Xɔ Gbe do Yehowa Sɔsɔke ji

1-2. Nyɔna ci nuvɔnwatɔ ciwo yí trɔ ji mɛ atɛnŋ akpɔɔ? (Gbekpɔakpa lɔ ji.)

EFYƆ Davidi nya lé nuvɔn ciwo mɛɖe wa vayi na yí edonɔ ehwɛ yiɖeki do. (Eha. 40:12; 51:3; tamɛnuŋwlɛŋwlɛ) Éwa nuvɔn gangan ɖewo le yi gbe mɛ. Vɔ, étrɔ ji mɛ ŋtɔŋtɔ yí Yehowa sɔ ki. (2 Sam.12:13) Ecɛ dɔ yí Davidi mɔŋje lé ewanɔ nywi nɔ amɛ do nɔ Yehowa sɔ enu ke amɛ.—Eha. 32:1.

² Shigbe Davidi nɛɔ, mìwo can mìatɛnŋ akpɔ jijɔ ci wokpɔnɔ nɔ woxɔ ŋshishikuku Yehowa tɔ. Nɔ mìwa nuvɔn ganganwo can ɔ, mìnya mɔ Yehowa le gbesɔsɔ yí asɔ ke mì, nɔ mìtrɔ ji mɛ ŋtɔŋtɔ, hun mìwo nuvɔnwo mɛ yí wa ci ji mìkpe yí mìdegbewa wo ke o. Ecɛ fa kɔn nɔ mì sugbɔ! (Elo. 28:13; Edɔ. 26:20; 1 Ʒan 1:9) Ci mìnya mɔ Yehowa sɔ enu kenɔ mì keŋkeŋ keke ale shigbe mɔ enu lɔ dejɔ kpɔ hannɛɔ, ejɔ ji nɔ mì haan!—Ezek. 33:16.

3-4. Lé enu wa nɔ nɔvinyɔnu ɖeka ci ewa ʒinʒindoshimɛ goduɔ, yí nyi yí mìakpla le nyɔta cɛ mɛɔ?

³ Hweɖewonuɔ, atɛnŋ agbɔnnu nɔ mɛɖewo mɔ woalɔn axɔ sɔsɔke Yehowa tɔ. Mìasɔ Jennifer ci wohɛn le nyɔnɔnwi lɔ mɛ kpɔwɛ. Ci eɖo cugbejɛvi mɛɔ, étɔ enu dɔndɔnwo wawa yí nɔnɔ agbe ve. Exwe ɖewo goduɔ, étrɔva Yehowa gbɔ yí vaje yí wa ʒinʒindoshimɛ. Énu mɔ: “Anyi gbe xoxwi ɖɔ koɖo ŋcilanmɛnuwo jiji, gbɔdɔndɔn masɔkoɖose gbe, aha sugbɔ nunu koɖo dɔmɛzi sugbɔ dodo. Le anyi susu mɛɔ, ŋnya mɔ ci ŋtrɔ ji mɛ yí biɔ sɔsɔkeɔ, Kristo tafɛn vɔnsa lɔ klɔŋ. Vɔ le anyi ji mɛɔ, ŋdekpɔɛni mɔ Yehowa sɔ nuvɔn lɔwo keŋ nyao o.”

⁴ Evagbɔnnɔnu nɔ eo hweɖewonu mɔ àna kankandoji ao ji mɔ Yehowa sɔ nuvɔn ciwo èwa vayi sɔ ke eoa? Yehowa ji mɔ ŋshishikuku yetɔ ye le wa nywi nɔ mì shigbe lé ewa nywi nɔ Davidi nɛ. Le nyɔta cɛ mɛɔ, mìaxo nuxu so enu ci yí taɖo eʒan mɔ mìaxɔ gbe do Yehowa sɔsɔke ji koɖo enu ci yí akpedo mì nu mìawɛ ahan nu.

NYI YÍ TAÐO EƷAN MƆ MÌAXƆ GBE DO YEHOWA SƆSƆKE JIƆ?

5. Nyi ji yí Satana ji mɔ mìwo le kandoɔ? Na kpɔwɛ ɖeka.

⁵ Nɔ mìlɔn do Yehowa sɔsɔke jiɔ, mìatɛnŋ aze nɔ Satana fɛncawo. Ðo ŋwi mɔ Satana ji mɔ yeawa enuɖekpokpui ci ji yeakpe keŋ aɖo te mì le Yehowa sɛnsɛn mɛ. Nɔ Satana aɖo yi tajinu lɔ gbɔɔ, étɛnŋ je agbla yí ana mìabui mɔ wodasɔ mìwo nuvɔnwo ke mì o. Mìasɔ ŋsu ɖeka ci yí nɔ gbɔdɔndɔn masɔkoɖose gbe le Korɛnti hamɛ lɔ mɛ yí woɖi ti kpɔwɛ. (1 Kor. 5:​1, 5, 13) Ci evatrɔ ji mɛ le yiyimɛɔ, Satana ji mɔ mɛ ciwo yí le hamɛ lɔ mɛ ŋgbesɔ nu ki o, ave xomɛ di yí agbe mɔ yewodaxwɛ o. Le gaɖekɛ lɔ ke mɛɔ, Satana jijiɛ mɔ le wawa nɔ ŋsu ci yí trɔ ji mɛ lɔ mɔ wodatɛnŋ asɔ enu ke eye o keŋ nɔ ‘aci ŋshishi mɛ ɖoɖu keke yí adanta nɔ yiɖeki’ yí ami Yehowa sɛnsɛn. Satana tajinu alo yi fɛncawo detrɔ o. Vɔ mìnya lé mìatrɔ kpanŋkɔ yi do.—2 Kor. 2:​5-11.

6. Nɔ ehwɛdoamɛɖeki vanyi agban yí kpɛnkpɛn mì ɖe, nyi mìatɛnŋ awa yí avoŋ le mìwoɖekiwo mɛɔ?

⁶ Nɔ mìxɔ gbe do sɔsɔke Yehowa tɔ jiɔ, akpedo mì nu mìdagbedonɔ hwɛ mìwoɖekiwo ɖoɖu o. Nɔ mìwa nuvɔn ɔ, esɔgbe mɔ mìado hwɛ mìwoɖekiwo. (Eha. 51:17) Ecɛ sɔgbe ahan. Ayexadohwɛnamɛnu mìwotɔ atɛnŋ acucu mì yí mìaɖe afɔ nywiwo keŋ atɔ enunywi wawa. (2 Kor. 7:​10, 11) Vɔ nɔ mìtrɔ ji mɛ so nuvɔn ɖe ci mìwa vayi nu gan yí gbekpɔtɔ dodoɔ hwɛ mìwoɖekiwo na nɔ hwenu jinjinɖeɔ, atɛnŋ adɔ yí mìagbɔjɔ yí ana ta. Hwenu yí mìvakando ji teŋteŋ mɔ Yehowa sɔ enu ke mìɔ, adɔ yí mìami ehwɛ dodo mìwoɖekiwo. Eyi mìatɛnŋ asɛn Yehowa shigbe lé eji mɔ mìwo le sɛn eye do nɛ, ci yí nyi mɔ mìasin koɖo ayexadohwɛnamɛnu mɛmi koɖo jijɔ gangan. (Kol. 1:​10, 11; 2 Tim. 1:3) Vɔ lé mìawɛ keke mìwo ji axɔ gbe do sɔsɔke Mawu tɔ jiɔ?

NYI YÍ ATƐNŊ AKPEDO MÌ NU YÍ MÌALƆN DO SƆSƆKE YEHOWA TƆ JIƆ?

7-8. Lé Yehowa dre yiɖeki nɔ Moizi doɔ, yí kankandoji ci yí ŋtɔ́ na mìɔ? (Hunhun 34:​6, 7)

⁷ Bu tamɛ kpɔ so lé Yehowa dre yiɖeki do nu. Se nyɔ ci yí Yehowa nu nɔ Moizi le Sinayi To lɔ ji ɖa.a (Hlɛn Hunhun 34:​6, 7.) Le enyɔ ciwo pleŋ Yehowa nu so yi nɔnɔmɛwo koɖo yi mɔwo nu mɛɔ, ékpɔ mɔ yi sɔgbe mɔ yeadre yeɖeki mɔ yenyi “Mawu ŋshishikunamɛtɔ koɖo vevisesedoamɛnutɔ.” Mawu ci yí ɖo nɔnɔmɛ ŋtɔ́wo ɖe, átɛnŋ agbe mɔ yedasɔ nu sɔ ke ye sɛntɔ ɖe ci yí je agɔ yí trɔ ji mɛ nyɔnɔnwitɔa? Kpɔ gbeɖe go! Nɔ éwɛ ahan ɔ, anyi mɔ desɔ enu kenɔ amɛ o yí gbevenɔ xomɛ. Kpɔ Yehowa datɛnŋ wa ahan gbeɖe o.

⁸ Mìatɛnŋ akando ji mɔ Yehowa dawa afɛn adre yiɖeki gbeɖe o, ɖo nyɔnɔnwi Mawu yí enyi. (Eha. 31:5) Eyi taɖo, mìatɛnŋ alɔn do yi nyɔ lɔ ji. Nɔ egbɔngbɔnnu nɔ eo mɔ àmi ehwɛ dodo eoɖeki so nuvɔn ciwo ewa sawo nuɔ, biɔ eoɖeki se mɔ: ‘Ŋkando Yehowa ji nyɔnɔnwimɛtɔ mɔ yinyi ŋshishikunamɛtɔ koɖo vevisesedoamɛnutɔ ci yí dagbe gbeɖe mɔ yedasɔ nu ke nuvɔnwatɔ ɖe ci yí trɔ ji mɛa? Yí ŋdeɖo axɔ gbe do ji mɔ yɛsɔ nu keŋ ba?’

9. Mìwo nuvɔn sɔsɔke gɔnmɛ ɖe? (Ehajiji Wema 32:5)

⁹ Bu tamɛ kpɔ so enyɔ ci Yehowa nu to Bibla ŋwlɛtɔwo ji yí wonu so sɔsɔke yitɔ nu. Kpɔ lé Bibla ŋwlɛtɔ Davidi dre Yehowa sɔsɔke do ɖa. (Hlɛn Ehajiji Wema 32:5.) Davidi mɔ: “Èsɔ anyi gɔjejewo keŋ.” Ebre nyɔgbe “sɔ ke” gɔnmɛ tɛnŋ gbenyi “woakɔ ŋɖe yi ji,” alo “akɔɛ swi.” Ci Yehowa sɔ nu ke Davidi ɔ, ele shigbe mɔ édro agban lɔ so ta ni nɛ. Eyi Davidi kpɔ fafa so agban kpɛnkpin ci yí nyi ehwɛdoamɛɖeki mɛ. (Eha. 32:​2-4) Mìatɛnŋ akpɔ fafa ŋtɔ́ hanci hɛnnɛ. Nɔ mìtrɔ ji mɛ ŋtɔŋtɔ so mìwo nuvɔnwo mɛɔ, degbeʒan mɔ mìakpɔtɔ ahɛnkɔ ehwɛdoamɛɖeki gban ci Yehowa ɖe so mì ji keŋkeŋ o.

10-11. Nyi nyɔgbe “le gbesɔsɔ asɔ enu ke amɛ” nunuɔ nɔ mì so Yehowa nuɔ? (Ehajiji Wema 86:5)

¹⁰ Hlɛn Ehajiji Wema 86:5. Elɛɔ, Davidi xo nuxu so Yehowa nu mɔ yɛle “gbesɔsɔ asɔ nu ke amɛ.” Bibla gɔnmɛɖeɖe wema ɖeka xo nuxu so nyɔgbe cɛ nu yí nu so Yehowa nu mɔ: “[Ényi] ‘enusɔkeamɛtɔ,’ ahan yí ‘ejɔ nɛ.’” Nyi yí taɖo Yehowa sɔ enu sɔ kenɔ amɛ le jɔjɔmɛnuɔ? Akpaxwe ci yí kplɔ kpukpui cɛ do dre mɛ mɔ: “Èɖo lɔnlɔn egbejinɔnɔtɔ sugbɔ nɔ mɛ ciwo pleŋ yí yɔnɔ eo.” Shigbe lé mìkplɛ le nyɔta ci yí vayi mɛ nɛɔ, lɔnlɔn egbejinɔnɔtɔ Yehowa tɔ na yí ekudo yi sɛntɔ egbejinɔtɔwo nu yí datashiwo gbeɖe o. Lɔnlɔn egbejinɔnɔtɔ Yehowa tɔ dɔ yí ‘asɔ nu ke’ nuvɔnwatɔ ciwo yí trɔ ji mɛ ‘faa.’ (Ezai 55:7.) Nɔ egbɔnnu nɔ eo mɔ alɔn do sɔsɔke Mawu tɔ jiɔ, àtɛnŋ abiɔ eoɖeki se mɔ: ‘Ŋkando ji mɔ Yehowa nyi enusɔkeamɛtɔ ci yí le gbesɔsɔ asɔ nu ke mɛ ciwo pleŋ yí trɔ ji mɛ yí yɔyɔɛ nɔ aku ŋshishi nɔ woa? Yí ŋdaxɔ gbe mɔ asɔ nu keŋ nɔ ŋdo axwa yɔɛ mɔ le ku ŋshishi nɔŋ ba?’

¹¹ Ci mìnya mɔ Yehowa mɔŋje mɛ mɔ mìnyi nuvɔnmɛwoɔ, mìatɛnŋ akpɔ akɔnfɛ. (Eha. 139:​1, 2) Ecɛ gbeze nywiɖe le Ehajiji Wema bu ciwo yí Davidi ŋwlɛ mɛ, ciwo yí atɛnŋ akpedo mì nu mìalɔn do enusɔkeamɛ Yehowa tɔ ji.

ŊGBEŊLƆBE ENU CI YÍ YEHOWA ÐONƆ ŊWI O

12-13. Sɔ koɖo Ehajiji Wema 103:14 ɖe, nyi Yehowa ɖonɔ ŋwi so mì nuɔ, yí nyi ecɛ dɔ ewanɔ nɔ mìɔ?

¹² Hlɛn Ehajiji Wema 103:14. Davidi nu so Yehowa nu mɔ “éɖonɔ ŋwi mɔ ekɔ yí mìnyi.” To nyɔgbe cɛwo jiɔ, Davidi dre ɖeka le susu ciwo yí taɖo Yehowa le gbesɔsɔ yí sɔ nu kenɔ yi sɛntɔ ciwo yí trɔ ji mɛ wo: Énya mɔ nuvɔnmɛwo mìnyi. Nɔ mìamɔŋje nyɔ cɛwo mɛ nywiɖe dojiɔ, mìatrɔ alé ŋkuvi do Davidi nyɔwo nu.

¹³ Davidi nu mɔ Yehowa “nya lé wowa mì do nywiɖe.” Éwa Adam koɖo “afizɔ” yí gbenya mɔ agbetɔ ciwo yí deɖo nuvɔnwo can ɖo sɛnxu ɖewo le jɔjɔmɛnu. Le kpɔwɛ mɛ, woʒan ŋɖuɖu, alɔndɔndɔn koɖo gbɔngbɔn. (Gɔnm. 2:7) Vɔ ci Adamu koɖo Ɛva wa nuvɔn ɔ, wogbevanyi afizɔ doji ke. Ci mìnyi Adam jijimɛviwoɔ, mìɖu nuvɔn cinɔ ci yí dɔ yí mìwanɔ nudɔndɔnwo. Yehowa denya kpoŋ mɔ mìnyi nuvɔnmɛwo o; Davidi nu so nu mɔ yi “ɖonɔ ŋwi” nuvɔnmɛ ci mìnyi. Ebre nyɔgbe ci yí wozan le lɛ gɔnmɛsese tɛnŋ nyi mɔ wowa enu nywiɖe alo wowa ŋɖe yí enyɔ. Mìatɛnŋ atrɔ anu enyɔ ciwo Davidi nu yí amɔ: Yehowa mɔŋje mɛ mɔ gaɖewomɛɔ, mìatɛnŋ ajuin fɛɛ; nɔ ejɔ ahan ɔ, énɔnɔ gbesɔsɔ yí adasɛ ŋshishikuku nɔ mì yí asɔ nu ke mì nɔ mìtrɔ ji mɛ.—Eha. 78:​38, 39.

14. (a) Lé Davidi dre lé Yehowa sɔsɔke mɔ yɛkeke bonu doɔ? (Ehajiji Wema 103:12) (b) Lé Davidi kpɔwɛ lɔ dasɛ lé Yehowa sɔ nu kenɔ amɛ keŋkeŋ doɔ? (Kpɔ dakavi ci yí nyi “Lé Yehowa Sɔ Nu Kenɔ Amɛ Yí Ŋlɔnɔbe do.”)

¹⁴ Keke fini Yehowa sɔsɔke keke bonu yiɔ? (Hlɛn Ehajiji Wema 103:12.) Davidi mɔ nɔ Yehowa sɔ nu ke amɛɔ, Ésɔnɔ mìwo nuvɔnwo so mì gbɔ “shigbe lé [wezexu] jinjin do [weɖoxɔxu] gbɔ nɛ.” Wezexu jinjin le weɖoxɔxu gbɔ taŋ, eyi wo koɖo ve datɛnŋ ado go kpɔ o. Nyi yí enyɔ cɛ nunuɔ nɔ mì so nuvɔn ciwo Yehowa sɔ kenɔ amɛ nuɔ? Wema ɖeka dre nyɔ cɛ mɛ mɔ: “Mawu te mìwo nuvɔnwo yi azɔge nɔ mì. Yi gɔnmɛ yí nyi kpɔ mɔ hwɛnhwɛn yitɔ, teshi yitɔ, enu ciwo pleŋ woaɖo ŋwi so nuvɔn lɔ nu so keŋkeŋ.” Hwɛnhwɛn ŋɖe tɔ kpetii tɛnŋ dɔ yí woagbeɖo ŋwi enu lɔ. Vɔ nɔ Yehowa sɔ enu ke amɛɔ, ele shigbe mɔ teshi lɔ can, hwɛnhwɛn lɔ can degbeli keke yí agbevasɔ wa ŋɖe koɖo mì o.—Ezek. 18:​21, 22; Edɔ. 3:19.

15. Nɔ nuvɔn ciwo mìwa vayi na yí mìdodoɔ hwɛ mìwoɖekiwo mamimami ɖe, nyi mìatɛnŋ awaɔ?

¹⁵ Lé Davidi nyɔ ciwo yí mìkpɔ le Ehajiji Wema 103 tɔ lɔ mɛ kpedo do mì nu yí mìaxɔ gbe do sɔsɔke Yehowa tɔ ji doɔ? Nɔ nuvɔn ciwo mìwa vayi na yí mìdodoɔ ehwɛ mìwoɖekiwo ɖoɖu mamimamiɔ, mìatɛnŋ abiɔ mìwoɖekiwo se mɔ: ‘Ŋŋlɔŋlɔbe enu ciwo yí Yehowa ɖonɔ ŋwia? Alo ŋŋlɔŋlɔbe mɔ énya mɔ nuvɔnmɛ yí ŋnyi yí asɔ nu ke nuvɔnwatɔ ɖe ci yí trɔ ji mɛ shigbe enyɛ nɛa? Ŋgbeɖoɖoɔ ŋwi enu ci Yehowa ŋtɔ sɔ gbeta mɔ yeaŋlɔbea? Alo ŋɖoɖoɔ ŋwi mɔ dagbevasɔ nuvɔn ciwo esɔ keŋ vayi sɔwa enu koɖoŋ gbeɖea?’ Yehowa desɔ susu ɖonɔ mìwo nuvɔn ciwo yí mìwa vayi ji o. Eyi taɖo mìwo can mìdeɖo awɛ ahan o. (Eha. 130:3) Nɔ mìlɔn do Yehowa sɔsɔke jiɔ, mìasun ji asɔ nuvɔn ciwo mìwa vayi asɔ kenɔ mìwoɖekiwo yí ayi ŋkɔ.

16. Sɔ kpɔwɛ ɖeka asɔ dre afɔku ci yí le ehwɛdoamɛɖeki ɖoɖu so nuvɔn ciwo wowa vayi mɛ. (Kpɔ foto lɔ hɛnnɛ.)

¹⁶ Mìasɔ kpɔwɛ ɖeka. Ehwɛdodoamɛki ɖoɖu so nuvɔn ciwo wowa vayi nu le shigbe wokukuɔ hun yikɔ keŋ yí kpɔtɔ glogloɔ ŋmɛkpɔnlin ci yí kpɔnɔ godu kpɔ hannɛ. Ényɔ mɔ woaglogloɔ ŋmɛkpɔnlin lɔ mɛ kpɔ gaɖewomɛ; adɔ yí ànya lé àwa nu do nɔ afɔku ɖe le godu nɔ eo. Vɔ nɔ afɔku ɖe davajɔ do eo jiɔ, èɖo asɔ susu ɖo emɔ lɔ ji yí akpɔ ŋkɔ. Ahanke nɔ mìɖoɖoɔ ŋwi mìwo nuvɔn hweɖewonuɔ, etɛnŋ kpedo mì nu yí mìatɛnŋ akpla nu so wo mɛ yí aɖui sɛnŋsɛnŋɖe mɔ mìdagbewa wo ke o. Vɔ nɔ mìsɔ ŋkuvi sɔ ɖo wo ji ɖoɖuɔ, ehwɛdoamɛɖeki lɔ ava wugan keke yí adɔ mìdagbesɛn Mawu o. Ewaɖeɔ, mìwo susu ɖo akpɔtɔ anɔ emɔ ci yí le ŋkɔ nɔ mì ji. Mìle emɔ ci yí kplɔ mì yikɔ agbe ci yí Mawu ɖo nɔ mì le xexe yoyu lɔ mɛ ji, fini yí susu vɔn ɖekpokpui ‘dagbeva ji mɛ nɔ mì le o.’—Ezai 65:17; Elo. 4:25.

KPƆTƆ ANANA KANKANDOJI AO JI

17. Nyi yí taɖo mìakpɔtɔ anana kankandoji mìwo ji so Yehowa lɔnlɔn koɖo yi sɔsɔke nuɔ?

¹⁷ Éʒan mɔ mìanana kankandoji mìwo ji so Yehowa lɔnlɔn koɖo sɔsɔke yitɔ nu. (1 Ʒan 3:19.) Nyi yí taɖoɔ? Ðo Satana dami agblajeje mɔ yeana mìaxɔɛ se mɔ mìdenyi mɛ ci woalɔn alo asɔ nu ke o. Ðekpokpui ɖe ci yí anyiɔ, tajinu ŋmɛɖekɛ lɔ yí le shi. Eyi nyi mɔ áwɛ nɔ mìami Yehowa sɛnsɛn. Mìatɛnŋ akpɔkpɔ emɔ mɔ yɛagbeje agbla doji sɔwu ɖo gaxoxo kankin ɖe kpoŋ yí kpɔtɔ ni. (Enyɔ. 12:12) Mìdeɖo atashi Satana nɔ aɖu ji kpɔ gbeɖe o!

18. Nyi àtɛnŋ awa ana kankandoji ao ji mɔ Yehowa nyi amɛlɔntɔ koɖo enusɔkeamɛtɔɔ?

¹⁸ Nɔ àdo ŋsɛn kankandoji ci èɖo mɔ Yehowa lɔn yeɔ, wa do susu ciwo nu mìxo nuxu so le nyɔta ci yí vayi mɛ ji. Nɔ àna kankandoji ao ji mɔ Yehowa sɔ nu kenɔ amɛɔ, bu tamɛ kpɔ so lé edre yiɖeki do nu. Bu tamɛ kpɔ so lé ecucu Bibla ŋwlɛtɔwo yí woxo nuxu so yi sɔsɔke nu do. Ŋgbeŋlɔbe mɔ yɛnya nywiɖe mɔ nuvɔnmɛ yí ènyi yí ekunɔ ŋshishi nɔ eo o. Ðo ŋwi mɔ nɔ ésɔ enu ke amɛɔ, ésɔ kenɔ amɛ keŋkeŋ. Nɔ eo can èvakando ŋshishikunamɛ Yehowa tɔ ji shigbe Davidi nɛɔ, àsun ji anu mɔ: “Akpe nɔ eo, Yehowa, èsɔ anyi gɔjejewo pleŋ sɔ keŋ’!”—Eha. 32:5.