‘Mɛ ciwo yí nɔnɔ gbeji nɔ Yehowa, nɔnɔ jijɔkpɔkpɔ mɛ’

1-2. (a) Lé acɛkpatɔ ɖewo wa nu do Yehowa mɛwo nu doɔ, vɔ lé Yehowa mɛwo wa nu doɔ? (b) Nyi yí taɖo mìatɛnŋ akpɔnɔ jijɔ nɔ wocikɔ yumɛ nɔ mì can ɔ? (Xo nuxu so foto ci yí le akpa lɔ ji nu.)

LE KAKACƐ mɛ le xexeɛ pleŋ mɛɔ, eju ciwo yí wu 30 mɛ yí wodeɖe emɔ do mìwo dɔwo pleŋ nu le o alo ɖo te wo. Le eju cɛ ɖewo mɛɔ, acɛkpakpa lɔwo sɔ mìwo nɔviwo do gakpa mɛ. Enudɔndɔn ci wowaɔ? Ŋɖekɛ. Le Yehowa gbɔɔ, wodewa enudɔndɔn ɖe o. Enu ci wowa yí nyi wohlɛnnɔ Bibla yí gbekplɛ ni, nunɔ enu ci ji woxɔ se nɔ mɛbuwo yí gbebɔnɔ doju koɖo wowo kpena xɔsetɔwo. Wogbeɖui hɛnnɛ mɔ yewodadonɔ nu ejunyɔ mɛ o. Ci wocikɔ yumɛ nɔ Mawu sɛntɔ egbejinɔtɔ cɛwo sɛnŋsɛnŋɖe can ɔ, wokpɔtɔ le gbeji yí sɔ dadasɛ mɔ yewosɔ yewoɖekiwo jo nɔ Yehowa keŋkeŋ.b Yí ecɛ na wokpɔnɔ jijɔ.

² Kankandojitɔɔ, èkpɔ Kunuɖetɔ edɔngbetɔ cɛ ɖewo foto le akpa lɔ ji yí kpɔ lé wokokoɔ nukui do. Wokpɔkɔ jijɔ ɖo wonya mɔ ci yewokpɔtɔ le gbeji nɔ Yehowaɔ, yewo nu kpekɔ ni. (1 Kro. 29:17a) Yesu nu mɔ: “Amɛ ciwo yí wo trefun nɔ sɔkudo ci wo wanɔ enujɔjɔɛ [ŋciɔ, woakpɔ jijɔ] . . . Mí kpɔ jijɔ yí mí a ɖu azan, ɖo enu ci yí taɖo ɔ, míwo fɛncu a sugbɔ.”—Mt. 5:10-12.

WOÐO KPƆWƐ ÐƐ NƆ MÌ

3. Nyi yí Edɔwawawo 4:19, 20 nu mɔ apotru lɔwo wa ci woci yumɛ nɔ woɔ, yí nyi yí taɖo wowa ahan ɔ?

³ Woci yumɛ nɔ apotruwo le exwe sanŋdi ŋkɔtɔ mɛ, ɖo woɖekɔ kunu so Yesu nu; eyi lɔ hanke yí jɔkɔ do mìwo nɔviŋsu koɖo nɔvinyɔnu ɖewo ji gbɛ. Kojoɖotɔ ciwo yí le Ʒuifuwo kojoɖoxu gangantɔ nu nɔ wo zenɛniɖe mɔ, “wo ŋgbe kpla enu amɛwo alo a xo nuxu ɖe nɔ amɛwo toto Yesu ŋkɔmɛ o.” (Edɔ. 4:18; 5:27, 28, 40) Lé apotru lɔwo wa nu doɔ? (Hlɛn Edɔwawawo 4:19, 20.) Wonya mɔ acɛkpatɔ gangantɔ yí ‘mɔ yewo le dra ŋɛnywi lɔ nɔ amɛwo yí aɖe kunu kitokito’ so Kristo nu. (Edɔ. 10:42) Eyi taɖo Piɛ koɖo Ʒan ciwo yí xokɔ nuxu do nu nɔ mɛkpɛtɛwo gbe dɔn yí nu mɔ, yewoɖo ase tonu nɔ Mawu wu wowo kojoɖotɔ cɛwo yí mɔ yewodami nuxu xoxo so Yesu nu o. Nɔ mìanuiɔ, wonukɔ nɔ acɛkpatɔ cɛwo mɔ, ‘Nu mínukɔ mɔ yewoɖo acɛ wu Mawu yɔa?’

4. Shigbe lé Edɔwawawo 5:27-29 nui nɛ ɖe, kpɔwɛ ci yí apotruwo ɖo ɖɛ nɔ Kristotɔ adodwiwo pleŋ ɔ, yí lé mìawɛ yí awa wowotɔ han doɔ?

⁴ Apotru lɔwo ɖo kpɔwɛ nywi ɖɛ, ‘wona shishi Mawu wu agbetɔwo.’ So hwenɔnu keke vaje egbɛɔ, Kristotɔ adodwiwo pleŋ wakɔ wowotɔ han. (Hlɛn Edɔwawawo 5:27-29.) Ci apotru lɔwo ɖui mɔ yewoakpɔtɔ anɔ gbeji nɔ Mawuɔ, woxo wo. Ci woxo wo ɖegbɔɔ, woso le Ʒuifuwo kojoɖoxu gangantɔ lɔ koɖo jijɔ, “eji jɔ wo, ɖo wo xɔ kanfukanfu do efunkpekpewo ci wo kpe dota nɔ Yesu ŋkɔ,” yí wokpɔtɔ drakɔ eŋɛnywi lɔ nɔ amɛwo.—Edɔ. 5:40-42.

5. Nyɔbiɔse ciwo yí mìɖo akpɔ ɖoŋci nɔɔ?

⁵ Kpɔwɛ ci apotruwo ɖo ɖɛ dɔ yí mìatɛnŋ abiɔ enyɔ ɖewo se. Ðewo ke, lé gbeta ci apotru lɔwo sɔ mɔ yewoaɖo to Mawu wu agbetɔwo sɔgbe koɖo ese ci yí le Bibla mɛ ci yí mɔ, wo “ɖo a na bubu acɛkpakpa gawo” ɔ? (Rɔm. 13:1) Lé mìawɛ yí atɛnŋ “a bubɔta do gɔnmɛ nɔ ejiɖuɖuwo hlɔnhlɔn koɖo ejukplɔtɔwo hlɔnhlɔn,” shigbe lé apotru Pɔlu nui nɛ, gan yí akpɔtɔ ale gbeji nɔ Mawu ci yí nyi Acɛkpatɔ Gangantɔ lɔɔ?—Titu 3:1.

“ACƐKPAKPA GAWO”

6. (a) Miwo yí nyi “acɛkpakpa ga” ciwo nyɔ yí wonu le Rɔmatɔwo 13:1 mɛɔ, yí lé mìɖo awa nu ɖaɖa wo gbɔ doɔ? (b) Nyɔnɔnwinyɔ ci mìɖo anya so agbetɔwo cɛkpakpawo pleŋ nuɔ?

⁶ Hlɛn Rɔmatɔwo 13:1. Le kpukpui cɛ mɛɔ, “acɛkpakpa gawo” yí nyi agbetɔ ciwo yí ɖo ŋsɛn yí kpakpa do mɛbuwo ji. Kristotɔwo ɖo abubɔ do gɔnmɛ nɔ acɛkpatɔ ŋtɔ́wo. Acɛkpatɔ cɛwo dɔ yí enuwo yinɔ do toto nu le eju lɔ mɛ, wokpɔnɔ gbɔ mɔ amɛwo awa do ese ji yí hweɖewonuɔ, woglɔnnɔ ta nɔ Yehowa mɛwo ŋtɔkpu. (Enyɔ. 12:16) Eyi taɖo wodo ŋsɛn mì mɔ mìanana taga wo, abunɔ wo, ashinɔ wo yí asɔ kanfukanfu ci woje nɔ wo. (Rɔm. 13:7) Vɔ Yehowa yí ɖe mɔ nɔ acɛkpakpa cɛwo yí dɔ woɖo ŋsɛn. Yesu na yí enyɔ cɛ mɛ kɔ gbawlɛɛ hwenu yí Rɔma jujikpɔtɔ Pɔnsi Pilati biɔ enyɔ yi se. Ci Pilati nu mɔ yeɖo acɛ yí atashi Yesu anɔ agbe alo ana woawuiɔ, Yesu nu ni mɔ: “De ɖo acɛkpakpa ɖe do Ŋ ji, nɔ́ Mawu de sɔɛ na eo so eji o.” (Ʒan 19:11) Shigbe lé acɛ ci Pilati ɖo ɖo sɛnxu nɛɔ, ahanke acɛkpatɔ koɖo politiki ga ciwo pleŋ yí li gbɛ cɛwo ɖo sɛnxu nɛ.

7. Hwenu yí mìdeɖo aɖo to acɛkpatɔwoɔ, yí nyi yí acɛkpatɔ lɔwo ɖo anyaɔ?

⁷ Kristotɔwo ɖo awa do ese ciwo yí agbetɔwo cɛkpakpawo do ji nɔ dana yí woada le Mawu se ji o. Vɔ mìdatɛnŋ aɖo to wo nɔ womɔ mìwo le wa ŋɖe ci Mawu gbe alo wogbe nɔ mì mɔ mìwoŋgbewa ŋɖe ci Mawu mɔ mìwo le wa o. Le kpɔwɛ mɛ, wotɛnŋ mɔ jajɛ ŋsuwo le yi ahwa.c Alo wotɛnŋ gbe mɔ mìwoŋgbezan Xexe Yeye Gɔmeɖeɖe Bibla lɔ koɖo mìwo wemawo o, alo agbe nɔ mì mɔ mìwoŋgbeɖe kunu yí abɔ doju koɖo mìwo kpenawo yí asɛn Yehowa o. Nɔ acɛkpatɔwo wa fɛn yí zanzan wowo cɛ lɔ yí sɔ cikɔ yumɛ nɔ Kristo dokplɔtɔwoɔ, woɖo ana kɔnŋta Mawu. Yehowa kpɔkɔ wo.—Ŋun. 5:8.

8. Vovototo ci yí le Yehowa koɖo agbetɔ cɛkpatɔwo mɛɔ, yí nyi yí taɖo ele mɔ mìɖo anya enyɔ cɛɔ?

⁸ Acɛkpakpawo atɛnŋ aɖo acɛ awa nunywi sugbɔwo yí akpa nɔ mɛbuwo. Vɔ ecɛ dedasɛ mɔ afɛn ɖe dele wo nu yí wole ŋkɔ nɔ mɛkpɛtɛwo o. Mɛɖeka yɛ li yí afɛn dele yɛ nu o, yí ele ŋkɔ nɔ agbetɔwo pleŋ; eyi nyi Yehowa Mawu. Zenɛ yí woyɔ Yehowa Mawu le Bibla mɛ mɔ yɛnyi “Acɛkpatɔ Gangantɔ.”—Dan. 7:18, 22, 25, 27, NWT.

“ACƐKPATƆ GANGANTƆ”

9. Nyi yí enyɔnuɖɛtɔ Daniɛli kpɔ le ŋteganwo mɛɔ?

⁹ Enyɔnuɖɛtɔ Daniɛli kpɔ ŋtegan ɖekawo ciwo yí dasɛ petii mɔ Yehowa ɖo acɛ wu acɛkpatɔ kpɛtɛwo pleŋ. Ŋkɔtɔɔ, Daniɛli kpɔ langan amɛnɛ ciwo yí le dumɛ nɔ xexeɛ mɛ cɛkpakpa ciwo yí ni vayi koɖo ciwo yí li gbɛ: Babiloni, Mɛdo-Pɛsi, Grɛki, Rɔma koɖo ci yí li gbɛ ci yí nyi Anglo-Amɛliki. (Dan. 7:1-3, 17) Eyi Daniɛli kpɔ Yehowa le nyinɔnɔ le fyɔʒinkpin mɛ le jeŋkwi mɛ le kojoɖoxu. (Dan. 7:9, 10) Enu ci enyɔnuɖɛtɔ egbejinɔtɔ lɔ kpɔ kplɔɛdo ɖo anyi amɛkanxlenyɔ nɔ acɛkpatɔ ciwo yí li gbɛ.

10. Sɔ koɖo Daniɛli 7:13, 14, 27 ɖe, miwo Yehowa sɔ mɔ woakpa cɛ do nyigban jiɔ, yí nyi ecɛ dasɛ so nuɔ?

¹⁰ Hlɛn Daniɛli 7:13, 14, 27. Mawu xɔ ŋsɛn koɖo acɛwo pleŋ le agbetɔ cɛkpakpawo shi yí sɔ jo nɔ mɛ ciwo yí je yí gbeɖo ŋsɛn wu wo. Miwo yɔɔ? Mɛ ci yí “ɖyi agbetɔ [vi],” Yesu Kristo koɖo “Mawu mɛ vevi” ciwo yí nyi amɛ 144 000 ciwo yí aɖu fyɔ “keke sɔyi mavɔ mavɔ.” (Dan. 7:18) Yi mɛ kɔ petii mɔ, Yehowa “Acɛkpatɔ Gangantɔ,” ɖekɛ yí ɖo acɛ awa nu cɛ.

11. Nubu ci Daniɛli nu ci yí dasɛ mɔ Yehowa kpa acɛ do jukɔnwo jiɔ?

¹¹ Enu ci Daniɛli kpɔ le ŋtegan lɔ mɛ sɔgbe koɖo enyɔ ci enu vayi. Énu mɔ: “Jeŋkwimɛ Mawu . . . ɖɔli efyɔwo. É nanɔ hlɔnhlɔn efyɔwo yí ɖe wowo hlɔnhlɔn swi.” Égbeŋwlɛ mɔ: “Mawu Ejiɖaatɔ kpacɛ nɔ agbetɔ fyɔjuwo. Mawu nanɔ efyɔju lɔwo amɛ ci yí E dro.” (Dan. 2:19-21; 4:17) Ejɔ kpɔ yí Yehowa xɔ acɛkpakpa le mɛɖe shi alo yí na acɛ mɛɖea? Aɛ!

12. Na kpɔwɛ ɖeka ci yí dasɛ lé Yehowa ɖe efyɔwo swi le ga ji vayi. (Kpɔ foto lɔ.)

¹² Yehowa dasɛ petii mɔ yeɖo acɛ do “acɛkpakpa gawo” ji. Mìakpɔ kpɔwɛ amɛtɔn. Eʒipti fyɔ Faraɔn sɔ Yehowa mɛwo wa hwashi yí gbe zenɛniɖe mɔ yedatashi wo o. Vɔ Mawu na wokpɔ vovo yí na Faraɔn ci Axu Jin lɔ mɛ yí nu shi yí ku. (Hun. 14:26-28; Eha. 136:15) Babiloni fyɔ Bɛlshasa ɖu azan ɖeka yí “fɔngu do jeŋkwimɛ Tɔhonɔ ji” yí “na kanfukanfu egacuho vojuwo, shika vojuwo” yí gbe Yehowa yɛ ɖɛ. (Dan. 5:22, 23) Vɔ Mawu bubɔ egoyitɔ ŋtɔ́. Le “ezan hunnɔ” mɛɔ, wowu Bɛlshasa yí sɔ fyɔɖuxu lɔ nɔ Mɛdi koɖo Pɛsitɔwo. (Dan. 5:28, 30, 31) Palɛstinu fyɔ Erodi Agripa I wu apotru Ʒaki yí lé apotru Piɛ do gakpa mɛ yí ji mɔ yeawu yɛ can. Vɔ Yehowa ɖo te Erodi yí degbewa enu ci eɖo mɔ yeawa lɔ o. Yehowa “dɔdɔla ɖeka do edɔ̀ yi nu,” yí eku.—Edɔ. 12:1-5, 21-23.

13. Nu kpɔwɛ ɖeka ci yí dasɛ lé Yehowa ɖu acɛkpatɔwo gbɛbɔbɔ ɖeka ji do.

¹³ Yehowa gbedasɛ hɛnnɛ mɔ yeɖo acɛ do acɛkpatɔwo gbɛbɔbɔwo ji. Éwa ahwa do nu nɔ Izraɛliviwo yí na wokpe ji yí ɖu Kanna fyɔ 31 ciwo yí jɔn nu yí wa ahwa koɖo wo ji yí woxɔ texwe sugbɔ le Gbeɖu Nyigban lɔ ji. (Ʒoz. 11:4-6, 20; 12:1, 7, 24) Yehowa gbekpedo Izraɛliviwo nu yí woɖu efyɔ Bɛn Xadadi koɖo Siri cɛkpatɔ 32 buwo ji le ahwa ɖeka mɛ.—1 Efy. 20:1, 26-29.

14-15. (a) Nyi Efyɔ Nabukodonosɔ koɖo Darius nu so Yehowa cɛkpakpa nuɔ? (b) Nyi ehakpatɔ lɔ nu so Yehowa koɖo Yi mɛwo nuɔ?

¹⁴ Yehowa dasɛ yi zenɛniɖe mɔ eye yí nyi Acɛkpatɔ Gangantɔ lɔ. Hwenu ci yí Babiloni Fyɔ Nabukodonosɔ ‘gangan yiɖeki yí mɔ yeɖo ŋsɛn yí gangan,’ vɔ yí desɔ yiɖeki hwe yí nya mɔ Yehowa ɖekɛ yí nyi Mɛ ci woakanfuɔ, Mawu dwi suku. Ci Nabukodonosɔ vaɖo yiɖeki mɛ yí vale nywiɖeɔ, éna “kanfukanfu Mawu Ejiɖaatɔ” yí nya mɔ “[Yehowa] kpacɛ keke sɔyì mavɔ mavɔ.” Énu kpi mɔ: “Amɛ ɖe da tɛnŋ ɖote Yi lɔ̀ ŋsɛntɔnɔ o!” (Dan. 4:30, 33-35) Ci wodo egbejinɔnɔ nɔ Mawu Daniɛli tɔ kpɔ yí Yehowa hwlin le janŋtanwo dumɛ ɖegbɔɔ, Efyɔ Darius nu mɔ: “Mí ɖo a vɔn yí a na bubu Daniɛli Mawu. Daniɛli Mawu nyi Mawu agbu agbu. Mawu li keke sɔyì mavɔ mavɔ! Wo da trɔn Yi fyɔju gbeɖe o. Yi cɛkpakpa da vɔ gbeɖe o.”—Dan. 6:7-10, 19-22, 26, 27.

¹⁵ Ehakpatɔ lɔ nu mɔ: “Tɔhonɔ tɛnŋ sɔ amɛ ɖeka ɖeka nukplamu sɔ trɔ enu gbali. É tɛnŋ trɔn wowo totomɛwo pleŋ.” Énu kpi mɔ: “Amɛ ciwo yí sɔ Tɔhonɔ sɔ ɖo wowo Mawu ɔ, wo cushi nɔ wo sugbɔ. Nyi yí taɖo ɔ? Ðo ɔ, Tɔhonɔ can wo nɔ wo a nyi Yiŋtɔ mɛ veviwo.” (Eha. 33:10, 12) Susu nywi ɖeka ci yí taɖo mìɖo akpɔtɔ anɔ gbeji nɔ Yehowa nɛ!

AHWA KPƐTƐKPƐTƐTƆ

16. Nyi ji mìatɛnŋ akando le “efunkpekpe gangan” lɔ hwenuɔ, yí nyi yí taɖoɔ? (Kpɔ foto lɔ.)

¹⁶ Mìhlɛn nu so enu ci Yehowa wa vayi nu. Vɔ nyi mìaɖo ŋkuvi le majinjinɖe mɛɔ? Mìatɛnŋ akando ji mɔ Yehowa ahwlɛn yi sɛntɔ egbejinɔtɔwo gan le “efunkpekpe gangan” ci yí gbɔgbɔ mɛ. (Mt. 24:21; Dan. 12:1) Áwa cɛ hwenu yí jukɔnwo gbɛbɔbɔ ci yí nyi Gɔgi ci yí so Magɔgi aje mɛ ciwo yí le gbeji nɔ Yehowa ji tamɛsɛnsɛntɔ le xexeɛ pleŋ mɛ. Nɔ jukɔn 193 ciwo yí le Jukɔnwo Xoxoxu Habɔbɔ lɔ mɛ gbebɔ doju can ɔ, wodakpe ji yí awa ahwa koɖo Acɛkpatɔ Gangantɔ lɔ koɖo jeŋkwi mɛ hwakɔn yitɔ lɔ o. Yehowa ɖo gbe mɔ: “Nagangan nyɛɖeki yí ana anyi ŋkɔ amɛ̀ yí nawɛ yí jukɔn sugbɔ ajeshiŋ, eyi woanya mɔ enyɛ yí nyi Yehowa.”—Eze. 38:14-16, 23, NWT; Eha. 46:10.

17. Nyi Bibla nu mɔ yiavajɔ do nyigban ji fyɔwo koɖo mɛ ciwo yí kpɔtɔ le gbeji nɔ Yehowa jiɔ?

¹⁷ Nɔ Gɔgi je Mawu mɛwo jiɔ, eyi adɔ yí Harmagedɔn hwa lɔ atɔ ji yí Yehowa agu “xexemɛ fyɔwo keŋkeŋ.” (Enyɔ. 16:14, 16; 19:19-21) Vɔ, “amɛ nywiwo koɖo amɛ manyi awoxotɔwo a nɔ̀ wowo nyigban ji. Amɛ jɔjɔɛwo a xɔ wowo nyigban yí a nɔ̀ ji.”—Elo. 2:21.

MÌÐO AKPƆTƆ ANƆ GBEJI

18. Nyi Kristotɔ adodwi sugbɔtɔ lɔn faa yí wanɔɔ, yí nyi yí taɖoɔ? (Daniɛli 3:28)

¹⁸ So xwe sugbɔwo keɔ, Kristotɔ adodwi sugbɔ sɔ vovo ci mɛ wole sa avɔn yí sɔ wowo gbe do afɔku mɛ ŋtɔkpu ɖo wolɔn Yehowa mɔ eyi nyi yewo Cɛkpatɔ Gangantɔ. Kristotɔ cɛwo ɖui mɔ yewoakpɔtɔ anɔ gbeji nɔ Yehowa, wole shigbe Ebrevi amɛtɔn ciwo yí kpɔtɔ nɔ gbeji nɔ Acɛkpatɔ Gangantɔ lɔ ci yí hwlɛn wo gan le ezo ci yí bibiɛ sɛnŋsɛnŋɖe mɛ.—Hlɛn Daniɛli 3:28.

19. Nyi ji Yehowa anɔ te do yí aɖo kojo nɔ yi mɛwoɔ, yí nyi mìɖo awa kakayɛɔ?

¹⁹ Ehakpatɔ Davidi ŋwlɛ nu so enu ci yí taɖo ele veviɖe mɔ mìakpɔtɔ anɔ gbeji nɔ Mawu nu yí mɔ: “[Yehowa] a ɖo kojo nɔ amɛwo. Tɔhonɔ ɖo kojo nɔ ŋ. Dasɛ mɔ ŋ nyi amɛ jɔjɔɛ. Dasɛ mɔ ŋ nyi [egbejinɔtɔ].” (Eha. 7:8) Davidi gbeŋwlɛ mɔ: “Nà nɔ egbejinɔnɔ koɖo enujɔjɔɛwawa aglɔn ta nɔŋ.” (Eha. 25:21, NWT) Enunywitɔ ci mìawa le agbe mɛ yí nyi mɔ mìakpɔtɔ anɔ gbeji nɔ Yehowa, mìdeɖo ami egbeji nɔnɔ ni gbeɖe o nɔ ŋɖeŋɖe gbejɔjɔ can. Eyi mìwo can mìatɛnŋ anu shigbe ehakpatɔ lɔ nɛ mɔ: “Amɛ ciwo yí nɔ̀nɔ [gbeji nɔnɔ] jijɔkpɔkpɔ mɛ. Amɛ hunnɔwo kplɔnɔ Tɔhonɔ nukplamuwo do.”—Eha. 119:1.