ENUKPLAKPLA 10
Lé àwɛ ajeshi sɛnsɛn adodwitɔ lɔɔ?
1. Sɛnsɛn adodwitɔ kuɖeka kpaŋ yí lia?
“Míkpɔ míwo ɖekiwo ji nywiɖe so enyɔnuɖɛtɔ [ŋsukantɔwo] nu.”—MATIE 7:15.
Sɛnsɛnha kuɖeka kpaŋ yí Yesu dasɛ nɔ yi dokplɔtɔwo, eyi nyi sɛnsɛnha adodwitɔ lɔ. Ele shigbe mɔ emɔ ci yí kplɔnɔ amɛ yi agbe mavɔ mɛ hannɛ. Yesu nu mɔ: “Amɛ hwɛɖeka yí kpɔɛni”. (Matie 7:14, nwt) Sɛnsɛnha ci nukplamuwo nɔ te do Bibla ji ɖekɛ kpaŋ ji Mawu dashi do. Kristotɔ adodwiwo pleŋ le ju le xɔse ɖeka mɛ.—Hlɛn Ӡan 4:23, 24; 14:6; Efezitɔwo 4:4, 5.
Kpɔ video ci yí nyi Sɛnsɛnwo pleŋ nu yí jɔnɔ ji nɔ Mawua?
2. Enyɔ ci Yesu nu so Kristotɔ ŋsukantɔwo nuɔ?
“Amɛ lɔwo nu mɔ yewo jeshi Mawu, vɔ enu vwin ciwo yí wowanɔ dasɛ mɔ wodelɔn Mawu o.”—TITU 1:16.
Yesu nu ɖɛ mɔ ŋsunyɔnuɖɛtɔwo ana amɛwo dagbenya mɛ ciwo yí nyi Kristotɔ adodwiwo o. Nɔ wokpɔ woɔ, wonɔnɔ shigbe mɔ Kristotɔ adodwiwo hannɛ. Ahanke wowo cɔciwo nu nɔ mɔ Kristotɔ yewonyi. Ganŋke àtɛnŋ ajeshi mɛ ciwo wonyi ŋtɔŋtɔ. Léɔ? Sɛnsɛn adodwitɔ ɖekɛ yí nanɔ amɛwo nyinɔ Kristotɔ adodwi ciwo yí ɖonɔ nɔnɔmɛ nywiwo yí gbenɔnɔ agbe nywi.—Hlɛn Matie 7:13-23.
3. Lé awɛ ajeshi Kristotɔ adodwiwoɔ?
Kpɔ enu amatɔn ciwo yí donɔ jeshi Kristotɔ adodwiwo ɖa:
Kristotɔ adodwiwo donɔ bubu Bibla nu mɔ yinyi Mawu Nyɔ. Wodonɔ gbla yí nɔnɔ agbe esɔnɔ koɖo yi gɔnmɛɖosewo. Eyi taɖo sɛnsɛnha adodwitɔ to akpo nɔ sɛnsɛnha ciwo yí nɔ te do agbetɔ susuwo ji. (Matie 15:7-9) Kristotɔ adodwiwo nɔnɔ agbe esɔnɔ koɖo enu ciwo yí wokplanɔ amɛwo.—Hlɛn Ӡan 17:17, nwt; 2 Timɔte 3:16, 17.
Yesu dokplɔtɔwo donɔ bubu Mawu ŋkɔ, Yehowa nu. Yesu do bubu Mawu ŋkɔ nu hwecinu yí ena amɛwo jeshii. Ékpedo amɛwo nu wojeshi Mawu, yí gbekpla wo mɔ wo le do gbe ɖaɖa mɔ Mawu ŋkɔ ŋci le kɔ. (Matie 6:9) Sɛnsɛnha ci yí le míwo kɔmɛ yí nanɔ amɛwo jenɔshi Mawu ŋkɔɔ?—Hlɛn Ӡan 17:6; Edɔwawawo 2:21.
Kristotɔ adodwiwo ɖenɔ kunu so Mawu Fyɔɖuxu nu. Mawu sɔ Yesu ɖaɖa mɔ yi le dra Fyɔɖuxu ŋɛnywi lɔ. Mawu Fyɔɖuxu ci yí Yesu nyi Efyɔ nɔ yí nyi emɔkpɔkpɔ adodwi ɖeka kpaŋ nɔ agbetɔwo. Yesu xokɔ nuxu so Fyɔɖuxu lɔ nu keke sɔyi yi kugbe. (Luiki 4:43; 8:1; 23:42, 43) Énu mɔ ye dokplɔtɔwo le ɖe kunu so nu. Nɔ mɛɖe te gogo eo, yí xo nuxu so Mawu Fyɔɖuxu nu nɔ eo ɖe, sɛnsɛnha ci mɛ tɔ yí àmɔ yinyiɔ?—Hlɛn Matie 24:14.
Yesu dokplɔtɔwo denyi xexe vɔn cɛ mɛ kpaxwe ɖe o. Àtɛnŋ ado jeshi wo to lé wodedonɔ nu politiki koɖo jumɛ hwawawawo mɛ o. (Ӡan 17:16; 18:36) Gbesɔ kpe niɔ, wodewanɔ nu alo nɔnɔ agbe shigbe xexe vwin cɛ mɛ tɔwo hannɛ o.—Hlɛn Ӡaki 4:4.
Kristotɔ adodwiwo ɖonɔ lɔnlɔn akun-akun nɔ wowonɔnɔwo. Mawu Nyɔ lɔ kplakpla na yí wolɔnnɔ akɔtawo pleŋ. Ŋsusɛnsɛnhawo donɔ alɔ ahwa ciwo yí jɔnɔ le ejuwo mɛ, vɔ Kristotɔ adodwiwo dewanɔ ahan o. (Mishe 4:1-3) Gbesɔ wuɔ, Kristotɔ adodwiwo zannɔ wowo gamɛ koɖo wowo nunɔamɛshiwo so ji mɛ, yí sɔ kpenɔdo amɛwo nu, yí gbedonɔ ŋsɛn wo.—Hlɛn Ӡan 13:34, 35; 1 Ӡan 4:20.
4. Àtɛnŋ ado jeshi sɛnsɛnha adodwitɔ lɔa?
Sɛnsɛnha ci nukplakplawo pleŋ nɔ te do Mawu Nyɔ ji, yí donɔ bubu Mawu ŋkɔ nu, yí gbeɖenɔ kunu mɔ Mawu Fyɔɖuxu yí nyi emɔkpɔkpɔ adodwitɔ ɖeka kpaŋ nɔ agbetɔwoɔ? Sɛnsɛnha ci yí lɔnnɔ amɛwo yí delɔnnɔ ahwawawaɔ? Sɛnsɛnha ci àyɔɔ?—Hlɛn 1 Ӡan 3:10-12.