Yehowa Ji Mɔ Amɛshiamɛ Le Trɔ Ji Mɛ

1. Nɔ womɔ jimɛtrɔtrɔ ɖe, nyi elɔ do mɛɔ?

NƆ MÌWA nuvɔn ɖeɔ, éle veviɖe mɔ mìatrɔ ji mɛ. Le Bibla mɛɔ, nɔ mɛɖe trɔ ji mɛɔ, nuvɔn ci ewa lɔ venɔ nu, yí eminɔ enu lɔ wawa, keŋ aɖui mɔ yedagbevawɛ ke o.—Kpɔ Enyɔ ciwo yí le vɔvɔnu, “Jimɛtrɔtrɔ.”

2. Nyi yí taɖo mì pleŋ ɖo akpla nu so jimɛtrɔtrɔ nuɔ? (Nexemi 8:9-11)

² Mɛɖekpokpui ci yí le agbe ɖo akpla nu so jimɛtrɔtrɔ nu. Nyi yí taɖoɔ? Ðo mì pleŋ wanɔ nuvɔn gbeɖeka duu. Ci mìnyi Adamu koɖo Ɛva jijimɛviwoɔ, mìwo domɛtɔ ɖekaɖeka ɖu nuvɔn koɖo eku cinɔ. (Rɔm. 3:23; 5:12) Detefla mɛɖe o. Ŋsu ciwo yí ɖo xɔse sɛnŋsɛnŋ ŋtɔkpu can, shigbe apotru Pɔlu nɛ, do gbla koɖo nuvɔn. (Rɔm. 7:21-24) Ecɛ dasɛ mɔ gashiagamɛ yí mìwo nu ɖo asadɔnu nɔ mìwoɖeki do mìwo nuvɔnwo ŋcia? Oo, Yehowa kunɔ ŋshishi nɔ amɛ yí ji mɔ mìwo le kpɔnɔ jijɔ. Kpɔ ŋci mɛ Ʒwifuwo to le Nexemi hwenu. (Hlɛn Nexemi 8:9-11.) Yehowa deji mɔ woasekɔ vevi gbɛmɛgbɛmɛ do wowo nuvɔn ciwo wowa vayi ŋci o, vɔ éji mɔ woakpɔnɔ jijɔ le ye sɛnsɛn mɛ. Yehowa nya mɔ jimɛtrɔtrɔ hɛnnɔ jijɔkpɔkpɔ va. Eyi taɖo ekplakɔ nu mì so nu. Nɔ mìtrɔ ji mɛ so mìwo nuvɔnwo mɛɔ, mìatɛnŋ akando ji mɔ mìwo Da ŋshishikunɔamɛtɔ lɔ asɔ nu ke mì.

3. Nyi nu mìaxo nuxu so le nyɔta cɛ mɛɔ?

³ Mìagbekpla nubuwo doji so jimɛtrɔtrɔ nu. Le nyɔta cɛ mɛɔ, mìakpɔ akpaxwe amɛtɔn ni. Ŋkɔtɔ, mìakpɔ ŋci Yehowa kpla Izraɛliviwo so jimɛtrɔtrɔ nu. Yi goduɔ, mìaxo nuxu so lé Yehowa kpedo nuvɔnwatɔwo nu do nɔ woatrɔ ji mɛ. Vɔvɔnuɔ, mìakan seŋ so ŋci Yesu dokplɔtɔwo kpla so jimɛtrɔtrɔ nu.

ŊCI YEHOWA KPLA IZRAƐLIVIWO SO JIMƐTRƆTRƆ NU

4. Nyi Yehowa kpla Izraɛli jukɔn lɔ so jimɛtrɔtrɔ nuɔ?

⁴ Hwenu yí Yehowa wa toto nɔ Izraɛliviwo yí wonyi jukɔn ɔ, éwa enublabla koɖo wo yí na yi sewo wo. Nɔ wowa do yi sewo jiɔ, aglɔn ta nɔ wo yí acu shi nɔ wo. Éna kankandoji wo so ese lɔwo nu yí mɔ: “Enuɖoɖo ci ŋna mí egbɛ denyi enu sɛnŋ nɔ mí o. De jinjin le mí gbɔ o.” (2 Ese. 30:​11, 16) Vɔ nɔ wofɔn gu do Yehowa nu, le kpɔwɛ mɛ, yí ɖui mɔ yewoasɛn ŋsu mawuwoɔ, dagbecu shi nɔ wo o yí woakpe fun. Vɔ, ecɛ dedasɛ mɔ Yehowa atashi wo keŋkeŋ o. Woatɛnŋ “a trɔ va Tɔhonɔ [wowo] Mawu gbɔ, yí a wa do yi nuɖoɖowo ji.” (2 Ese. 30:​1-3, 17-20) Nɔ mìatrɔ anuiɔ, woatɛnŋ atrɔ ji mɛ. Nɔ wowɛ ahan ɔ, Yehowa ate gogo wo yí acu shi nɔ wo.

5. Lé Yehowa dasɛ mɔ ye jukɔn nu decikɔ nɔ ye doɔ? (2 Efyɔwo 17:​13, 14)

⁵ Yehowa jukɔn lɔ fɔnnɔ gu do ji gbɛmɛgbɛmɛ. Sɔ kpe nɔ voju ciwo sɛnkɔ wo leɔ, wogbewanɔ enu dakpu buwo. Ecɛ dɔ yí wokpe fun. Vɔ wowo nu deci kɔ nɔ Yehowa o. Édɔ enyɔnuɖɛtɔwo ɖaɖa wo zenɛniɖe yí do ŋsɛn wo mɔ wo le trɔ ji mɛ yí atrɔva ye gbɔ.—Hlɛn 2 Efyɔwo 17:13, 14.

6. Lé Yehowa zan nyɔnuɖɛtɔwo yí sɔ kpla nu yi jukɔn do so ŋci yí taɖo jimɛtrɔtrɔ le veviɖe nuɔ? (Kpɔ foto lɔ hɛnnɛ.)

⁶ Yehowa zannɔ yi nyɔnuɖɛtɔwo yí sɔ kannɔxle yi jukɔn lɔ yí gbegbenɔ nyɔ nɔ wo. Le kpɔwɛ mɛ, Mawu nu to Ʒeremi ji mɔ: “Oo Izraɛli tonumasetɔ trɔva. . . Ŋdagbedo dɔmɛzi do mí ke o, ɖo egbejinɔtɔ yí ŋnyi, . . . Ŋdakpɔtɔ ale dɔmɛzi ji keke asɔyi mavɔ o. Ŋɖeka ci ŋbiɔbiɔ eo yí nyi mɔ naxɔ gbe amɔ yewu hwɛ, ɖo èfɔn gu do [Yehowa] ji” (Ʒer. 3:​12, 13, NWT) Yehowa to Ʒoɛli ji yí nu mɔ: “Mítrɔva ŋgbɔ koɖo míwo jiwo pleŋ.” (Ʒoɛli 2:​12, 13, NWT) Éto Ezai ji yí nu mɔ: “Mí klɔ míwoɖekiwo yí a mɛ. Mí ɖo te enu vɔn ciwo yí mí wanɔ. Ŋ de ji a kpɔ enu vɔn hunnɔwo o.” (Ezai 1:​16-19) Eyi to Ezekiɛli jiɔ, Yehowa nu mɔ: “Ŋ de dro mɔ amɛ vɔnwo a ku o. . . Ŋ dro mɔ wo a ɖɔli wowo dɛnwo yí a tɛnŋ a nɔ̀ agbe. Ŋ da dro mɔ Na wu mí o, . . . mí trɔ va yí a nɔ̀ agbe.” (Ezek. 18:23, 32) Nɔ Yehowa kpɔ yí yi mɛwo trɔ ji mɛɔ, ejɔnɔ ji ni, ɖo éji mɔ woakpɔtɔ anɔ agbe tɛgbɛɛ! Eyi taɖo Yehowa denɔ te kpoŋ nɔ mɛ ci yí wa nuvɔn lɔ awa trɔtrɔ keŋ gbɔxwe akpedo nu o. Mìagbekpɔ kpɔwɛ ɖewo so nyɔ cɛ nu.

7. Nyi Yehowa kpla yi jukɔn ci ezan enyɔnuɖɛtɔ Oze koɖo ashiɛ xolɔlɔɔ?

⁷ Do jeshi ŋci Yehowa zan yí sɔ kpla nu yi jukɔn. Ézan enyɔnuɖɛtɔ Oze koɖo ashiɛ Gomɛ kpɔwɛ. Ci Gomɛ wa hashiɔ, éso gbeɖe Oze ɖɛ yí vayi ci ŋsu buwo gbɔ. Jimɛtrɔtrɔ gluia? Yehowa ci yí kpɔnɔ jiwo mɛ nu nɔ Oze mɔ: “[Gbetrɔ alɔn nyɔnu ci yí ŋsu bu lɔn yí ele hashi wakɔ.] Tɔhonɔ kpɔtɔ lɔn Izraɛlitɔwo. Vɔ wo kpɔtɔ sɛnnɔ vojuwo.” (Oze 3:1; Elo. 16:2) Do jeshi mɔ Oze ashiɛ kpɔtɔ le nuvɔn gangan wakɔ. Éle ahan gan, Yehowa nu nɔ Oze mɔ yɛ le yi kplɔɛ gbɛ, asɔ ki keŋ nɔ woawa fafa.a Ahanke Jukɔn tonumasetɔ lɔ nu decikɔ nɔ Yehowa nɛ. Ci wokpɔtɔ le nuvɔn ganganwo wakɔ can ɔ, ékpɔtɔ lɔn wo yí kpɔtɔ yí yɔkɔ wo mɔ wo le va ye gbɔ nɔ yeakpedo wo nu nɔ woatrɔ ji mɛ yí atrɔ wowo dɛnwo. Kpɔwɛ cɛ dadasɛ mɔ, Yehowa, mɛ ci yí kpɔnɔ jiwo mɛ ayɔ mɛɖekamɛɖeka ci yí kpɔtɔ le nuvɔn gangan wakɔ yí aje agbla mɔ atrɔ ji mɛa? (Elo. 17:3) Mìakpɔ ɖoŋci lɔ.

LÉ YEHOWA KPEDO NUVƆNWATƆWO NU DO NƆ WOATRƆ JI MƐ

8. Lé Yehowa kpedo Kayɛn nu do nɔ atrɔ ji mɛɔ? (Gɔnmɛjeje 4:3-7) (Kpɔ foto lɔ hɛnnɛ.)

⁸ Kayɛn yí nyi evi ŋkɔtɔ nɔ Adamu and Ɛva. Éɖu nuvɔn cinɔ so yi jilawo gbɔ.Gbesɔ kpe niɔ, Bibla nu so nu mɔ: “Wana yitɔwo nyi evwinwo.” (1 Ʒan 3:12) Taŋfuin ŋtɔ́ dre ŋci yí taɖo Yehowa “de xɔ Kayɛn koɖo yi vɔnsa o” hwenu yí ewa vɔnsa ni. Nɔ anyɔ saɔ, átrɔ yi nɔnɔmɛ lɔ, vɔ “Kayɛn xa le yiɖeki mɛ yí etɔ dɔmɛzi dodo sugbɔ.” Nyi Yehowa wa kplɔɛdoɔ? Éxo nuxu nɔ Kayɛn. (Hlɛn Gɔnmɛjeje 4:3-7.) Do jeshi mɔ Yehowa sɔ lɔnlɔn yí kpla nu Kayɛn yí na emɔkpɔkpɔ bu yi yí gbekanxli mɔ yeavawa nuvɔn nɔ ékpɔtɔ le dɔmɛzi ji. Esadɔnu mɔ, Kayɛn gbe mɔ yedaɖo to Yehowa o. Dena emɔ Yehowa nɔ akpedo nu keŋ nɔ atrɔ ji mɛ o. Ci Kayɛn desɔ ɖe le nyɔ ŋnɔwo ji can ɖe, Yehowa sɔ gbeta mɔ yeami kpekpedo nuvɔnmɛ buwo nu nɔ woatrɔ ji mɛa? Kpɔ gbeɖe go!

9. Lé Yehowa kpedo Davidi nu do yí etrɔ ji mɛɔ?

⁹ Yehowa lɔn Efyɔ Davidi haan. É yɔɛ ŋtɔkpu can mɔ “ŋsu ci Ŋ lɔn.” (Edɔ. 13:22) Vɔ Davidi vawa nuvɔn ganganwo, hashiwawa koɖo amɛwuwu can le mɛ. Sɔgbe koɖo Moizi se lɔɔ, woɖo awu Davidi.b (1 Ese. 20:10; Amh. 35:31) Vɔ Yehowa ji mɔ yeakpedo nu nɔ atrɔ ji mɛ. Édɔ enyɔnuɖɛtɔ Natan ɖaɖa nɔ avaji Efyɔ lɔ kpɔ, ci Davidi dedasɛ jimɛtrɔtrɔ jeshidu ɖekɛ can. Natan na kpɔwɛ ɖeka yí sɔ kpedo Davidi nu nɔ amɔŋje lé nuvɔn ciwo ewa gangan do. Ecɛ wadɔ do Davidi ji sugbɔ yí etrɔ ji mɛ. (2 Sam. 12:​1-14) Éŋwlɛ hajiji ɖeka ci yí dasɛ lé nuvɔn ciwo ewa ve ni sugbɔ do. (Eha. 51, Tamɛnuŋwlɛŋwlɛwo) Ehajiji ŋtɔ́ fa akɔn nɔ nuvɔnwatɔ ciwo yí do mahlɛn yí ekpedo wo nu wotrɔ ji mɛ. De jɔ ji nɔ mì mɔ Yehowa sɔ lɔnlɔn yí kpedo yi sɛntɔ Davidi ci elɔn yí etrɔ ji mɛ ba?

10. Lé ewa nɔ eo ci ènya mɔ Yehowa xɔnɔ jigbɔnɖɛ nɔ mì yí sɔ nu kenɔ mìɔ?

¹⁰ Yehowa gbe nuvɔn yí delɔn do eɖekpokpui ji o. (Eha. 5:​4, 5) Vɔ, énya mɔ mì pleŋ nyi nuvɔnmɛwo, yí ci eɖo lɔnlɔn nɔ mìɔ, éji mɔ yeakpedo mì nu mìawa ahwa koɖo nuvɔn. Éjenɔ agbla gashiagamɛ mɔ yeakpedo mɛ ciwo yí wa nuvɔn kpotuwo nu nɔ woatrɔ ji mɛ keŋ ate gogo ye. Éfa akɔn nɔ mì sugbɔ ci mìnya ahan! Nɔ mìbubuɔ tamɛ kpɔ so jigbɔnɖɛxɔxɔ Yehowa tɔ koɖo enusɔkeamɛ yitɔ nuɔ, ana yí mìaɖui akpɔtɔ anɔ gbeji ni yí aɖeblɛ atrɔ ji mɛ nɔ mìwa nuvɔn. Ecɛyɛ mìakpɔ nubu ciwo Yesu kpla yi dokplɔtɔwo so jimɛtrɔtrɔ nu.

ENU CI YESU DOKPLƆTƆWO KPLA SO JIMƐTRƆTRƆ NU

11-12. Nyi Yesu kpla amɛwo so enusɔkeamɛ Eda lɔ tɔ nuɔ? (Kpɔ foto ci yí lɔ ji.)

¹¹ Le exwe sanŋdi ŋkɔtɔ mɛ K.H.ɔ, hwenu lɔ vaɖo yí Mɛsia lɔ ava. Shigbe lé mìnui le nyɔta ci yí vayi mɛɔ, Yehowa zan Ʒan Amɛʒindoshimɛtɔ koɖo Yesu yí wokpla lé jimɛtrɔtrɔ le veviɖe do.—Mt. 3:1, 2; 4:17.

¹² Le yi kunuɖeɖedɔ lɔ mɛɔ, Yesu kpla nu yi toɖotɔwo so lé Edalɔ sɔ enu kenɔ amɛ do. Yesu zan evibubu labalu lɔ yí sɔ kpla enuvevi cɛ amɛwo. Nanɔ hwenu ɖeɔ, ɖajɛvi ŋtɔ́ so le axomɛ yí wa enubaɖawo. Vɔ ci eva “yi yiɖekimɛ kpɔɔ,” étrɔ gbɔ va axomɛ. Lé Edalɔ wanu doɔ? Yesu nu mɔ “gayimɛ de kpɔ yí ɖo gbɔɔ, edalɔ kpɔɛ, yí e ku ŋshishi ni sugbɔ. É lɔ ju yì evi lɔ gbɔ yí kpla ashi ekɔ ni yí kishi ni.” Ðevi lɔ drɔdrɔɛ mɔ yeabiɔ ye daye se mɔ yeatɛnŋ anyi yi dɔwavi ma, vɔ edalɔ yɔɛ mɔ “anyi vi” yí gbetrɔ yí xɔɛ do yi xomu lɔ mɛ. Vida lɔ nu mɔ: “É bu sa, vɔ, wo kpɔɛ.” (Luiki 15:​11-32) Hwenu Yesu le jeŋkwi mɛ yí dekpɔva nyigban jiɔ, kankandoji li mɔ ékpɔ Dalɔ yí ese vevi do nuvɔnwatɔ sugbɔ ciwo yí trɔ ji mɛ nu. Labalu cɛ ci Yesu zan defa akɔn nɔ mì yí dasɛ lé mìwo Da Yehowa nyi ŋshishikunɔamɛtɔ do ba?

13-14. Nyi apotru Piɛ kpla mì so jimɛtrɔtrɔ nuɔ, yí nyi ekpla mɛbuwo so nuɔ? (Kpɔ foto lɔ hɛnnɛ.)

¹³ Apotru Piɛ kpla enuvevi ɖeka le Yesu gbɔ so jimɛtrɔtrɔ koɖo sɔsɔke nu. Blaŋblaŋ ɔ, éʒan mɔ woasɔ nu sɔ kenɔ Piɛ yí Yesu lɔn faa yí sɔ nu sɔ ki. Le kpɔwɛ mɛ, ci Piɛ gbe mɔ yedejeshi ye Xwetɔ zetɔn ɖegbɔɔ, édo hwɛ yiɖeki sugbɔ. (Mt. 26:​34, 35, 69-75) Vɔ, ci Yesu fɔn so ku goduɔ, édasɛ yiɖeki nɔ Piɛ Taŋfuin hwenu ele yiɖekɛ. (Luiki 24:​33, 34; 1 Kor. 15:​3-5) Kankandojitɔ le gaŋtɔ́ mɛɔ, Yesu lɔn faa yí sɔ nu ki, yí do ŋsɛn apotru yitɔ ci yí trɔ ji mɛ lɔ.—Kpɔ Maki 16:7 Koɖo gɔnmɛnuŋwlɛŋwlɛ Bibla nukplakplatɔ “koɖo Piɛ.”

¹⁴ Ci Piɛ vamɔŋje jimɛtrɔtrɔ koɖo enusɔkeamɛ nywiɖe hɔntɔn ɔ, étɛnŋ sunji yí kpla nu mɛbuwo so nu. Hweɖekanu le pantekoti xweɖuɖu goduɔ, Piɛ xo nuxu nɔ amɛahwa ciwo yí nyi Ʒuifu maxɔsetɔwo yí ɖe mɛ nɔ wo mɔ wowo yí wu Mɛsia lɔ. Vɔ, ésɔ lɔnlɔn do ŋsɛn wo mɔ: “Eyi taɖo mítrɔ ji mɛ yí atrɔ, nɔ woacucu míwo nuvɔnwo, nɔ akɔnfanɔamɛ hwenuwo ava so Yehowa ŋtɔ gbɔ nɔ mí.” (Edɔ. 3:​14, 15, 17, 19, NWT) Piɛ dasɛ mɔ jimɛtrɔtrɔ yí dɔ yí nuvɔnwatɔ ɖe wanɔ trɔtrɔwo. Ecɛ dasɛ mɔ atrɔ enudɔndɔn ciwo ebunɔ kpɔ yí wanɔ keŋ yí atɔ enu ciwo yí akpe nɔ Mawu wawa. Apotru lɔ gbedasɛ mɔ Yehowa acucu wowo nuvɔnwo yí aɖe wo sui keŋkeŋ. Yí le xwe sugbɔ goduɔ, Piɛ na kankandoji Kristotɔwo mɔ: “[Yehowa]. . . xɔxɔ jigbɔnɖɛ do míwo ŋci, ɖo Dé jiji mɔ amɛ ɖe a trɔn o, vɔ, É jiji mɔ amɛshamɛ a trɔjimɛ.” (2 Piɛ 3:9) Mɔkpɔkpɔ nywi ɖeka yí anyi nɔ Kristotɔwo nɔ wowa nuvɔnwo, nɔ egbenyi nuvɔn ganganwo yɔ can!

15-16. (a) Lé apotru Pɔlu kpla nu so enusɔkeamɛ nu doɔ? (1 Timɔte 1:12-15) (b) Nyi nu mìaxo nuxu so le nyɔta ci yí gbɔgbɔ mɛɔ?

¹⁵ Mɛ ciwo yí ʒan jimɛtrɔtrɔ koɖo enusɔkeamɛ sɔwu Pɔlu ci yí so Tarsis de sugbɔ o. Éci yumɛ nɔ Kristo dokplɔtɔwo tamɛsɛnsɛntɔ. Taŋfuin Kristotɔ sugbɔtɔ kpɔɛ mɔ ɖewaxu degbeli ni o, yí mɔkpɔkpɔ ɖe deli mɔ atrɔ ji mɛ o. Vɔ lé Yesu ci yí fɔn so ku kpɔnɔ nuwo do, to akpo nɔ agbetɔ nuvɔnmɛwo tɔ. Yɛ koɖo Dalɔ kpɔ nɔnɔmɛ nywiwo le Pɔlu mɛ. Yesu nu mɔ: “Ŋ can ŋsu cɛ mɔ yi a nyí anyi dɔwanu.” (Edɔ. 9:15) Ŋtɔkpu can ɔ, Yesu wa enujiŋ ɖeka yí sɔ kpedo Pɔlu nu nɔ atrɔ ji mɛ. (Edɔ. 7:58–8:3; 9:​1-9, 17-20) Ci Sɔlu vanyi Kristotɔɔ, wovayɔɛ le yiyimɛ mɔ apotru Pɔlu. Blaŋblaŋ ɔ, édanasɛ mɔ xomɛvu ci wowa nɔ ye koɖo ŋshishi ci woku nɔ ye jeŋ nɔ ye. (Hlɛn 1 Timɔte 1:12-15.) Enu lɔ jeŋ ni yí enu mɔ: “Mawu wa xomɛvu sugbɔ nɔ mí. Yí É xɔ jigbɔnɖɛ nɔ mí. É le te kpɔ mí nɔ míatrɔ adɛn.”—Rɔm. 2:4.

¹⁶ Hwenu yí Pɔlu se gbɔdɔndɔn masɔkoɖose nyɔ sɛnŋ ci yí jɔ le Korɛnti hamɛ lɔ mɛ ɖe lé ekpɔ nyɔ lɔ gbɔ doɔ? Lé ekpɔ gbɔ do kpla enuvevi ɖeka mì so lé Yehowa sɔ lɔnlɔn dɔnnɔ to nɔ amɛ koɖo enu ci yí taɖo ele veviɖe mɔ woaku ŋshishi nɔ amɛ. Mìaxo nuxo so exolɔlɔ cɛ nu le nyɔta ci yí gbɔgbɔ mɛ.