Nawˇ ‘miˇ tsaˬ jeˬ biˇ’ yuˇ˗eu gʼaˇ duˬ dah laˇ taˬ maˬ loˇ?

Miˇ tsaˬ˗ahˇ uˆ lahˇ˗eu gʼaˇ duˬ lehˬ hmˬ˗eu

Yeˬhawˇbaˬ tsawˇ haˬ zaˬ˗ahˇ “miˇ tsaˬ kʼoeˇ taˆ byah laˇ˗awˇ, miˇ tsaˬ˗ahˇ uˆ lahˇ luꞈ˗uˇ” lehˇ dawˬ biꞈ˗euˬ heu naˇ, miˇ tsaˬ tiˬ siˬ siˬ lah ni˗ahˇ Baˬlaˬdiˇsuˆ mˇ pyeuꞈ gʼeh gaˇ ehˇ mawꞈ˗eu meh. (Aˇdahˬbeh˗eu 1:28) Miˇ tsaˬ kʼoeˇ taˆ mˬ maˬ maˬ byaˆ zaˇ ziˇ dehꞈ gʼeh˗eu lehˇ noeˬ tmˬ luꞈ˗eu deuˬ naˇ, dawˬ teu˗ahˇ ya naˇ haˬ˗awˇ ya mˇ caw˗eu meh. Miˇ tsaˬ kʼoeˇ taˆ Eˬdeˬ yaˇ kmˇ maˬ paˇ jaˆ˗euˬ miˇ neh, aˇ dahˬ beh gaˇ neh ya mˇ paˇ˗eu meh. Aˬmaˬgeˬdoˬ guiˇ jiˇ ngeh tiˬ jawˇ miˇ tsaˬ˗ahˇ laˆ luiˆ laˆ buˇ˗eu gaˇ mˇ˗eu gʼawˬ mya ni jaˆ˗eu meh. Teu ngeh gaˇ myaˬ dui dui˗eu yaw duˬ baw meh.

Heu naˇ Baˬbuˇloˬ˗ahˇ neh gʼoꞈ laˇ˗euˬ Iˇsaˬleˬlaˆ deuˬ neh mˇ˗euˬ jeˬ˗ahˇ bi noeˬ mawˇ laˇ˗eu meh. Aˬ yawꞈ maꞈ˗euˬ jawˇ kʼahˬ˗ahˇ uˬ taꞈ 70 kʼoꞈ tsawˇ haˬ maˬ jawˇ ni jaˆ˗euˬ meh. Ehˇ kʼawꞈ Iˇsaˬyaˇ maˬ keuˆ laˇ mi naˆ˗ehˇ Yeˬhawˇbaˬ˗euˬ guiˬ lahˬ baˬ da neh muiˬ dui dui˗eu jawˇ kʼahˬ pyeuꞈ kʼoꞈ laˇ meh lehˇ ehˇ taˬ˗euˬ meh. Maˬ keuˆ laˇ miˇ ehˇ taˬ˗euˬ dawˬ˗ahˇ “miˇ tsaˬ kʼaˇ shuiꞈ deh ga˗ahˇ duˇ kʼawꞈ, ngaˬ neh mˇ˗euˬ Eˬdeˬ yaˇ kmˇ loꞈ˗ehˇ duˇ˗eu, yaˇ kmˇ tiˬ kmˇ bi pyeuꞈ laˇ ma” lehˇ ehˇ taˬ˗euˬ meh. (Iˇsaˬyaˇ 51:3) Ehˇ loꞈ˗ehˇ Iˇsaˬleˬlaˆ deuˬ teu loꞈ˗ehˇ mˇ nya˗euˬ meh. Teu gaˇ duˇ ni miˇ tsaˬ jeˬ biˇ za˗eu deuˬ jiˇ Yeˬhawˇbaˬ˗euˬ guiˬ lahˬ baˬ da neh miˇ tsaˬ˗ahˇ yaw muiˬ˗ehˇ uˆ lahˇ laˇ nya˗eu meh. Aˬ dui gaˇ teu˗ahˇ gm leˇ˗awˇ mˇ mawꞈ˗eu lehˇ nymˬ˗mˇ neh mˇ mawˇ nya˗eu meh.

Aˬ dui mˇ mawˇ nya˗eu tiˬ jeˬ naˇ yawˬ ha˗euˬ iˇ kahˇ hawˇ˗eu jawˬ nya yaw buˇ buˇ lehˇ bi jaˆ˗eu heu meh. Yawˬ ha˗euˬ gaˇ dahˬ gaˇ dzeˇ deuˬ aˬ joˆ˗ehˇ dehꞈ kʼawꞈ, yawˬ ha yaw luiˆ yaw buˇ buˇ lehˇ ya dehꞈ˗eu meh. Kʼoeˇ naˇ Bawˬdzaˬnymˇ deuˬ laˆ luiˆ laˆ buˇ gaˇ laˆ saˆ gaˇ gm leˇ˗awˇ caw ba˗eu heu neh jiˇ mˇ mawˇ nya˗eu meh. Tsaˬ laˇ naˇ uˬ jeˬ jaˬ lehˇ˗euˬ shaˬ zahˬ˗ahˇ ya puˬ˗eu deuˬ˗ahˇ caw ba˗iˇ˗eu gʼaˇ duˬ kʼawꞈ jaˇ laˇ biꞈ nehˬ nya meh. Teu loꞈ˗ehˇ jahˇ taˬ˗euˬ teu naˇ nawˇ loˬ laˇ naˇ cawˬ ba nehˬ mawꞈ˗eu lehˇ bi mawˇ˗eu jeˬ pyeuꞈ meh. Nawˇ yawˬ ha˗ahˇ ‘Miˇ tsaˬ˗ahˇ mˬ maˬ maˬ byaˆ zaˇ ziˇ ya dehꞈ gʼeh ngeh gaˇ dahˇ tsoeˬ˗eu zaˬ siˬ tsawˇ gahˇ tiˬ jeˬ na˗ahˇ dzaw taˬ nya ma laˬ?’ lehˇ naˇ haˬ paˬ˗ehˇ gʼeh˗eu meh.

Gʼoꞈ dehꞈ laˇ˗eu deuˬ˗ahˇ ha˗eu gʼaˇ duˬ lehˬ hmˬ˗eu

Yeˬsuˇ Yaˬiˇluˆ˗euˬ aˬ buˇ˗ahˇ laˆ dehꞈ nehˬ gʼaˬ˗euˬ tiˬ dehˬ, tiˬ jeˬ paˬ bi dzaˬ lehˇ ehˇ˗eu meh. (Maˬkuˆ 5:42, 43) 12 kʼoꞈ kʼawˆ laˇ˗euˬ aˬ buˇ zaˬ˗ahˇ bi dzaˬ˗eu heu naˇ, teu naˆ naˆ˗ehˇ shaˬ˗eu jeˬ maˬ ngeuˇ˗a. Ehˇ kʼawꞈ “shiˇ dzeuˇ˗euˬ tsawˇ haˬ dawˬ tawˆ luꞈ aˬ yawꞈ˗euˬ dawˬ ya gaˬ˗eu aˇ nah keuˆ le luꞈ meh. Lmˬ bymˇ laꞈ kʼoeˇ neh aˬ yawꞈ maꞈ doˆ laˇ” lehˇ ehˇ˗eu saˇ jaˇ dawˬ byah laˇ ngeh, gaˇ aˇ naˆ ni myaˬ paˬ nga lehˇ shaˇ noeˬ haw sheˇ. (Yoˇhaˬ 5:28, 29) Jaˇliꞈ˗ahˇ duꞈ yawˇ ni aˬ joˆ˗ehˇ ya jahˇ˗eu lehˇ maˬ ehˇ nehˬ taˬ˗euˬ kʼawꞈ, gʼoꞈ dehꞈ laˇ˗eu deuˬ˗ahˇ dzaˬ dzaˬ dawˇ dawˇ, dm gʼaˬ dm lmˇ, jawˇ duˬ jawˇ zaˇ ya lehˬ hmˬ nehˬ˗eu yaw duˬ baw meh. Nawˇ caw ba nehˬ mawꞈ˗eu lehˇ nymˬ˗mˇ neh mˇ mawˇ nya ma laˬ? Naˇ haˬ˗eu jeˬ heu˗ahˇ ja sawˇ ma.

Nawˬ˗euˬ aˇ muˇ˗ahˇ aˇ maꞈ˗ahˇ sheuˬ gʼeh˗eu gʼaˬ gʼa laˇ ngeh, hawˬ bi dzaˬ nya ma laˬ? Nawˇ Beˬdeˬlaˇ˗ahˇ neh doˆ laˇ˗awˇ tsaꞈ gaˬ˗eu gaˇ mˇ le˗euˬ mehˇ nmˇ tiˬ gʼaˬ na˗ahˇ maˬ ehˇ, aˇ maꞈ˗ahˇ sheuˬ gʼeh˗eu gaˇ˗ahˇ neh naˬ shaw˗euˬ mehˇ nmˇ tiˬ gʼaˬ na˗ahˇ maˬ ehˇ, jawˇ duˬ jawˇ zaˇ poˆ nehˬ nya ma laˬ? Nawˬ˗euˬ jawˇ kʼahˬ˗ahˇ huiˬ˗eu mehˬ bawˬ jaˆ naˇ, mehˬ bawˬ˗euˬ jeˬ hu ngeh maˬ ehˇ, jiˇ ngeh maˬ ehˇ, caw ba˗iˇ nehˬ nya ma laˬ? Maˬ ngeuˇ naˇ, daˬ yah deuˬ˗ahˇ ha˗eu gaˇ˗ahˇ caw ba˗iˇ nya ma laˬ?

Gʼoꞈ dehꞈ laˇ˗eu deuˬ˗ahˇ mehˬ nehˬ˗eu gʼaˇ duˬ lehˬ hmˬ dah taˬ˗eu

Gʼaˬkʼehˇ 24:15 heu naˇ, tsawˇ haˬ gʼawˬ mya heˇ lam gʼaˬ gʼoꞈ dehꞈ laˇ˗eu lehˇ bi siˬ laꞈ˗eu meh. Gʼoꞈ dehꞈ laˇ˗eu gʼawˬ mya gʼaˬ Yeˬhawˇbaˬ˗euˬ gaˇ kawˆ maˬ ya siˬ nya ni shiˇ˗euˬ deuˬ pyeuꞈ meh. Nymˬ˗mˇ poˆ naˇ aˬ yawꞈ maꞈ Yeˬhawˇbaˬ˗euˬ gaˇ kawˆ dzaw˗eu aˬ kawˬ˗aˬ za˗eu meh.a Noeˬ dahˇ doe˗awˇ saˇ jaˇ ziꞈ˗eu gaˇ mˇ zaˬ deuˬ mehˬ˗eu gaˇ teu˗ahˇ mˇ˗eu aˬ kawˬ˗aˬ za˗eu meh. (Iˇsaˬyaˇ 11:9) Yuˇloˬ hawˇ˗eu Aˬmeˬliˇkaˬ laꞈ oˆ paw pyawˬ uˬ taꞈ, Ehˇpa˗li kaˆ˗ahˇ tsaꞈ gaˬ haw˗euˬ mehˇ nmˇ Tsaˬlawˇ, gaˇ teu ya mˇ gaˇ dawˬ luꞈ˗eu meh. Aˬ yawꞈ heu loꞈ˗ehˇ ehˇ˗eu meh. “Ngaˇ gʼoꞈ dehꞈ laˇ˗eu deuˬ˗ahˇ ya mehˬ gaˇ noeˬ tmˬ luꞈ˗eu ma. Ngaˇ shiˇ dzeuˇ˗euˬ tiˬ gʼaˬ na˗euˬ gaˇ kawˆ˗ahˇ ya gui ngeh, ‘Aˬ yawꞈ Yeˬhawˇbaˬ˗ahˇ siˬ nya law nmˇ˗aˬ, aˬ yawꞈ˗euˬ dehꞈ ziˇ teu loꞈ˗ehˇ maˬ gʼeh˗eu beu’ lehˇ noeˬ nya. Ngaˬ˗ahˇ aˬ yawꞈ maꞈ˗ahˇ Yeˬhawˇbaˬ˗ahˇ siˬ nya naˇ aˇ naˆ ni muiˬ˗eu lehˇ dzawˇ nehˬ mawꞈ laˇ taˬ˗euˬ lehˇ miˇ˗a.”

Yeˬsuˇ˗euˬ saˇ ka maˬ keuˆ le mi naˆ˗ehˇ dehꞈ yaꞈ˗euˬ Yeˬhawˇbaˬ˗euˬ saˇ jaˇ ziꞈ˗eu gaˇ mˇ zaˬ deuˬ kʼawꞈ, gʼoꞈ dehꞈ laˇ ngeh dzaw paˬ˗ehˇ gʼeh˗eu jeˬ gʼawˬ mya ni jaˆ˗eu meh. Aˬ dui Daˬyeˬlaˇ˗ahˇ aˬ yawꞈ jiˇ maˬ gʼoˆ shaw˗eu aˬ yawꞈ neh boꞈ˗euˬ maˬ keuˆ laˇ miˇ ehˇ taˬ dawˬ deuˬ aˬ joˆ˗ehˇ byah laˇ˗euˬ gaˇ kawˆ ya dzawˇ nehˬ˗eu heu, aˇ naˆ ni laˬ kʼaˬ cehˇ laˇ paˬ˗ehˇ gʼeh˗eu jeˬ pyeuꞈ nga lehˇ shaˇ noeˬ haw sheˇ. (Daˬyeˬlaˇ 12:8) Kʼoeˇ naˇ Luˇta hawˇ˗eu Nawˇmi˗ahˇ jiˇ Meˬsiˇya aˬ yawꞈ pehˬ˗euˬ aˇ jeuˬ˗ahˇ neh aˬ joˆ˗ehˇ oe˗euˬ gaˇ kawˆ jiˇ ya dzawˇ nehˬ˗eu meh. Teu ngeh nyehꞈ suꞈ laˇ˗awˇ, laˆ tsoeˬ, laˆ baˇ laˇ˗eu jeˬ maˬ jaˆ ni ya mehˬ ya tsoˆ˗eu heu naˇ aˇ naˆ ni laˬ kʼaˬ cehˇ laˇ paˬ˗ehˇ gʼeh˗eu jeˬ pyeuꞈ nga?

Aˬ dui gaˇ teu laꞈ kʼoeˇ gm leˇ˗eu gʼaˇ duˬ lehˬ hmˬ deuˇ luꞈ˗eu lehˇ nymˬ˗mˇ neh aˬ joˆ˗ehˇ mˇ mawˇ nya˗eu nga? Aˬ dui mehˬ˗eu gaˇ˗ahˇ bym laˇ byehˆ laˇ ni leh jeh˗awˇ, aˬ myah luꞈ tsaꞈ gaˬ˗iˇ˗eu heu neh meh. (Maꞈtehˬ 24:14) Aˇ kʼoꞈ kʼawˆ laˇ˗euˬ baˬ da neh maˬ ehˇ, nui jeˬ baˬ da neh maˬ ehˇ, tsaꞈ gaˬ˗eu yaw shaˬ kʼawꞈ kʼaˇ gʼeh nya gaˇ neh leh jeh˗awˇ tsaꞈ gaˬ naˇ, gʼoꞈ dehꞈ laˇ˗eu deuˬ˗ahˇ mehˬ nehˬ mawꞈ dui dui˗eu lehˇ mˇ mawˇ˗eu jeˬ pyeuꞈ meh.

Aˬ dui yawˬ ha˗ahˇ heu loꞈ˗ehˇ naˇ haˬ nya meh. Ngaˇ miˇ tsaˬ jeˬ biˇ yuˇ˗eu gʼaˇ duˬ loꞈ luꞈ miˇ˗a loˇ? Ngaˇ gʼoꞈ dehꞈ laˇ˗eu deuˬ˗ahˇ ha˗awˇ, mehˬ˗eu uˬ taꞈ, miˇ tsaˬ˗ahˇ ya uˆ lahˇ gaˇ laˬ kʼaˬ tiˬ cehˇ dawˬ luꞈ miˇ˗a laˬ? Nawˇ miˇ tsaˬ jeˬ biˇ za ngeh ya mˇ˗eu gaˇ deuˬ˗ahˇ nymˬ˗mˇ neh leh jeh˗awˇ mˇ˗eu heu neh miˇ tsaˬ˗ahˇ mˬ maˬ maˬ byaˆ zaˇ ziˇ dehꞈ gʼeh˗eu gʼaˇ duˬ lehˬ hmˬ luꞈ˗eu lehˇ mˇ mawˇ nya˗eu meh.