Gui˗eu deuˬ naˇ haˬ˗eu jeˬ

Yeˬsuˇ dehꞈ le gʼaˬ˗euˬ naˇ Maˬliˇ hawˇ˗eu Yoˇsehˆ Naˬzaˬlehˇ meuˬ˗ahˇ maˬ gʼoꞈ leˇ ni aˬ jeˬ miˇ neh Behˬlehˬhehˬ meuˬ˗ahˇ paˇ jawˇ daˆ leꞈ˗euˬ nga?

Gaˇ kawˆ teu nehˬ˗ehˇ taꞈ leˇ˗awˇ Jaˇliꞈ˗ahˇ duꞈ yawˇ ni maˬ ehˇ nehˬ taˬ˗aˬ. Ehˇ kʼawꞈ Naˬzaˬlehˇ meuˬ˗ahˇ aˬ jeˬ miˇ neh maˬ gʼoꞈ leˇ˗eu gaˇ kawˆ nehˬ˗ehˇ taꞈ leˇ˗awˇ nui ma ahˇ laˇ paˬ˗ehˇ gʼeh˗eu gaˇ kawˆ tiˬ kawˆ jaˆ˗eu meh.

Mˬ taˆ gʼaˬ kʼehˇ Maˬliˇ jawˇ gaˇ oe˗awˇ nawˇ aˬ li tiˬ li ya baw meh lehˇ ehˇ le ngeh, teu ngeh Yoˇsehˆ hawˇ˗eu Maˬliˇ Yoˇsehˆ˗euˬ jawˇ kʼahˬ pyeuꞈ˗eu Gaˬliˬlehˇ miˇ kʼahˬ Naˬzaˬlehˇ meuˬ˗ahˇ jawˇ luꞈ˗eu meh. (Luˇkaꞈ 1:26-31; 2:4) Aˇ nah naˇ Yeˬsuˇ peh Iˇjiˇtuˆ miˇ kʼahˬ˗ahˇ neh gʼoˆ laˇ ngeh Naˬzaˬlehˇ meuˬ˗ahˇ gʼoˆ leˇ˗euˬ meh. Yeˬsuˇ teu gaˇ huiˬ laˇ˗euˬ miˇ neh Yeˬsuˇ˗ahˇ Naˬzaˬlehˇ meuˬ zaˬ lehˇ kuˇ˗eu meh. (Maꞈtehˬ 2:19-23) Teu miˇ neh aˬ dui Yeˬsuˇ, Yoˇsehˆ, Maˬliˇ˗ahˇ kʼaˇ ngehˬ keuˆ ngeh, Naˬzaˬlehˇ meuˬ˗ahˇ noeˬ doˆ laˇ˗eu meh.

Maˬliˇ Yuˇdaˆ miˇ kʼahˬ˗ahˇ Eˇliˇsaˬbehˆ lehˇ kuˇ˗eu yuiꞈ nyiˇ tiˬ gʼaˬ jawˇ˗eu meh. Eˇliˇsaˬbehˆ naˇ piˇ ma Zaˬkaˬliˇ˗euˬ miˬ zaˬ pyeuꞈ˗awˇ iˇ cuꞈ shawˇ˗eu Yoˇhaˬ˗euˬ aˬ ma pyeuꞈ laˇ˗euˬ meh. (Luˇkaꞈ 1:5, 9, 13, 36) Maˬliˇ Eˇliˇsaˬbehˆ jawˇ gaˇ ba la smˇ siˬ dawˬ deh gʼa iˇ˗awˇ, Naˬzaˬlehˇ meuˬ˗ahˇ gʼoˆ laˇ˗euˬ meh. (Luˇkaꞈ 1:39, 40, 56) Maˬliˇ Yuˇdaˆ jawˇ kʼahˬ˗ahˇ yaw muiˬ˗ehˇ siˬ nya˗eu meh.

Aˇ nah naˇ tsawˇ haˬ yawˬ gʼaˬ na luꞈ ‘tsawˇ myahˇ dawˆ˗eu’ gʼaˇ duˬ yawˬ ha˗euˬ jawˇ kʼahˬ˗ahˇ ya gʼoꞈ˗iˇ˗eu meh. Teu miˇ neh Yoˇsehˆ pehˬ Naˬzaˬlehˇ meuˬ˗ahˇ neh Behˬlehˬhehˬ meuˬ˗ahˇ gaˇ ma doˆ˗iˇ˗euˬ meh. Behˬlehˬhehˬ meuˬ naˇ “Daˬbiˇ dehꞈ le˗euˬ meuˬ” pyeuꞈ˗awˇ, Meˬsiˇya dehꞈ leˇ meh lehˇ maˬ keuˆ laˇ mi naˆ˗ehˇ ehˇ taˬ˗euˬ jawˇ duˬ jiˇ pyeuꞈ˗eu meh. (Luˇkaꞈ 2:3, 4; 1 Saˬmeuˬlaˆ 17:15; 20:6; Miˇkaˬ 5:2) Yeˬsuˇ meuˬ teu meuˬ˗ahˇ dehꞈ le˗euˬ meh. Yoˇsehˆ nahˬ jawˆ ni gʼeh luꞈ˗eu zaˬ nahˬ Yeˬsuˇ hawˇ˗eu Maˬliˇ˗ahˇ sheuˬ˗awˇ gaˇ mahˇ˗ahˇ jaˆ˗eu Naˬzaˬlehˇ meuˬ˗ahˇ gaˇ ma maˬ doˆ˗iˇ mawꞈ˗eu miˇ neh, Behˬlehˬhehˬ meuˬ˗ahˇ jawˇ daˆ leꞈ˗euˬ meh. Behˬlehˬhehˬ naˇ Yeˬluˇsaˬlehˬ nehˬ˗ehˇ 6 laˇ (9 kiˬloˬmiˬteuˬ) ehˇ gʼaˬ naˆ ni kaˬ˗eu meh. Teu miˇ neh zaˬ nahˬ sheuˬ˗awˇ neh uˬ duˬ tahˬ nymˇ nymˇ ma jaˆ˗eu Yeˬluˇsaˬlehˬ meuˬ˗ahˇ zahˇ jaˆ˗eu loꞈ˗ehˇ yaw awˬ˗ehˇ lawˇ˗iˇ shehˇ˗iˇ nya˗euˬ meh.—Uˬduˬtahˬ˗eu 12:2, 6-8; Luˇkaꞈ 2:22-24.

Mˬ taˆ gʼaˬ kʼehˇ Maˬliˇ˗ahˇ zaˬ nahˬ heu gʼaˬ “Daˬbiˇ˗euˬ dzoeˬ dzaˬ nui mahˬ”˗ahˇ nui laˇ˗awˇ, ‘sahˬ paˬ geuꞈ˗awˇ uˆ lahˇ meh’ lehˇ ehˇ nehˬ˗euˬ meh. Teu miˇ neh Daˬbiˇ dehꞈ leꞈ˗euˬ meuˬ˗ahˇ Yeˬsuˇ dehꞈ le˗euˬ heu naˇ maˬ yehˆ maˇ yehˆ˗ehˇ pyeuꞈ laˇ˗euˬ maˬ ngeuˇ˗eu lehˇ Yoˇsehˆ hawˇ˗eu Maˬliˇ siˬ nya˗eu tehꞈ˗a. (Luˇkaꞈ 1:32, 33; 2:11, 17) Teu miˇ neh aˬ yawꞈ pehˬ teu gaˇ jawˇ daˆ leꞈ˗awˇ neh Miˬyehˇ neh sheuˬ hehˇ nehˬ laꞈ˗euˬ jeˬ˗ahˇ dawˬ˗eu heu naˇ nui gahˇ ahˇ˗eu jeˬ pyeu nga lehˇ noeˬ˗eu kʼawꞈ pyeuꞈ nya meh.

Aˬ guiˇ gaˇ kawˆ tsawˇ gahˇ ahˇ˗eu deuˬ laˇ keuˆ ngeh, aˬ yaw pehˬ Behˬlehˬhehˬ meuˬ˗ahˇ jawˇ luꞈ˗eu aˇ naˆ ni myahˇ laˇ˗euˬ lehˇ aˬ dui maˬ siˬ duˬ nya˗a. Ehˇ kʼawꞈ teu ngeh aˬ yawꞈ pehˬ iˇ kahˇ tiˬ kahˇ˗ahˇ jawˇ luꞈ˗awˇ, Yeˬsuˇ kʼawꞈ zaˬ nahˬ maˬ paˇ ngeuˇ ni “zaˬ yaw nyiˇ” pyeuꞈ laˇ shaw˗euˬ lehˇ siˬ nya˗eu ma. (Maꞈtehˬ 2:11) Aˬ yawꞈ pehˬ Naˬzaˬlehˇ meuˬ˗ahˇ maˬ gʼoꞈ leˇ ni Behˬlehˬhehˬ meuˬ˗ahˇ tiˬ sheuˇ jawˇ daˬ taˬ˗euˬ gaˇ duˇ˗eu meh.

Sahˬ paˬ Heˬloˆ ‘Behˬlehˬhehˬ meuˬ˗ahˇ kʼaˇ jawˇ˗eu nyiˬ kʼoˆ˗ahˇ neh laꞈ oˆ paw˗euˬ aˬ li zaˬ nahˬ deuˬ˗ahˇ sehꞈ dzeh jiˇ˗eu gʼaˇ duˬ’ dawˬ biꞈ˗euˬ meh. (Maꞈtehˬ 2:16) Gaˇ kawˆ heu˗ahˇ mˬ taˆ gʼaˬ kʼehˇ ehˇ gaˬ le˗euˬ miˇ neh Yoˇsehˆ hawˇ˗eu Maˬliˇ Yeˬsuˇ˗ahˇ sheuˬ˗awˇ Iˇjiˇtuˆ miˇ kʼahˬ˗ahˇ cehˆ˗euˬ meh. Heˬloˆ maˬ shiˇ˗eu kʼoeˇ keuˆ ni aˬ yawꞈ pehˬ teu gaˇ jawˇ˗euˬ meh. Teu gaˇ neh naˇ, aˬ yawꞈ pehˬ Naˬzaˬlehˇ meuˬ˗ahˇ gʼoꞈ leˇ˗euˬ meh. Aˬ yawꞈ pehˬ Behˬlehˬhehˬ meuˬ˗ahˇ aˬ jeˬ miˇ maˬ gʼoꞈ laˇ˗euˬ nga? Aˬ jeˬ miˇ neh ehˇ naˇ, Yuˇdaˆ miˇ kʼahˬ˗ahˇ haiˬ dui doeˇ dui dui˗eu Heˬloˆ˗euˬ aˬ li Aˬgeˬlaˇ uˆ lahˇ luꞈ˗eu siˬ miˇ neh meh. Kʼoeˇ naˇ mˬ taˆ gʼaˬ kʼehˇ jiˇ teu gaˇ gʼoˆ leˇ naˇ lehˬ laˇ ca laˇ nya nga lehˇ saˇ tiˇ biꞈ nehˬ˗euˬ meh. Teu miˇ neh Yoˇsehˆ aˬ yawꞈ pehˬ˗euˬ nymˇ jiˇ˗ahˇ Naˬzaˬlehˇ meuˬ˗ahˇ sheuˬ kʼoꞈ leꞈ˗euˬ meh. Naˬzaˬlehˇ meuˬ naˇ Yeˬsuˇ˗ahˇ cu huiˬ˗eu muiˬ dui dui˗eu jawˇ kʼahˬ pyeuꞈ meh.—Maꞈtehˬ 2:19-22; 13:55; Luˇkaꞈ 2:39, 52.

Mˬ taˆ daˆ leˇ˗eu deuˬ˗euˬ gʼaˇ duˬ gaˇ ma maˬ pah nehˬ mi naˆ˗ehˇ Yoˇsehˆ shiˇ˗euˬ meh. Ehˇ kʼawˆ gʼawˬ myahˇ maˬ gʼeh˗ehˇ Yoˇsehˆ gʼoꞈ dehꞈ laˇ˗eu meh. Yeˬsuˇ˗ahˇ baw gʼaˬ ngeh Behˬlehˬhehˬ meuˬ˗ahˇ aˬ jeˬ miˇ jawˇ daˆ leꞈ˗euˬ gaˇ kawˆ˗ahˇ yaw muiˬ˗ehˇ ya siˬ˗eu gʼaˇ duˬ, Yoˇsehˆ nehˬ˗ehˇ ya mawˇ dzoeˇ ngeh aˬ yawꞈ˗ahˇ paˇ naˇ haˬ tehꞈ˗a.