Amɛyoyu Amɛve Ciwo Yí Vaɖo Edɔjikpɔha Lɔ Mɛ
LE XWESHIAXWE bɔbɔ ci wowa le 5 octobre 2024 mɛɔ, wowa nunɔwoase vevi ɖeka: Wosɔ nɔviŋsu Jody Jedele koɖo Jacob Rumph nɔ woanyi Edɔjikpɔha mɛ tɔ Yehowa Kunuɖetɔwo tɔ. Nɔviŋsu amɛve cɛwo sɛn Yehowa le egbejinɔnɔ mɛ na nɔ hwenu jinjinɖe.
Jody Jedele koɖo ashiɛ Damaris
Woji Nɔviŋsu Jedele le Missouri le États-Unis yí wohin le nyɔnɔnwi lɔ mɛ. Yi xomu lɔ sɔ nyigbanmama ɖeka ci mɛ wodeɖenɔ kunu le ahan gbɔ. Eyi taɖo édonɔ go nɔviŋsu sugbɔ ciwo yí so texwe vovovowo yí vaɖenɔ kunu le nɔ. Lɔnlɔn ci yí le wo mɛ koɖo lé egbe le ju nɔ wo do wadɔ do ji sugbɔ. Éwa ʒinʒindoshimɛ le 15 octobre 1983 hwenu eɖoɖoɔ ɖajɛvi mɛ. Kunuɖegbe yiyi jɔnɔ ji ni eyi taɖo ci éɖegbɔ sukluɔ, étɔ gbeshiagbe mɔɖeɖedɔ lɔ ji le septembre 1989 mɛ.
Hwenu Nɔviŋsu Jedele nyi ɖajɛvihweɔ, yi jilawo kplɔnɔ yɛ koɖo nɔviɛ nyɔnuvi yi Betɛli. Esaɖyiɖyi cɛwo do ŋsɛn ɖevi lɔwo yí woɖui mɔ yewoavawa edɔ le Betɛli gbeɖeka. Eyi wowo amɛve lɔwo vaɖo wowo tajinu lɔ gbɔ. Nɔviŋsu Jedele va Betɛli Wallkill tɔ le septembre 1990 mɛ. Doŋkɔɔ, éwa dɔ le Kɔkɔɛnyinyi Dɔwaxu koɖo Dɔwaxu ci yí Kpɔnɔ Lanmɛsɛnnyɔwo Gbɔ le yiyimɛ.
Le hwehunɔtɔwo mɛɔ, amɛwo vasukɔgbɔ le hamɛ ciwo yí donɔ Espagnol-gbe mɛ yí woʒan nɔviŋsuwo. Eyi taɖo Nɔviŋsu Jedele vayi ci hamɛ lɔwo ɖeka mɛ yi tɔ Espagnol-gbe kplakpla. Le hwenu kleŋ ɖe goduɔ, édo go nɔvinyɔnu Damaris ci yí nyi emɔɖetɔ le ekan ci mɛ ele. Le yiyimɛɔ, woɖe nɔnɔ yí nɔvinyɔnu lɔ va bɔ do nu le Betɛli.
Le 2005 mɛɔ, woso le Betɛli keŋ ayi lebu nɔ wowo jila egbejinɔtɔwo. Le gaŋtɔ́wo mɛɔ, wonyi gbeshiagbe mɔɖetɔwo. Nɔviŋsu Jedele vanyi nukplamɛtɔ nɔ Emɔɖetɔwo Suklu. Égbewa dɔ le Dotoxwe Kacaca Jikpɔgbɛ koɖo Exɔcucudɔ Jikpɔgbɛ ɖeka mɛ.
Le 2013 mɛɔ, wogbetrɔ yí yɔ Nɔviŋsu koɖo Nɔninyɔnu Jedele va Betɛli nɔ woawa edɔ le Warwick xɔcucudɔ mɛ. Le yi goduɔ, wogbevawa dɔ le Patterson koɖo Wallkill. Nɔviŋsu Jedele wa edɔ le Exɔcucu Jikpɔgbɛ LDC tɔ koɖo Dotoxwe nyɔwo dɔwaxu mɛ. Le mars 2023 mɛɔ, wosɔɛ nɔ anyi Sumɔsumɔdɔ Jikpɔgbɛ kpedonutɔ. Ci ebu tamɛ kpɔ so edɔ vovovo ciwo woɖo ni vayi nuɔ, énu mɔ: “Hwenu yí wona edɔ yoyu ɖe eoɔ, étɛnŋ vawa nɔ eo hweɖewonu mɔ edɔ lɔ wugan eo hannɛ. Vɔ gaŋtɔ́ mɛ yí èɖo aɖo ŋwi mɔ yeɖoakando Yehowa ji nɛ, ɖo eyi dɔ yí mìsun ji yí wanɔ edɔ ɖekpokpui ci edɔ mì.”
Jacob Rumph koɖo ashiɛ Inga
Woji Nɔviŋsu Rumph le Californie le États-Unis. Hwenu enyi vihwɛɔ, enɔlɔ mi bɔbɔwo koɖo kunuɖegbe yiyi vɔ étekpɔ yí kplanɔ Bibla mɛ nyɔnɔnwiwo yi. Ahanke le exwe ɖeka mɛ duuɔ, Nɔviŋsu Rumph yi yɔnɔ mamalɔ ci yí nyi Kunuɖetɔ egbejinɔtɔ kpɔ nɛ. Mamalɔ kpedo nu yí esɔ eɖe le nyɔnɔnwi lɔ ji. Ci eɖo exwe 13 ɔ, éji mɔ yeakpla Bibla. Le 27 septembre 1992 ɔ, éwa ʒinʒindoshimɛ hwenu enyi jajɛ. Jijɔ enyi mɔ enɔlɔ trɔ yí tɔ bɔbɔ koɖo kunuɖegbewo yiyi. Gbesɔ kpe niɔ, edalɔ koɖo nɔjijiɛwo wa ŋkɔyiyi yí wa ʒinʒindoshimɛ.
Hwenu Nɔviŋsu Rumph nyi jajɛɔ, ékpɔ lé hanci emɔɖetɔwo kpɔkpɔ jijɔ do. Eyi taɖo ci eyi suklu ɖegbɔɔ, étɔ mɔɖeɖedɔ lɔ ji le septembre 1995 mɛ. Le exwe 2000 mɛɔ, évayi ci Équateur fini eʒan sugbɔ le. Le enɔɔ, édo go Nɔvinyɔnu Inga ci yí nyi emɔɖetɔ ɖeka yí so Canada yí le yiyimɛɔ, woɖe nɔnɔ. Wo koɖo ve lɔwo tɔ́ wowo lɔlele gbe nɔnɔ le Équateur jugan ɖeka ci mɛ yí eŋɛnywidratɔwo gbɛbɔbɔ hwɛhwɛ ɖeka le. Egbɛɔ, évatrɔ hamɛ gangan ɖeka.
Na nɔ exwe sugbɔɔ, wosɔ Nɔviŋsu koɖo Nɔvinyɔnu Rumph nɔ woanyi emɔɖetɔ veviwo. Le yiyimɛɔ, wovatɔ Ekan lɔ mɛ hamɛwo jijikpɔdɔ lɔ wawa. Le 2011 mɛɔ, woyɔ wo nɔ Gileadi suklu klass 132 tɔ lɔ. Ci woxɔ kunuɖewema lɔ ɖegbɔɔ, wowa sumɔsumɔdɔ lɔ le texwe vovovowo nɔ xexe lɔ yí emɔ sugbɔ hun nɔ wo. Wowa sɛnsɛndɔ le Betɛli, wowa ejugoduŋɛnywidradradɔ lɔ yí gbewa ekan lɔ mɛ hamɛwo jijikpɔdɔ lɔ. Emɔ gbehun nɔ Nɔviŋsu Rumph yí enyi nukplamɛtɔ le Fyɔɖuxu Ŋɛnywidratɔwo Sukluwo mɛ.
COVID-19 dɔ̀bamɛ lɔ dɔ yí Nɔviŋsu koɖo Nɔvinyɔnu Rumph trɔyi États-Unis. Woyɔ wo mɔ wo le vawa edɔ le Betɛli Wallkill tɔ. Le nɔɔ, wona kpla Nɔviŋsu Rumph le Sumɔsumɔ Dɔwaxu. Le yiyimɛɔ, woɖo edɔ nɔ Nɔviŋsu Rumph nɔ atrɔ ayi Équateur lɔjedɔwaxu yí anɔ Alɔjedɔjikpɔgbɛ mɛ tɔwo mɛ. Le 2023 mɛɔ, wotrɔ yí yɔ wo mɔ wo le va Warwick. Le janvier 2024 mɛɔ, wosɔ Nɔviŋsu Rumph nɔ anyi Sumɔsumɔdɔ Jikpɔgbɛ kpedonutɔ. Ci ebu tamɛ kpɔ so finiwo yí ewa edɔ le nuɔ, énu mɔ: “Denyi fini mì le yí dɔ edɔ ci mìwanɔ nyi enuvevi o vɔ mɛ ciwo mìwanɔ edɔ koɖo yí dɔ ele veviɖe.”
Mìwo nɔviŋsu edɔsɛnsinwatɔ cɛwo nu jɔnɔ ji nɔ mì sugbɔ, eyi taɖo ‘mína bubu ŋsu vevi cɛwo.’—Fili. 2:29.