Amɛ miliɔn nɛniɖe kpɔkɔ ale so egbegɔnmɛɖexu ciwo yí le azɔge nɔ betɛli mɛ

Gashiagamɛ gbegɔnmɛɖetɔwo gbɛbɔbɔ 60 le 100 mɛ dewakɔ dɔ le alɔjedɔwaxu o. Vɔ wowakɔ dɔ le egbegɔnmɛɖexu ciwo yí le azɔge nɔ Betɛli. Nyɔna ciwo yí le toto cɛ mɛɔ? Edɔwanu ciwo yí egbegɔnmɛɖetɔwo ӡan gbɔxwe awa dɔ nywiɖe le egbegɔnmɛɖexu ciwo yí le azɔge cɛwo mɛɔ? Yí lé texwe ci woɖo egbegɔnmɛɖexu do wɛni mɔ, egbegɔnmɛɖeɖedɔ lɔ nyɔnɔ abi denyɔnɔ ahan doɔ?

Egbegɔnmɛɖexu ciwo yí le azɔge toto lɔ dɔ yí egbegɔnmɛɖetɔwo nɔnɔ fini amɛ sugbɔ donɔ wowo gbe lɔ le. Karin nyi Bas Allemand gbegɔnmɛɖetɔ. Édre nyɔ lɔ mɛ mɔ: “So hwenu mìvayi ci egbegɔnmɛɖexu ci yí le azɔge le Cuauhtémoc jugan mɛ le Chihuahua le Mexiqueɔ, mìdonɔ Bas Allemand gbe gashiagamɛ koɖo mìwo kpena egbegɔnmɛɖetɔwo. Mìgbeduini le kunuɖegbe koɖo nuxwlexuwo. Mɛ ciwo yí donɔ mìwo gbe lɔ ɖeɖe shɔnŋ yí trɔdo mì. Mìsenɔ nyɔgbe ɖewo ciwo mìgbese kpɔ yɛɔ, ejinjin yí mìkplanɔ nyɔgbe yoyu ciwo amɛwo zankɔ.”

James ci yí wanɔ dɔ le Frafra gbegɔnmɛɖexu le Ghana lɔn do ji mɔ, yedegbetɛnŋ donɔ ha koɖo nɔvi ciwo yí le alɔjedɔwaxu lɔ hweɖewonu o. Vɔ énu mɔ: “Edɔwawa le egbegɔnmɛɖexu ci yí le azɔge jɔnɔ ji nɔŋ. Nɔ ŋɖekɔ kunu le egbe ci mɛ lɔwo donɔ mɛ yí kpɔ lé woxɔkɔ ŋɛnywi lɔ doɔ, evivinɔ nɔŋ.”

Lé mìwo nɔviwo wɛ yí sɔnɔ fini woaɖo egbegɔnmɛɖexu ci yí le azɔge doɔ? Joseph ci yí wanɔ dɔ le Exɔcucudɔwaxu mìwo dɔwaxu gangantɔ le Warwick, New York, États-Unis nu mɔ: “Cukaɖa ɖeka ci mìdonɔ go yí nyi mɔ, egbegɔnmɛɖexu ɖewo dekpɔnɔ ezo koɖo eshi alo ɛntɛnɛti asɔ wanɔ kɔpi nɔ enu ciwo woaɖe gɔnmɛ nɔ lɔwo o. Eyi taɖo nɔ mìjikɔ aɖo egbegɔnmɛɖexu do fiɖeɔ, mìglonɔ texwe sugbɔ kpɔ le fini wodonɔ gbe lɔ le gbɔxwe asɔ ɖeka le wo mɛ.”

Blaŋblaŋ ɔ, nɔ mìsɔ gbeta mɔ mìaɖo egbegɔnmɛɖexu lɔ do takpekpewaxu, Fyɔɖuxuxɔ mɛ alo eŋɛnywidratɔ ejugodutɔwo xwemɛ yí egbegɔnmɛɖetɔ lɔwo avawanɔ dɔ le nɔɔ, mìkpɔnɔ texwe blaŋ yí ehozanzanwo gbeɖenɔ kpɔtɔ nywiɖe. Nɔ texwe ŋtɔ́ han ɖewo deliɔ, woana gbe nɔvi lɔwo dru fɛɛ mɔ wo le xwle axwe ɖe ci mɛ woaɖo dɔwaxuwo do yí egbegɔnmɛɖetɔ lɔwo avaci hunnɔ awanɔ wowo dɔ. Nɔ nuwo gbevatrɔ nɔ gbegɔnmɛɖetɔwo gbɛbɔbɔ lɔɔ, woatɛnŋ asa axwe lɔ fafɛɖe yí azan ho lɔ le fini eӡan gbesugbɔ wu le dru.

Wonanɔ nushianu wo nɔ woayi dɔ lɔ ji

Le sumɔsumɔxwe 2020 mɛɔ, mìzan Amɛlikiho dɔla miliɔn 13 (alo 7 020 miliɔn FCFA) han do gbegɔnmɛɖexu ciwo yí le azɔgewo nu. Egbegɔnmɛɖexuwo ӡan ɔdinatɛɛ, ɔdinatɛɛ ji dɔwanu ɖewo koŋ, enulele do ka ji dɔwanuwo, Kɔnnɛshiɔn nɔ ɛntɛnɛti, eshi, ezo koɖo nuvevi buwo. Le kpɔwɛ mɛ, ɔdinatɛɛ ci mɛ kuɖeka azan sɔ kpe nɔ enu klikli ciwo yí abɔdo nu nyi Amɛlikiho dɔla 750 alo 405 000 FCFA han. Woxwlenɔ ɔdinatɛɛ dɔwanuwo do ɔdinatɛɛ lɔwo ji yí gbesɔnɔ Watchtower Translation System dɔwanu danɔ do wo ji. Watchtower Translation System nyi dɔwanu ci habɔbɔ lɔ ŋtɔ wa yí ekpenɔdo egbegɔnmɛɖetɔwo nu wokpɔnɔ edɔ ciwo woawa koɖo edɔwanu ciwo yí adɔ woawa dɔ lɔ nywiɖe. Egbewɛ yí edɔ lɔ wa ɖaŋ yinɔ le ɖoɖonu.

Wogbesɔnɔ enulele do ka ji dɔwanuwo ɖaɖa egbegɔnmɛɖetɔwo yí wotɛnŋ lénɔ nuwo do ka ji zeɖeka le wowo bilowo mɛ. Edɔwanu cɛwo vakpedo egbegɔnmɛɖetɔ lɔwo nu sugbɔ hwenu yí COVID-19 dɔ̀bamɛ lɔ tɔ ji, ɖo sugbɔtɔ le wo mɛ tɛnŋ sɔ wo yi axwemɛ keŋ yí tɛnŋ lénɔ nu ciwo gɔnmɛ woɖe do ka ji yí gbesɔ wo wanɔ videowo.

Nɔ gbegɔnmɛɖetɔwo ɖe wema ɖe gɔnmɛ ɖegbɔɔ, lɔnlɔn faa dɔwatɔ ciwo yí le nutwiɔ mɛ tonɔ wema lɔ mɛ keŋ yí nunɔ ŋciwo wokpɔ so nu nɔ gbegɔnmɛɖetɔ lɔwo. Wogbedranɔ dɔwaxu lɔwo do yí sɔ kpenɔdo wo nu. Cirstin ci yí wakɔ dɔ le Afrikaans gbegɔnmɛɖexu le Cape Town le Afrique du Sud nu mɔ, “Emɔ hunnɔ nɔ eŋɛnywidratɔ koɖo gbeshiagbe mɔɖetɔ sugbɔ yí wotɛnŋ vawanɔ dɔ le lɛ.”

Emɔ cɛ ci yí hun nɔ lɔnlɔn faa dɔwatɔ lɔwo jɔnɔ ji nɔ wo sugbɔ. Nɔvinyɔnu ɖeka ci yí vayi wanɔ dɔ le egbegɔnmɛɖexu ɖeka ci yí le azɔge mɔ edɔwawa le nɔ le shigbe “aya fafɛ xɔxɔ do lanmɛ” hannɛ. Nɔviŋsu koɖo nɔvinyɔnu ciwo yí le nutwi ci mɛ egbegɔnmɛɖexu le ɖewo can nunɔ nyɔ lɔwo yí woxɔnɔ wo do ka ji. Juana ci yí nyi gbegɔnmɛɖetɔ le Totonac gbegɔnmɛɖexu le Veracruz jugan mɛ le Mexique nu mɔ: “Ecɛyɛ ci mìvagogo jugan ciwo mɛ wodonɔ mìwo gbe lɔ leɔ, nɔviŋsu koɖo nɔvinyɔnu ciwo yí kpenɔdo mì nu mìxɔnɔ odio koɖo video ciwo mìwa do ka ji fafɛɖe vasukɔgbɔ doji.”

Vɔ egbegɔnmɛɖexu ciwo yí le azɔge toto lɔ ci wowa dɔ yí egbegɔnmɛɖeɖedɔ lɔ nyɔnɔ dojia? Mɛ ciwo yí hlɛnnɔ nu lɔwo miliɔn nɛniɖe ɖo ŋci mɔ ɛɛ. Cédric ci yí wanɔ dɔ koɖo Kongo gbegɔnmɛɖetɔwo le République démocratique du Congo nu mɔ: “Lé mìɖenɔ gbe lɔ gɔnmɛ do sa le Kongo gbeɛ mɛ wɛ mɔ, nɔviŋsu koɖo nɔvinyɔnu ɖewo yɔnɔ mì mɔ ‘Watch Tower wema Kongo tɔwo,’ ɖo desɔgbe koɖo lé amɛ sugbɔtɔ donɔ Kongo gbe lɔ do o. Vɔ ecɛyɛɔ, wonunɔ mɔ wovaɖeɖeɛ mìwo wemawo gɔnmɛ do Kongo gbe ci wododoɔ kakayɛ mɛ.”

Andile ci yí wanɔ dɔ koɖo Xhosa gbegɔnmɛɖetɔwo can se amɛwo nunɔ ahan le Afrique du Sud. Émɔ: “Amɛ sugbɔ nu nɔ mì mɔ yewokpɔɛ mɔ lé mìɖenɔ gbeɛ gɔnmɛ do trɔ. Ðevi ciwo yí hlɛnnɔ Jutakpɔxɔ le Ŋlɛshigbe mɛ sasa can vahlinkɔ le Xhosa gbe mɛ ɖɛyɛ. Lé wotrɔ ashi le Xexe Yeye Gɔnmeɖeɖe lɔ nu yí evasɔgbe koɖo lé wododoɔ gbe lɔ do ɖɛyɛ yí jɔ ji nɔ wo koŋ.”

Edro nunana ci amɛwo nanɔ mɔ, wo le sɔ do alɔ xexeɛ pleŋ mɛ dɔ lɔ gban mɛ yí wokpɔnɔ keŋ yí sɔnɔ eho ciwo pleŋ wozannɔ yí sɔ ɖonɔ egbegɔnmɛɖexu ciwo yí le azɔge nɔ Betɛli, esɔ lenɔ bu nɔ wo yí gbezannɔ do mɛ ciwo yí wanɔ dɔ le gbegɔnmɛɖexu lɔwo nu. Enu ciwo wonanɔ to donate.jw.org ji can le mɛ.