Lé Nawɛ Nɔ Anyi Jilawo Delɔn Mɔ Nyɛ Le Zan Ɛntɛniti Jugbaja Hadoxuɔ?

Ewa shigbe mɔ ao xlɔwo pleŋ yí zankɔ Ɛntɛniti jugbaja hadoxu nɛ yí woxonɔ nuxu so nu gashiagamɛ. Ðowotɔ wokonɔ eo hɛnnɛ, ɖo dehun kɔnŋtu do ji o. Nyi èɖo anya so nɔnɔmɛ lɔ nuɔ? Yí nyi àtɛnŋ awa so nuɔ?

Enu ci èɖo anya

Denyi eo ɖekɛ yɔ o. Jila sugbɔ delɔn mɔ yewo viwo azan Ɛntɛniti jugbaja hadoxuwo o. Ðo etɛnŋ nyi mɔ enu amɛtɔn cɛwo tonɔ so jugbaja hadoxuwo zanzan mɛ:

• enubukpɔdɔ̀ koɖo susumɛdɔ̀ buwo.

• gbɔdɔndɔnnuwo kpɔkpɔ, gbɔdɔndɔnnuwo sɔsɔ ɖaɖa amɛ, koɖo adrɛnjiji le Ɛntɛniti ji.

• evu gbali ciwo yí exlɔwo wanɔ.

Jajɛ sugbɔ ɖui koŋ yí mi Ɛntɛniti jugbaja hadoxuwo zanzan. Wowoŋtɔwo do jeshi mɔ yɛdadahɛn nu le yewo nu sɔwu nyɔna ciwo yewokpɔnɔ le mɛ. Kpɔ kpɔwɛ ŋtɔŋtɔ ciwo yí gbɔgbɔ:

• Priscilla vakpɔɛ mɔ yɛɖukɔ gamɛ ci yeazan do enu adodwiwo nu le ye shi.

• Jeremy do jeshi mɔ jugbaja hadoxu lɔ lɔnɔ enuwo va telefonu ji nɔ ye yí yedetɛnŋ axe mɔ nɔ wo o.

• Bethany vakpɔɛ mɔ yɛna yesɔ susu ɖo enu ciwo mɛbuwo wakɔ ji ɖoɖu.

“Ŋsɔ gbeta yí cucu jugbaja hadoxu lɔ le telefonu mɛ, yí ejɔ ji nɔŋ mɔ ŋwɛ ahan. Yi ji yiyi degbedrokɔŋ hɛnnɛ o, ɖo ŋsekɔ vivi nɔ gamɛ sugbɔ ci yí vale ŋshi yí ŋsɔ susu ɖonɔ enuvevitɔwo ji.”​—Sierra.

“Enu ci yí dekpe nɔ nyɛ yí nyi mɔ, jugbaja hadoxu lɔ vanyi numamɛ nɔŋ yí gaɖewomɛɔ, ŋlonɔ nu kpɔ so nyɔ ci amɛwo avanu so enu ciwo ŋsɔ da ɖo ka ji nu. Defa gbɔxwe ŋvacucu jugbaja hadoxu lɔ si o, vɔ ci ŋvawɛɔ, ŋvo le nyɛɖeki mɛ. Ci ŋmi zinzin ɔ, ŋkpɔ fafa le nyɛɖeki mɛ sɔwu.”​—Kate.

Enu ci àtɛnŋ awa

Wa do ao jilawo sewo ji. Wa do wowo sewo ji yí ŋgbewa dɔmɛzi alo ato nyɔ o keŋ asɔ dasɛ nɔ wo mɔ yetɔ shinshin.

Bibla gɔnmɛɖose: “Sukunu watɔ ɖeblɛ donɔ dɔmɛzi. Vɔ, ŋununyatɔ xɔnɔ jigbɔnɖɛ yí ɖunɔ yiɖeki ji.”​—Elododo Wema 29:11.

Mɛɖewo tɛnŋ nu nɔ eo mɔ eɔ le zan jugbaja hadoxuwo le ao jilawo godu alo ahun kɔnŋtu do ji le bebe mɛ. Vɔ nɔ èwɛ ahan pi, anyi èwa afɛn! Ðo nɔ èbe yí wɛɔ, àxa yí davo le eoɖeki mɛ o. Kpɔ nɔ wovanya, anyi èje cukaɖa mɛ, yí agbɔnnu mɔ woakando eo ji.

Bibla gɔnmɛɖose: “Mìji mɔ mìawanɔ nushianu le nyɔnɔnuitoto mɛ.”​—Ebretɔwo 13:18, NWT.

Eoŋtɔ sɔ gbeta koŋ. Shigbe jajɛ ciwo mìyɔ vayi nɛɔ, ètɛnŋ bu tamɛ yí akpɔ susu sugbɔ ciwo yí taɖo àmi jugbaja hadoxu zanzan. Nɔ éze petii nɔ eo mɔ, jugbaja hadoxu zanzan dahɛn nyɔna ɖe vɛ nɔ eoɔ, eoŋtɔ sɔ gbeta koŋ ami zinzin yí denyi ci ao jilawo gbe ɖekɛ yí taɖo o. Nɔ èwɛ ahan gbɔxwe ao kpenawo vabiɔ nyɔ eo se so nuɔ, dawa ŋkpɛn nɔ eo o, yí kankandoji li mɔ wodagbeko eo ahan o.

Susu vevi lɔ: Wa do ao jilawo sewo ji, yí atekpɔ akpɔ enu ci yí taɖo wowo susu sɔgbe, ɖo ecɛ akpedo eo nu yí ao gbetasɔsɔ asɔ koɖo wowotɔ. Le kakacɛ mɛɔ, nɔ dezan jugbaja hadoxu can ɔ, ànɔ agbe.