Wozan Miliya Kotokun Nɛniɖe Do Ahwa Mɛ​—Eho Ðekɛ Yí Yi Ku Domɛa?

Enu ciwo yí ahwa dahɛn sɔgbɔ taŋ.

• “Le exwe ci vayi mɛɔ, acɛkpakpawo zan dɔla miliya 2.2 do ahwa nɛniɖe mɛ le xexeɛ pleŋ mɛ. Wodezan eho do ahwa mɛ ahan le exwe ɖe mɛ sɔ exwe ci yí vayi o.”​—The Washington Post, 13 Février 2024.

Denyi eho ɖekɛ yí yi ku domɛ o. Mìasɔ kpɔwɛ ɖeka kpoŋ: Ahwa ci yí jɔjɔ le Ukraine.

• Sɔjawo. Ci wowa kɔnŋta kpɔɔ, sɔja 500 000 han yí wowu alo xɔ akpa ci ahwa lɔ tɔ jɔjɔ so exwe ve ke.

• Jumɛvi Manyaɖewo. Nations Unies nu mɔ agbetɔ ciwo yí wu 28 000 yí ku alo xɔ akpa. Ele ahan gan, mɛɖeka ci yí le acɛtɔxu le Nations Unies lɔ mɛ nu mɔ: “Wodatɛnŋ anu lé ahwa vwin cɛ dahɛn nu le jumɛvi manyaɖewo nu o.”a

Wodatɛnŋ anu agbetɔ nɛni ci yí kpekɔ fun le ahwa koɖo manyimanyiwo mɛ le xexeɛ pleŋ mɛ o.

• Agbetɔ miliɔn 114. Keke avaɖo Septembre 2023 le xexeɛ pleŋ mɛɔ, agbetɔ miliɔn 114 yí ahwa koɖo manyimanyi nya do gbe.

• Agbetɔ miliɔn 783 yí shive cikɔ mamimami. “Ahwa yí nyi enu ŋkɔtɔ ci yí sɔ shive cikɔ amɛwo. Nɔ wosɔ mɛ ciwo yí shive cikɔ le xexeɛ mɛɔ, 70 le sanŋdi ɖeka mɛ le texwe ciwo ahwa koɖo tamɛsɛnsɛn le.”​—Programme Alimentaire Mondial.

Ahwa avavɔ kpɔa? Keke agbetɔ avavo kpɔa? Hwenu ɖe li yí mɛɖe dagbenyi wamɛnɔ o, yí mɛshiamɛ ase vivi nɔ enu ciwo yí le nyigban ji yí aɖu yí xodu aɖɛa? Lé Bibla nuɔ?

Ahwa hwenu

Bibla nu ɖɛ mɔ ahwawo akaka do nyigban lɔ ji. Édri le kpɔwɛnyɔnunu mɛ mɔ yɛnyi esɔkutɔ.

• “Eyi esɔ bu vá to. Esɔ lɔ nyi esɔ jin. Wo na hlɔnhlɔn esɔkutɔ lɔ nɔ á ɖe fafa so nyigban ji. Wo gbe na hlɔnhlɔn yi nɔ a dɔ yí amɛwo a wunɔ wowonɔnɔwo. Wo na dekpi gangan ɖeka esɔkutɔ lɔ.”​—Enyɔdasɛ 6:4.

Esɔkutɔ amɛve buwo kplɔ esɔkutɔ cɛ do. Wowo koɖo ve hɛn ejutotwi koɖo eku vɛ. (Enyɔdasɛ 6:5-8) Nɔ àkpɔ enubuwo kuso Bibla mɛ nyɔnuɖɛwo koɖo enu ci yí taɖo mìatɛnŋ akando ji mɔ wovavamɛ le mìwo hwenu nuɔ, hlɛn nyɔci ci yí nyi “Sɔdola Eneawo Ame Kawoe Wonye?”

Hwenu fafa ava xwe

Sabaɖe yɛɔ, wodagbezan xexeɛ mɛ dɔkunuwo do ahwa mɛ o. Ele ahan gan, denyi agbetɔwo gblajeje yí adɔ anyi ahan o. Bibla nu mɔ:

• Mawu “a ɖote ahwawo le afi ɖekpokpwi le nyigban ji.”​—Ehajiji Wema 46:9.

• Mawu adra enu ciwo ahwa dahɛn do. “Mawu a cucu ɖashi keŋkeŋ le ŋkuviwo ji nɔ wo. Eku, enulolo, avifanfan, alo vevisese da gbe li o. Enu ŋkɔtɔwo a vayì.”​—Enyɔdasɛ 21:4.

• Mawu ana fafa bɔkɔɔ amɛshiamɛ. “Anyi mɛwo a nɔ̀ agble nyakpɔkpɔ mɛ koɖo ŋcifafa. Anyi mɛwo a nɔ̀ hwlɛngan zavawo mɛ. Wo a nɔ̀ afi ɖoɖa koɖo ŋcifafa tɔxuwo.”​—Ezai 32:18.

Sɔ koɖo Bibla mɛ nyɔnuɖɛwoɔ, ahwa koɖo enu ciwo yí jɔjɔ le egbɛ mɛ dasɛ mɔ hwenu fafa cɛ ava gogo.

Lé Mawu ahɛn fafa cɛ vɛ doɔ? Ázan yi cɛkpakpa alo yi Fyɔɖuxu ci yí le jeŋkwi mɛ asɔ wɛ. (Matie 6:10) Nɔ àkpɔ enu ci yí Fyɔɖuxu cɛ nyi koɖo enu ci atɛnŋ awa nɔ eoɔ, kpɔ video kpoli cɛ ci nyi Nyi yí Mawu Fyɔɖuxu nyiɔ?