2023 nyi Enulolokpɔ Xwe—Enyɔ Ci Bibla Nu So Nuɔ?

Le exwe 2023 mɛɔ, enu sugbɔ jɔ le xexeɛ mɛ yí dasɛ mɔ mìle agbe le hwenu Bibla yɔ mɔ “ŋkeke vɔvɔwo mɛ.” (2 Timɔte 3:1) Kpɔ lé enu ciwo yí jɔkɔ le exweɛ mɛ sɔ koɖo enu ciwo Bibla nu ɖɛ mɔ woajɔ le mìwo hwenu ɖa.

Bibla koɖo xexeɛ mɛ nujɔjɔwo

“Mí a se enyɔ so ahwa ciwo yí jɔjɔ nu.”​—Matie 24:6.

• “Ahwa sɛnŋsɛnŋ ciwo yí jɔjɔ le texwe vovovowo le xexeɛ pleŋ mɛ va sukɔgbɔ doji.”a

“Nyigban a hunhun le afi ɖewo.”​—Maki 13:8.

• “So tɔtɔmɛ nɔ exwe 2023 ɔ, nyigban hunhun gangan 13 yí jɔ le xexeɛ pleŋ mɛ. So hwenu wotɔ nyigban hunhunwo hlɛnhlɛn ɔ, wodesugbɔ le exwe ɖe mɛ shigbe kɔcɛ nɛ o.”b

“Enujiŋwo ciwo yí a do vɔnvɔn nɔ amɛ a jɔjɔ.”​—Luiki 21:11.

• “Saɔ, zozu kpoŋ yí le xexeɛ mɛ; vɔ ecɛyɛɔ, ayamɛ vabikɔ xɛxɛxɛ.”​—António Guterres, Sécretaire générale des Nations-Unies.c

“Ejutotwiwo.”​—Matie 24:7.

• “2023 gbenyi exwe ci mɛ egbɔn nu nɔ amɛwo le mɔ woakpɔ ŋɖuɖu nɔ xomuwo.”d

“Cukaɖa sugbɔ a va.”​—2 Timɔte 3:1.

• “Le xexeɛ pleŋ mɛɔ, amɛ kuɖeka le amɛnyi mɛ lé susumɛdɔ ɖe.”e

Nyi mìatɛnŋ akpɔ mɔ nɔ le exwe 2024 mɛɔ?

Mɛɖekɛ datɛnŋ anya enu ciwo yí ajɔ le exwe 2024 mɛ pɛpɛpɛ o. Vɔ enu ciwo yí jɔjɔ le xexeɛ mɛ dasɛ mɔ, Mawu Fyɔɖuxu alo jeŋkwi mɛ cɛkpakpa lɔ aɖɔli agbetɔwo cɛkpakpawo sabaɖe. Águ enu ciwo pleŋ yí na agbetɔwo ɖukɔ aya yí lonɔ nu kpɔ.​—Daniɛli 2:44; Enyɔdasɛ 21:4.

Vɔ gbɔxwe hwenɔnu aɖoɔ, nɔ mìavatɔ enu lolo kpɔɔ, mìatɛnŋ abiɔ Mawu nɔ akpedo mì nu. Bibla nu mɔ:

“Hwecinu vɔnvɔn lé ŋ ɔ, ŋ sɔ anyi jidodo daɖo eo ji.”​—Ehajiji Wema 56:3.

Lé mìawɛ aɖoŋ do Mawu nu ahan ɔ? Mìsɔ jijɔ yɔyɔ eo mɔ, eo le vakpla enu sugbɔ so Bibla gbeɖu ciwo yí kuso esɔ mɛ, ci mɛ vevisese dale nu. Te Bibla Kplakpla To Seŋkankan Ji gbali kpɔ keŋ akpɔ lé eo koɖo ao xomu atɛnŋ aɖu le nɔ Bibla gbeɖuwo do.