Enuɖetinɔnyɔ

Kpukpui Ciwo Akpedo mì nu Mìanɔ Agbe Mɛ̀mi akpedo eo nu nakpɔ Bibla kpukpuiwo koɖo exolɔlɔ ciwo akpedo eo nu nakpɔ cukaɖa ciwo mɛ ètotoɔ gbɔ. Ágbekpedo eo nu hɛnnɛ nakpɔ mawunyɔkpukpui vevi ciwo àsɔ do ŋsɛn mɛbuwo yí agbekpedo wo nu woasɔ gbeta ciwo ahɛn kanfukanfu vɛ nɔ Yehowa. Can nyɔta ci yí jɔ ji nɔ eo. Le nyɔta ɖekaɖeka mɛɔ, àkpɔ nyɔbiɔse veviwo koɖo Bibla mɛ xolɔlɔ ɖewo ciwo mɛ wodre le kleŋ mɛ. (Kpɔ dakavi ci yí nyi “Lé Woazan Wema cɛ do.”) Àtɛnŋ akpɔ mawunyɔkpukpui ciwo ana eo enukplamu nywi koɖo akɔnfɛ ci èʒan. Àgbekpɔ enuvevi bu ciwo nu àxo nuxu so nɔ mɛbuwo. Ahanke àgbekpɔ Bibla mɛ gɔnmɛɖose nywi ciwo àtɛnŋ azan asɔ do ŋsɛn mɛbuwo.

Lé Woazan Wema cɛ do

Nɔ àkpɔ nyɔta ɖeɔ, àtɛnŋ azan enujijikpɔ dakavi alo aji wo kpɔ le akpaxwe vovovo lɔwo mɛ nɔ wema lɔ. Woma Kpukpui Ciwo Akpedo mì nu Mìanɔ Agbe Mɛ̀mi wema cɛ do amadrɛ: Cukaɖawo, Kristotɔwo Wanawo, Hamɛ, Gbeshiagbe Gbenɔnɔ, Xomu, Gbɔngbɔnmɛ, koɖo Adɛnwo. Nyɔta sugbɔ ale gɔnmɛ nɔ akpaxwe ɖeka ɖeka. Sɔ akpaxwe ci yí sɔgbe keŋ acan nyɔta ci èjijiɛ. Éle ahan gan, nɔ dekando ji mɔ nyɔta ci yejijiɛ dele akpaxwe lɔ mɛɔ, sɔ Wo Pleŋ keŋ aji nyɔta ci èjijiɛ kpɔ. Le nyɔta ɖeka ɖeka mɛɔ, àkpɔ enu sugbɔ ciwo woŋwlɛ koɖo wemakui tritriwo. Ðewo nyi enyɔfɔkpewo; ebuwo nyi nyɔbiɔsewo. Nɔ èle Bibla kpukpui ciwo woŋwlɛ koɖo wemakui tritriwo hlɛnkɔɔ, ja enyɔ lɔ kpɔ le susu mɛ yí abu tamɛ kpɔ so lé woca ka koɖo nyɔfɔkpe lɔ alo nyɔbiɔse lɔ do. Gaɖewo mɛɔ, womanɔ nyɔta ɖeka do akpaxwe hwɛhwɛwo mɛ nɔ nakpɔ enu ci èjijiɛ blaŋ. Hweɖewonuɔ, kpukpui ɖewo nɔnɔ “Gbekpɔ” kpaxwe. Ecɛtɔ gbenanɔ susu vovovowo so nyɔta lɔ nu. Le nyɔta sugbɔtɔ mɛɔ, àkpɔ “Bibla mɛ kpɔwɛ ciwo yí atɛnŋ akpedo eo nu” alo “Bibla mɛ kpɔwɛ ci yí atɛnŋ akpedo eo nu”. Woŋwlɛnɔ nyɔfɔkpe kleŋ ɖe yí asɔ dre nukplamu vevi ci yí le kpukpui ci woyɔ mɛ. Nɔ èhlɛn kpukpui lɔɔ, nyɔfɔkpe cɛ tɔ akpedo eo nu nanya enu ci wojijiɛ mɔ woawa.

Wodeyɔ kpukpui ciwo pleŋ yí kudo nyɔta ɖekaɖeka nu le wema cɛ mɛ o. Vɔ wema nywi ɖeka enyi ci mìatɛnŋ azan asɔ wa numɛkukuwo. (Elo 2:1-6) Nɔ àji dwi ni kpɔ dojiɔ, zan dodomɛnuŋwlɛŋwlɛ, enumɛɖeɖe buwo le Ŋɔŋlɔ Kɔkɔeawo—Xexe Yeye Gɔmeɖeɖe Bibla mɛ. Nɔ àgbemɔŋje kpukpui ɖewo mɛ dojiɔ, kpɔ “Bibla kpukpui ciwo woɖe gɔnmɛ nɔ” le Numekuku Ŋuti Mɔfiagbalẽ Na Yehowa Ðasefowo kpaxwe alo le Index Des Publications Des Témoins De Jéhovah mɛ. Jikpɔ le wema godugodutɔ ciwo yí xo nuxu so nu mɛ, keŋ akando ji mɔ yeɖo enumɛmɔŋje yoyutɔ so kpukpui lɔ nu.

Kpukpui Ciwo Akpedo mì nu Mìanɔ Agbe Mɛ̀mi wema cɛ lé kpedo eo nu naɖo ŋununyanya, nunya koɖo enumɛmɔŋje ciwo yí le Enuŋwlɛŋwlɛ Kɔkɔɛ lɔwo mɛ. Nɔ èle Wema cɛ zankɔɔ, àgbevakando ji mɔ “Mawu Nyɔ le agbe yí le edɔ wakɔ.”—Ebre 4:12.