Haiˬ˗eu miˇ tsaˬ heu siˬ˗ahˇ laˆ cawˆ gaˇ kʼaˬ duˬ ni haw tsoˆ taˬ

Gʼawˬ myahˇ maˬ gʼeh˗ehˇ Yeˬhawˇbaˬ haiˬ˗eu miˇ tsaˬ heu siˬ˗ahˇ maˬ paˇ oˇ oꞈ˗awˇ, zahˇ kʼawꞈ deuˬ˗ahˇ laˆ cawˆ jiˇ˗eu meh. Tsawˇ jeuˬ tsawˇ ca deuˬ uiˬ leˇ˗awˇ Miˬyehˇ˗euˬ tsawˇ haˬ˗ahˇ deuˆ laˇ˗eu meh. Teu ngeh Yeˬhawˇbaˬ Aˬmaˬgeˬdoˬ guiˇ neh haiˬ˗eu tsawˇ haˬ deuˬ˗ahˇ laˆ cawˆ jiˇ˗eu meh. Aˬ dui nui ma cehˇ tahˬ tahˬ laˇ paˬ˗ehˇ gʼeh˗eu aˇ yeˇ huiˬ˗eu gaˇ kawˆ heu pyeuꞈ laˇ gaˇ dawˬ luꞈ˗eu ma.

Aˬ dui huiˬ dui dui˗eu shaˬ zahˬ kʼoeˇ aˬ joˆ˗ehˇ gʼeh˗eu lehˇ maˬ siˬ nya˗a. Yaw jeˬ ma jeˬ, gaˇ kawˆ heu aˬ geu ngeh nah aˬ geu ngeh kʼoꞈ˗ahˇ pyeuꞈ laˇ˗eu nga? Zahˇ deuˬ˗ahˇ laˆ cawˆ˗eu lehˇ miˇ kʼahˬ˗ahˇ uˆ lahˇ˗eu aˬ yuiꞈ deuˬ˗ahˇ laˆ noeˬ nehˬ˗eu aˬ jeˬ nga? Tsawˇ jeuˬ tsawˇ ca deuˬ Miˬyehˇ˗euˬ tsawˇ haˬ deuˬ˗ahˇ aˇ myah keuˆ ni deuˆ˗awˇ, gaˇ kawˆ heu aˬ myah jiˇ leˇ˗eu nga? Aˬmaˬgeˬdoˬ guiˇ mˇ ngeh Yeˬhawˇbaˬ aˬ jeˬ˗ahˇ zmˬ˗awˇ haiˬ˗eu tsawˇ haˬ deuˬ˗ahˇ laˆ cawˆ˗eu nga? Aˬ dui gaˇ kawˆ heu deuˬ˗ahˇ maˬ siˬ nya˗a.

Ehˇ kʼawꞈ mehˬ hu paw pyeuꞈ laˇ˗eu jeˬ˗ahˇ aˬ dui kʼaˬ duˬ ni kamˬ daˬ coeˇ˗eu gʼaˇ duˬ, aˬ joˆ˗ehˇ ya jahˇ˗eu lehˇ Jaˇliꞈ laꞈ kʼoeˇ ehˇ nehˬ taˬ˗euˬ meh. Yaw jeˬ ma jeˬ, aˬ dui “aˇ saˬ saˬ˗eu aˇ nah aˇ yamˬ laꞈ kʼoeˇ” dehꞈ luꞈ˗eu lehˇ siˬ nya˗eu ma. (2 Tiˆmoˇseˬ 3:1) Yeˬhawˇbaˬ zahˇ maˇ˗ahˇ maˬ bi laˆ cawˆ˗eu gʼaˇ duˬ, zahˇ deuˬ˗ahˇ deuˆ˗eu aˇ yamˬ “laˆ nymˇ˗eu” meh. (Maꞈtehˬ 24:22) Kʼoeˇ naˇ Yeˬhawˇbaˬ aˬ yawꞈ˗euˬ tsawˇ haˬ deuˬ buˬ˗iˇ ni jiˇ caw ba meh. (2 Beˬtuˆluˆ 2:9) Kʼoeˇ uˬ taꞈ haiˬ˗eu tsawˇ haˬ deuˬ˗ahˇ laˆ cawˆ˗awˇ, tsawˇ haˬ aˇ maꞈ maꞈ ma˗ahˇ Aˬmaˬgeˬdoˬ guiˇ˗ahˇ neh buˬ˗iˇ ni caw ba nehˬ˗eu gʼaˇ duˬ, Yeˬhawˇbaˬ neh tseˇ taˬ˗euˬ gʼaˬ naˇ, tsaˬ˗awˇ dawˇ˗awˇ baoˬ jiˇ jaˆ˗eu meh lehˇ aˬ dui siˬ nya˗eu ma.—Pah mehˬ˗eu 19:11, 15, 16.

Mehˬ hu paw pyeuꞈ laˇ˗eu gaˇ kawˆ˗ahˇ tsawˇ haˬ deuˬ ya mawˇ ngeh, “myaˆ leˇ tehꞈ˗a.” Ehˇ kʼawꞈ aˬ dui gaˇ hu Yeˬhawˇbaˬ aˬ yawꞈ˗euˬ tsawˇ haˬ deuˬ˗ahˇ aˬ joˆ˗ehˇ caw ba˗awˇ, mehˬ hu paw nehˬ˗ehˇ taꞈ leˇ˗awˇ aˬ joˇ joˆ˗ehˇ ehˇ taˬ˗euˬ nga lehˇ gui˗awˇ shaˇ noeˬ shaˇ sawˇ naˇ, aˬ dui “uˬ duˬ baꞈ diˇ”˗awˇ ziꞈ dah ni yawꞈ nya˗eu meh. Aˬ jeˬ miˇ neh ehˇ naˇ, ka kʼoꞈ˗eu aˇ yamˬ peh laˇ˗euˬ meh.—Luˇkaꞈ 21:26, 28.