Aˬ myah luꞈ Yeˬhawˇbaˬ˗ahˇ saˇ jaˇ ziꞈ

Ka li zaˬ maˇ diˇ deuˬ tsawˇ haˬ neh maˬ ehˇ, aˬ geu jeˬ neh maˬ kaˬ, aˬ yawꞈ maꞈ Yeˬhawˇbaˬ˗ahˇ uˬ duˬ tahˬ˗eu jeˬ˗ahˇ maˬ bi laˆ cawˆ lehˇ noeˬ tsoˆ taˬ˗euˬ meh. Nawˇ kʼawꞈ toˆ˗ehˇ noeˬ taˬ˗euˬ paˬ. Yeˬhawˇbaˬ nawˇ aˬ yawꞈ˗ahˇ saˇ jaˇ ziꞈ˗eu jeˬ˗ahˇ aˇ poeˬ taˬ baw dui dui˗eu meh. (1 Laˬsaˬbaˬ 28:9-ahˇ gui.) Aˬ dui Yeˬhawˇbaˬ˗ahˇ saˇ jaˇ ziꞈ gaˇ laˆ tsoeˬ laˇ˗eu aˬ jeˬ jeˇ jaˆ nga? Aˬ dui˗ahˇ laˆ tsoeˬ laˇ˗eu jeˬ˗ahˇ aˬ joˆ˗ehˇ gʼaˬ leˇ nya˗eu nga?

1. Yeˬhawˇbaˬ˗ahˇ saˇ jaˇ maˬ bi ziꞈ ni aˬ cawˬ aˬ dui˗ahˇ aˬ jeˬ jahˇ laˇ nya˗eu nga?

Tiˬ deuˬ na aˬ dui Yeˬhawˇbaˬ˗euˬ gaˇ˗ahˇ byehˇ ni leh jeh˗eu meh. Aˬ yawꞈ maꞈ aˬ geu deuˬ nga? Tiˬ deuˬ na Miˬyehˇ˗euˬ gaˇ maˬ paˇ mˇ ni byehˇ dzeh˗awˇ, aˬ dui˗euˬ nui jah˗ahˇ laˆ cawˆ˗eu gʼaˇ duˬ, Miˬyehˇ˗euˬ aˇ maꞈ aˇ muˇ˗euˬ gaˇ kawˆ maˬ ngeuˇ˗eu jeˬ˗ehˇ ja bu˗eu meh. Teu deuˬ˗ahˇ Miˬyehˇ˗ahˇ saˇ jaˇ puiˬ˗euˬ deuˬ lehˇ kuˇ˗eu meh. Zahˇ˗euˬ aˬ yuiꞈ tiˬ deuˬ na jiˇ aˬ dui˗euˬ gaˇ kawˆ maˬ ngeuˇ˗eu jeˬ˗ehˇ ja bu˗eu meh. Aˬ dui maˬ yahˇ naˇ aˬ yawꞈ maꞈ˗euˬ dawˬ˗ahˇ jah leˇ˗awˇ Miˬyehˇ˗euˬ gaˇ˗ahˇ maˬ paˇ mˇ ni byehˇ nya˗eu meh. Teu miˇ neh aˬ dui aˬ yawꞈ maꞈ˗euˬ sahˬ boꞈ hawˇ˗eu biˬdiˬoˬ deuˬ˗ahˇ maˬ ehˇ, aˬ yawꞈ maꞈ neh iˇteuꞈnehꞈ laꞈ kʼoeˇ yuˇ daˆ taˬ˗euˬ jeˬ˗ahˇ maˬ ehˇ, haw paˬ˗ehˇ maˬ gʼeh˗a. Aˬ dui saˇ jaˇ ziꞈ˗eu jeˬ˗ahˇ laˆ cawˆ˗eu lehˇ leh jeh˗eu deuˬ˗ahˇ Yeˬsuˇ heu loꞈ˗ehˇ ngehˬ keuˆ taˬ˗euˬ meh. “Aˬ yawꞈ maꞈ˗aˬ, myaˆ behꞈ deuˬ˗ahˇ sheuˬ gʼeh˗eu myaˆ behꞈ behꞈ˗eu aˬ yuiꞈ aˬ tsu meh. Myaˆ behꞈ neh myaˆ behꞈ˗ahˇ sheuˬ gʼeh naˇ, nyiˬ gʼaˬ luꞈ duˬ kʼahˬ˗ahˇ ga ahˇ tehꞈ˗a.”—Maꞈtehˬ 15:14.

2. Aˬ dui Yeˬhawˇbaˬ˗ahˇ saˇ jaˇ ziꞈ˗eu lehˇ bi mawˇ˗eu gʼaˇ duˬ aˬ joˆ˗ehˇ ya noeˬ tsehˆ˗eu nga?

Aˬ dui Yeˬhawˇbaˬ˗ahˇ gaˬ˗eu miˇ neh zahˇ kʼawꞈ nehˬ˗ehˇ maˬ taꞈ maˬ gm leˇ ni yahˇ˗eu ma. Teu miˇ neh aˬ dui aˬ geu jeˬ˗euˬ gaˇ mˇ˗awˇ aˬ jeˬ jahˇ˗eu maˬ kaˬ, aˬ geu jeˬ˗euˬ aˇ maꞈ aˇ muˇ nehˬ˗ehˇ taꞈ leˇ gm leˇ˗eu maˬ kaˬ, zahˇ kʼawꞈ nehˬ˗ehˇ taꞈ ngaˇ laˬ lehˇ yaw muiˬ˗ehˇ ya haw˗eu meh. Yeˬhawˇbaˬ aˬ dui˗ahˇ ‘Ngaˬ˗euˬ tsawˇ haˬ deuˬ [Huiˬ dui dui˗eu Baˬbuˇloˬ] jawˇ gaˇ neh doˆ laˇ˗awˬ’ lehˇ ehˇ˗eu meh.—Pah mehˬ˗eu 18:2, 4.

Naꞈ suiˇ ni dzaw

3. Mehˬ bahˬ˗eu deuˬ˗ahˇ yahˇ

Yeˬhawˇbaˬ˗euˬ aˇ maꞈ aˇ muˇ˗euˬ gaˇ kawˆ maˬ ngeuˇ˗eu jeˬ˗ehˇ ja gaˇ ya gaˬ ngeh, aˬ joˆ˗ehˇ ya jahˇ˗eu nga? Dawˬdaˬ 14:15-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ dui neh ya gaˬ˗euˬ yawˬ jeˬ na luꞈ˗ahˇ aˬ jeˬ miˇ neh taˆ lehˇ maˬ ya jah˗eu nga?

2 Yoˇhaˬ 9-11-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Jaˇliꞈ heu deuˆ˗ahˇ haw ngeh aˬ dui Miˬyehˇ˗ahˇ saˇ jaˇ puiˬ˗euˬ deuˬ nehˬ˗ehˇ ngehˬ cawˬ paˬ˗ehˇ gʼeh ngaˇ laˬ? Aˬ jeˬ miˇ neh?

• Aˬ dui Miˬyehˇ˗ahˇ saˇ jaˇ puiˬ˗euˬ deuˬ nehˬ˗ehˇ mawˇ mawˇ˗ehˇ maˬ ngehˬ cawˬ kʼawꞈ, aˬ yawꞈ maꞈ neh mehˬ bahˬ˗euˬ jeˬ˗ahˇ aˬ gaˇ neh ya siˬ ya mawˇ˗eu nga?

• Yeˬhawˇbaˬ hawˇ˗eu aˬ yawꞈ˗euˬ aˇ maꞈ aˇ muˇ nehˬ˗ehˇ taꞈ leˇ˗awˇ maˬ ngeuˇ˗eu jeˬ˗ehˇ ngehˬ gaˇ naˇ haˬ naˇ, Yeˬhawˇbaˬ˗ahˇ aˬ joˆ˗ehˇ gʼeh leˇ paˬ nga?

4. Mehˇ nmˇ tiˬ gʼaˬ na mˇ bahˬ ngeh, aˬ dui Yeˬhawˇbaˬ˗ahˇ saˇ jaˇ ziꞈ

Mehˇ nmˇ tiˬ gʼaˬ na huiˬ˗eu iˬ baˇ mˇ˗euˬ lehˇ ya siˬ ngeh, aˬ dui aˬ joˆ˗ehˇ ya jahˇ˗eu nga? Gaˇ hu Miˬyehˇ neh Iˇsaˬleˬlaˆ deuˬ˗ahˇ biꞈ˗euˬ zahˇ dawˬ kʼoꞈ dawˬ˗ahˇ haw ma. Uˬduˬtahˬ˗eu 5:1-ahˇ gui.

Mehˇ nmˇ tiˬ gʼaˬ huiˬ˗eu iˬ baˇ mˇ˗euˬ lehˇ ya siˬ naˇ, aˬ dui aˇ muˇ˗ahˇ sheuˬ gʼeh˗eu deuˬ˗ahˇ ya ehˇ nehˬ˗iˇ meh lehˇ Jaˇliꞈ heu deuˆ ehˇ˗eu meh. Ehˇ kʼawꞈ teu loꞈ˗ehˇ maˬ jahˇ mi naˆ˗ehˇ aˬ dui mˇ lehˬ˗euˬ gʼaˬ˗ahˇ gaˬ˗eu lehˇ bi siˬ˗eu gʼaˇ duˬ, sheuˬ gʼeh˗eu deuˬ jawˇ gaˇ iˇ˗awˇ yawˬ ha˗euˬ iˬ baˇ ja doˆ nehˬ˗iˇ˗awˬ lehˇ aˬ yawꞈ˗ahˇ ya ehˇ nehˬ˗eu meh. Ehˇ kʼawꞈ aˬ yawꞈ maˬ ehˇ nehˬ˗iˇ naˇ, aˬ dui Yeˬhawˇbaˬ˗ahˇ saˇ jaˇ ziꞈ˗eu miˇ neh ya ehˇ nehˬ˗iˇ˗eu meh.

• Heu loꞈ˗ehˇ jahˇ˗eu heu aˬ jeˬ miˇ neh Yeˬhawˇbaˬ˗ahˇ gaˬ˗eu jeˬ pyeuꞈ˗eu nga?

• Heu loꞈ˗ehˇ jahˇ˗eu heu aˬ jeˬ miˇ neh mˇ bahˬ˗euˬ gʼaˬ˗ahˇ gaˬ˗eu jeˬ pyeuꞈ˗eu nga?

• Heu loꞈ˗ehˇ jahˇ˗eu heu aˬ jeˬ miˇ neh mehˇ nmˇ deuˬ˗ahˇ gaˬ˗eu jeˬ pyeuꞈ˗eu nga?

5. Huiˬ dui dui˗eu Baˬbuˇloˬ nehˬ˗ehˇ taˬ taꞈ taˬ gm leˇ

Biˬdiˬoˬ: Huiˬ dui dui˗eu Baˬbuˇloˬ˗ahˇ neh doˆ le (5:06)

Luˇkaꞈ 4:8 hawˇ˗eu Pah mehˬ˗eu 18:4, 5-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Nawˇ zahˇ kʼawꞈ laꞈ kʼoeˇ tsawˇ myahˇ ahˇ luꞈ de siˬ laˬ?

• Nawˇ zahˇ kʼawꞈ˗ahˇ taꞈ˗eu aˇ maꞈ aˇ muˇ laꞈ kʼoeˇ jaˇ laˇ ahˇ luꞈ de siˬ loˇ?

• Nawˇ mˇ luꞈ˗eu gaˇ teu zahˇ kʼawꞈ˗ahˇ gʼaˬ biꞈ˗eu jeˬ pyeuꞈ ngaˇ laˬ?

• Zahˇ kʼawꞈ nehˬ˗ehˇ taꞈ leˇ˗awˇ nawˇ byehˇ paˬ˗ehˇ gʼeh˗eu nui jeˬ paˇ jaˆ nga siˬ laˬ?

• Heu gaˇ naˇ haˬ laꞈ˗euˬ heu laꞈ kʼoeˇ neh tiˬ kawˆ na yawˬ ha˗ahˇ taꞈ miˇ˗a lehˇ siˬ laˇ naˇ, aˬ jeˬ jahˇ paˬ˗ehˇ gʼeh˗eu nga?

Nawˇ yawˬ ha laꞈ kʼoeˇ laˆ paˇ paˬ˗ehˇ gʼeh˗eu tiˬ jeˬ na˗ahˇ ya mawˇ naˇ, yawˬ ha˗euˬ siˬ nya˗eu nui ma shawˇ˗eu jeˬ˗ehˇ hawˇ˗eu, Yeˬhawˇbaˬ˗ahˇ saˇ jaˇ ziꞈ˗eu lehˇ bi mawˇ˗eu jeˬ˗ehˇ noeˬ tsehˆ˗awˬ.

Kawˆ shawˆ

Aˬ dui Yeˬhawˇbaˬ˗ahˇ saˇ jaˇ ziꞈ daˆ leꞈ-eu g’aˇ duˬ naˇ aˬ dui-ahˇ sheuˬ bahˬ-eu lehˇ leh jeh luꞈ-eu deuˬ nehˬ-ehˇ cawˬ maˬ cawˬ ni ya yahˇ-eu meh.

Ja sawˇ poˆ˗eu

• Aˬ dui aˬ jeˬ miˇ neh Miˬyehˇ˗ahˇ saˇ jaˇ puiˬ˗euˬ deuˬ neh boꞈ doˆ jahˇ doˆ taˬ˗euˬ jeˬ˗ahˇ maˬ ya naˇ haˬ˗eu nga?

• Aˬ dui mehˇ nmˇ tiˬ g’aˬ huiˬ-eu iˬ baˇ mˇ taˬ-euˬ lehˇ ya siˬ naˇ aˬ jeˬ jahˇ paˬ-ehˇ g’eh-eu nga?

• Zahˇ kʼawꞈ˗ahˇ neh doˆ laˇ lehˇ ehˇ˗eu dawˬ˗ahˇ aˬ dui aˬ joˆ˗ehˇ mˇ caw nya˗eu nga?

Haw lahˬ

Yeˬhawˇbaˬ˗euˬ Saˇ kiˇ deuˬ˗euˬ gaˇ kawˆ˗ahˇ maˬ ngeuˇ˗eu jeˬ˗ehˇ ja bu gaˇ ya gaˬ ngeh, aˬ joˆ˗ehˇ ya jahˇ˗eu nga lehˇ haw.

“Nawˇ gaˇ kawˆ deuˬ˗ahˇ siˬ duˬ ma loˇ?” (Loꞈ˗eu nymˇgoˇ, 2018 Yehꞈ siˬ ba la)

Huiˬ dui dui˗eu Baˬbuˇloˬ˗ahˇ taꞈ˗eu aˇ maꞈ aˇ muˇ hawˇ˗eu mˇ jeˬ shaˇ kawˆ˗ahˇ aˬ joˆ˗ehˇ siˬ laˇ˗eu nga?

“‘Aˇ saˬ saˬ˗eu aˇ nah aˇ yamˬ’ jiˇ leˇ dzaˬ˗ahˇ leh jeh dui dui” (Loꞈ˗eu nymˇgoˇ, 2019 Tseˇ siˬ ba la, aˇ deuˆ 16-18)

Miˬyehˇ˗ahˇ saˇ jaˇ puiˬ˗euˬ deuˬ aˬ dui˗euˬ nui jah gʼaˬ bi baˬ˗iˇ ni aˬ jeˬ jahˇ˗eu nga?

Jaˬ myawꞈ mehˇ shuiˇ dawˬ˗ahˇ yahˇ (9:32)

Siˬtoꞈ zahˇ˗euˬ aˬ yuiꞈ tiˬ gʼaˬ aˬ jeˬ miˇ neh zahˇ teu˗ahˇ maˬ paˇ tawˬ˗euˬ nga lehˇ haw˗eu gʼaˇ duˬ, “Ngaˇ yaw nyiˇ ngeh neh Miˬyehˇ˗ahˇ shaˇ poˆ˗euˬ ma” lehˇ ehˇ˗eu gaˇ kawˆ˗ahˇ haw.

“Jaˇliꞈ tsawˇ haˬ˗euˬ dehꞈ ziˇ˗ahˇ laˆ paˇ” (Loꞈ˗eu nymˇgoˇ, 2011 Shiꞈ siˬ ba la 1)