“Miˬyehˇ neh yuˇ dzoeˇ taˬ˗euˬ . . .”

Moˇseˬ˗euˬ zahˇ dawˬ laꞈ kʼoeˇ miˬ zaˬ˗ahˇ gʼawˬ mawꞈ˗eu kʼaˬ dzeˇ zaˬ deuˬ zahˇ sahˇ kʼoꞈ jaˆ˗eu loꞈ˗ehˇ miˬ zaˬ kʼoꞈ˗eu sahˬ boꞈ ya jahˇ meh lehˇ ehˇ taˬ˗euˬ meh. Heu naˇ yaw muiˬ˗ehˇ maˬ shaˇ noeˬ ni gʼawˬ˗eu jeˬ maˬ bi pyeuꞈ laˇ˗eu gʼaˇ duˬ meh. Ehˇ kʼawꞈ, Yeˬsuˇ˗euˬ saˇ ka˗ahˇ˗euˬ zahˇ˗euˬ aˬ yuiꞈ deuˬ yaw awˇ laꞈ˗ehˇ bi gʼawˬ˗awˇ, gaˇ kawˆ gʼawˬ mya jeˬ baˬ da neh miˬ zaˬ˗ahˇ bi gʼawˬ nya meh. (nwtsty˗E Kuˆ 10:4, 11-ahˇ pyehˆ tseˇ˗eu gaˇ kawˆ) Sheuˬ dahˬ dzaˬ˗eu jeˬ˗aˬ, Yeˬhawˇbaˬ neh dahˬ beh˗euˬ meh lehˇ maˇ jawˆ ni ehˇ taˬ˗euˬ meh. (Maˬkuˆ 10:2-12) Kʼaˬ dzeˇ zaˬ hawˇ˗eu miˬ zaˬ “tiˬ shiˬ tiˬ shaˬ” tehꞈ˗ehˇ pyeuꞈ iˇ˗awˇ, ziˇ jiˇ ngeh keuˆ ni tiˬ kawˆ loꞈ˗ehˇ ya jawˇ meh. Maꞈtehˬ sahˬ boꞈ laꞈ kʼoeˇ boꞈ taˬ˗euˬ loꞈ˗ehˇ duˇ ni, ‘aˬ cawˬ nehˬ˗ehˇ bahˬ˗euˬ’ maˬ ngeuˇ taꞈ naˇ maˬ gʼawˬ nya˗a lehˇ Jaˇliꞈ ehˇ˗eu meh.—Tehˬ 19:9.

Nymˬ˗mˇ iˬ nah tsawˇ haˬ deuˬ sheuˬ dahˬ dzaˬ˗eu jeˬ˗ahˇ Yeˬsuˇ haw˗eu loꞈ˗ehˇ maˬ haw ni, Paˬliˬsehˇ deuˬ loꞈ˗ehˇ haw˗eu meh. Aˬ yawꞈ maꞈ gaˇ kawˆ doˆ laˇ ngeh yaw kawˇ ma˗ehˇ gʼawˬ˗eu meh. Heu naˇ Ka li zaˬ deuˬ nehˬ˗ehˇ beu gaˇ˗eu meh. Ka li zaˬ deuˬ naˇ, sheuˬ dahˬ dzaˬ ngeh saˇ jaˇ dzaˬ˗euˬ dawˬ˗ahˇ aˇ yeˇ huiˬ˗eu gaˇ kawˆ pyeuꞈ˗eu lehˇ haw˗awˇ, Jaˇliꞈ laꞈ kʼoeˇ mehˬ taˬ˗euˬ jeˬ˗ahˇ zmˬ˗awˇ gaˇ kawˆ deuˬ˗ahˇ laˆ piˇ˗eu lehˇ leh jeh˗eu meh. Gaˬ˗eu jeˬ hawˇ˗eu yaw zeu baw˗eu jeˬ nymˇ jiˇ laꞈ kʼoeˇ mehˬ bawˬ bi gm lehˇ ehˇ˗eu biˬdiˬoˬ pah˗awˇ, naˇ haˬ˗eu jeˬ heu deuˬ˗ahˇ dawˬ kʼoꞈ biꞈ:

• 

  Dawˬdaˬ 15:1-ahˇ mehˬ nehˬ taˬ˗euˬ jeˬ nawˬ˗euˬ nymˇ dahˬ laꞈ kʼoeˇ aˬ joˆ˗ehˇ zmˬ iˇ nya˗eu nga, gaˇ kawˆ heu aˬ jeˬ miˇ neh aˇ yeˇ huiˬ˗eu nga?

• Dawˬdaˬ 19:11-ahˇ mˇ caw naˇ, gaˇ kawˆ maˬ bi doˆ laˇ ni aˬ joˆ˗ehˇ caw ba nehˬ˗eu nga?

• Nawˬ nyaꞈ˗euˬ nymˇ dahˬ pyaˆ iˇ˗eu lehˇ gʼeh ngeh, ‘Nga nyaꞈ gʼawˬ paˬ nga laˬ leˇ?’ lehˇ maˬ shaˇ noeˬ ni, aˬ jeˬ lehˇ shaˇ noeˬ paˬ˗ehˇ gʼeh˗eu nga?

• Maꞈtehˬ 7:12-ahˇ mˇ caw naˇ, muiˬ˗eu kʼaˬ dzeˇ zaˬ hawˇ˗eu muiˬ˗eu miˬ zaˬ aˬ joˆ˗ehˇ pyeuꞈ laˇ nya˗eu nga?