Eŋɛnywi ci yí kudo sɛnsɛnhawo nuɔ?

1. Sɛnsɛnhawo pleŋ yí nyɔa?

Ejinywitɔwo le sɛnsɛnhawo pleŋ mɛ. Eŋɛnywi yí enyi mɔ Yehowa kpɔkɔ wo yí gbesɔnɔ eɖe le mɛ nɔ wo. Ewa ŋshishi mɔ sɛnsɛnhawo ŋkɔ mɛ yí wowa tamɛsɛnnu vwin sugbɔ le. (2 Korɛntitɔwo 4:3, 4; 11:13-15, nwt) Shigbe lé enyɔjɔjɔwo danasɛ hannɛɔ, sɛnsɛnhawo sɔ wowoɖekiwo do vɔnvɔndonamɛ nuwanawo, akɔta ɖe koŋ gugu si, ahwawawa koɖo tamɛsɛnnu wawa do ɖeviwo nu mɛ. Kpɔ lé wana cɛwo kunɔ lanmɛ nɔ mɛ ciwo yí xɔ Mawu ji se ɖa!​—Hlɛn Matie 24:3-5, 11, 12.

Sɛnsɛnha adodwitɔ kannɔfu Mawu, vɔ ŋsusɛnsɛnhawo nu dekpenɔ ni o. Wokplanɔ enu ciwo yí dele Bibla mɛ o, wodekplanɔ nyɔnɔnwi ci yí kudo Mawu koɖo amɛ kukuwo nu o. Vɔ Yehowa ji mɔ amɛwo le nya nyɔnɔnwi so ye nu.​—Hlɛn Rɔmatɔwo 6:23; 1 Timɔte 2:3-5.

2. Eŋɛnywi ci yí kudo sɛnsɛnhawo nuɔ?

Jijɔ nyɔ lɔ yí nyi mɔ sɛnsɛnha ciwo yí nunɔ mɔ yewolɔn Mawu, vɔ yí enyi Satana xexe lɔ yí wolɔn ɔ, datɛnŋ able Mawu o. (Ӡaki 4:4) Mawu Nyɔ yɔ ŋsusɛnsɛnhawo mɔ “Babiloni Gangan.” Babiloni nyi ejugan xoxwi ci mɛ ŋsusɛnsɛnhawo je gɔnmɛ so le eshiɖɔɖɔ Nɔwe hwenu tɔ godu. Zaanɖeɔ, Mawu agban sɛnsɛnha ciwo yí blekɔ amɛwo yí gbedokɔ vevisese nɔ wo.​—Hlɛn Enyɔdasɛ 17:1, 2, 5, 16, 17; 18:8.

Eŋɛnywi buwo li. Wowo yí nyi mɔ, Yehowa deŋlɔbe ejinywitɔ ciwo yí kaka do ŋsusɛnsɛnhawo mɛ le xexeɛ mɛ o. Ébɔkɔ wo doju to nyɔnɔnywi lɔ kplakpla wo ji.—Hlɛn Mishe 4:2, 5.

3. Nyi ele mɔ ejinywitɔwo awaɔ?

Yehowa sɔnɔ eɖe le mɛ nɔ mɛ ciwo yí lɔn nyɔnɔnwi koɖo nunywi. Énukɔ nɔ wo veviɖe mɔ wo le to le ŋsusɛnsɛnhawo mɛ. Mɛ ciwo yí lɔn Mawu nɔnɔ gbesɔsɔ mɛ yí trɔnɔ wowo gbenɔnɔ keŋ nɔ wowo nu aje Mawu tɔ ji.—Hlɛn Enyɔdasɛ 18:4.

Le exwe sanŋdi ŋkɔtɔ mɛ, hwecinu yí ejinywitɔwo se eŋɛnywi lɔ so apostolowo gbɔɔ, woxɔɛ koɖo jijɔ. Wokpla agbenɔnɔmɔ yoyu bu so Yehowa gbɔ, agbenɔnɔmɔ ci mɛ jijɔkpɔkpɔ, tajinu koɖo mɔkpɔkpɔ le. Kpɔwɛ nywi ɖeka yí wonyi nɔ mì egbɛ. Ðoɔ woxɔ eŋɛnywi lɔ keŋ yí sɔ Yehowa ɖo ŋkɔ le wowo gbe mɛ.—Hlɛn 1 Tɛsalonikitɔwo 1:8, 9; 2:13.

Yehowa xɔnɔ mɛ ciwo yí to so ŋsusɛnsɛnhawo mɛ do yi sɛntɔwo xomu mɛ. Nɔ èxɔ amɛyɔyɔ Yehowa tɔ cɛɔ, ànyi yi xlɔ yí aɖo xomu yoyu lɔn-amɛ Yehowa sɛntɔwo tɔ mɛ, yí agbekpɔ agbe mavɔ.—Hlɛn Maki 10:29, 30; 2 Korɛntitɔwo 6:17, 18.

4. Lé Mawu avahɛn jijɔ va nyigban ji doɔ?

Kojo ci woaɖo nɔ ŋsusɛnsɛnhawo nyi eŋɛnywi ɖeka. Ana yí xexeɛ pleŋ avo so xaxa mɛ. Wodagbekpɔ ŋsusɛnsɛnhawo able amɛ alo ama agbetɔwo mɛ kpɔ gbeɖe o. Amɛ ciwo pleŋ yí avanɔ agbe asɛn Mawu adodwi ɖeka kpaŋ lɔ doju.—Hlɛn Enyɔdasɛ 18:20, 21; 21:3, 4.