Ӱлӱрген ай

Слерге сӧсуккур болорго јеҥил эмес болуп турган болор. Андый болзо, слер јаҥыскан эмезигер. Темдектезе, Давид каан Иегованы сӱреен тыҥ сӱӱген де болзо, кезикте ого Кудайдыҥ сӧзин угарга јеҥил эмес болотон. Оныҥ учун ол Кудайга мӱргӱп, мынайып айткан: «Сеге сӧсуккур болор кӱӱнимди тыҥыт» (Сар. 51:12). Улуска сӧсуккур болорго нениҥ учун јеҥил эмес? Баштапкызында, биске ада-ӧбӧкӧлӧристеҥ сӧс укпас болор кӱӱн укталып келген. Экинчизинде, Иеговага удура болгон Сатана бисти бойыныҥ кийнинеҥ апарарга албаданат (2 Кор. 11:3). Ӱчинчизинде, бис кемге де багынар кӱӱн јок улустыҥ ортозында јададыс (Эф. 2:2). Оныҥ учун биске кинчектӱ кӱӱниске ле Сатанага ла оныҥ телекейине багынбас керек. Оныҥ ордына бастыра кӱчистеҥ Иегованыҥ ла оноҥ јаҥ алган улустыҥ сӧзин угар керек. w23.10 6, абз. 1

Иисустыҥ Канада эткен кайкалынаҥ неге ӱренедис? Јобош болорго. Иисус сууны кызыл аракы эдип ийгениле бир де мактанбаган. Ол нени де этсе, качан да мактанбай туратан. Карын, бастыра макты ла кӱндӱни теҥеридеги Адазына јетирген (Иоанн 5:19, 30; 8:28). Бис Иисус чылап јобош болзоос, бойыстыҥ јеткен једимдерисле база качан да мактанбазыс. Иеговага эдип турган ижисти бойыстыҥ кӱчисле эмес, карын, теҥеридеги Адабыстыҥ ийде-кӱчиле эдип турганыс деп сананарыс (Иер. 9:23, 24). Јӱк ле Иегова Адабыс бастыра макты ла кӱндӱни алар учурлу. Бис оныҥ болужы јогынаҥ нени эдер эдис? (1 Кор. 1:26—31). Бис јобош болзоос, та кемге де болушканыс учун улус бисти мактап ийзин деп сакыбай турарыс. Нениҥ учун дезе Иегова Адабыс бистиҥ јакшы керектеристи кӧрӱп турган ла баалап турган деп оҥдоп јадыс (Матфей 6:2—4 тӱҥдештиригер; Евр. 13:16). Иисус чылап јобош болорго албаданып турзаас, Иегованы сӱӱндиредис (1 Пётр 5:6). w23.04 4, абз. 9; 5, абз. 11, 12

Апостол Павел Кудайдыҥ агару тынына баштадып, христиандарды ӧскӧ улустыйын сананзын деп кӱӱнзеткен. Бис бу јӧпти јуунныҥ туштажуларында канайып тузаланар аргалу? Ӧскӧ улус база каруулар берерге турган деп ундыбай турзаас. Бу айалгага ӧскӧ јанынаҥ кӧрӱп ийзеер де. Темдектезе, слер најылараарла куучындажып турзаар, олорго сӧс тӧ айдар арга бербей, јӱк ле слер куучындайдаар ба? Јок эмей! Олор до бойыныҥ санаа-шӱӱлтезин айдып турзын деп кӱӱнзеп турган эмейигер. Анайып ла ок, ака-эјелер јуунныҥ туштажуларында јартамалдар берзин деп кӱӱнзеп турганыс. Улустыҥ кӱӱнин кӧдӱретен аргалардыҥ бирӱзи — олорго бойыныҥ бӱдӱмјизин кӧргӱзетен арга берери (1 Кор. 10:24). Оныҥ учун јуунда кӧп ака-эјелер каруулар берип турзын деп турган болзоос, карууларды кыскарта беригер. Каруулараар кыска да болзо, кӧп шӱӱлтелер айдарга албаданбагар. Нениҥ учун дезе абзацта шӱӱлтелерди ӱзе айдып салзаар, ӧскӧ кижиге кожуп айдарга не де артпас. w23.04 23, абз. 11—13

Бис улуска болужар учурлу. Эҥ ле јаан болуш — олорго Каандык керегинде сӱӱнчилӱ јарды јарлаары. Биске јарлаар иште эпчил болор керек. Нениҥ учун дезе бис башка-башка улуска туштайдыс. Олордыҥ культуразы да, угы-тӧзи де, јӱрӱмге кӧрӱми де башка болот. Темдектезе, апостол Павел коркышту эпчил кижи болгон, бис оноҥ тем алар аргалу. Оны Иисус «ӧскӧ калыктарга» апостол эдип кӧстӧгӧн (Рим. 11:13). Апостол Павел бу ишти сӱреен јакшы бӱдӱрген. Ол јӱк ле иудейлерге эмес, је грек те улуска, ӱредӱлӱ де, ӱредӱ јок то улуска, анайда ок чиновниктерге де, каандарга да јарлаган. Бу улустыҥ јӱрегин томултарга, ол «ончозына ончозындый боло берген» (1 Кор. 9:19—22). Павел олорло куучын баштаардаҥ озо, олордыҥ кандый айалгада чыдап ӧскӧнин, культуразын ла кудай јаҥын ајаруга алып туратан. Айдарда, јарлаар иште эпчил болуп, кажы ла кижиге канайып болужарын шӱӱп сананып турзаас, сӱӱнчилӱ јарды соныркап уккан кажы ла кижиниҥ јӱрегин томултар аргалу болорыс. w23.07 23, абз. 11, 12

Јобош болоры — кижиниҥ уйанын эмес, је ийде-кӱчтӱзин кӧргӱзет. Бу кылык-јаҥ айалга катуланып турза, токуналу артарга болужат. Јобош болоры — агару тынныҥ тӱжӱми (Гал. 5:22, 23). «Јобош» деп кӧчӱрилген грек сӧсти эмдик атты јобожытканы керегинде айткан тушта тузаланылат. Эмдик атты јобожыдып салза, ол сӧсуккур болуп та калза, ийде-кӱчтӱ артат. Анайып ла бис јобош болорго ӱренип турзаас, ийде-кӱчтӱ болорыс. Је бу кылык-јаҥга Кудайдыҥ агару тыныныҥ болужы јогынаҥ канайып та албаданзаас, бойыс ӱренип болбозыс. Оныҥ учун јобош болорго, Иеговага мӱргӱп, болуш сураар керек. Анайып, Иегованыҥ Керечилери олорды кара санаалу улус сурактарла туйуктап ийерге де турза, токуналу артып јат. Мыны кӧрӱп, айландыра улус кайкажып јадылар (2 Тим. 2:24, 25, ЈТ). Бу кылык-јаҥга канайып ӱренип алар? w23.09 15, абз. 3

Апостол Иоанн кижиниҥ куйка-бажы јымыраар кайкамчылу кӧрӱлте кӧрди. Теҥериде 24 аксагал Иегованы мактап турдылар. Олор Иегованы: «Макты, кӱндӱни... аларга јарамык» — деп айдышкан (Ачыл. 4:10, 11). Чындык ангелдерде де Иегованы мактайтан база кӧп шылтактар бар. Олор јаантайын Иегованыҥ јанында болот, оныҥ учун оны јакшы билер. Олор Иегованыҥ эдип турган керектерин ӱзе кӧрӱп јат. Мынаҥ улам оны јаантайын мактагылайт (Иов 38:4—7). Бис база мӱргӱӱлдеристе Иегованы мактаар аргалу. Темдектезе, Иегованы нениҥ учун сӱӱп турганысты ла бисти оныҥ кандый кылык-јаҥдары кайкадып турганын айдар аргалу. Агару Бичикти кычырып, ӱренип јаткан тушта, Иегованыҥ анчада ла слерге јарап турган кылык-јаҥдарын кӧрӧргӧ албаданып туругар (Иов 37:23; Рим. 11:33). А оноҥ Иеговага бойоордыҥ сезимдереерди куучындагар. Анайда ок Иегованы биске ле ака-эјелерге болужып турганы учун мактаарга јараар (1 Сам. 2:1, 2). w23.05 3—4, абз. 6, 7

1919 јылда Кудайдыҥ албатызы Улу Вавилонноҥ јайымдалган. Бу ла јылда «Агару јолго» туруп алган улусты уткыырга, «бӱдӱмјилӱ ле керсӱ кул» кӧстӧлгӧн (Матф. 24:45—47; Иса. 35:8). Бу кулдыҥ ла бу јолды белетеген улустыҥ болужынаҥ улам «Агару јолго» туруп алгандар Иегова ла оныҥ амадузы керегинде билгирлер алып туратан (Укаа 4:18). Анайда ок бойыныҥ јӱрӱмин Иегованыҥ некелтелери аайынча солыыр аргалу болгон. Иегова бу улусты тӱрген солынар деп сакыган ба? Јок. Иегова бойыныҥ албатызын араайынаҥ арутаган. Је келер ӧйдӧ ӱзе ле немени Иегованыҥ табы аайынча эдип турганыстаҥ кажыбыс ла јаан сӱӱнчи аларыс! Јолды туткан кийнинде оны јаантайын ла јазап турар керек. Анайып ла ок 1919 јылда ачылган «Агару јолдо» јаантайын ла кӧп иш эдилет. Мыныҥ амадузы кандый? Канча ла кире кӧп улус Улу Вавилонноҥ чыксын деп. w23.05 17, абз. 15; 19, абз. 16

Башкару јӧп дезе Башкару јӧптиҥ комитединиҥ болушчыларын таҥынаҥ ӱреткилейт. Бу болушчылар бӱгӱнги ле кӱнде Иегованыҥ организациязында башка-башка иш бӱдӱрет ле коркышту јаан молјуларлу болот. Олор, майлаткандар теҥеридӧӧн јӱре берзе, Христостыҥ койлорын башкарарга, эмди ле јакшы ӱредилип калган. Улу тӱбектиҥ чек ле учы јаар майлаткандардыҥ калганчызы теҥеридӧӧн јӱрӱп калза, јердеги ару бажырыш јоголбос. Бис Иисустыҥ башкарузынаҥ улам Иеговага оноҥ ло ары бажырарыс. Је ол ӧйдӧ Магог јериниҥ Гогы, албатылардыҥ коалициязы, Кудайдыҥ албатызына табару эдер. Је оныҥ табарузы кыска ӧйгӧ болор ло једимдӱ болбос (Иез. 38:18—20). Бистиҥ агару ижис бир де арайлабас. Иегова бойыныҥ улузын аргадап алар! Нениҥ учун дезе апостол Иоанн кӧрӱлтеде Христостыҥ «кара-бајырт» ӧскӧ койлорын кӧргӧн. Агару Бичикте бу улус «улу ачу-коронды» чыккан деп айдылат (Ачыл. 7:9, 14). w24.02 5—6, абз. 13, 14

Агару тынды аларга нени эдер керек? Иегованаҥ агару тын сураарыс, оныҥ тыныла бичилген Агару Бичикти тереҥ шиҥдеерис, анайда ок Кудайдыҥ тыны башкарган организацияга јӧмӧжӧрис. Ол тушта агару тынныҥ тӱжӱмине кирип турган кылык-јаҥдарыс тыҥыыр (Гал. 5:22, 23). Кудай тынын јӱк ле санаалары ла керектери ару улуска берип јат. Је бис санаабысты ла керектеристи быјарсыдып койзоос, Иегова биске агару тынын бербей барар (1 Фес. 4:7, 8). Анайда ок биске «судурларды керекке албай јӱрбегер» деген сӧстӧр аайынча јӱрер керек (1 Фес. 5:20, ЈТ). «Судурлар» дегенин канайып оҥдоор? Ол Кудайдыҥ тыны ажыра айдылып турган јетирӱлер болот. Бу јетирӱлерге Иегованыҥ кӱни керегинде ле бистиҥ јадып турган аҥылу ӧй керегинде јетирӱлер кирет. Оныҥ да учун бис ол ӧйди Армагеддонго јетире јӱрӱп болбозыс деп сананып, ыратпай јадыс. Карын, Иегованыҥ кӱни јууктап келген деп, ундыбай јӱредис. Бу недеҥ кӧрӱнер? Иегованы сӱӱндирерге, ару јӱрӱп турзаас ла кӧгӱс керектерге эрчимдӱ туружып турзаас (2 Пётр 3:11, 12). w23.06 12—13, абз. 13, 14

Бистиҥ электронный эдимисте порнографиялу јуруктар кӧрӱнип келзе, бис канайдарыс? Оны тӱрген ле кӧзистеҥ туура эдерис. Анайып эдерге не болужар? Андый ӧйдӧ Иеговала колбуларысты ӱребеске турганы́с болужар. Је кезикте кӧрӱнип келген јуруктар порнография эмес те болзо, олор кижиниҥ сексуальный кӱӱнин кӱйбӱредердеҥ айабас. Андый немелерди нениҥ учун кӧрбӧс керек? Нениҥ учун дезе бис эш-нӧкӧриске чындык артатан нормаларды бузарга бир де кӱӱнзебей јадыс (Матф. 5:28, 29). Таиландта јадып турган Дэвид деп аксагал куучындайт: «„Кӧрӱп турганым порнография эмес те болзо, Иегова ого канайып кӧрӧт?“ — деп бойымнаҥ сурайдым. Анайып сананганым јастыра неме этпеске болужат». Иегованаҥ айап турарга биске ойгор болоры болужар. Нениҥ учун дезе Агару Бичикте айдылганыла, «ойгор болоры» Иегованаҥ айап турарынаҥ башталат. w23.06 23, абз. 12, 13

«Тӧриндеги кыптар» дегени бистиҥ јуундарысты темдектеердеҥ айабас. Бис улу тӱбектиҥ ӧйинде кӧгӱс билегисле кожо болзоос, Иегова бисти аргадап алар. Оныҥ учун биске эмди ле бой-бойысты чыдажарга ла сӱӱрге албаданар керек. Мынаҥ јӱрӱмис камаанду. «Иегованыҥ улу кӱни» бастыра кижиликке коркышту коркымчылу ӧй болор (Соф. 1:14, 15). Иегованыҥ албатызына да јеҥил болбос. Је эмдештеҥ ле белетенип турзаас, ол ӧйдӧ токыналу артып, ӧскӧ дӧ улуска болужар аргалу болорыс. Ол тушта јолыбыска туштаган кандый ла кӱчтерди турумкай ӧдӱп чыгарыс. Анайда ок бистиҥ ака-эјелер тӱбекке тӱшсе, олорды килеп, канча кире аргабыс бар болужарыс. Сӱӱген ака-эјелеристеҥ бисти не де ырадып болбос. Ол тушта Иегова бисти кыйын-шыра јок ӱргӱлји јӱрӱмле кайралдаар (Иса. 65:17). w23.07 7, абз. 16, 17

Агару Бичикте коркышту кайкамчылу керектер эткен кӱчтӱ, чындык ишчилер керегинде айдылат. Олор ийде-кӱчтӱ болгон до болзо, кезикте бойлорын уйан деп сескилейтен. Темдектезе, Давид каан бойын «кайадый ийде-кӱчтӱ» деп сананган, је кезик ӧйлӧрдӧ ол та недеҥ де коркый беретен (Сар. 30:7). Анайда ок Самсонго до Кудай агару тыны ажыра коркышту тыҥ ийде-кӱч берген. Оныҥ да учун ол Кудайдыҥ болужы јогынаҥ тегин ле кижи болуп каларын оҥдоп туратан (Јарг. 14:5, 6; 16:17). Айдарда, Кудайдыҥ бу чындык ишчилери Кудайдыҥ болужы эмес болзо, канайып ийде-кӱчтӱ болотон эди?! Апостол Павел Иегованыҥ ийде-кӱчин керексип турганын база оҥдоп туратан (2 Кор. 12:9, 10). Ондо су-кадык јанынаҥ кӱчтер болгон (Гал. 4:13, 14). А кезикте ого Иегованы сӱӱндирерге кӱч болуп туратан (Рим. 7:18, 19). А качан јӱрӱминде нени эдетенин, канайдатанын билбей турза, ол санааркап баштайтан (2 Кор. 1:8, 9). Је Иегова ого ийде-кӱч беретен. Мынаҥ улам ол ӱзе ченелтелерди ӧдӱп чыккан. w23.10 12, абз. 1, 2

Бис бойысты неге де турбас кижи деп кӧрӱп турган болзоос, Иегова анайып сананбай турганын ундыбас керек. Нениҥ учун дезе Агару Бичикте айдылганыла, Иегова бойы бисти јууктадып алган (Иоанн 6:44). Бис бойыстыҥ јакшы јандарысты кӧрбӧй турган болорыс. Је Иегова јӱрегисти кӧрӱп јат (2 Лет. 6:30). Кудайыс бисти сӱӱп турарда, бис оныҥ сӱӱжине не алаҥзыырыс (1 Иоанн 3:19, 20). Кезик улус бойлорын чындыктаҥ озо эткен јаман керектери учун јинип јат (1 Пётр 4:3). Керек дезе чындык та христиандарга кинчектӱ кӱӱниле тартыжарга келижет. А слер керегинде нени айдарга јараар? Иегова слердиҥ кинчегерди таштабаган деп санаалар болот по? Эйе болзо, андый санаалар Иегованыҥ чындык ишчилеринде де болуп турганы слерди токунадар аргалу. Темдектезе, апостол Павел јастыраларынаҥ улам бойын јинип туратан (Рим. 7:24). Је ол кинчегин алынып, сууга чӧҥӱрилген. Андый да болзо, ол бойын уйан кижи деп кӧрӱп, мен «ончо апостолдордыҥ јабызы» деп айткан (1 Кор. 15:9; 1 Тим. 1:15). w24.03 27, абз. 5, 6

Биске Иоас каанныҥ јастыразын этпеске нени эдер керек? Јакшы камаанын јетирер најылар талдап турар керек. А јакшы најылар — Иегованы сӱӱп турган ла оныҥ сезимдерин ајаруга алып турган улус. Анайда ок најылар јӱк ле слерле јажыт болор учурлу эмес. Иоас Иодайдаҥ канча киреге кичинек болгонын ундыбай јӱрӱгер. Слердиҥ најылараар кандый деп билип аларга, бойоордоҥ мынайып сурагар: «Бу најылык меге Иеговага бӱткенимди тыҥыдарга болужып турган ба? Мениҥ најыларым Иегованы угарга албаданып турган ба, мени бого кӱӱнзедет пе? Олорго Иегова ла кӧгӱс темалар керегинде куучындажарга јарап турган ба? Олор Иегованыҥ јасактарын тооп турган деп кӧрӱнет пе? Олор меге ле јарагадый неме айдып турган ба? Эмезе јастырып турзам, тӱзедерге белен бе?» (Укаа 27:5, 6, 17). Слердиҥ најылараар Иегованы сӱӱбей турган болзо, олор слерге керек јок деп јартын айдып јадыс. Је слердиҥ најылараар Иегованы сӱӱп турган болзо, олордоҥ бек тудуныгар. Олорло болзоор, слерде ӱзе јакшы болор! (Укаа 13:20). w23.09 9, абз. 6, 7

Альфа — грек алфавиттиҥ баштапкы буквазы, а омега — калганчызы. Иегованыҥ «Альфа ла Омега» деп айтканы ол та нени де эдип баштаган болзо, оны учына јетире эдет деп кӧргӱзет. Иегова Адам ла Еваны јайаган ла кийнинде олорго айткан: — „Ӧзигер, кӧптӧгӧр, јерди толтырып ээлегер“ (Баш. 1:28). Ол ло ӧйдӧ Иегова, сӱрлеп айтса, «Альфа» деген. Иегова амадузын јартап берген: Адам ла Еваныҥ толо кемдӱ, сӧсуккур балдары јердиҥ ӱстин толтырып, рай эдип салар. А качан бу сӧстӧр бӱдӱп калза, Иегова, сӱрлеп айтса, «Омега» деп айдар. Бу андый ла болор деп, Иегова јерди ле теҥерини јайаган ла кийнинеҥ сӧзин берген. Анайып, Иегова бастыра амадузын бӱдӱрип салар деп керелеген. Оныҥ сӧстӧри јетинчи кӱнниҥ учында бӱдӱп калар (Баш. 2:1—3). w23.11 4—5, абз. 13, 14

Вавилонноҥ Израильдӧӧн јанарга, кайда да тӧрт ай керек болгон. Је Иегова албатызына јолдо болотон кандый ла буудактарды јоголтып салар деп сӧзин берген. Кудайдаҥ айап јӱрген еврейлерди Израильдӧӧн јанарыла колбулу кӱчтер бир де токтотпогон. Олор Иеговага бажырарга болуп, кандый ла кӱчтерди ӧдӧргӧ белен болгон. Вавилондо Иеговага бажырар ӧргӧӧ јок болгон. Моисейдиҥ јасагы да аайынча тайылгалар эдетен тагыл јок болгон. Анайда ок агару ишти башкарар абыстар да болбогон. Бого ло коштой олор Иегованы ла оныҥ нормаларын бир де тообой турган улустыҥ ортозында јаткан. Оныҥ учун Кудайдаҥ айап јӱрген еврейлер бойыныҥ јер-алтайына јанып, чындык бажырышты орныктыратан арганы сӱреен тыҥ сакыган. w23.05 14—15, абз. 3, 4

Биске «јарыктыҥ балдары» болорго агару тын керек болуп јат. Нениҥ учун дезе ол јогынаҥ бу ӱрелип калган телекейде ару артып болбозыс (1 Фес. 4:3—5, 7, 8). Агару тын бу телекейдиҥ кӧрӱминеҥ, ол тоодо Кудайдыҥ кӧрӱм-санаазына келишпей турган философиянаҥ, корулап јат. Анайда ок биске чын јӱрерге болужат (Эф. 5:9). Агару тынды канайып алар? Оны алатан аргалардыҥ бирӱзи — Кудайга мӱргӱӱри. Иегова «оноҥ сурап турган улуска агару тынды берер» деп, Иисус айткан (Лука 11:13, ЈТ). Анайда ок бис агару тынды христиан туштажуларда Кудайды мактап турзаас, аладыс (Эф. 5:19, 20). Агару тынныҥ болужынаҥ улам бис Кудайысты сӱӱндирип јӱрер аргалу. w24.03 23—24, абз. 13—15

Слер јаантайын чыдамкай болорго кӱӱнзейдеер бе? Эйе болзо, чыдамкай болорго мӱргӱгер. Чыдамкай болоры — агару тынныҥ тӱжӱми (Гал. 5:22, 23). Бу јараш кылык-јаҥга бойыстыҥ кӱчисле ӱренип болбозыс. Кезикте кандый бир кӱч айалгада биске чыдамкай болорго кӱч болуп турза, Иеговага мӱргӱп, агару тын сурап јадыс (Лука 11:13). Анайда ок бис ӱзе немеге Иегованыҥ кӧрӱмиле кӧрӧргӧ, болуш сураар аргалу. Мӱргӱген кийнинеҥ чыдамкай болорго, кажы ла кӱн албаданар керек. Канча ла кире кӧп мӱргӱп, албаданып турзаас, ончо ло кире чыдамкай болорына ӱренип аларыс. Бого коштой Агару Бичиктеги темдерди шӱӱп сананыгар. Ондо чыдамкай болгон кӧп улустыҥ темдери бичилип калган. Ол улустыҥ јӱрӱмин шӱӱп сананзаас, бис кӧп немеге ӱренип алар аргалу. w23.08 22—23, абз. 10, 11

Иисус апостол Пётрга Иегова оны артыргыспас деп оҥдоп аларга болушкан. Тирилген кийнинде ол, Пётр ла ӧскӧ апостолдор кӧп балык тудуп алзын деп, эткен (Иоанн 21:4—6). Бу кайкал Пётрды Иеговага оныҥ керексиништерин јеткилдеерге бир де кӱч эмес деп бӱдӱмјилеген. Ол, Кудайдыҥ Каандыгын јӱрӱминде баштапкы јерге тургузып турган улустыҥ керексиништерин Иегова јеткилдеер деп, Иисустыҥ айткан сӧстӧрин эске алган болор (Матф. 6:33). Оныҥ учун Пётр јӱрӱмин балык тударына эмес, је јарлаар ишке учурлаган. Б. э. 33-чи јылыныҥ Беженинчи кӱнинде Пётр јалтанбай, куучын-эрмек айткан. Бу куучын-эрмектеҥ улам канча муҥ улус чындыкты алынган (Ап. ижи 2:14, 37—41). Анайда ок Пётр самаритяндарга ла еврей эмес укту улуска Христостыҥ ӱренчиги болорго болушкан (Ап. ижи 8:14—17; 10:44—48). Бу учуралдардаҥ Иегова Пётрды јуундӧӧн башка-башка укту улусты экелерге, эрчимдӱ тузаланган деп јарт кӧрӱп јадыс. w23.09 20, абз. 1; 23, абз. 11

Вавилоняндар Иерусалимди јемирип салган кийнинеҥ эки јыл кире ӧдӧ берерде Вавилонныҥ каанына, Навуходоносорго, тӱш јеринде коркышту јаан чалу кӧрӱнген. Ол бойыныҥ ойгор улузына, ол тоодо Даниилге, олор бу тӱшти куучындап бербезе, оныҥ учурын јартап болбозо, олорды ончозын ӧлтӱрип саларым деп айткан (Дан. 2:3—5). Даниилге бу айалгада тӱргендеер керек болгон. Не дезе кӧп улустыҥ јӱрӱми јеткерлӱ айалгада болгон. Оныҥ учун «Даниил каанга барып, тӱшти јартап берерге, ӧй сураган» (Дан. 2:16). Мыны эдерге, ого јалтанбас болоры ла бӱдери керек болгон. Не дезе Даниил мынаҥ озо тӱштер јартаган деп, кайда да айдылбаган. Ол Вавилондо најыларына: «Кудай олорды килеп, бу јажытты ачып берзин... деп, теҥериниҥ Кудайына мӱргӱзин» — деген (Дан. 2:18). Иегова олордыҥ мӱргӱӱлдерине каруузын берген. Кудайдыҥ болужыла Даниил Навуходоносорго тӱшти јартап берген. Мынайып, Даниил ле оныҥ најылары тирӱ артып калган. w23.08 2, абз. 4

Чыдамкай болорыныҥ тузазын сананыгар. Чыдамкай кижи кӧп сабада ырысту ла амыр јӱрет. Оныҥ учун чыдамкай болуп турзаас, су-кадыгыс та јакшы болот. Анайда ок улусла јакшы колбуларлу болуп, јууныстыҥ бирлигин кичеейдис. А кем-кем бисти ачындырарга албаданып турган ӧйдӧ, бойысты тудунып турзаас, айалганы јымжадып саладыс (Сар. 37:8, сноска; Укаа 14:29). Је эҥ учурлузы — теҥеридеги Адабыска тӱҥей болуп, ого оноҥ јуук болуп каладыс. Чыдамкай болоры кажы ла кижини јарандырып турган сӱреен јараш ла тузалу кылык-јаҥ. Бу кылык-јаҥга ӱренип аларга јеҥил эмес те болзо, Иегованыҥ болужыла бис оноҥ ло ары ӱренер аргалу. Эмди јаҥы телекейдиҥ келерин сакып тура, бис «Иегова оноҥ айап тургандарды ла оныҥ чындык сӱӱжине иженип тургандарды кӧрӱп јӱрет» деп, алаҥзыбай јадыс (Сар. 33:18). Оныҥ учун чыдамкай болорын кийим чилеп кийип алала, оны уштыбай јӱректер! w23.08 22, абз. 7; 25, абз. 16, 17

Иаковтыҥ бичигениле, кижи: «Мен Кудайга бӱдӱп тургам» — деп айдып та турза, је керектери чек ӧскӧ немени кӧргӱзет (Иак. 2:1—5, 9). Анайда ок ол «карындажы эмезе сыйны јылаҥаш эмезе кӱндик курсагы јок» болгонын кӧрӧлӧ, болушпай турган кижи керегинде айдат. Андый кижи Кудайга бӱдӱп те турган болзо, је бӱдӱмјизин керектериле кӧргӱспей јат. Оныҥ учун оныҥ бӱдӱмјизинде туза јок. (Иак. 2:14—16). Бӱдӱмјини керектерле кӧргӱзер керек деп јартаарга, Иаков Раавтыҥ темин тузаланган (Иак. 2:25, 26). Раав Иегова керегинде угала, Кудай израильтяндарга болужып турган деп билип ийген (Иис. Н. 2:9—11). Ол бӱдӱмјизин керектериле кӧргӱскен: Израильдиҥ эки кайучылын улус ӧлтӱрерге турарда, олорды айылына јажырып алган. Кийнинде дезе толо кеминде эмес ле еврей укту эмес ӱй кижи, Раав, Авраам ла чылап акту деп адаткан. Раавтыҥ темиле болзо, бис бӱдӱмјибисти керектерисле кӧргӱзер учурлу. w23.12 5, абз. 12, 13

Бис, христиандар, Агару Бичиктиҥ јӱк ле тӧс чындыктарыла болорзынбай јадыс. Бис Кудайдыҥ тереҥ де чындыктарын оҥдоорго кӱӱнзейдис. Олорды оҥдоорго биске агару тын болужар (1 Кор. 2:9, 10). Слерге јилбилӱ болуп турган кандый бир суракты эмезе теманы талдап алала, оны тереҥжиде шиҥдеп кӧрӱгер. Анайып этсеер, слердиҥ Иеговала колбулараар оноҥ тыҥ болор. Темдектезе, Кудай алдындагы ӧйдӧ ишчилерине канайып сӱӱжин кӧргӱскенин шиҥдезеер, ол слерди де сӱӱп турган деп кӧрӱп ийереер. Ол эмезе израильтяндардыҥ Кудайга бажырганы бӱгӱнги христиандардыҥ бажырыжыла незиле тӱҥей болгонын тӱҥдештиригер. Анайда ок Иисус јерде болордо, ого кандый судурлар бӱткенин шиҥдеерге јараар. Агару Бичикти мынай шиҥдегени сӱреен јилбилӱ болот. Анайда ок слер «Путеводитель по публикациям Свидетелей Иеговы» ла «Индекс публикаций Сторожевой башни» деген бичиктерди тузаланар аргалу. Кажы ла јанынаҥ Агару Бичикти шиҥдезеер, бӱдӱмјигер тыҥыыр ла «Кудай керегинде билгирди» таап алараар (Укаа 2:4). w23.10 19, абз. 4, 5

«Тыҥ» деп кӧчӱрилген сӧс «чӧйӧрин» темдектейт. Ӱлгердиҥ экинчи бӧлӱгинде андый сӱӱш неге экелип турганы бичилет,— ол ака-эјелердиҥ јаманын таштайт. Мындый неме сананып ийзеер де, слер сӱӱжеерди эки колоорло алып, оны чӧйилип турган бӧс чилеп там ла там јаанада чӧйӧ тартып јадаар. Слер оны бир-эки эмес, је кӧп кинчектер бӧктӧлгӧнчӧ, чӧйӧ тартып јадаар. Бӧслӧ кандый бир кирлӱ јерди бӧктӧп саларга јараар, анайып ла сӱӱш ӧскӧ улустыҥ јастыраларын эмезе једикпестерин бӧктӧп салат. Тыҥ сӱӱш ака-эјелердиҥ јастыраларын, јеҥил эмес те болзо, таштаарга болужат (Кол. 3:13). Бис улустыҥ јаманын таштап турган болзоос, сӱӱжистиҥ бек болгонын кӧргӱзедис. Анайып Иегованы сӱӱндирип јадыс. w23.11 10—11, абз. 13—15

26 јаштуда Иосия каан ӧргӧӧни јазап баштаган. Ол иштер ӧткӱрилип турган тужында, «Моисей ажыра берилген Иегованыҥ јасагы» табылган. Ондо бичилген сӧстӧрди угуп ийеле, каан олорды капшай ла бӱдӱрип баштаган (2 Лет. 34:14, 19—21). Слер Агару Бичикти јаантайын кычырадаар ба? Слерге оны кычырарга јарап јат па? Слерге болужып турган ӱлгерлерди темдектеп аладаар ба? Иосияга 39 јаш кире болордо, ол јаан јастыра эдип ийеле, божоп калган. Иегованыҥ башкартузын сураардыҥ ордына, ол бойына иженген (2 Лет. 35:20—25). Бис мынаҥ неге ӱренедис? Биске канча да јаш болзын, Агару Бичикти ӱренгенис удап та калган болзын, биске Иеговала јаантайын јӧптӧжип турар керек. А мыны эдерге, Иеговага мӱргӱп, оныҥ Сӧзин шиҥдеп, кӧгӱзи тереҥ ака-эјелердеҥ јӧп сурап турар керек. Ол тушта бис јаан јастыралар да этпезис, ырысту да болорыс (Иак. 1:25). w23.09 12—13, абз. 15, 16

Агару Бичикте Иегованы сӱӱген ле ого иштеген кӧп ӱй улустыҥ јакшы темдери бар. Олор «бойын тудунып билер ле чындык» болгон (1 Тим. 3:11). Анайда ок сыйындар јуундагы кӧгӱзи тереҥ эјелердеҥ тем алар аргалу. Кару сыйындар, слер андый эјелерди билереер бе? Олордыҥ сӱреен јакшы кылык-јаҥдарына ајару эдип, ол кылык-јаҥдарды слер канайып кӧргӱзер аргалу деп шӱӱп сананыгар. Тереҥ кӧгӱстӱ кижи јобош болот. Ол Иеговала да, улусла да јакшы колбуларлу. Темдектезе, Иегованы сӱӱп турган ӱй кижи баш болотон принципти баалап јӱрет (1 Кор. 11:3). Бу принцип биледе де, јуунда да сӱреен керектӱ. w23.12 18—19, абз. 3—5

Иегова ӧбӧӧнинеҥ ӱйин сӱӱр ле оны јеткилдеер деп сакыйт. Анайда ок ӧбӧӧни ӱйине јуук најы болор ло ого Иеговала колбуларын тыҥыдарга болужар учурлу. Оныҥ учун карындаштарга Иегова чылап сананар, ӱй улусты тоор ло бӱдӱмјилӱ кижи болор керек. Бу ончо неме олорго ӱйлерине јакшы эш-нӧкӧрлӧр болорго ло билезин јакшы башкарарга болужар. Сен кижи алган кийнинде балдарлу болуп калар болорыҥ. Эҥ јакшы ада — Иегова. Сен оноҥ кӧп немеге ӱренип алар аргалу (Эф. 6:4). Иегова бойыныҥ Уулын сӱӱп ле јарадып турганын чыгара айдып туратан (Матф. 3:17). Сен ада болуп калзаҥ, балдарыҥа сен олорды сӱӱп тургаҥ деп айдып тур. Анайда ок олорды јаантайын, кичинек те эткен јакшы керектери учун, мактап тур. Иегованаҥ тем алып турган адалар балдарына тереҥ кӧгӱстӱ улус болуп каларга болужып јат. Сен ада болотон молјуга эмдигештеҥ ала белетенип баштаар аргалу. Темдектезе, јуундагы ака-эјелерди ле бойыҥныҥ билеҥди кичееп тур. Олорды сӱӱп турганыҥды ла нениҥ учун баалап турганыҥды айдып тур (Иоанн 15:9). w23.12 28—29, абз. 17, 18

Бис Иегованыҥ чындык ишчилери де болзоос, тӱҥей ле ӱзе улус ла чылап ооруп та јадыс, кандый ла кӱчтер де ӧдӱп јадыс. Анайда ок Кудайдыҥ албатызын кӧрӧр кӱӱни јок улус бисти истежип те јат, биске удурлажып та јат. Иегова бисти бу кӱчтердеҥ корулабай да турган болзо, биске болужар деп сӧзин берет (Иса. 41:10). Бис оныҥ болужыла сӱӱнчисти јылыйтпас аргалу, ойгор јӧптӧр чыгарар аргалу ла кандый да кӱч болзо, ого чындык артар аргалу. Иегова биске Агару Бичикте айдылганыла, «Кудайдыҥ амырын» берер (Флп. 4:6, 7). Бу амыр санаабысты ла јӱрегисти токунадат, андый амыр Иеговала јуук колбуларыстаҥ улам болот. Анайда ок бу амыр «кижиниҥ сагыжынаҥ бийик» деп айдылат. Ӧскӧртӧ айтса, Кудайдыҥ амыры бажыста јуралып турган амырдаҥ канча катапка артык. Слерде андый болгон бо? Иеговага мӱргӱп ийген кийнинеҥ јӱрегерге сӱреен амыр боло берген бе? Бу шак ла Иегованыҥ берип турган амыры. w24.01 20, абз. 2; 21, абз. 4

Иегованы сӱӱп турган улус оныҥ адын акту јӱрегинеҥ мактаарга кӱӱнзейт. Давид каан Иегованыҥ адын мактаганы — Кудайды бойын мактаганы — деп оҥдоп турган болгон. Качан бис Иегованыҥ адын угуп ийзеес, санаагыста капшай ла оныҥ сӱреен јараш кылык-јаҥдары ла коркышту кайкамчылу керектери јуралат. Давид теҥеридеги Адазыныҥ адын сӱреен тыҥ баалаган ла оны акту јӱрегинеҥ мактаарга кӱӱнзеген. Бу јанынаҥ темди биске левиттер база кӧргӱскен. Олор Кудайга тоомјызын кӧргӱзип, оныҥ агару адын мактаарга сӧс тӧ јетпес деп айткандар (Неем. 9:5). Чын ла, бис теҥеридеги Адабысты тооп, оныҥ адын мактап турзаас, оныҥ јӱрегин сӱӱндиредис. w24.02 9, абз. 6

Слер тургузып алган амадугарга јединип болбозоор до, Иегова слерди качан да јектебес (2 Кор. 8:12). Амадугарга јединип болбогоноордоҥ ӱредӱ алыгар. Једимдереерди ундыбагар. Агару Бичикте мынайда айдылган: «Кудай чындык, ол... эдип турган ижигерди... ундыбас» (Евр. 6:10, ЈТ). Оныҥ да учун христиан јолдо јеткен једимдеристи биске де ундыбай турар керек. Темдектезе, слер Иегованыҥ најызы болуп калганаар, ол керегинде куучындап баштаганаар ол эмезе сууга чӧҥӱрилгенеер. Канайып алдында да амадулар тургузып, ого једингенеер, эмди де оноҥ ло ары анайда эдигер. Слер Иегованыҥ болужыла кӧгӱс амадулараарга јединер аргалу. А амадугарга јӱткӱген тужыгарда, Иегованыҥ слерге канайып болушканын ла алкаганын кӧрӱп туругар. Бу слерге јаан сӱӱнчи экелер (2 Кор. 4:7). Слер чӧкӧбӧзигер, Иегова слерге арбынду алкыштар берер (Гал. 6:9). w23.05 31, абз. 16—18

Иеговага бойыныҥ ишчилерине сӱӱжин ле олорды баалап турганын кӧргӱзерге јарап јат. Бу бичикте ол Иисусты «сӱӱген Уулым» деп айткан эки учурал бичилген (Матф. 3:17; 17:5). Слер Иегованаҥ мындый јылу сӧстӧр угарга кӱӱнзейдеер бе? Бӱгӱн бис Иегованы бойын угуп болбозыс, је бис оны Агару Бичиктеҥ угар аргалу. Иисустыҥ сӧстӧрин кычырып турзаас, Иегова бисти баалап турган деп кӧрӧдис. Иисус Адазына сӱреен јуук болгон, оныҥ учун Адазы канайып эдер эди, Иисус анайып ла эдет. Иисустыҥ ӱренчиктери јастырып туратан, је андый да болзо, олор Иеговага чындык иштеген. Иисус олорды мактап, олорго карузып туратан. Бис Иисустыҥ бойыныҥ ӱренчиктерине айткан сӧстӧрин кычырып турзаас, бу Иегованыҥ меге айткан сӧстӧри деп сананар аргалу (Иоанн 15:9, 15). Је бисте ченелтелер болуп турза, Иегова бисти таштап ийген деп сананбас керек. Карын андый ӧйдӧ бисте ого сӱӱжисти ле ого иженип турганысты кӧргӱзетен арга болот (Иак. 1:12, JT). w24.03 28, абз. 10, 11