Akpaxwe ci sɛnsɛnwo wakɔ le Ukraine hwa lɔ mɛ—Lé Bibla nu so nuɔ?

Kpɔ lé enyɔ ciwo yí gbɔgbɔ dasɛ do mɔ sɛnsɛnŋkɔnɔtɔ ganganwo wakɔ akpaxwe ɖe le ahwa lɔ mɛ le Ukraine:

• “Patriarch Kirill ci yí nyi ŋkɔnɔtɔ nɔ Orthodoxe cɔci le Russie denu nyɔ ɖe so egu ci Russie fɔn do Ukraine ji nu o. . . . Yi cɔcimɛtɔwo kaka ŋsukankannyɔ so Ukraine nu, eyi Putine zankɔ enyɔ lɔwo sɔ ɖokɔ kpe ahwa ci ewakɔ ji.”—EUobserver, 7 mars 2022.

• “Patriarch Kirill . . . dasɛ petii mɔ yele ŋgbe nɔ enu ci Russie cukɔ koɖo Ukraine ci enu mɔ, egufɔnfɔn cɛ nyi ahwawawa koɖo nuvɔn.”—AP News, 8 mars 2022.

• “Metropolitan Epiphanius Ŋkɔtɔ ci yí le Kiev yí nyi ŋkɔnɔtɔ nɔ Orthodoxe cɔci le Ukraine, cu shi nɔ yi mɛwo tɛnigbe mɔ wo le ‘wa hwa kpe Russitɔ ciwo yí tɔ nu koɖo wo’ . . . Énu hɛnnɛ mɔ nɔ wowu Russie sɔjawoɔ, denyi nuvɔn o.”—Jerusalem Post, 16 mars 2022.

• “Mì [mɛ ciwo nanɔ kpla sɛnsɛnwo koɖo Ukraine cɔcitɔwo (ciwo wogbeyɔnɔ mɔ UCCRO)] le ŋgbe nɔ Ukraine Sɔjawo koɖo mɛ ciwo pleŋ yí kpekpeɛdo mì nu. Mìcu shi do agbla ciwo pleŋ wojekɔ yí kpekɔdo mì nu ji, yí mìdokɔ gbe ɖaɖa do ta nɔ wo.”—UCCROa Statement, 24 février 2022.

Lé èkpɔɛ doɔ? Sɛnsɛn ciwo yí mɔ yewokplɔ Yesu Kristo do ado ŋsɛn wowo mɛwo mɔ wo le wa ahwaa? Lé Bibla nu so nuɔ?

Exolɔlɔwo dasɛ mɔ sɛnsɛnwo do nu ahwa mɛ

Exolɔlɔwo dasɛ mɔ sɛnsɛnwo lɔnnɔ do ahwawawa ji, nunɔ mɔ yɛsɔgbe alo donɔ ŋsɛn amɛwo mɔ wo le wɛ, gan yí awakɔ nu shigbe mɔ wojikɔ fafa nɛ. Ejinjin yɛ, yí Yehowa Kunuɖetɔwo klokɔ nu so ayemɛnuwawa sɛnsɛnwo tɔ cɛ ji. Kpɔ yi kpɔwɛ ɖewo ciwo woyɔ do mìwo wemawo mɛ.

• Nyɔci ci yí nyi “Atitsogaʋawo—‘Amefuflu Wɔnublanui’ Aɖe” ɖe mɛ mɔ Rɔma Katoliki Cɔci gbɔ yí eso yí wowu amɛ sugbɔ le Mawu koɖo Kristo ŋkɔ mɛ.

• Nyɔci ci yí nyi “Katolikoha la le Afrika” na kpɔwɛ ɖeka ci yí dasɛ mɔ sɛnsɛnhawo dekpe ji yí ɖo te jumɛviwo hwa alo akɔta ɖewo gugu swi o.

• Nyɔci ciwo yí nyi “Akpa si Mawusubɔsubɔha Wɔ le Ameƒomea ƒe Aʋawɔwɔwo Me,” koɖo “Mawusubɔsubɔ De Akpa aɖe Dzi” dre mɛ mɔ Katoliki, Orthodoxe koɖo Protestant cɔci ŋkɔnɔtɔwo nɔ ŋgbe nɔ akpaxwe amɛve le ahwawo mɛ.

Sɛnsɛnha ciwo yí nyi Kristotɔwo ɖo ado alɔ ahwawawaa?

Enukplamu ci Yesu na: ‘Ðo lɔnlɔn nɔ ao kpena shigbe lé èlɔn eoŋtɔ nɛ.’ (Matie 22:39) “Mí lɔn míwo ketɔnɔwo.”—Matie 5:44-47.

Enyɔ ci Yesu nu: “Anyi fyɔɖuɖu de le xexe cɛ mɛ o. Nɔ Anyi fyɔɖuɖu le xexe cɛ mɛ sa ɔ, Anyi dɔkplaviwo a wa ahwa nɔ Ŋ, yi Ʒuifuwo da lé Ŋ o.” (Ʒan 18:36) “Amɛ ciwo pleŋ yí a sɔ ewi do amɛ ji ɔ, wo a ku ewi ku.”—Matie 26:47-52.

Bu nyɔ cɛ kpɔ: Nɔ Kristotɔwo deɖo awa ahwa yí ahwlɛn ta nɔ Yesu ɖe, susu bu ɖe li ci ŋci woawa ahwa yɛa? Hlɛn nyɔci ci yí nyi “Ðe Wòsɔ Be Kristotɔwo Nayi Aʋa?” yí akpɔ lé Kristotɔ ŋkɔtɔwo wa nu shigbe Yesu nɛ do yí gbewa do yi nukplamuwo ji pɛpɛpɛ.

Nyi yí ajɔ do sɛnsɛn ciwo yí nɔkɔ ŋgbe nɔ ahwawo jiɔ?

Bibla kpla mì mɔ Mawu gbe sɛnsɛn ciwo yí mɔ yewokplɔ Yesu do, gan yí wodewanɔ do yi nukplamuwo ji o.—Matie 7:21-23; Titu 1:16.

• Enyɔdasɛ wema dasɛ mɔ Mawu do hwɛ sɛnsɛn hunnɔwo mɔ wowo yí na wowu “amɛ ciwo pleŋ yí wo wu le” nyigban ji. (Enyɔdasɛ 18:21, 24) Nɔ àkpɔ enu ci yí taɖoɔ, hlɛn nyɔci ci yí nyi “Nu Kae Nye Babilon Gã La?”

• Yesu nu mɔ woagu sɛnsɛn ciwo pleŋ nu yí dekpenɔ Mawu swi shigbe lé ‘wojanɔ aci ci yí desɛnnɔ eku nywi yí sɔ donɔ ezo mɛ’ nɛ, ɖo wole enudɔndɔn wakɔ. (Matie 7:15-20) Hlɛn nyɔci ci yí nyi “Ɣeyiɣi si me Woaɖe Alakpasubɔsubɔhawo Ða la Ðo Vɔ!” keŋ akpɔ lé avajɔ do.

Fini foto lɔwo so, so miɔmɛ yi ɖushimɛ: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images