Gui˗eu deuˬ naˇ haˬ˗eu jeˬ

Dawˬdaˬ 30:18, 19-ahˇ “kʼaˬ dzeˇ zaˬ hawˇ˗eu zaˬ miˬ zaˬ gaˬ˗eu” jeˬ˗ahˇ “ngaˇ maˬ noeˬ doˆ coeˇ” lehˇ ehˇ taˬ˗euˬ heu naˇ aˬ jeˬ˗ahˇ ehˇ mawꞈ nga?

Dawˬdaˬ 30:18, 19-ahˇ “Ngaˇ maˬ noeˬ doˆ coeˇ˗ehˇ zahˬ dui dui leˇ˗eu oeˬ jeˬ˗aˬ, mˬ kʼoeˇ taˆ zaw˗eu kʼaˬ dzeˇ, lo guˇ˗ahˇ cah˗eu aˇ lawˇ, iˬ ma laˆ shaˆ gʼahˇ ceh gaˇ daˬ mawˇ nya˗eu saˇ baoˬ, kʼaˬ dzeˇ zaˬ hawˇ˗eu zaˬ miˬ zaˬ gaˬ˗eu, heu oeˬ jeˬ meh” lehˇ ehˇ taˬ˗euˬ meh. ‘Kʼaˬ dzeˇ zaˬ hawˇ˗eu zaˬ miˬ zaˬ gaˬ˗eu jeˬ’ lehˇ ehˇ˗eu dawˬ heu dawˬ, aˬ jeˬ˗ahˇ ehˇ mawꞈ nga lehˇ Jaˇliꞈ paw nui gahˇ ahˇ˗eu deuˬ hawˇ˗eu tsawˇ haˬ gʼawˬ mya ni siˬ nya mawꞈ˗eu meh.

Yaw nyiˇ 15, 16-ahˇ “tiˬ jawˇ˗iˬ nui kʼahˇ maˬ byah˗eu” lehˇ ehˇ˗eu gaˇ kawˆ pah mehˬ taˬ˗euˬ meh. Yaw nyiˇ 20-ahˇ naˇ “saˇ jaˇ maˬ jawˇ˗eu miˬ zaˬ”˗euˬ gaˇ kawˆ pah mehˬ taˬ˗euˬ meh. Teu miˇ neh aˬ dui yaw beh ba ‘kʼaˬ dzeˇ zaˬ hawˇ˗eu zaˬ miˬ zaˬ gaˬ˗eu jeˬ’ lehˇ ehˇ˗eu dawˬ heu naˇ, maˬ muiˬ˗eu tiˬ jeˬ jeˬ˗ahˇ ehˇ luꞈ nga lehˇ gʼoˆ shaw˗euˬ ma. Aˬ dui mˬ taˆ zaw˗eu kʼaˬ dzeˇ, kʼaˬ lo kʼoeˇ taˆ cah˗eu aˇ lawˇ, iˬ ma laˆ shaˆ˗ahˇ cah˗eu saˇ baoˬ lehˇ ehˇ˗eu heu naˇ, kʼaˬ dzeˇ zaˬ tiˬ gʼaˬ aˬ yawꞈ iˇ˗eu laˇ˗eu pehˬ zaˇ maˬ bi siˬ ni, iˇ nya laˇ nya mˇ nya shaˇ nya gaˇ ehˇ nga lehˇ gʼoˆ shaw˗euˬ ma. Yaw gahˇ zmˬ˗eu kʼaˬ dzeˇ zaˬ deuˬ yaw laiꞈ laiꞈ˗eu zaˬ miˬ zaˬ deuˬ˗ahˇ mehˇ shuiˇ shuiˇ˗awˇ yuꞈ taꞈ jawˇ taꞈ˗eu leh jeh gaˇ ehˇ nga lehˇ gʼoˆ shaw˗euˬ ma.

Ehˇ kʼawꞈ Jaˇliꞈ aˇ deuˆ heu, yaw muiˬ tiˬ jeˬ jeˬ˗ahˇ ehˇ luꞈ˗eu lehˇ ehˇ nya˗eu gaˇ kawˆ deuˬ jaˆ˗eu meh. Jaˇliꞈ boꞈ˗euˬ gʼaˬ naˇ aˬ yawꞈ zahˬ leˇ˗eu jeˬ˗ahˇ pah mehˬ taˬ˗euˬ tehꞈ meh.

Jaˇliꞈ aˇ deuˆ heu yaw muiˬ tiˬ jeˬ jeˬ˗ahˇ ehˇ keuˆ mawꞈ˗eu lehˇ Heˬbyehˇ sahˬ boꞈ aˇ mawˇ deuˬ boꞈ taˬ gaˇ haw ngeh siˬ laˇ˗eu meh. Dawˬdaˬ 30:18-ahˇ “ngaˇ maˬ noeˬ doˆ coeˇ” lehˇ ehˇ˗eu dawˬ heu dawˬ naˇ, aˬ cawˬ˗ahˇ maˬ duˇ˗eu, pyeuꞈ leˇ nya paˬ˗ehˇ maˬ gʼeh˗eu jeˬ˗ahˇ ehˇ mawꞈ˗eu meh lehˇ Jaˇliꞈ yaw oeˇ dmˬ˗ahˇ dawˬ tsuiꞈ puiˇ kʼawˬ˗eu paˇ dmˬ tiˬ dmˬ˗ahˇ pah mehˬ taˬ˗euˬ meh.

“Jaˇliꞈ boꞈ˗euˬ gʼaˬ zahˬ leˇ˗eu gaˇ kawˆ˗ahˇ pah mehˬ taˬ˗euˬ jeˬ pyeuꞈ˗eu tehꞈ ngaˇ” lehˇ Aˬmeˬliˇkaˬ miˇ kʼahˬ Haˇbeuˬ sahˬ boꞈ dzaw goˇ˗eu dzaw nymˇ˗ahˇ˗euˬ Kawˇ˗lawˇpeuˬ Hawˇbeuˬ Tawˇ˗ehˇ lehˇ kuˇ˗eu saˬ laˬ jiˇ teu loꞈ˗ehˇ ehˇ˗eu meh.

Teu miˇ neh Dawˬdaˬ 30:18, 19 heu naˇ, aˬ dui maˬ noeˬ doˆ coeˇ gaˇ keuˆ ni zahˬ leˇ paˬ˗ehˇ gʼeh˗eu jeˬ˗ahˇ pah mehˬ taˬ˗euˬ lehˇ ehˇ nya meh. Mˬ kʼoeˇ taˆ kʼaˬ dzeˇ deuˬ aˬ joˆ˗ehˇ zaw˗eu nga? Aˬ kuiˇ maˬ tsoꞈ gaˇ kʼaˬ lo kʼoeˇ taˆ aˬ lawˇ deuˬ aˬ joˆ˗ehˇ joe joe˗ehˇ cah˗eu nga? Iˬ ma laˆ shaˆ˗ahˇ saˇ baoˬ baoˬ ma deuˬ aˬ joˆ˗ehˇ iˇ tsehˆ˗eu nga? Kʼaˬ dzeˇ zaˬ hawˇ˗eu miˬ zaˬ deuˬ aˬ joˆ˗ehˇ gaˬ leˇ gʼoeˇ leˇ˗awˇ ziˇ jiˇ ngeh keuˆ ni dehꞈ˗eu nga lehˇ Jaˇliꞈ boꞈ˗euˬ teu gʼaˬ loꞈ˗ehˇ aˬ dui yawˬ gʼaˬ na luꞈ jiˇ zahˬ leˇ˗eu ma.