Yeˬhawˇbaˬ˗euˬ Saˇ kiˇ deuˬ˗euˬ mehˬ bawˬ nawˬ˗ahˇ aˬ joˆ˗ehˇ gaˇ dahˇ tsoeˬ˗eu nga?

Nawˇ Yeˬhawˇbaˬ˗euˬ Saˇ kiˇ deuˬ˗euˬ mehˬ bawˬ˗ahˇ iˇ haw maˬ loˇ? Maˬ iˇ haw˗euˬ naˇ ui cuiˆ na shaˬ zahˬ naꞈ˗eu paˬ. ‘Aˬ yawꞈ maꞈ˗euˬ mehˬ bawˬ˗ahˇ aˬ jeˬ jeˇ jahˇ˗eu nga? Mehˬ bawˬ heu aˬ jeˬ miˇ neh aˇ yeˇ huiˬ˗eu nga? Ngaˇ mehˬ bawˬ˗ahˇ aˬ jeˬ miˇ neh iˇ paˬ˗ehˇ gʼeh˗eu nga?’ lehˇ kʼawꞈ noeˬ˗eu paˬ. Mehˬ bawˬ˗ahˇ iˇ˗eu heu naˇ, Miˬyehˇ nehˬ˗ehˇ bi gʼoeˇ leˇ˗awˇ, nawˬ˗euˬ gʼaˇ duˬ jiˇ gaˇ dahˇ tsoeˬ˗eu lehˇ heu kawˆ laꞈ kʼoeˇ ja sawˇ ngeh ya siˬ meh.

1. Yeˬhawˇbaˬ˗euˬ Saˇ kiˇ deuˬ aˬ jeˬ miˇ neh tiˬ kawˆ loꞈ˗ehˇ mehˬ bawˬ mˇ˗eu nga?

Jaˇliꞈ boꞈ˗euˬ tiˬ gʼaˬ, tiˬ kawˆ loꞈ˗ehˇ mehˬ bawˬ mˇ˗eu teu naˇ aˬ jeˬ miˇ neh aˇ yeˇ huiˬ dui dui˗eu lehˇ ehˇ nehˬ taˬ˗euˬ meh. Aˬ yawꞈ ‘Ngaˇ tsawˇ haˬ aˇ maꞈ gʼahˇ ceh yawꞈ˗awˇ, Sahˬpaˬ Miˬyehˇ˗ahˇ ja ceuˬ ma’ lehˇ ehˇ˗eu meh. (Ja ceuˬ 26:12) Teu gaˇ duˇ ni Yeˬhawˇbaˬ˗euˬ Saˇ kiˇ deuˬ jiˇ tiˬ kawˆ loꞈ˗ehˇ mehˬ bawˬ ya mˇ gaˇ laˬ kʼaˬ cehˇ˗eu meh. Aˬ yawꞈ maꞈ Miˬyehˇ˗ahˇ ja ceuˬ˗awˇ uˬ duˬ tahˬ˗eu gʼaˇ duˬ maˬ ehˇ, dawˬ caˇ caˇ˗awˇ guiˬ lahˬ shaˇ˗eu gʼaˇ duˬ maˬ ehˇ, yawˬ jaw na luꞈ mawˇ dzoeˇ˗eu meh. Kʼoeˇ naˇ yawˬ kʼoꞈ na luꞈ huiˬ˗eu mehˬ bawˬ jiˇ jaˆ˗eu meh.

2. Mehˬ bawˬ˗ahˇ neh aˬ jeˬ jeˇ ya siˬ˗eu nga?

Mehˬ bawˬ mˇ ngeh, Jaˇliꞈ mehˬ nehˬ laꞈ˗awˇ, “Miˬyehˇ˗euˬ zahˇ dawˬ kʼoꞈ dawˬ˗ahˇ dawˬ tsuiꞈ yuˇ doˆ˗awˇ yaw muiˬ paˬ˗ehˇ ja sawˇ mehˬ nehˬ” laꞈ˗eu meh. (Neˬhaˬmiˇ 8:8-ahˇ gui.) Teu gaˇ iˇ naˇ, Yeˬhawˇbaˬ˗euˬ gaˇ kawˆ hawˇ˗eu aˬ yawꞈ aˬ joˆ˗ehˇ gʼeh˗eu Miˬyehˇ pyeuꞈ˗eu lehˇ ya siˬ˗awˇ, Miˬyehˇ nawˬ˗ahˇ aˇ naˆ ni gaˬ˗eu lehˇ ya siˬ ngeh, aˬ yawꞈ nehˬ˗ehˇ gʼoeˇ dzehˬ laˇ˗eu meh. Kʼoeˇ naˇ, nawˬ˗euˬ dehꞈ ziˇ muiˬ daˆ laˇ ni, aˬ yawꞈ aˬ joˆ˗ehˇ caw ba nehˬ luꞈ˗eu lehˇ jiˇ ya siˬ˗eu meh.—Iˇsaˬyaˇ 48:17, 18.

3. Mehˬ bawˬ˗ahˇ laˇ˗euˬ deuˬ nehˬ˗ehˇ ngehˬ cawˬ˗eu heu naˇ, aˬ joˆ˗ehˇ gaˇ dahˇ tsoeˬ˗eu nga?

Yeˬhawˇbaˬ aˬ dui˗ahˇ ‘aˬ cawˬ˗ahˇ gʼoeˇ nya gaˬ nya˗awˇ yaw muiˬ jeˬ mˇ nya ni, aˬ dui tiˬ gʼaˬ tiˇ gʼaˬ kʼahˇ kʼoꞈ˗awˇ ngehˬ gʼeh, tiˬ kawˆ loꞈ˗ehˇ tahˬ dzoeˇ’ lehˇ ehˇ˗eu meh. (Heˬbyehˇ 10:24, 25) Mehˬ bawˬ˗ahˇ iˇ ngeh, tiˬ gʼaˬ tiˇ gʼaˬ maˇ maˇ ni gaˬ˗eu deuˬ˗ahˇ ya mawˇ˗awˇ, nawˇ loꞈ˗ehˇ Miˬyehˇ˗euˬ gaˇ kawˆ˗ahˇ siˬ nya mawꞈ˗eu deuˬ˗ahˇ jiˇ ya mawˇ˗eu meh. Kʼoeˇ naˇ, Jaˇliꞈ˗ahˇ dawˬ pehˬ taˬ˗eu gʼaˬ bi ahˇ laˇ˗eu gaˇ kawˆ˗ahˇ jiˇ ya gaˬ˗eu meh. (Loˇmaˆ 1:11, 12-ahˇ gui.) Kʼoeˇ uˬ taꞈ, shaˬ zahˬ˗ahˇ yaw muiˬ˗ehˇ laˆ piˇ nya˗eu, nymˇ dahˬ baw˗eu deuˬ hawˇ˗eu maˬ baw˗eu deuˬ nehˬ˗ehˇ jiˇ cawˬ cawˬ nya˗eu meh. Teu miˇ neh Yeˬhawˇbaˬ aˬ dui˗ahˇ mehˬ bawˬ˗ahˇ bi iˇ mawꞈ˗eu meh. Heu naˇ aˬ dui˗ahˇ gaˇ dahˇ tsoeˬ˗eu tiˬ kawˆ na tehꞈ˗a siˬ.

Naꞈ suiˇ ni dzaw

4. Yeˬhawˇbaˬ˗euˬ Saˇ kiˇ deuˬ˗euˬ mehˬ bawˬ

Dahˬ beh˗euˬ Ka li zaˬ deuˬ Yeˬhawˇbaˬ˗ahˇ uˬ duˬ tahˬ˗eu gʼaˇ duˬ, aˬ myah luꞈ uiˬ laˇ˗eu meh. (Loˇmaˆ 16:3-5) Gawˇlawˇsehˇ 3:16-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Dahˬ beh˗euˬ Ka li zaˬ deuˬ Yeˬhawˇbaˬ˗ahˇ uˬ duˬ tahˬ ngeh aˬ jeˬ jeˇ jahˇ˗eu nga?

Biˬdiˬoˬ: Miˬyehˇ Miˇkʼahˬ Bawˬdzaˬnymˇ˗ahˇ nga maꞈ aˬ jeˬ jeˇ jahˇ˗eu nga? (2:12)

• Nymˬ˗mˇ iˬ nah Bawˬdzaˬnymˇ˗ahˇ jahˇ luꞈ˗eu jeˬ, Gawˇlawˇsehˇ 3:16-ahˇ ehˇ taˬ˗euˬ jeˬ nehˬ˗ehˇ aˬ jeˬ jeˇ duˇ leˇ˗eu nga?

• Biˬdiˬoˬ hawˇ˗eu aˇ baˇ˗ahˇ haw ngeh, nawˬ˗ahˇ aˬ geu jeˬ˗ahˇ ya leˇ nya?

2 Gawˇliˬtu 9:7-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬhawˇbaˬ˗euˬ Saˇ kiˇ deuˬ˗euˬ mehˬ bawˬ˗ahˇ aˬ jeˬ miˇ neh pyuˇ damˬ maˬ oˆ˗eu nga?

Heu jaw˗euˬ mehˬ bawˬ˗ahˇ aˬ jeˬ jeˇ˗euˬ gaˇ kawˆ˗ahˇ ja sawˇ˗eu nga lehˇ, nawˬ˗ahˇ Jaˇliꞈ mehˬ˗eu gʼaˬ nehˬ˗ehˇ haw.

• Nawˬ˗ahˇ aˬ geu kawˆ˗ahˇ siˬ nya mawꞈ˗awˇ, nawˬ˗euˬ gʼaˇ duˬ gaˇ dahˇ tsoeˬ˗eu aˬ geu kawˆ nga?

Nawˇ siˬ nya ma loˇ?

jw.org gʼoeˇsaiˇ laꞈ kʼoeˇ, miˇ kʼahˬ doe ni jaˆ˗eu Yeˬhawˇbaˬ˗euˬ Saˇ kiˇ deuˬ˗euˬ mehˬ bawˬ aˬ geu ngeh yamˬ˗ahˇ jahˇ˗awˇ, aˬ gaˇ jahˇ˗eu lehˇ poˆ˗iˇ nya meh.

1. Nga maꞈ˗euˬ mehˬ bawˬ˗ahˇ dawˬ mehˬ mehˬ˗awˇ, biˬdiˬoˬ deuˬ byaˬ˗eu uˬ taꞈ, tsaꞈ gaˬ˗eu hawˇ˗eu mehˬ˗eu paw jiˇ bym laˇ byehˆ laˇ ni dzaw nehˬ laꞈ˗eu meh. Mehˬ bawˬ dahˬ beh ngeh hawˇ˗eu aˇ saˬ saˬ ngeh, dawˬ caˇ caˇ˗awˇ guiˬ lahˬ shaˇ˗eu meh

2. Mehˬ bawˬ laꞈ kʼoeˇ˗euˬ tiˬ kawˆ na˗ahˇ, yawˬ gʼaˬ na luꞈ nui noeˬ nui duˇ biꞈ nya meh

3. Zaˬ guˬ tsawˇ mawˬ maˬ ehˇ, nymˇ dahˬ baw˗eu hawˇ˗eu maˬ baw˗eu deuˬ˗ahˇ maˬ ehˇ, yawˬ gʼaˬ na luꞈ˗ahˇ ha geuꞈ meh

4. Yeˬhawˇbaˬ˗euˬ Saˇ kiˇ deuˬ˗euˬ mehˬ bawˬ˗ahˇ pyuˇ damˬ maˬ oˆ˗a

5. Mehˬ bawˬ˗ahˇ iˇ˗eu gʼaˇ duˬ ya leh jeh

Yeˬsuˇ pehˬ˗euˬ nymˇ jiˇ˗ahˇ shaˇ noeˬ haw sheˇ. Aˬ yawꞈ maꞈ aˇ yeˇ huiˬ˗eu mehˬ bawˬ˗ahˇ yawˬ kʼoꞈ na luꞈ iˇ˗eu gʼaˇ duˬ, Naˬzaˬlehˇ meuˬ˗ahˇ neh Yeˬluˇsaˬlehˬ meuˬ˗ahˇ keuˆ ni, gawˬ jawˬ gawˬ duˇ doe˗i smˬ nah ehˇ gʼaˬ ni gaˇ ma ya cah˗eu meh. Luˇkaꞈ 2:39-42-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬluˇsaˬlehˬ meuˬ˗ahˇ iˇ˗eu gʼaˇ duˬ, ya leh jeh ngaˇ laˬ?

• Nawˬ˗ahˇ tawˇ neh mehˬ bawˬ˗ahˇ iˇ˗eu gʼaˇ duˬ, aˬ jeˬ jeˇ ya leh jeh nya?

• Leh jeh poeˬ kʼoꞈ ngaˇ lehˇ nawˬ˗ahˇ noeˬ miˇ˗a laˬ? Aˬ jeˬ miˇ neh?

• Aˬ dui aˬ jeˬ miˇ neh aˬ myah luꞈ mehˬ bawˬ˗ahˇ iˇ paˬ˗ehˇ gʼeh˗eu nga?

Kawˆ shawˆ

Nawˇ mehˬ bawˬ˗ahˇ iˇ naˇ Yeˬhawˇbaˬ Miˬyehˇ˗euˬ gaˇ kawˆ˗ahˇ siˬ nya dzehˬ laˇ˗awˇ, Miˬyehˇ nehˬ˗ehˇ gʼoeˇ dzehˬ laˇ˗eu uˬ taꞈ, aˬ cawˬ nehˬ˗ehˇ jiˇ Yeˬhawˇbaˬ˗ahˇ uˬ duˬ tahˬ nya˗eu meh.

Ja sawˇ poˆ˗eu

• Yeˬhawˇbaˬ aˬ dui˗ahˇ aˬ jeˬ miˇ neh mehˬ bawˬ˗ahˇ bi iˇ mawꞈ˗eu nga?

• Yeˬhawˇbaˬ˗euˬ Saˇ kiˇ deuˬ˗euˬ mehˬ bawˬ˗ahˇ neh nawˇ aˬ jeˬ jeˇ ya siˬ˗eu nga?

• Mehˬ bawˬ˗ahˇ neh gaˇ dahˇ tsoeˬ˗eu aˬ jeˬ paˇ za nya nga siˬ?

Haw lahˬ

Nawˇ mehˬ bawˬ˗ahˇ iˇ˗eu gʼaˇ duˬ shaˬ zahˬ naꞈ luꞈ naˇ, teu loꞈ˗ehˇ gʼeh haw˗euˬ zaˬ yo aˬ li tiˬ gʼaˬ aˬ jeˬ miˇ neh mehˬ bawˬ˗ahˇ iˇ mawꞈ laˇ˗euˬ nga lehˇ haw.

Lmˇ boˬ ni ha nehˬ laꞈ gaˇ maˬ ngehˇ leˇ coeˇ nya (4:16)

Zaˬ guˬ tiˬ gʼaˬ aˬ jeˬ miˇ neh mehˬ bawˬ˗ahˇ iˇ gaˇ ya leˇ˗eu nga? Aˬ yawꞈ aˬ myah luꞈ iˇ nya˗eu gʼaˇ duˬ aˬ jeˬ jeˇ jahˇ˗euˬ nga lehˇ haw.

Ngaˬ˗ahˇ mehˬ bawˬ˗ahˇ ya leˇ lehˇ miˇ˗a (4:33)

Gʼawˬ mya gʼaˬ mehˬ bawˬ˗ahˇ ya iˇ gaˇ aˬ joˆ˗ehˇ noeˬ˗eu nga lehˇ haw.

“Bawˬdzaˬnymˇ˗ahˇ aˬ jeˬ miˇ neh iˇ paˬ˗ehˇ gʼeh˗eu nga?” (Iˇteuꞈnehꞈ laꞈ kʼoeˇ˗euˬ gaˇ kawˆ)

Tahˇ joe tiˬ gʼaˬ Yeˬhawˇbaˬ˗euˬ Saˇ kiˇ deuˬ˗euˬ mehˬ bawˬ˗ahˇ iˇ˗euˬ taꞈ naˇ, aˬ yawꞈ˗euˬ dehꞈ ziˇ aˬ joˆ˗ehˇ paˇ laˇ˗euˬ nga lehˇ haw.

“Ngaˇ miˬ beuˆ maˬ yuˇ ni tiˬ gaˇ˗iˬ maˬ iˇ” (Loꞈ˗eu nymˇgoˇ, 2014 Koꞈ siˬ ba la 1)