kovop58/stock.adobe.com
MÍNƆ ZANŊTE!
Kanmɛtetekpɔwo Atɛnŋ Adɔ Jukɔnwo Anɔ Ju Nyaoa?—Enyɔ Ci Bibla Nuɔ?
Amɛ miliya amatɔn han akpɔ kanmɛtetekpɔ ciwo woawa le ezomɛ le 2024 mɛ. Mɛ ciwo yí awa kanmɛtetekpɔ lɔwo aso jukɔn 206 mɛ. Thomas Bach, Xexeɛ Pleŋ Mɛ Kanmɛtetekpɔ Jikpɔgbɛ lɔ jikpɔtɔ nu mɔ: “Mìjikɔ awa wana ci yí dɔ xexe lɔ pleŋ nɔnɔ ju le fafa mɛ. Eyi taɖo mìaɖu exwe nɔ kanmɛtetekpɔ cɛ, ɖo éna agbetɔviwo nɔnɔ ju le fafa mɛ, ci woto vo nɔ wowonɔnɔwo can.”
Kanmɛtetekpɔwo atɛnŋ aɖo tajinu kpɛnkpin cɛ gbɔa? Mìatɛnŋ akpɔ mɔ nɔ fafa koɖo ejunɔnɔ adodwia?
Kanmɛtetekpɔwo ahɛn fafa koɖo ejunɔnɔ vɛa?
Kanmɛtetekpɔ ciwo wojikɔ awa kɔcɛ kuso nubuwo nu sɔwu munumumuwo kpoŋ. Munumumu lɔwo tɛ gbe do eju koɖo politiki cukaɖa ciwo yí mama amɛwo mɛ ji. Cukaɖa ɖewo yí nyi agbetɔwo cɛwo, akɔtaklanklan, sɛnsɛnwo klanklan, koɖo enumajɔmajɔwawa.
Kanmɛtetekpɔ wana ciwo wowanɔ le xexeɛ mɛ donɔ jijɔ amɛwo. Ele ahan gan, wana cɛwo donɔ ŋsɛn amɛwo nɔ woaɖo susu koɖo nɔnɔmɛ ciwo yí hɛnnɔ manyimanyi vɛ yí fafa koɖo ejunɔnɔ adodwi denini o.
Bibla nu ɖɛ mɔ agbetɔwo aɖo adɛn ciwo yí adɔ ejunɔnɔ agbɔnnu le egbɛ mɛ. (2 Timɔte 3:1-5) Nɔ àkpɔ enu sugbɔ buwo doji so Bibla nyɔnuɖɛ cɛ nuɔ, hlɛn enyɔci ci yí nyi “La Bible a-t-elle prédit la mentalité et la conduite des gens de notre époque ?”
Enu ci yí ahɛn fafa koɖo ejunɔnɔ adodwi va xexeɛ mɛ
Bibla nu enu ci yí ahɛn fafa koɖo ejunɔnɔ adodwi va xexeɛ mɛ. Éɖo gbe mɔ agbetɔ ciwo pleŋ yí le nyigban lɔ ji anɔ ju le jeŋkwi mɛ cɛkpakpa ɖeka ci eyɔ mɔ “Efyɔɖuxu Mawutɔ” gɔnmɛ.—Luiki 4:43; Matie 6:10.
Yesu Kristo ci yí nyi Efyɔ nɔ Fyɔɖuxu cɛ ahɛn fafa va xexe lɔ keŋkeŋ mɛ. Bibla nu mɔ:
“Amɛjɔjɔɛwo adɔn shigbe flawawo nɛ, eyi fafa asugbɔ keke.”—Ehajiji Wema 72:7, NWT
“Mìwo Fyɔ kpenɔdo wamɛnɔwo koɖo amɛ klekliwo nu. . . . Efyɔ lɔ hwlɛn wo gan le amɛ kpotu ciwo yí tekpɔ yí a do vevisese lanmɛ nɔ wo shi.”—Ehajiji Wema 72:12, 14.
Le egbɛ mɛɔ, Yesu nukplakplawo na amɛ miliɔn nɛniɖe nɔnɔ ju le jukɔn 239 mɛ. Yehowa Kunuɖetɔwo nyi Kristotɔ ciwo yí kpla lé woawanɔ nu le fafa mɛ do. Nɔ àkpɔ lé wowɛni doɔ, hlɛn Jutakpɔxɔ enyɔdrawema ci nyɔta yí nyi “Àte Ŋu Aɖu Fuléle Dzi!.”