Lé Àwɛ Akpɔ mɛ ci Àɖe

1-2. (a) Nyiwo nu Kristotɔ trɛnnɔwo ɖo abu tamɛ kpɔ so gbɔxwe atɔ mɛɖe jiji mɔ yeaɖeɔ? (b) Woatɔ “mɛɖe jiji” gɔnmɛɖe? (Kpɔ “Enyɔgbewo Gɔnmɛɖeɖe.”)

ÉJI MƆ yealé alɔa? Ci denyi alɔlele yí ana woakpɔ jijɔ le agbe mɛ can ɔ, Kristotɔ trɛnnɔ sugbɔ, jajɛ alo mɛganxoxu jijiɛ mɛ ci woaɖe. Le nyɔnɔwi mɛɔ, gbɔxwe àmɔ yeatɔ zɔnzɔn koɖo mɛɖeɔ, èɖo aɖo kacaca sɛnŋ koɖo Yehowa yí ajeshi eoɖeki ɖɛ nywiɖe, yí ale gbesɔsɔ akpɔ ehonyɔwo koɖo gbɔngbɔnmɛ ʒanwo gbɔ le alɔlele mɛ.a (1 Kor. 7:36) Nɔ ele ahan nɔ eoɔ, àtɛnŋ avakpɔ jijɔ le alɔlele aotɔ mɛ.

² Vɔ, dele fafɛɖe gashiagamɛ mɔ, woakpɔ asu nywi alo nyɔnu nywi aɖe o. (Elo. 31:10) Eyi nɔ èvakpɔ mɛɖe ci yí asɔ koɖo eoɔ, àji mɔ yeajeshi ɖɛ doji, vɔ detɛnŋ nɔnɔ fafɛɖe mɔ woatɔ zɔnzɔn o.b Le nyɔta cɛ mɛɔ, mìaxo nuxu so enu ciwo yí akpedo Kristotɔ trɛnnɔwo nu yí woakpɔ mɛɖe ci yí avanyi nyɔnu nywi alo asu nywi nɔ wo yí woatɔ zɔnzɔn. Mìagbekpɔ lé mɛbu ciwo yí le hamɛ lɔ mɛ atɛnŋ akpedo mɛ ciwo yí ji mɔ yewoalé alɔ nu do.

LÉ ÀWƐ AKPƆ AMƐNYWI AÐE

3. Nyiwo nu Kristotɔ trɛnnɔ ɖe abu tamɛ kpɔ so, nɔ éji mɔ yealé alɔ koɖo mɛɖeɔ?

³ Nɔ èji mɔ yealé alɔɔ, anyɔ mɔ àle ŋkuvi do mɛ ci èji mɔ yeaɖe lɔ nu nywiɖe doŋkɔ gbɔxwe míatɔ zɔnzɔn. Nɔ denyi ahan ɔ, ètɛnŋ vawa afɛn akpɔ mɛ ci yí atɛnŋ avanyi nyɔnu nywi alo asu nywi nɔ eo alo etɛnŋ vatɔ zɔnzɔn koɖo mɛ ci yí desɔ koɖo eo o. Le nyɔnɔnwi mɛɔ, mɛɖekpokpui ci woaji amɔ woaɖe ɖo anyi Kristotɔ ci yí wa ʒinʒindoshimɛ. (1 Kor. 7:39) Vɔ denyi mɛɖekpokpui ci yí waʒinʒindoshimɛ yí átɛnŋ avanyi nyɔnu nywi alo asu nywi nɔ eo o. Eyi taɖo àtɛnŋ abiɔ eoɖeki se mɔ: ‘Nyiwo yí nyi anyi tajinuwo le agbe mɛɔ? Nɔnɔmɛ ciwo ŋkpɔ mɔ yɛle veviɖe mɔ mɛ ci naɖe aɖoɔ? Ŋciwo ŋkpɔkpɔ emɔ nɔ lɔwo le dredrenua?’

4. Nyi mɛɖewo sɔ donɔ wowo gbedoɖawo mɛɔ?

⁴ Nɔ èji mɔ yealé alɔɔ, kankandoji li mɔ, èdo gbe ɖaɖa so nu. (Fili. 4:6) Le nyɔnɔnwi mɛɔ, Yehowa deɖo gbe nɔ mɛɖe mɔ yeani ŋsu alo nyɔnu aɖe o. Vɔ ébukɔ tamɛ kpɔ so ao ʒanwo koɖo lé nuwo wakɔ do nɔ eo nu, yí atɛnŋ akpedo eo nu hwenu yí èjejeɛ agbla mɔ yeakpɔ mɛ ci yeaɖe. Eyi taɖo, kpɔtɔ anukɔ lé enuwo wakɔ do nɔ eo ni. (Eha. 62:8) Do gbe ɖaɖa yí abiɔ jigbɔnɖɛxɔxɔ koɖo nunya. (Ʒaki 1:5) Nɔviŋsu John,c ci yí nyi trɛnnɔ le États-Unis, xo nuxu so enu ciwo yí esɔ donɔ yi gbedoɖawo mɛ nu. Émɔ: “Ŋnu jijɔ ciwo mɛ ci naɖe aɖo, nɔ Yehowa. Ŋdo gbe ɖaɖa mɔ, emɔwo le hun nɔŋ mado go mɛ ci navaɖe. Ŋgbebiɔ Yehowa mɔ le kpedo ŋnu maɖo jijɔ ciwo naɖo yí anyi asu nywi.” Nɔvinyɔnu Tanya, ci yí le Sri Lanka, nu mɔ: “Hwenu ŋjijiɛ mɛ ci naɖeɔ, ŋbiɔ Yehowa mɔ lé kpedo ŋnu nɔ makpɔtɔ anɔ gbeji, aɖo susu nywi yí agbekpɔnɔ jijɔ.” Nɔ dekpɔ amɛnywi ci àɖe kakayɛ can ɔ, Yehowa ɖogbe mɔ yeakpɔtɔ akpɔnɔ ao ʒanwo gbɔ le ŋcilanmɛ koɖo le susu mɛ.—Eha. 55:22.

5. Emɔ ciwo yí hun nɔ Kristotɔ trɛnnɔwo yí woado go koɖo mɛ ciwo yí lɔn Yehowaɔ? (1 Korɛntitɔwo 15:58) (Kpɔ foto lɔ hɛnnɛ.)

⁵ Bibla do ŋsɛn mì mɔ “[mìayi] ŋkɔ doji tɛgbɛɛ le Mawu dɔwawawo mɛ.” (Hlɛn 1 Korɛntitɔwo 15:58.) Nɔ èkpɔtɔ yí wakɔ edɔ sugbɔ le Yehowa sɛnsɛn mɛ yí zanɔ ao gamɛ koɖo nɔviŋsu koɖo nɔvinyɔnu vovovowoɔ, denyi ŋsɛndoamu ɖekɛ yí àxɔ so ejunɔnɔ koɖowo gbɔ o, vɔ emɔ agbehun nɔ eo yí nado go koɖo trɛnnɔ bu ciwo yí le shigbe eo nɛ, ciwo yí sɔ susu ɖo Yehowa sɛnsɛn ji. Yí nɔ ewakɔ ci ji èkpe keŋ nɔ ao nu akpe nɔ Yehowaɔ, àkpɔ jijɔ ŋtɔŋtɔ.

6. Nyi yí ɖo ale susu mɛ nɔ Kristotɔ trɛnnɔ ɖe hwenu éjijiɛ mɛ ci aɖeɔ?

⁶ Vɔ, kpɔ eoɖeki ji nɔ mɛ ci àɖe jiji ŋgbevanyi enuvevitɔ nɔ eo le agbe mɛ o. (Fili. 1:10) Denyi nɔ elé alɔ alo delé o yí adɔ akpɔ jijɔ ŋtɔŋtɔ o, vɔ nɔ èle kacaca nywi mɛ koɖo Yehowa yí adɔ àkpɔ jijɔ. (Mat. 5:3) Eyi hwenu ènyi trɛnnɔɔ, àtɛnŋ akpɔ vovo yí awa sugbɔ doji le kunuɖeɖedɔ lɔ mɛ. (1 Kor. 7:​32, 33) Zan trɛnnɔnɔ hwenu aotɔ lɔ nywiɖe. Nɔvinyɔnu Jessica, ci yí so États-Unis yí ɖo xwe 30 koɖo ŋɖe gbɔxwe valé alɔ nu mɔ: “Hwenu ŋnyi trɛnnɔɔ, ŋwadɔ sugbɔ le kunuɖeɖedɔ lɔ mɛ, yí ecɛ kpedo ŋnu ŋkpɔnɔ jijɔ ci ŋji mɔ naɖe asu can.”

DO ƷINXO A JESHI MƐ CI EJIKƆ AÐE ÐƐ NYWIÐE

7. Nyi yí taɖo mìagbɔnjiɖɛ aglo mɛ ci mìjikɔ avaɖe lɔ kpɔ nywiɖe gbɔxwe yí avayi nu ni mɔ yɛ nu kpe nɔ mìɔ? (Elododo Wema 13:16)

⁷ Nɔ èkpɔ mɔ mɛɖe atɛnŋ anyi nyɔnu nywi alo asu nywi nɔ ye ɖe, èɖo avayi nui nɔ mɛ lɔ zeɖeka amɔ yi nu jɔ ji nɔ yea? Bibla nu mɔ mɛ ci yí nya ŋɖɛ jenɔshi nuwo nywiɖe gbɔxwe wanɔ nu. (Hɛn Elododo Wema 13:16.) Eyi taɖo anyɔ mɔ ale ŋkuvi do mɛ lɔ nu nywiɖe na nɔ hwenu ɖe yí yiŋtɔ danya o, gbɔxwe avayi nu ni mɔ yɛ nu kpe nɔ ye. Aschwin ci yí le Pays-Bas nu mɔ: “Nɔ ètɔ mɛɖe jijiɔ, ŋgbenɔte do lɔnlɔn ci èɖo nɔ mɛ lɔ le gaŋtɔ́ mɛ ɖekɛ ji o, ɖo kpakpa ci yí sɔsɔ eo do mɛ lɔ nu le gaxoxo ŋtɔ́ mɛ atɛnŋ avabu blaŋ.” Gbesɔ kpe niɔ, nɔ èglo mɛ lɔ kpɔ nywiɖeɔ, àtɛnŋ avakpɔɛ mɔ, mɛ ŋtɔ́ davanyi ashi nywi alo asu nywi nɔ ye o.

8. Lé trɛnnɔ ɖe atɛnŋ ale ŋkuvi do mɛ ci ejikɔ avaɖe ɖɛ nu nywiɖe doɔ? (Kpɔ foto lɔ hɛnnɛ.)

⁸ Lé atɛnŋ aglo mɛɖe kpɔ nywiɖe gan yí danya doɔ? Nɔ èyi hamɛ bɔbɔwo alo nɔ mído go do ejunɔnɔ ɖeɔ, àtɛnŋ ado jeshi lé mɛ lɔ le le gbɔngbɔn mɛ do, mɛ ci ŋmɛ enyi koɖo adɛn yitɔ. Miwo yí nyi yi xlɔwoɔ, yí nyiwo nu exonɔ nuxu soɔ? (Luiki 6:45) Tajinu yitɔwo sɔ koɖo kinyɛtɔwoa? Àtɛnŋ axo nuxu koɖo yi hamɛmɛshinshinwo alo Kristotɔ shinshin bu ciwo yí jeshi ɖɛ nywiɖe. (Elo. 20:18) Àtɛnŋ abiɔ wo nɔ woanu mɛ ci ŋmɛ mɛ lɔ nyi nɔ eo koɖo jijɔ ciwo eɖo. (Ruta 2:11) Nɔ èglugluɛ kpɔɔ, ŋgbewɛ nɔ ao nuwanawo adɔ yí axa le yíɖeki mɛ o. Do bubu yi nu, ŋgbesɔ cukaɖa wɛ o yí ajejeɛ agbla gashiagamɛ mɔ yeanya ŋɖekpokpui so nu o, etɛnŋ na yí davo le yíɖeki mɛ o.

9. Gbɔxwe àte gogo mɛɖe ci yí átɛnŋ anyi nyɔnu nywi alo asu nywi nɔ eo ɖe, nyi ji èɖo akandoɔ?

⁹ Keke avaje hwenu yí aglo mɛɖe kpɔ nywiɖe gbɔxwe avayi nu ni mɔ yi nu kpe nɔ yeɔ? Nɔ eɖeblɛ yí vayi xo nuxu nɔ mɛ lɔ blaŋ ɔ, ale shigbe mɔ dèbunɔ tamɛ kpɔ nywiɖe gbɔxwe yí sɔnɔ gbetawo hannɛ. (Elo. 29:20) Nɔ mɛ lɔ kpɔɛ mɔ ye nu jɔ eji nɔ eo, vɔ yí exɔ gamɛ sugbɔ gbɔxwe èvayi gbɔɔ, wotɛnŋ kpɔɛ mɔ deɖeblɛ yí sɔnɔ gbeta o. (Ŋun. 11:4) Ðo ŋwi mɔ gbɔxwe àte gogo mɛɖeɔ, deʒan mɔ akando ji mɔ yeavaɖe mɛ ŋtɔ́ o. Vɔ èɖo akando ji mɔ yele gbesɔsɔ mɔ yealé alɔ, yí mɛ lɔ tɛnŋ nyi nyɔnu nywi alo asu nywi nɔ eo.

10. Nyi èɖo awa nɔ mɛɖe xo jiji nuxu nɔ eo, vɔ yí yi nu dekpe nɔ eoɔ?

¹⁰ Vɔ, nɔ èvado jeshi mɔ, amɛ lɔ ji mɔ yeajeshi yeɖɛ nywiɖe ɖe? Nɔ mɛ lɔ nu dekpe nɔ eoɔ, tekpɔ adasɛ ni gbawlɛɛ to ao nuwanawo mɛ. Danyɔ mɔ àwɛ yí mɛ lɔ abukɔ mɛ yi le mɛ nɔ eo, gan yí denyi ahan yɔ nɛ o.—1 Kor. 10:24; Efe. 4:25.

11. Le eju ciwo mɛ mɛbuwo jinɔ nyɔnu nɔ amɛ le alo wanɔ toto do alɔlele nu nɔ amɛwo le ɖe, nyi yí ɖo anɔ susu mɛ nɔ amɛɔ?

¹¹ Le eju dewo mɛɔ, wokpɔnɔ emɔ mɔ jilawo alo mɛganxoxuwo aji nyɔnu alo asu nɔ wowo mɛ ci yí nyi trɛnnɔ. Le eju buwo mɛɔ, xomu alo exlɔwo yí jinɔ mɛ ci yí trɛnnɔ ɖe aɖe, wowanɔ toto lɔwo yí ŋsu lɔ koɖo nyɔnu lɔ ado go keŋ nɔ wo amɛve lɔwo akpɔ mɔ yewosɔ koɖo yewonɔnɔwo ma. Nɔ womɔ eo le wa toto nɔ amɛ amɛve atɔ zɔnzɔn koɖo wowonɔnɔwo alo alé alɔɔ, sɔ susu ɖo enu ci yí jɔnɔ ji nɔ nyɔnu lɔ koɖo ŋsu lɔ, sɔ kpe nɔ wowo ʒanwo ji. Nɔ èkpɔ mɔ mɛɖe anyi asu nywi alo nyɔnu nywi nɔ ao xlɔ alo ao xomumɛtɔ ɖeɔ, tekpɔ ajeshi mɛ lɔ nywiɖe, ajeshi yi jijɔwo yí vevitɔ yí nyi mɔ àkpɔ mɔ mɛ lɔ le kacaca nywi mɛ koɖo Yehowa ma. Nɔ mɛɖe le kacaca nywi koɖo Yehowaɔ, ele veviɖe sɔwu mɔ, eho ale mɛ lɔ shi yí ese wema alo ényi amɛkpɛnkpin le yi ju mɛ. Vɔ ɖo ŋwi mɔ, nɔviŋsu trɛnnɔ lɔ koɖo nɔvinyɔnu trɛnnɔ lɔwo ŋtɔwo yí avasɔ gbeta kpɛtɛkpɛtɛtɔ lɔ yí amɔ yewoaɖe nɔnɔ alo yewodaɖe nɔnɔ o.—Gal. 6:5.

LÉ ÀTƆ ZƆNZƆN KOÐO MƐÐE DO

12. Nɔ mɛɖe nu jɔ ji nɔ eo yí èji mɔ yeazɔn koɖi ɖe, lé ànui ni doɔ?

¹² Nɔ èji mɔ yeatɔ zɔnzɔn koɖo mɛɖe ɖe, lé àwɛ anu nɔ mɛ lɔ mɔ yɛ nu jɔ ji nɔ ye doɔ?d Àtɛnŋ awa toto keŋ akan seŋ koɖo mɛ lɔ, etɛnŋ nyi fini wogbɔnɔ le le jugbaja alo toto telefonu ji. Nu ni nɔ yi mɛ akɔ ni gbawlɛ mɔ yi nu jɔ ji nɔ eo. (1 Kor. 14:9) Nɔ eʒan ɔ, na gamɛ amɛ lɔ nɔ abu tamɛ kpɔ keŋ gbɔxwe ana ɖoŋci eo. (Elo. 15:28) Nɔ mɛ lɔ deji mɔ yeazɔn koɖo eoɔ, lɔn do nyɔ ci enu ji.

13. Nyí àtɛnŋ awa nɔ mɛɖe nu nɔ eo mɔ ao nu jɔ ji nɔ yeɔ? (Kolosetɔwo 4:6)

¹³ Nɔ mɛɖe nu nɔ eo mɔ ao nu jɔ eji nɔ ye ɖe, amɛ lɔ gbedɔn gbɔxwe yí te gogo eo yí nui eo, eyi taɖo wa nu ɖaɖa gbɔ nywiɖe yí ado bubu yi nu. (Hlɛn Kolosetɔwo 4:6.) Nɔ enyi mɔ eʒan gamɛ yí abu tamɛ kpɔ gbɔxwe anu nɔ mɛ lɔ mɔ yewoatɔ zɔnzɔn ɔ, na nu ahan ni. Vɔ tekpɔ nɔ ŋgbe jinjin gbɔxwe na nui nɔ mɛ lɔ o. (Elo. 13:12) Nɔ dele mɛ nɔ eoɔ, sɔ xomɛfafa adre mɛ ni gbawlɛ. Kpɔ lé nɔviŋsu ɖeka wa nu do hwenu yí nɔvinyɔnu ɖeka te gogui yí nu yi jimɛnyɔwo ni ɖa. Énu mɔ: “Ŋkan seŋ koɖi yí sɔ xomɛfafa nu gbeta ci ŋsɔ ni yí yi mɛ kɔ ni petii. Ŋdeji mɔ, ákpɔkpɔ emɔ mɔ gbeɖeka mìavatɔ zɔnzɔn o. Eyi taɖo ŋgbekpɔ nyɛɖeki ji nɔ ŋgbebui mɔ navatrɔ anyi susu o.” Le akpa bu jiɔ, nɔ èji mɔ yeajeshi mɛɖe ɖɛ nywiɖe dojiɔ, nui ni nɔ míakan seŋ so nu doju yí míanu ŋciwo mídrɔdrɔ mɔ míawa hwenu yí míjijiɛ nɔnɔ. Ŋciwo èdrɔdrɔ mɔ yeawa lɔwo tɛnŋ to akpo nɔ ao kpena tɔ, sɔ kuso akɔta ci mɛ èso koɖo nubuwo yí dɔ enyi ahan.

LÉ MƐBUWO ATƐNŊ AKPEDO KRISTOTƆ TRƐNNƆWO NU DOƆ?

14. Lé mìatɛnŋ ato nyɔ ciwo mìnunɔ ji keŋ asɔ kpedo Kristotɔ trɛnnɔwo nu doɔ?

¹⁴ Lé mìwo pleŋ atɛnŋ akpedo Kristotɔ trɛnnɔ ciwo yí jikɔ alé alɔ nu doɔ? Emɔ ɖeka yí nyi mìakpɔ mìwoɖekiwo ji le enyɔ ciwo mìnunɔ nu. (Efe. 4:29) Mìatɛnŋ abiɔ mìwoɖekiwo se mɔ: ‘Ŋjinɔ ege le mɛ ciwo yí ji mɔ yewoalé alɔ nua? Nɔ ŋkpɔ nɔviŋsu trɛnnɔ ɖe koɖo nɔvinyɔnu trɛnnɔ ɖe xokɔ nuxu ɖe, ŋnunɔ le nyɛɖeki mɛ mɔ wojikɔ wowonɔnɔwe yɔa?’ (1 Tim. 5:13) Gbesɔ kpe niɔ, mìdeɖo awa ŋɖe yí Kristotɔ trɛnnɔ ɖe akpɔɛ mɔ ŋɖe hwete do ye ci yedele alɔ o. Hans, ci nu mìxo nuxu so vayi nu mɔ: “Nɔvi ɖewo nunɔ mɔ, ‘Nyi yí taɖo dekpɔ ɖe nyɔnuɔ? Égbenyi vihwɛ ba?’ Enyɔ ŋtɔ́wo nunu ana yí trɛnnɔwo akpɔɛ mɔ yewo nu degbekpekɔ nɔ amɛwo o yí ecɛ tɛnŋ gbeʒin wo ji yí woatɔ bubuikpɔ mɔ yewoalé alɔ.” Anyɔ sugbɔ sɔwu mɔ mìaji emɔ ciwo ji mìato akannɔfu Kristotɔ trɛnnɔwo!—1 Tɛs. 5:11.

15. (a) Sɔgbe koɖo Rɔmatɔwo 15:2 ɖe, nyi mìɖo abu kpɔ keŋ gbɔxwe akpedo mɛɖe nu nɔ akpɔ mɛ ci aɖeɔ? (Kpɔ foto lɔ hɛnnɛ.) (b) Enuvevi ci èkpɔ le video lɔ mɛɔ?

¹⁵ Vɔ nɔ èkpɔɛ mɔ nɔviŋsu ɖe koɖo nɔvinyɔnu ɖe atɛnŋ avanyi asu koɖo ashi nywi ɖe? Bibla nu nɔ mì mɔ, mìwo le kpɔ do lé nu wanɔ do nɔ mɛbuwo. (Hlɛn Rɔmatɔwo 15:2.) Trɛnnɔ sugbɔwo dejinɔ mɔ, mɛbuwo adasɛ mɛ ci yewoaɖe nɔ yewo o, yí mìɖo ado bubu wowo gbetasɔsɔwo nu. (2 Tɛs. 3:11) Etɛnŋ jɔ eji nɔ mɛɖewo mɔ wo le kpedo yewo nu, vɔ mìdeɖo awɛ nɔ wodebiɔ mì o.e (Elo. 3:27) Trɛnnɔ ɖewo dejinɔ mɔ woaxo nuxu so mɛɖe nu nɔ yewo tiin o. Nɔvinyɔnu trɛnnɔ Lydia, ci yí le Allemagne nu mɔ: “Àtɛnŋ asɔ nɔviŋsu koɖo nɔvinyɔnu lɔwo do gbɛbɔbɔ gangan ɖe mɛ yí ahun emɔ nɔ nɔviŋsu koɖo nɔvinyɔnu lɔwo kpoŋ nɔ wowoŋtɔwo asɔ gbeta so ŋci woji mɔ yewoawa nu.”

16. Nyi yí Kristotɔ trɛnnɔwo ɖo aɖonɔ ŋwiɔ?

¹⁶ Mìwo pleŋ trɛnnɔwo alo mɛ ciwo yí lé alɔwo can atɛnŋ akpɔ jijɔ le agbe mɛ! (Eha. 128:1) Eyi taɖo nɔ eji mɔ yeaɖe asu alo nyɔnu yí dekpɔ kpɔ mɛɖe hɔɖoɔ, tekpɔ akpɔtɔ asɔ susu sɔ ɖo Yehowa sɛnsɛn ji. Nɔvinyɔnu Sin Yi ci yí so Macao nu mɔ: “Sɔ hwenu ci yí àsɔ nɔ ju koɖo mɛ ci èɖe le paradiso mɛ, sɔ sɔ koɖo hwenu kankin ci enyi trɛnnɔ. Zan hwenu vevi cɛ nywiɖe.” Vɔ nɔ èkpɔ mɛ ci yí avanyi asuo alo ashio yí míwo koɖo yɛ tɔ zɔnzɔn vɔ ɖe? Nyɔta ci yí akplɔ cɛ do axo nuxu so lé nɔnɔjiji hwenu ŋtɔ́ akpedo eo nu natɛnŋ asɔ gbeta nywiwo.