Uˆ lahˇ˗eu aˇ muˇ˗euˬ sahˬ boꞈ

Gaˬ˗eu mehˇ nmˇ deuˬ˗oˇ,

Yeˬsuˇ Saˬmuˇlaˬnaˆ meuˬ˗ahˇ˗euˬ aˇ muˇ˗ahˇ “nawˇ ya daˬ˗eu lehˇ gʼeh˗eu kʼehˬ˗eu kʼaˆ˗eu jeˬ˗ahˇ taˬ guˆ” lehˇ ehˇ nehˬ˗euˬ meh. (Pah mehˬ˗eu 2:10) Yeˬsuˇ neh taˬ guˆ lehˇ gʼaˬ biꞈ nehˬ˗euˬ dawˬ heu naˇ “Sahˬpaˬ Miˬyehˇ˗euˬ aˇ nah˗ahˇ” yaw dehꞈ dehꞈ luꞈ˗eu aˬ dui˗ahˇ jiˇ gaˇ dahˇ tsoeˬ˗eu meh. (Pah mehˬ˗eu 1:10) “Shaˬ dui dui˗eu aˇ yamˬ” laꞈ kʼoeˇ ya dehꞈ luꞈ kʼawꞈ miˇ kʼahˬ doe ni jawˇ˗eu Miˬyehˇ˗euˬ tsawˇ haˬ deuˬ, Miˬyehˇ˗ahˇ saˇ jaˇ ziꞈ˗eu gʼaˇ duˬ nui jah ziꞈ dah ni gʼeh˗awˇ kʼaˬ duˬ ni gʼeh gaˇ ya mawˇ˗eu miˇ neh, nga maꞈ˗ahˇ gʼaˬ ahˇ laˇ dui dui miˇ˗a.—2 Tiˆmoˇseˬ 3:1-5.

Aˬ dui nui jah ziꞈ dah ni gʼeh˗awˇ kʼaˬ duˬ ni gʼeh˗eu laꞈ kʼoeˇ ‘mehˬ nah paw maˬ zeuˆ pyawˇ’ ni aˬ joˆ˗ehˇ ya jahˇ nga? (Heˬbyehˇ 10:39) Laˆ tsoeˬ laˇ˗eu jeˬ hawˇ˗eu kʼehˬ laˇ kʼaˆ laˇ˗eu jeˬ jaˆ˗eu miˇ neh, aˬ myah luꞈ toˆ˗ehˇ jahˇ˗eu yaw awˬ nmˇ maˬ ngeuˇ˗a. Ehˇ kʼawꞈ aˬ dui Yeˬhawˇbaˬ˗ahˇ saˇ jaˇ ziꞈ˗awˇ kʼaˬ duˬ ni yaw tsaˬ yaw dawˇ jeˬ mˇ˗eu lehˇ tseˇ nya meh. Zawˇ˗ehˇ shaꞈ dawˇ nya˗awˇ nui kʼaˬ yaw kʼaˆ˗ehˇ maˬ ahˇ˗eu deuˬ kʼawꞈ toˆ˗ehˇ jahˇ nya meh. Aˬ dui˗ahˇ caw ba nehˬ nya˗eu aˬ jeˬ nga?

Jaˇliꞈ aˬ dui˗ahˇ nui kʼaˬ ahˇ laˇ ni caw ba nehˬ nya meh. Jaˇliꞈ laꞈ kʼoeˇ kʼaˬ duˬ ni gʼeh˗eu tsawˇ haˬ deuˬ˗euˬ gaˇ kawˆ gʼawˬ mya ni ahˇ˗eu meh. Paˇ dmˬ heu dmˬ naˇ aˬ yawꞈ maꞈ˗euˬ gaˇ kawˆ˗ahˇ yaw muiˬ˗ehˇ siˬ nya laˇ˗awˇ, aˬ yawꞈ maꞈ˗ahˇ dzaw geuꞈ nya ni caw ba nehˬ nya meh. Aˬ yawꞈ maꞈ˗euˬ gaˇ kawˆ˗ahˇ gui ngeh nawˇ nymˬ˗mˇ ya puˬ luꞈ˗eu shaˬ zahˬ˗ahˇ maˬ ehˇ, mehˬ hu paw ya puˬ˗eu shaˬ zahˬ˗ahˇ maˬ ehˇ, kamˬ daˬ coeˇ ni aˬ joˆ˗ehˇ caw ba nehˬ nya nga lehˇ ya siˬ˗eu gʼaˇ duˬ guiˬ lahˬ shaˇ. Kʼoeˇ naˇ aˬ yawꞈ maꞈ˗ahˇ dzaw geuꞈ˗awˇ, laꞈ oˆ ngehˬ keuˆ taˬ˗euˬ gaˇ kawˆ heu deuˬ˗ahˇ kʼaˬ duˬ ni aˬ joˆ˗ehˇ mˇ nya nga lehˇ shaˇ noeˬ shaˇ sawˇ.

Laˆ poˆ laˆ paˇ mˇ˗eu. (Yaˬkoˆ 3:17) Yawˇnaˆshaˬ aˬ yawꞈ˗euˬ aˬ da jiˇ naˇ aˬ yawꞈ sahˬ paˬ ya geuꞈ˗eu lehˇ noeˬ˗euˬ paˬ. Ehˇ kʼawꞈ Yeˬhawˇbaˬ aˬ yawꞈ˗ahˇ maˬ ngeuˇ˗eu aˬ yawꞈ taꞈ˗ehˇ gʼawˬ naˆ ni nyiˇ dzehˬ˗eu Daˬbiˇ˗ahˇ tseˇ˗euˬ meh. Teu ngeh Yawˇnaˆshaˬ Yeˬhawˇbaˬ neh tseˇ˗euˬ gaˇ ha geuꞈ˗awˇ, saˇ jaˇ ziꞈ˗eu laꞈ kʼoeˇ kʼaˬ duˬ ni Daˬbiˇ˗ahˇ caw ba nehˬ˗euˬ meh.

Yaw tsaˬ yaw dawˇ jeˬ mˇ˗eu. (Heˬbyehˇ 11:32-34) Haˬnaˬniˇyaˆ, Miˇsheˬlaˇ, Aˬzaˬyiˇ aˬ ha smˇ gʼaˬ Yeˬhawˇbaˬ˗ahˇ saˇ jaˇ puiˬ˗awˇ tahˬ pahˬ aˬ ma mawˇ kawˇ˗ahˇ uˬ duˬ tahˬ ngeh to˗aˬ, miˬ dzaˬ doꞈ luꞈ˗eu tsawˬ bu˗ahˇ bi biˬ ahˇ ma lehˇ tseˇ˗euˬ meh.

Yaw tsaˬ yaw dawˇ jeˬ ja nehˬ˗eu. (Maꞈtehˬ 22:16) Tsawˇ haˬ deuˬ Daˬsuˆ meuˬ˗ahˇ jawˇ˗eu Sawˇluˆ, Yeˬsuˇ˗euˬ mehˬ nah caw teh˗eu deuˬ˗ahˇ laˆ cawˆ jiˇ meh lehˇ noeˬ˗euˬ meh. Ehˇ kʼawꞈ Sawˇluˆ noeˬ poˆ noeˬ paˇ˗awˇ Yeˬsuˇ˗euˬ gaˇ kawˆ kʼaˬ duˬ ni tsaꞈ gaˬ˗euˬ meh.

Paˇ dmˬ heu dmˬ naw maꞈ˗ahˇ nui jah bi ziꞈ dzehˬ laˇ˗awˇ kʼaˬ duˬ ni bi gʼeh dzehˬ laˇ meh lehˇ nga maꞈ noeˬ tmˬ ma. (Ja ceuˬ 27:14) Nymˇ jiˇ laꞈ kʼoeˇ˗euˬ deuˬ hawˇ˗eu aˇ muˇ laꞈ kʼoeˇ˗euˬ mehˇ nmˇ deuˬ˗ahˇ kʼaˬ duˬ ni Miˬyehˇ Miˇkʼahˬ˗euˬ gaˇ mˇ nya ni caw ba nehˬ luꞈ˗eu nawˬ˗ahˇ Yeˬhawˇbaˬ guiˬ lahˬ biꞈ luꞈ˗uˇ.