3 УРОК
Агару Бичиктеги чындык канайып јаҥыдаҥ ачылган?
Агару Бичиктиҥ Шиҥдеечилери. 1870 јылдар
«Каруулчы бакананыҥ» баштапкы чыгармазы. 1879 јыл
«Каруулчы бакана» бӱгӱнги кӱнде
Агару Бичикте, Христостыҥ божогон кийнинде, баштапкы христиандардыҥ ортозынаҥ Агару Бичиктиҥ чындыгын ӧнӧтийин ӧскӧртӧр тӧгӱн судурчылар болор деп, озолодо айдылган (Апостолдордыҥ ижи 20:29, 30). Бу судур бӱдӱп калды. Тӧгӱн судурчылар Иисустыҥ ӱредӱлерин ӧскӧ кудай јаҥдардыҥ ӱредӱлериле булгап салгандар. Анайып, тӧгӱн христиан кудай јаҥ башталган (2 Тимофейге 4:3, 4). Агару Бичик чынынча неге ӱредип турганын бис чын оҥдоп турганыс деп, канайып бӱдӱмјиленер?
Чындыкты ачарга Иегованыҥ ӧйи једип келди. Ӧйдиҥ учында «чындык билгир кӧптӧӧр» деп, Кудай озолодо айдып салган (Даниил 12:4). 1870 јылда чындыкты бедиреп турган јаан эмес бӧлӱк улус, серкпелердиҥ кӧп ӱредӱлери Агару Бичикке тӧзӧлӧнбӧй јат деп оҥдогон. Оныҥ учун олор кандый ӱредӱлер Агару Бичикке тӧзӧлӧнгӧн деп аайына чыгарга, Кудайдыҥ Сӧзин шиҥдеп баштагандар. Иегова олордыҥ албаданганына алкыш берип, ич-кӧгӱс јанынаҥ оҥдоп турарын ачкан.
Ак санаалу улус Агару Бичикти лаптап шиҥдегендер. Бистеҥ озо болгон Агару Бичиктиҥ иштеҥкей Шиҥдеечилери, Агару Бичикти ӱренерине бистиҥ бӱгӱнги кӱнге јетире тузаланып турган эп-аргала тузаланган. Олор Агару Бичикти темаларла шӱӱжер болгон. Кандый бир теманы оҥдоорго кӱч болзо, оны јартагадый ӧскӧ ӱлгерлер бедирегендер. Олордыҥ оҥдогоны Агару Бичимелде бичилгениле келижип турза, оны бичип алып тургандар. Анайып Агару Бичик бойын бойы јартазын деп арга берип, олор Кудайдыҥ ады, Каандыгы, јерге ле кижиликке Кудайдыҥ амадузы керегинде, кижи божогон кийнинде не болот ло тирилиш керегинде чындыкты такып ачкан. Агару Бичикти тереҥ шиҥдеп, олор тӧгӱн ӱредӱлердеҥ ле јастыра кылык јаҥнаҥ јайымдалган (Иоанн 8:31, 32).
1879 јылда Агару Бичиктиҥ Шиҥдеечилери ончо улуска чындыкты ачар ӧй једип келди деп оҥдогон. Олор бӱгӱнги кӱнге јетире чыгып турган журнал чыгарып баштаган. Бу журнал «Каруулчы бакана Иегованыҥ Каандыгын јарлайт» деп адалат. Бис бӱгӱн Агару Бичиктиҥ чындыгын 240 ороондо ло јерлерде 750 кире тилдерге куучындап јадыс. Мынайып чындык билгир качан да кӧптӧбӧгӧн!
Христостыҥ ӧлӱминиҥ кийнинеҥ Агару Бичиктиҥ чындыгыла не болуп калган?
Кудайдыҥ Сӧзиндеги чындыкты јаҥыдаҥ ачарга не болушкан?