼaˬ miˬ sheu˗eu gaˇ kawˆ nehˬ˗ehˇ taꞈ leˇ˗awˇ mehˬ taˬ˗euˬ zahˇ dawˬ˗ahˇ maˬ bi mˇ caw ni lawˬ haw laˇ ngeh ngehˬ˗ehˇ dzehˬ yaw kʼaˆ˗ehˇ ya yahˇ˗eu meh. Yaw jeˬ ma jeˬ zaˬ haˬ haˬ ngeh toeˬ ciˆ˗eu jeˬ˗ahˇ maˬ ehˇ mehˬ saw saw˗eu jeˬ˗ahˇ maˬ ehˇ nyiˬ gʼaˬ tehꞈ˗ehˇ jawˇ˗eu jeˬ˗ahˇ maˬ ehˇ yaw dui laˆ baw taˬ˗eu heu naˇ zaˬ siˬ nui gahˇ ahˇ˗eu jeˬ pyeuꞈ meh. (Dawˬdaˬ 22:3) Kʼoeˇ naˇ aˬ li hawˇ˗eu aˬ buˇ tehꞈ˗ehˇ jeˬ gaꞈ jeˬ ka mˇ ngeh maˬ ehˇ gaˇ mˇ taꞈ ngeh maˬ ehˇ lehˬ laˇ ca laˇ nya˗eu meh. (Dawˬdaˬ 2:10-12, 16) Nawˇ Yeˬhawˇbaˬ˗euˬ Saˇ kiˇ tiˬ gʼaˬ pyeuꞈ maˬ lehˇ noeˬ taˬ. Yaw muiˬ˗ehˇ jawˇ tiˬ poˆ tehꞈ˗ehˇ yaw myaˬ gʼaˬ nehˬ˗ehˇ ngehˬ caw˗eu heu naˇ lehˬ laˇ nya meh. Kʼoeˇ naˇ aˬ dui noeˬ shaˇ˗awˇ nymˇ gawˬ gawˬ ngeh jiˇ ya yahˇ˗eu meh. Teu ngeh aˬ dui˗ahˇ aˇ poeˬ taˬ baw˗eu tiˬ gʼaˬ paˬ loˬ nya lehˇ noeˬ laˇ˗awˇ aˬ suˇ gʼaˬ ngehˬ cawˬ laˇ kʼawꞈ ha geuꞈ˗eu awˬ dui dui˗eu meh. Heu naˇ lehˬ laˇ ca laˇ nya meh. Nawˇ jiˇ teu loꞈ˗ehˇ noeˬ luꞈ˗eu tiˬ gʼaˬ naˇ za˗eu laꞈ sawˬ˗ahˇ laˆ tsoeˬ laˇ˗eu jeˬ˗ahˇ maˬ jahˇ ni Yeˬhawˇbaˬ hawˇ˗eu mehˇ nmˇ deuˬ˗ahˇ caw ba nehˬ laꞈ lehˇ ya shaˇ˗eu meh.—Ja ceuˬ 34:18; Dawˬdaˬ 13:20-ahˇ gui.

6. Aˬ dui byawˬ gʼa mo gʼa˗eu jeˬ˗ahˇ tseˇ ngeh aˬ jeˬ ya noeˬ taˬ˗eu nga?

⁶ Kʼaˬ miˬ sheu mawꞈ˗eu nui ma˗ahˇ laˆ sehꞈ˗eu gʼaˇ duˬ kʼaˬ miˬ sheu ni laˆ noeˬ nehˬ˗eu byawˬ gʼa mo gʼa˗eu jeˬ˗ahˇ ya yahˇ˗eu meh. Nymˇ iˬ nah jahˇ doˆ laꞈ˗euˬ byawˬ gʼa mo gʼa˗eu jeˬ myaˬ ni Sawˇdoˬ meuˬ hawˇ˗eu Gawˇmawˇlaˆ meuˬ˗ahˇ pyeuꞈ yaꞈ˗euˬ jeˬ˗ahˇ bi noeˬ mawˇ˗eu meh. (Yuˇdaˆ 7) Byawˬ gʼa mo gʼa˗eu jeˬ jahˇ doˆ˗eu deuˬ kʼaˬ miˬ sheu˗eu jeˬ˗ahˇ tiˬ jeˬ yaw lehˬ maˬ ngeuˇ˗eu loꞈ˗ehˇ jahˇ doˆ laꞈ˗eu meh. Teu miˇ neh aˬ dui aˬ myah luꞈ ya yahˇ˗eu meh. Aˬ dui kʼaˇ jahˇ doˆ laꞈ˗eu byawˬ gʼa mo gʼa˗eu jeˬ˗ahˇ haw nya˗eu lehˇ maˬ ngeuˇ˗a. Aˬ dui˗euˬ dehꞈ ziˇ laꞈ sawˬ˗ahˇ maˬ bi laˆ cawˆ laˇ˗eu gʼaˇ duˬ yaw muiˬ˗ehˇ ya tseˇ˗eu meh.—Dawˬdaˬ 4:23.

Gʼoeˇ˗eu gaˬ˗eu jeˬ hawˇ˗eu gʼawˬ shaˬ gaˬ˗eu jeˬ “dm tsahˬ taˬ”

7. Ka li zaˬ aˇ muˇ laꞈ kʼoeˇ aˬ jeˬ˗euˬ gaˇ kawˆ doˆ laˇ nya˗eu nga?

⁷ Aˬ dui Ka li zaˬ aˇ muˇ laꞈ kʼoeˇ neh tiˬ gʼaˬ ya pyeuꞈ˗eu nui kʼahˇ shiˇ miˇ˗a. Aˬ dui bawˬ dzaˬ ngeh Miˬyehˇ˗euˬ dawˬ kawˬ dzaw˗awˇ nui gaˬ ahˇ˗eu laꞈ kʼoeˇ tiˬ gʼaˬ tiˇ gʼaˬ gʼaˬ biꞈ˗eu ma. Heu naˇ aˬ dui˗ahˇ laꞈ sawˬ˗ahˇ haw tsoˆ taˬ nya ni caw ba nehˬ˗eu meh. Ehˇ kʼawꞈ tiˬ poˆ na gʼoˆ shaw bahˬ˗eu baˬ da neh mehˇ nmˇ deuˬ nehˬ˗ehˇ gaˇ kawˆ doˆ laˇ nya˗eu meh. Aˬ dui gaˇ kawˆ deuˬ˗ahˇ maˬ laˆ tsaˬ naˇ nui pehˇ yaw awˬ˗ehˇ ahˇ laˇ nya˗eu meh. Toˆ˗ehˇ naˇ aˬ dui gaˇ kawˆ doˆ laˇ ngeh aˬ joˆ˗ehˇ ya jahˇ˗eu nga?—1 Beˬtuˆluˆ 3:8, 9-ahˇ gui.

8, 9. (a) Laꞈ sawˬ za nya ni aˬ dui˗ahˇ caw ba nehˬ˗eu aˬ jeˬ nga? (b) Aˬ dui˗euˬ Ka li zaˬ cawˬ deuˬ nui ma laˆ cawˆ laˇ ngeh mehˬ bawˬ gm ni aˬ dui˗ahˇ aˬ jeˬ caw ba nehˬ˗eu nga?

⁸ Aˬ dui nui pehˇ neh za˗eu laꞈ sawˬ˗ahˇ maˬ bi laˆ cawˆ. Ka li zaˬ deuˬ aˬ jeˬ ya jahˇ˗eu lehˇ Pawˇluˆ ehˇ nehˬ laꞈ˗eu meh. Aˬ yawꞈ ehˇ˗eu: “Naw maꞈ˗aˬ Miˬyehˇ˗euˬ tsawˇ haˬ meh. Aˬ yawꞈ naw maꞈ˗ahˇ gaˬ˗awˇ aˬ yawꞈ˗euˬ tsawˇ haˬ bi pyeuꞈ laˇ˗eu gʼaˇ duˬ tseˇ doˆ taˬ˗euˬ meh. Kʼoeˇ miˇ neh aˬ cawˬ˗ahˇ gʼawˬ shaˬ gaˬ˗eu aˬ cawˬ˗ahˇ ngehˬ gʼeh mawꞈ˗eu yawˬ haˇ yawˬ ha taˬ nyiˇ˗eu nui nahˬ nui yu ahˇ˗eu nui ma gʼawˬ mahˇ ni taˬ˗eu heu deuˬ˗ahˇ naw maꞈ dm tsahˬ taˬ˗awˬ. Tiˬ gʼaˬ tiˇ gʼaˬ oˇ˗awˬ. Iˬ baˇ taˬ kʼaˇ za laˇ ngeh tiˬ gʼaˬ tiˇ gʼaˬ iˬ baˇ pyehˬ˗awˬ. Sahˬpaˬ Yeˬsuˇ naw maꞈ˗ahˇ iˬ baˇ pyehˬ nehˬ laꞈ˗euˬ loꞈ˗ehˇ tiˬ gʼaˬ tiˇ gʼaˬ iˬ baˇ pyehˬ˗awˬ. Heu deuˬ dawˬ tawˆ luꞈ mˇ˗euˬ kʼoeˇ taˆ gʼoeˇ˗eu gaˬ˗eu jeˬ bi jaˆ˗awˬ. Gʼoeˇ˗eu gaˬ˗eu jeˬ˗aˬ dawˬ tawˆ luꞈ tiˬ gaˇ taꞈ leˇ jiˇ ni gahˇ dzahˬ˗eu meh.”—Gawˇlawˇsehˇ 3:12-14.

⁹ Gʼoeˇ˗eu gaˬ˗eu jeˬ hawˇ˗eu gʼawˬ shaˬ gaˬ˗eu jeˬ aˬ cawˬ˗ahˇ iˬ baˇ pyehˬ ni caw ba nehˬ˗eu meh. Tiˬ gʼaˬ na aˬ dui˗ahˇ dawˬ neh maˬ ehˇ mˇ jeˬ shaˇ kawˆ neh maˬ ehˇ nui ma laˆ naˇ laˇ ngeh aˬ dui neh aˬ cawˬ˗ahˇ laˆ naˇ nehˬ ngeh aˬ yawꞈ maꞈ aˬ dui˗ahˇ iˬ baˇ pyehˬ nehˬ laꞈ˗euˬ gaˇ kawˆ˗ahˇ ya shaˇ noeˬ˗eu meh. (Dawˬtsoˆtsoˆ˗eu 7:21, 22-ahˇ gui.) Yeˬsuˇ Ka li gʼawˬ shaˬ gaˬ˗eu laꞈ kʼoeˇ maˇ diˇ uˬ duˬ tahˬ˗eu deuˬ˗ahˇ mehˬ bawˬ gm ni laˆ uiˬ meh. (Gawˇlawˇsehˇ 3:15) Aˬ dui Miˬyehˇ aˬ yawꞈ tiˬ gʼaˬ˗ahˇ tehꞈ˗ehˇ gaˬ˗awˇ guiˬ lahˬ dawˬ jiˇ aˬ yawꞈ tiˬ jeˬ tehꞈ˗ehˇ tsaꞈ gaˬ˗eu uˬ taꞈ tiˬ gaˇ duˇ˗eu shaˬ zahˬ gʼawˬ mya jeˬ˗ahˇ jiˇ ya tahˬ puˬ˗eu meh. Aˬ dui tiˬ gʼaˬ tiˇ gʼaˬ gʼawˬ shaˬ gaˬ˗awˇ iˬ baˇ pyehˬ nehˬ naˇ aˇ muˇ laꞈ kʼoeˇ mehˬ bawˬ gm dzehˬ laˇ˗awˇ laꞈ sawˬ˗ahˇ haw tsoˆ daˆ leꞈ nya˗eu meh.

10, 11. (a) Myaˆ naˆ˗eu jeˬ aˬ jeˬ miˇ neh guˆ laˇ paˬ˗ehˇ gʼeh˗eu nga? (b) Aˬ dui myaˆ naˆ˗eu jeˬ neh aˬ dui za˗eu laꞈ sawˬ˗ahˇ maˬ bi laˆ tsoeˬ ni aˬ joˆ˗ehˇ ya jahˇ˗eu nga?

¹⁰ Myaˆ naˆ˗eu jeˬ aˬ dui˗ahˇ laꞈ sawˬ maˬ bi za ni laˆ tsoeˬ laˇ nya˗eu meh. Jaˇliꞈ laꞈ kʼoeˇ myaˆ naˆ˗eu jeˬ aˇ naˆ ni guˆ laˇ paˬ˗ehˇ gʼeh nga lehˇ ehˇ mawˇ taˬ˗euˬ meh. Yaw jeˬ ma jeˬ Gaˬiˇnaˆ Aˬbeˬlaˆ˗ahˇ myaˆ naˆ˗awˇ sehꞈ˗euˬ meh. Kawˇlaˆ Daˬtaˬ hawˇ˗eu Aˬbiˇlamˬ Moˇseˬ˗ahˇ myaˆ naˆ˗awˇ laˆ tsoeˬ˗euˬ meh. Miˬyehˇ neh “Myaˆ naˆ˗eu jeˬ hawˇ˗eu yawˬ ha gʼaˇ duˬ tehꞈ˗ehˇ shaˇ noeˬ˗eu jeˬ kʼaˇ jaˆ gaˇ maˬ tsaˬ maˬ dzoeˇ leˇ˗eu jeˬ hawˇ˗eu yaw haiˬ gʼawˬ mya jeˬ jaˆ˗eu meh” lehˇ ehˇ taˬ˗euˬ dawˬ maˇ diˇ ngeuˇ˗eu meh.—Yaˬkoˆ 3:16.

¹¹ Aˬ dui gʼoeˇ˗eu gaˬ˗eu jeˬ hawˇ˗eu gʼawˬ shaˬ gaˬ˗eu jeˬ ahˇ ni leh jeh naˇ myaˆ naˆ˗eu jeˬ˗ahˇ yahˇ nya meh. “Gʼoeˇ˗eu gaˬ˗eu jeˬ˗aˬ nui ma gʼawˬ mahˇ ni taˬ˗awˇ aˬ cawˬ˗ahˇ gʼawˬ shaˬ gaˬ nya˗eu meh. Myaˆ maˬ naˆ˗a” lehˇ Miˬyehˇ ehˇ˗eu meh. (1 Gawˇliˬtu 13:4) Aˬ dui laꞈ kʼoeˇ myaˆ naˆ˗eu jeˬ maˬ bi ahˇ˗eu gʼaˇ duˬ yawˬ jeˬ na luꞈ˗ahˇ Yeˬhawˇbaˬ haw˗eu loꞈ˗ehˇ ya haw˗eu meh. Aˬ dui mehˇ nmˇ deuˬ˗ahˇ gʼawˇ mawˇ tiˬ mawˇ˗euˬ aˇ sehˇ loꞈ˗ehˇ ya haw˗eu meh. Heu naˇ aˇ muˇ pyeuꞈ meh. “Aˇ sehˇ tiˬ sehˇ˗ahˇ aˬ cawˬ ja ceuˬ kʼaˇ za naˇ aˇ sehˇ dawˬ tawˆ luꞈ laˬ kʼaˬ ya caw cehˇ˗eu meh” lehˇ Jaˇliꞈ ehˇ˗eu meh. (1 Gawˇliˬtu 12:16-18, 26) Aˬ dui˗euˬ mehˇ nmˇ deuˬ yaw muiˬ jeˬ tiˬ jeˬ na za naˇ aˬ yawꞈ maꞈ˗ahˇ myaˆ maˬ naˆ ni aˬ yawꞈ maꞈ nehˬ˗ehˇ laꞈ kʼaˬ ya caw cehˇ˗eu meh. Sahˬ paˬ Sawˇluˆ˗euˬ aˬ li Yawˇnaˆshaˬ neh mˇ mehˬ yaꞈ˗euˬ gaˇ kawˆ˗ahˇ shaˇ noeˬ haw sheˇ. Miˬyehˇ aˬ yawꞈ˗ahˇ sahˬ paˬ maˬ bi geuꞈ ni Daˬbiˇ˗ahˇ bi geuꞈ ngeh aˬ yawꞈ Daˬbiˇ˗ahˇ myaˆ maˬ naˆ˗eu uˬ taꞈ Daˬbiˇ˗ahˇ gʼaˬ biꞈ˗awˇ caw ba˗eu meh. (1 Saˬmeuˬlaˆ 23:16-18) Aˬ dui Yawˇnaˆshaˬ loꞈ˗ehˇ gʼeh˗eu gʼoeˇ˗eu gaˬ˗eu jeˬ hawˇ˗eu gʼawˬ shaˬ gaˬ˗eu jeˬ ahˇ nya meh loˇ?

Pehˬ zaˬ ma zaˬ laꞈ sawˬ za

12. Aˬ dui˗euˬ nymˇ jiˇ˗ahˇ laꞈ sawˬ za nya ni caw ba nehˬ˗eu aˬ jeˬ˗euˬ dawˬ mehˬ dawˬ tsoˆ jaˆ nga?

¹² Nymˇ jiˇ laꞈ kʼoeˇ jawˇ˗eu deuˬ Miˬyehˇ˗euˬ dawˬ˗ahˇ mˇ caw naˇ laꞈ kʼaˬ cehˇ nui saˇ oꞈ˗awˇ laꞈ sawˬ za nya˗eu meh. Pawˇluˆ nymˇ jiˇ laꞈ kʼoeˇ jawˇ˗eu deuˬ˗ahˇ nui gahˇ ahˇ˗eu dawˬ biꞈ˗euˬ meh. Aˬ yawꞈ ehˇ˗eu “Miˬ zaˬ deuˬ˗oˇ yawˬ ha˗euˬ kʼaˬ dzeˇ zaˬ uˆ lahˇ˗eu uˬ moˆ dehꞈ˗awˬ. Aˬ jeˬ miˇ neh ehˇ naˇ naw maꞈ Ka li zaˬ pyeuꞈ˗eu miˇ neh kʼoeˇ loꞈ˗ehˇ dehꞈ˗eu tsaˬ meh. Kʼaˬ dzeˇ zaˬ deuˬ˗oˇ yawˬ ha˗euˬ miˬ zaˬ˗ahˇ gaˬ˗awˬ. Yehˬ bawˬ sehˇ lu˗ehˇ taˬ gʼeh. Zaˬ deuˬ˗oˇ naw maꞈ Ka li zaˬ pyeuꞈ˗eu loꞈ˗ehˇ yawˬ ha˗euˬ aˬ ma aˬ da ehˇ dawˬ˗ahˇ yawˬ jawˇ na luꞈ naˇ haˬ geuꞈ˗awˬ. Aˬ jeˬ miˇ neh ehˇ naˇ kʼoeˇ loꞈ˗ehˇ mˇ gaˇ Miˬyehˇ nui ma tsaˬ˗eu meh. Aˬ da aˬ ma deuˬ˗oˇ yawˬ ha˗euˬ zaˬ deuˬ nui ma pehˇ ni taˬ jahˇ. Kʼoeˇ loꞈ˗ehˇ jahˇ nehˬ naˇ yawˬ jeˬ na luꞈ laꞈ kʼoeˇ aˬ yawꞈ maꞈ nui ma baˬ˗iˇ tehꞈ˗a.” (Gawˇlawˇsehˇ 3:18-21) Dawˬ mehˬ dawˬ tsoˆ heu nawˬ˗euˬ nymˇ jiˇ˗ahˇ aˬ joˆ˗ehˇ zmˬ iˇ nya˗eu nga?

13. Yeˬhawˇbaˬ˗ahˇ uˬ duˬ maˬ tahˬ˗eu kʼaˬ dzeˇ zaˬ˗ahˇ miˬ zaˬ gʼaˬ aˬ joˆ˗ehˇ caw ba nya˗eu nga?

¹³ Nawˇ˗euˬ kʼaˬ dzeˇ zaˬ Miˬyehˇ gaˇ maˬ mˇ˗eu tiˬ gʼaˬ pyeuꞈ˗eu paˬ. Nawˬ˗euˬ kʼaˬ dzeˇ zaˬ nawˬ˗ahˇ yaw muiˬ˗ehˇ maˬ mˇ nehˬ naˇ aˬ jeˬ jahˇ nya˗eu nga? Nawˇ nui ma pehˇ˗awˇ ceh dzaˬ nya˗eu meh. Ehˇ kʼawꞈ teu loꞈ˗ehˇ jahˇ˗eu teu naˇ muiˬ daˆ laˇ ngaˇ laˬ? Nawˇ aˬ yawꞈ˗ahˇ ceh behˬ nya kʼawꞈ aˬ yawꞈ Yeˬhawˇbaˬ˗euˬ gaˇ mˇ mawꞈ laˇ ngaˇ laˬ? Maˬ mˇ laˇ˗eu paˬ? Ehˇ kʼawꞈ nawˇ aˬ yawꞈ˗ahˇ nymˇ sahˇ aˬ da tiˬ gʼaˬ loꞈ˗ehˇ yaw zeu baw nehˬ naˇ nymˇ jiˇ laꞈ kʼoeˇ nui saˇ oꞈ˗awˇ Yeˬhawˇbaˬ˗ahˇ ja ceuˬ˗eu jeˬ pyeuꞈ meh. Nawˬ neh yaw muiˬ jeˬ mˇ˗euˬ heu naˇ nawˬ˗euˬ kʼaˬ dzeˇ zaˬ Yeˬhawˇbaˬ˗ahˇ uˬ duˬ tahˬ mawꞈ laˇ nya˗awˇ pehˬ zaˬ ma zaˬ luꞈ laꞈ sawˬ za nya˗eu meh.—1 Beˬtuˆluˆ 3:1, 2-ahˇ gui.

14. Yeˬhawˇbaˬ˗ahˇ uˬ duˬ maˬ tahˬ˗eu miˬ zaˬ˗ahˇ kʼaˬ dzeˇ zaˬ gʼaˬ aˬ joˆ˗ehˇ caw ba nya˗eu nga?

¹⁴ Nawˇ˗euˬ miˬ zaˬ Miˬyehˇ gaˇ maˬ mˇ˗eu tiˬ gʼaˬ pyeuꞈ˗eu paˬ. Aˬ yawꞈ nawˬ˗ahˇ yaw zeu maˬ baw naˇ nawˇ aˬ jeˬ jahˇ nya˗eu nga? Nawˇ nymˇ jiˇ laꞈ kʼoeˇ neh huiˬ dzehˬ˗eu gʼaˬ pyeuꞈ de lehˇ aˬ yawꞈ˗ahˇ guˇ guˇ˗ehˇ ngehˬ naˇ aˬ yawꞈ nawˬ˗ahˇ yaw zeu baw laˇ ngaˇ laˬ? Maˬ baw laˇ˗eu duˬ meh. Miˬyehˇ nawˬ˗ahˇ Yeˬsuˇ˗ahˇ dzaw geuꞈ˗eu laꞈ kʼoeˇ nui gaˬ ahˇ˗eu kʼaˬ dzeˇ zaˬ bi pyeuꞈ mawꞈ meh. (Eˇpeˇsu 5:23) Aˇ muˇ˗euˬ uˬ duˬ pyeuꞈ˗eu Yeˬsuˇ aˬ myah luꞈ oˇ oꞈ˗awˇ nui gaˬ ahˇ˗eu meh. (Luˇkaꞈ 9:46-48) Nawˇ Yeˬsuˇ˗ahˇ dzaw geuꞈ naˇ tiˬ nah nawˬ˗euˬ miˬ zaˬ kʼawꞈ Yeˬhawˇbaˬ˗euˬ gaˇ mˇ mawꞈ laˇ˗eu meh.

15. Ka li zaˬ pyeuꞈ˗eu kʼaˬ dzeˇ zaˬ aˬ yawꞈ˗euˬ miˬ zaˬ˗ahˇ gaˬ˗eu lehˇ aˬ joˆ˗ehˇ mˇ mawˇ nya˗eu nga?

¹⁵ Yeˬhawˇbaˬ kʼaˬ dzeˇ zaˬ deuˬ˗ahˇ “Kʼaˬ dzeˇ zaˬ deuˬ˗oˇ yawˬ ha˗euˬ miˬ zaˬ˗ahˇ gaˬ˗awˬ. Yehˬ bawˬ sehˇ lu˗ehˇ taˬ gʼeh” lehˇ ehˇ˗eu meh. (Gawˇlawˇsehˇ 3:19) Nui gaˬ ahˇ˗eu kʼaˬ dzeˇ zaˬ yawˬ ha˗euˬ miˬ zaˬ˗ahˇ yaw zeu baw˗eu meh. Aˬ joˆ˗ehˇ? Aˬ yawꞈ ngehˬ gaˇ yaw muiˬ˗ehˇ naˇ haˬ˗awˇ aˬ yawꞈ neh ngehˬ˗euˬ jeˬ nawˬ˗euˬ gʼaˇ duˬ aˇ yeˇ huiˬ meh lehˇ bi siˬ. (1 Beˬtuˆluˆ 3:7) Aˬ yawꞈ neh shaˇ˗euˬ loꞈ˗ehˇ yawˬ poˆ na maˬ mˇ caw nehˬ nya kʼawꞈ aˬ yawꞈ ngehˬ gaˇ naˇ haˬ naˇ noeˬ tsehˆ ngeh muiˬ dzehˬ˗eu meh. (Dawˬdaˬ 15:22) Nui gaˬ ahˇ˗eu kʼaˬ dzeˇ zaˬ ngaˬ˗ahˇ yaw zeu baw lehˇ yawˬ ha˗euˬ miˬ zaˬ˗ahˇ maˬ ka tiˇ˗a. Miˬ zaˬ gʼaˬ yaw zeu baw laˇ ni yaw muiˬ jeˬ mˇ nehˬ˗eu meh. Yeˬhawˇbaˬ˗euˬ gaˇ mˇ laꞈ kʼoeˇ kʼaˬ dzeˇ zaˬ deuˬ yawˬ ha miˬ zaˬ hawˇ˗eu zaˬ deuˬ˗ahˇ gaˬ naˇ laꞈ kʼaˬ cehˇ˗awˇ dehꞈ ziˇ laꞈ sawˬ za nya˗eu meh.

Zaˬ guˬ deuˬ nawˬ˗euˬ laꞈ sawˬ˗ahˇ tiˬ jeˬ neh˗iˬ taˬ bi laˆ tsoeˬ

16, 17. Zaˬ guˬ deuˬ aˬ da aˬ ma˗ahˇ nui ma maˬ pehˇ ni aˬ joˆ˗ehˇ yahˇ nya˗eu nga?

¹⁶ Nawˇ zaˬ guˬ zaˬ pyeuꞈ˗awˇ nawˬ˗euˬ aˬ da aˬ ma nawˬ˗ahˇ maˬ gʼoˆ shaw nehˬ laꞈ nya maˬ ngeuˇ naˇ aˇ dzehˬ˗ehˇ ka tiˇ dzeuˇ nya lehˇ noeˬ˗eu paˬ. Gaˇ kawˆ heu nawˬ˗ahˇ nui ma laˆ cawˆ laˇ˗awˇ ngaˇ Yeˬhawˇbaˬ˗euˬ gaˇ mˇ mawꞈ miˇ˗a laˬ leˇ heu lehˇ noeˬ laˇ nya˗eu meh. Ehˇ kʼawꞈ nawˇ Yeˬhawˇbaˬ˗ahˇ byehˇ dzeh naˇ miˇ tsaˬ kʼoeˇ taˆ nawˬ da nawˬ ma hawˇ˗eu Ka li zaˬ mehˇ nmˇ deuˬ loꞈ˗ehˇ gʼeh˗eu nui gaˬ nawˇ tiˬ gaˇ˗iˬ maˬ paˇ ya mawˇ haw meh.

¹⁷ Gaˇ kawˆ heu˗ahˇ shaˇ noeˬ haw sheˇ. Nawˬ˗euˬ aˬ da aˬ ma nawˬ˗ahˇ maˬ mehˬ maˬ tsoˆ naˇ aˬ da aˬ ma nawˬ˗ahˇ maˇ diˇ ngehˬ gʼeh ngaˇ lehˇ nawˇ aˬ joˆ˗ehˇ ya siˬ nmˇ? (Heˬbyehˇ 12:8) Nawˬ˗euˬ aˬ da aˬ ma maˬ byah kuꞈ˗eu miˇ neh aˬ yawꞈ maꞈ˗euˬ mehˬ jeˬ mehˬ kawˆ nawˬ˗ahˇ nui ma laˆ cawˆ nya˗eu meh. Ehˇ kʼawꞈ teu gaˇ tehꞈ˗ehˇ haw tsoˆ taˬ ngeh to˗aˬ aˬ yawꞈ maꞈ aˬ jeˬ miˇ neh teu loꞈ˗ehˇ ngehˬ˗awˇ mˇ˗eu nga lehˇ ya gʼoˆ shaw nehˬ˗eu meh. Aˬ yawꞈ maꞈ ngehˬ ngeh maˬ teuˆ ni yaw muiˬ paˬ˗ehˇ naˇ haˬ˗awˬ. “Dawˬ kʼaˇ ngeuˇ˗eu maˬ ngehˬ˗eu deuˬ tsawˇ gahˇ byah˗awˇ nui ma yaw coꞈ deuˬ noeˬ siˬ noeˬ mawˇ nya˗eu meh” lehˇ Jaˇliꞈ ehˇ˗eu meh. (Dawˬdaˬ 17:27) Aˬ joˆ˗ehˇ mehˬ laˇ tsoˆ laˇ kʼawꞈ noeˬ dahˇ doeˬ laˇ˗euˬ tsawˇ kʼaˆ tiˬ gʼaˬ loꞈ˗ehˇ ha geuꞈ˗awˇ dzaw geuꞈ ma lehˇ noeˬ taˬ. (Dawˬdaˬ 1:8) Yeˬhawˇbaˬ˗ahˇ gaˬ˗eu aˬ da aˬ ma za taˬ˗euˬ heu naˇ zawˇ˗ehˇ muiˬ˗eu laꞈ sawˬ tiˬ jeˬ pyeuꞈ˗eu taˬ ngehˇ. Aˬ yawꞈ maꞈ nawˬ˗ahˇ mˬ maˬ maˬ byaˆ zaˇ ziˇ ya dehꞈ ni caw ba nehˬ mawꞈ˗eu meh.

18. Nawˇ aˬ jeˬ miˇ neh laꞈ sawˬ˗ahˇ haw tsoˆ taˬ ma lehˇ noeˬ tsehˆ leˬ?

¹⁸ Aˬ dui˗euˬ noeˬ tmˬ˗eu jeˬ pyeuꞈ˗eu mˬ kʼoeˇ taˆ jaˆ˗eu maˬ ehˇ miˇ tsaˬ kʼoeˇ taˆ jaˆ˗eu maˬ ehˇ yawˬ gʼaˬ na luꞈ yawˇ muiˬ˗eu noeˬ tmˬ˗eu jeˬ heu˗ahˇ loꞈ nya˗eu meh. Aˬ dui neh noeˬ tmˬ taˬ˗euˬ jeˬ yaw duˬ baw meh. Heu naˇ boeˬ boeˬ luˆ luˆ˗ahˇ Beh˗euˬ gʼaˬ˗euˬ saˇ jaˇ dawˬ laꞈ kʼoeˇ jaˆ˗awˇ ‘Yeˬhawˇbaˬ˗ahˇ siˬ nya˗eu jeˬ miˇ tsaˬ kʼoeˇ taˆ byah˗eu’ meh lehˇ aˬ yawꞈ ehˇ˗eu meh. (Iˇsaˬyaˇ 11:9) Gʼawˬ myahˇ maˬ gʼeh˗ehˇ yawˬ gʼaˬ na luꞈ Yeˬhawˇbaˬ neh mehˬ˗eu jeˬ˗ahˇ za˗eu meh. Heu naˇ mˇ poeˬ kʼoꞈ˗eu laꞈ sawˬ pyeuꞈ meh. Teu miˇ neh Yeˬhawˇbaˬ neh nawˬ˗ahˇ saˇ jaˇ dzaˬ taˬ˗euˬ jeˬ˗ahˇ aˬ myah luꞈ noeˬ taˬ˗awˬ nawˇ za˗eu laꞈ sawˬ˗ahˇ tiˬ jeˬ neh˗iˬ taˬ bi laˆ tsoeˬ.