Yeˬsuˇ Ka li, aˬ suˇ gʼaˬ nga?

1. Yeˬsuˇ˗euˬ dehꞈ ziˇ, aˬ joˆ˗ehˇ dahˬ beh˗euˬ nga?

Yeˬsuˇ miˇ tsaˬ kʼoeˇ taˆ maˬ dehꞈ le˗euˬ mi na˗ehˇ, mˬ kʼoeˇ taˆ yaw sahˇ˗euˬ gʼawˇ mawˇ neh dehꞈ luꞈ˗eu meh. Teu miˇ neh, Yeˬsuˇ tsawˇ haˬ zaˬ deuˬ nehˬ˗ehˇ beu gaˇ˗eu meh. (Yoˇhaˬ 8:23) Yeˬsuˇ˗aˬ, Miˬyehˇ neh beh dahˬ beh˗euˬ gʼaˬ pyeuꞈ˗awˇ, Miˬyehˇ yawˬ jeˬ yawˬ˗ahˇ beh ngeh, aˬ yawꞈ caw ba nehˬ˗euˬ meh. Yeˬhawˇbaˬ Miˬyehˇ˗euˬ aˬ laꞈ neh toeˬ ciˆ˗awˇ beh˗euˬ gʼaˬ, Yeˬsuˇ tiˬ gʼaˬ tehꞈ˗ehˇ pyeuꞈ˗eu miˇ neh, aˬ yawꞈ˗ahˇ “Zaˬmaˇ tiˬ gʼaˬ tehꞈ” lehˇ kuˇ˗eu geuˇ meh. (Yoˇhaˬ 1:14) Yeˬsuˇ˗aˬ, Miˬyehˇ˗euˬ gʼaˇ duˬ ngehˬ dah˗eu gʼaˬ pyeuꞈ˗eu miˇ neh, aˬ yawꞈ˗ahˇ “Dawˬ” lehˇ kʼawꞈ kuˇ˗eu meh.—Dawˬdaˬ 8:22, 23, 30; Gawˇlawˇsehˇ 1:15, 16-ahˇ gui˗awˬ.

2. Yeˬsuˇ miˇ tsaˬ kʼoeˇ taˆ, aˬ jeˬ miˇ neh oe ka˗euˬ nga?

Miˬyehˇ aˬ yawꞈ˗euˬ Zaˬmaˇ˗ahˇ, Yuˇdaˆ tsawˇ haˬ zaˬ miˬ yaw shawˇ Maˬliˇ uꞈ maˆ laꞈ kʼoeˇ dawˆ ahˇ nehˬ˗awˇ, bi dehꞈ le˗euˬ meh. Kʼoeˇ miˇ neh Yeˬsuˇ˗aˬ, shiˬ shaˬ jiˇ˗euˬ aˬ da lehˇ maˬ baw˗a. (Luˇkaꞈ 1:30-35) Yeˬsuˇ miˇ tsaˬ kʼoeˇ taˆ ya oe˗euˬ gaˇ kawˆ ˗aˬ, (1) Miˬyehˇ nehˬ˗ehˇ taꞈ leˇ˗eu yaw tsaˬ yaw dawˇ jeˬ˗ahˇ mehˬ nehˬ˗eu gʼaˇ duˬ meh. (2) Shaˬ˗eu zahˬ˗eu jeˬ puˬ le kʼawꞈ, Miˬyehˇ nui ma tsaˬ˗eu jeˬ mˇ nya meh lehˇ, mˇ mawˇ nehˬ le˗euˬ meh. (3) Byah kuꞈ˗eu gʼawˇ mawˇ iˬ baˇ zaˬ deuˬ˗euˬ gʼaˇ duˬ, “ka kʼoꞈ” le˗euˬ meh.—Maꞈtehˬ 20:28-ahˇ gui˗awˬ.

3. Aˬ jeˬ miˇ neh ka kʼoꞈ˗eu jeˬ loˬ˗eu nga?

Ka kʼoꞈ˗eu jeˬ heu naˇ, tsawˇ haˬ tiˬ gʼaˬ shiˇ˗eu jeˬ˗ahˇ neh maˬ bi shiˇ ni, zeuˇ kʼoꞈ˗eu aˇ poeˬ˗ahˇ ehˇ˗eu meh. (Doˆ˗iˇ˗eu 21:29, 30) Miˬyehˇ˗euˬ nui noeˬ naˇ, tsawˇ haˬ zaˬ˗ahˇ heu loꞈ˗ehˇ bi mawˬ iˇ˗awˇ, bi shiˇ˗eu lehˇ beh˗euˬ maˬ ngeuˇ˗a. Aˬ dui aˬ joˆ˗ehˇ siˬ nya˗eu nga? “Iˬ baˇ” lehˇ ehˇ˗eu jeˬ˗ahˇ mˇ naˇ ya shiˇ meh lehˇ, Aˬdaˬ˗ahˇ Miˬyehˇ ehˇ nehˬ˗euˬ meh. Aˬdaˬ iˬ baˇ maˬ mˇ law nmˇ˗aˬ, maˬ ya shiˇ˗a. (Aˇdahˬbeh˗eu 2:16, 17; 5:5) Jaˇliꞈ laꞈ kʼoeˇ ehˇ˗eu, Aˬdaˬ baˬ da neh tsawˇ haˬ zaˬ yawˬ gʼaˬ na luꞈ shiˇ˗eu jeˬ “keuˆ le˗euˬ”meh. Aˬdaˬ aˬ yawꞈ˗euˬ oeˬ paˬ oeˬ ma deuˬ˗ahˇ, shiˇ˗eu jeˬ biˇ, biꞈ taˬ yaꞈ˗euˬ meh. Teu baˬ da neh, shiˇ˗eu jeˬ˗ahˇ neh law iˇ˗eu gʼaˇ duˬ, ka kʼoꞈ˗eu aˇ poeˬ loˬ˗eu meh.—Loˇmaˆ 5:12; 6:23-ahˇ gui˗awˬ.

Aˬ suˇ gʼaˬ ka kʼoꞈ nehˬ nya˗eu nga? Aˬ dui shiˇ ngeh iˬ baˇ˗euˬ gʼaˇ duˬ lawˇ nehˬ˗eu aˇ poeˬ pyeuꞈ˗eu meh. Kʼoeˇ miˇ neh, iˬ baˇ zaˬ cawˬ cawˬ maˬ ka kʼoꞈ nehˬ nya.—Ja ceuˬ 49:7-9-ahˇ gui˗awˬ.

4. Yeˬsuˇ aˬ jeˬ miˇ neh ya shiˇ˗eu nga?

Yeˬsuˇ aˬ dui nehˬ˗ehˇ maˬ duˇ leˇ˗eu heu naˇ, byah kuꞈ˗eu gʼaˬ pyeuꞈ˗eu miˇ neh meh. Yeˬsuˇ tiˬ jawˇ˗iˬ, iˬ baˇ maˬ mˇ haw˗euˬ miˇ neh, aˬ yawꞈ˗euˬ gʼaˇ duˬ shiˇ dah˗eu maˬ loˬ˗a. Aˬ cawˬ˗euˬ gʼaˇ duˬ shiˇ dah le˗euˬ jeˬ pyeuꞈ˗eu meh. Miˬyehˇ tsawˇ haˬ zaˬ˗ahˇ gaˬ˗eu miˇ neh, aˬ yawꞈ˗euˬ Zaˬmaˇ bi shiˇ dah le˗euˬ meh. Yeˬsuˇ kʼawꞈ aˬ dui maꞈ˗ahˇ gaˬ˗eu miˇ neh, aˬ yawꞈ˗euˬ Aˬda kʼehˇ˗eu loꞈ˗ehˇ, aˬ dui˗euˬ gʼaˇ duˬ shiˇ dah le˗euˬ meh.—Yoˇhaˬ 3:16; Loˇmaˆ 5:18, 19-ahˇ gui˗awˬ.

Biˬdiˬoˬ haw Yeˬsuˇ aˬ jeˬ miˇ neh ya shiˇ˗eu nga?

5. Nymˇ Yeˬsuˇ aˬ jeˬ jahˇ luꞈ˗eu nga?

Yeˬsuˇ miˇ tsaˬ kʼoeˇ taˆ jawˇ ngeh, naˇ˗eu gawˇ˗eu deuˬ˗ahˇ laˆ saˆ nehˬ˗awˇ, shiˇ˗euˬ deuˬ˗ahˇ kʼawꞈ bi gʼoꞈ dehꞈ laˇ˗euˬ meh. Kʼoeˇ naˇ, shaˬ˗eu zahˬ˗eu deuˬ˗ahˇ jiˇ caw ba nehˬ˗euˬ meh. Gaˇ kawˆ heu deuˬ˗aˬ, ehˇ dawˬ naˇ haˬ˗eu tsawˇ haˬ deuˬ˗ahˇ, mehˬ hu paw heu loꞈ˗ehˇ mˇ nehˬ ma lehˇ, aˇ baˇ baˇ mawˇ nehˬ yaꞈ˗euˬ jeˬ pyeuꞈ˗eu meh. (Maꞈtehˬ 15:30, 31; Yoˇhaˬ 5:28) Yeˬsuˇ shiˇ dzeuˇ naˇ, Yeˬhawˇbaˬ Miˬyehˇ aˬ yawꞈ˗ahˇ saꞈ laˇ gʼawˇ mawˇ neh bi gʼoꞈ dehꞈ laˇ˗euˬ meh. (1 Beˬtuˆluˆ 3:18) Yeˬsuˇ gʼoꞈ dehꞈ laˇ gʼaˬ naˇ, Miˬyehˇ˗euˬ aˇ maˇ paw nuiˇ leˇ˗awˇ, miˇ tsaˬ kʼoeˇ taˆ Sahˬpaˬ geuꞈ˗awˇ uˆ lahˇ˗eu aˬ kawˬ˗aˬ biꞈ laꞈ gaˇ dawˬ luꞈ meh. (Heˬbyehˇ 10:12, 13) Nymˇ Yeˬsuˇ mˬ kʼoeˇ taˆ Sahˬpaˬ geuꞈ˗awˇ uˆ lahˇ luꞈ meh. Aˬ yawꞈ˗euˬ gʼaˬ kʼehˇ deuˬ kʼawꞈ, miˇ kʼahˬ doe ni iˇ˗awˇ, gaˇ kawˆ heu deuˬ˗ahˇ tsaꞈ gaˬ luꞈ meh.—Daˬyeˬlaˇ 7:13, 14; Maꞈtehˬ 24:14-ahˇ gui˗awˬ.

Gʼawˬ myahˇ maˬ gʼeh˗ehˇ, Yeˬsuˇ aˬ yawꞈ euˬ aˇ yaˬ˗ahˇ zmˬ˗awˇ neh, miˇ tsaˬ kʼoeˇ taˆ shaˬ˗eu zahˬ˗eu jeˬ bi pyeuꞈ laˇ luꞈ˗eu gʼaˬ˗ahˇ laˆ byoˆ nehˬ meh. Yeˬsuˇ˗ahˇ jah˗awˇ neh ehˇ dawˬ naˇ haˬ˗eu deuˬ yawˬ gʼaˬ na luꞈ, miˇ tsaˬ kʼoeˇ taˆ jaˆ˗eu Baˬlaˬdiˇsuˆ˗ahˇ laꞈ kʼaˬ tiˬ cehˇ ya jawˇ gʼeh meh.—Ja ceuˬ 37:9-11-ahˇ gui˗awˬ.