Иеговала кожо кажы ла кӱн иштенигер

1. Слерде Иеговала кожо иштейтен кандый аргалар бар?

ИЕГОВА толо кемдӱ улусты јайап турарда, олорды оныҥ амадузын бӱдӱрерге, оныла кожо иштензин деп кӱӱнзеген. Је бӱгӱнги кӱнде Кудайдыҥ ишчилери толо кемдӱ эмес те болзо, тӱҥей ле оныла кожо кажы ла кӱн иштеер аргалу. Темдектезе, бис Каандык керегинде сӱӱнчилӱ јарды јарлап, ӱренчиктер белетеер иште туружып турзаас, «Кудайла кожо иштеп» јадыбыс (1 Кор. 3:5—9). Бис Телекейдиҥ Улу Јайаачызыла иштенип, оныҥ јаан учурлу јакарузын бӱдӱрер аргалу. Бу биске сӱрекей јаан кӱндӱ болот! Је бисте оныла кожо иштейтен ӧскӧ дӧ аргалар бар. Бу јӧрмӧлдӧ, билегиске ле јуундагы ака-эјелериске кӱндӱзек болорго, теократиялык проекттерде ле агару иште кӧптӧдӧ туружарга канайып болужарга јараарын кӧрӧрис (Кол. 3:23).

2. Биске нениҥ учун бойысты качан да улусла тӱҥдештирбес керек?

² Бу јӧрмӧлди кычырып тура, бойыгарды улусла тӱҥдештирбегер, не дезе, Иеговага иштееринде кажы ла кижиниҥ аргазы ла айалгазы, керек дезе, јажы да, су-кадыгы да башка. Элчи Павел агару тынныҥ болужыла мындый сӧстӧр бичиген: «Кажы ла кижи бойыныҥ керектерин ченезин, ол тушта ӧскӧ улустаҥ эмес, бойы бойында јараду алар» (Гал. 6:4).

БИЛЕГЕРГЕ ЛЕ АКА-ЭЈЕЛЕРЕЕРГЕ БОЛУЖЫГАР

3. Бойыныҥ билезин кичеерге албаданып турган кижи Кудайла кожо иштеп турган деп, нениҥ учун айдарга јараар?

³ Иегованыҥ ишчилери бойыныҥ билелерине болужар учурлу. Слерге јууктарыгарды јеткилдеерге кӧп иштенерге келижип турган болор. Кезик энелер јаш балдарыла айылда отурат. А кемге де јажы јаанап калган ада-энезин кӧрӧр керек. Бу јаан учурлу молјулар болот, нениҥ учун дезе Агару Бичикте: «Бойыныҥ улузын, анчада ла айылдагы улузын кичеебей турган кижи дезе бӱдӱп јӱреринеҥ јана тӱжӱп, бӱтпес кижидеҥ јаман болгоны ол» — деп айдылат (1 Тим. 5:8). Слерде шак мындый айалгалар болзо, теократиялык керектерге кӧп туружып болбой турган болороор. Је андый да болзо, санааркабагар! Не дезе, бойыгардыҥ билегерди кичеерге албаданып турган болзоор, Иегованы сӱӱндирип јадыгар (1 Кор. 10:31).

4. Кӧп ада-энелер баштапкы јерге бойыныҥ кӱӱнин эмес, је Каандыкты тургузат деп канайып кӧргӱзедилер? Олор кандый алкыштар алат?

⁴ Христиан ада-энелер балдарына кӧгӱс амадулар тургузарга болужып турза, Иеговала кожо иштенип јат. Анайып, кӧп јииттер айылынаҥ ыраак јӱрӱп, Кудайга ӧйин толо берип иштенет: кем де миссионер болот, кем де јарчылар јетпей турган јерлерде пионер болот, а кем де Бет-Элде иштейт. Балдары айылынаҥ ыраак болгонынаҥ улам ада-энелер олорло каа-јаада кӧрӱжип те турган болзо, балдарын оноҥ ло ары агару ишти бӱдӱрзин деп кӱӱнзедет. Нениҥ учун? Нениҥ учун дезе олор јӱк бойлорын сананбай, балдарыныҥ Каандыкты баштапкы јерге тургузып турганына тыҥ сӱӱнип јадылар (3 Иоанн 4). Кӧп христиандар Аннаныҥ сезимдерин оҥдоп турган болор. Ол бойыныҥ уулын, Самуилди: «Мен оны Иеговага берип јадым» — деп айткан. Андый ада-энелерге Иеговала кожо иштейтен арга — сӱрекей јаан кӱндӱ болот. Анайда ок олор балдарыныҥ андый јӱрӱм талдаганына сӱӱнип јадылар (1 Сам. 1:28).

5. Јуунныҥ ака-эјелерине болужатан кандый аргалар бар? (Јӧрмӧлдиҥ бажындагы јурукты кӧрӱгер.)

⁵ Билегерге кӱч эмес болзо, слер ооруп турган, јажы јаанап калган эмезе ӧскӧ дӧ кӱчтерлӱ ака-эјелерге болужып болороор бо? Анайда ок мындый улуска болужып турган ака-эјелерге база болуш керек болордоҥ айабас. Слердиҥ јууныгарда кемге-кемге болуш керек болзо, ого болужарга албаданыгар. Темдектезе, бир эје јажы јаанап калган ада-энезин кӧрӱп турган болзын. Ол бойыныҥ керектерин эдип алзын деп, слер оныҥ ада-энезиле бир эмеш ӧйгӧ отурып болороор бо? А кемди де јуунга апарарга, эмезе кожо магазин барып келерге эмезе эмчиликте јаткан таныжына кожо барып келерге јараар. Слердиҥ болужыгар ака-эјениҥ мӱргӱӱлиниҥ каруузы болор аргалу. (1 Коринфтегилерге 10:24 кычырыгар.)

КӰНДӰЗЕК БОЛУГАР

6. Кӱндӱзек болорго нени эдер керек?

⁶ Кӱндӱзек болоры — Кудайла иштеп јӱрген улустыҥ аҥылу кылык-јаҥы болуп јат. Христиан Грек Бичимелдерде «кӱндӱзек» деп кӧчӱрилген сӧс «таныш эмес улуска јалакай баштанарын» темдектейт (Евр. 13:2). Агару Бичикте бисти кӱндӱзек болорына ӱредип турган кӧп улустыҥ темдери бичилип калган (Баш. 18:1—5). Биске ончо улуска — јуундагы ака-эјелериске де, ӧскӧ улуска да болужарга албаданар керек (Гал. 6:10).

7. Јорыкчы ишчилерге кӱндӱзек болгоныгардаҥ кандый алкыштар аларыгар?

⁷ Кудайла кожо иштейтен база кандый арга бар? Јорыкчы ишчилерди айылыста кӱндӱлеерге јараар. (3 Иоанн 5, 8 кычырыгар.) Анайып, бис бой-бойыстаҥ оморкоду аладыс (Рим. 1:11, 12). Олаф деп аканыҥ темин кӧрӱп ийектер. Ол јиит болордо оныҥ јуунына бойдоҥ аймак кӧрӧӧчи келген. Јуунныҥ ака-эјелеринде бу аканы јатыргызар арга болбогон. Оныҥ учун Олаф бойыныҥ Керечил эмес ада-энезинеҥ аканы јатыргызарга јӧп сураган. Оныҥ ада-энези јӧпсинген, је Олафка эби-јок јерге уйуктаарга келишкен. Је бу ого бир де кӱч деп билдирбеген. Ол эске алат: «Ол неделе качан да ундылбайтан ӧй болгон! Бис аймак кӧрӧӧчиле эрте туруп, ажанар ӧйдӧ јилбилӱ сурактар шӱӱжер болгоныс. Андый куучындар мениҥ кӱӱнимди кӧдӱрген, не дезе, мен ӧйимди толо берип иштеерге тыҥ кӱӱнзей бергем». Соондо 40 јылдыҥ туркунына Олаф башка-башка ороондордо миссионер болуп иштеген.

8. Улус бистиҥ болужарга албаданганысты баштап-тарый баалабай да турза, нениҥ учун јалакай болор керек? Тем куучындап беригер.

⁸ Бистиҥ јалакайысты улус баалабай да турза, јалакай баштанатан кандый ла аргалар бар. Испаниядагы бир эјебистиҥ темин кӧрӱп ийектер. Ол Эквадордоҥ келген Есика деп ӱй кижиле ӱредӱ ӧткӱрген. Бир катап Есика ӱредӱниҥ ӧйинде ыйлай берген. Кӧрӧр болзо, ол Эквадордо јадарда, акчага јединбей шыралап јӱрген. Бир катап курсагы божоп каларда, балазына суунаҥ ӧскӧ берер неме јок болгон. Есика кызычагын јайкап, Кудайдаҥ болуш сураган. Јаан удабай ого эки эје келген, је Есика олордыҥ берген журналын јара тартала: «Мен мыныла баламды азырайтам ба?» — деп чугулданган. Эјелер оны токунадып болбоды. Соондо олор оныҥ бозогозына курсак артыргызып салган. Эјелердиҥ јалакайы Есиканыҥ јӱрегин томулткан. Оныҥ учун Агару Бичикти ӱренген ӧйдӧ мӱргӱӱлине Кудайдыҥ каруузын кӧрбӧгӧнин оҥдоп ийеле, ол ыйлай берген. Оноҥ ло бери Есика Иеговага иштеерге шӱӱп алган. Эјелердиҥ анайып болушканы сӱрекей јакшы туза экелди (Јарл. 11:1, 6).

ТЕОКРАТИЯЛЫК ПРОЕКТТЕРДЕ ТУРУЖЫГАР

9, 10. а) Јебрен ӧйдӧ Кудайдыҥ албатызы Иегованыҥ агару ижине канайып јӧмӧшкӧн? б) Акалар јуунга болужарга нени эдер аргалу?

⁹ Јебрен ӧйдӧ израильтяндарда Иегованыҥ агару ижине јӧмӧжӧтӧн аргалар сӱреен кӧп болгон (Чыг. 36:2; 1 Лет. 29:5; Неем. 11:2). Бӱгӱнги де кӱнде бис ака-эјелерге болужарга, бойыстыҥ аргаларысты, ӧйисти, анайда ок акча-јӧӧжӧбисти берер аргалу. Анайып, бис јаан сӱӱнчи ле кӧп алкыш аларыс.

¹⁰ Акалар Иеговала кожо иштенерге нени эдер аргалу? Агару Бичик олорды болушчы ишчилер ле аксагалдар болорына кӱӱнзедет (1 Тим. 3:1, 8, 9; 1 Петр 5:2, 3). Андый акалар улуска јаҥыс ла кӧгӱс јанынаҥ эмес, је ӧскӧ дӧ јанынаҥ болужарга кӱӱнзейт (Ап. ижи 6:1—4). Аксагалдар слерди туштажуларда болушчы башкараачылар (распорядитель) болзын деп, эмезе бичиктер ле јарлайтан участоктор јанынаҥ болужарга эмезе Каандыктыҥ Туразында иш эдерге сураза, слер јӧпсинереер бе? Бу јакаруларды бӱдӱрип турган акалардыҥ айтканыла болзо, мынайып болушканынаҥ олор јаан сӱӱнчи алат.

11. Бир эјеге, теократиялык туралар туткан ӧйдӧ тапкан најылары канайып болушкан?

¹¹ Теократиялык туралар тударында туружып турган ака-эјелер јаҥы најылар таап алат. 18 јылдыҥ туркунына Каандыктыҥ Тураларын тударында турушкан Марджи эјениҥ темин кӧрӱп ийектер. Бу јылдардыҥ туркунына ол јиит сыйындарга ајару эдип, олорло бойыныҥ билгирлериле, анайда ок ченемелиле ӱлешкен. Мындый проекттерде турушканы бой-бойын кӧгӱс јанынаҥ оморкодотон јакшы арга деп, Марджи айдат (Рим. 1:12). Је качан Марджиниҥ јӱрӱминде кӱч ӧйлӧр башталарда, Каандыктыҥ Тураларын тударында најылажып алган сыйындар, ого јаан болуш јетирген. Слер теократиялык туралар тударында турушканаар ба? Слерде ченемел јок то болзо, бу ишке болужар эдеер бе?

12. Ар-бӱткенниҥ тӱбегине тӱшкен ака-эјелерге канайып болужарга јараар?

¹² Бис ар-бӱткенниҥ тӱбегине тӱшкен ака-эјелерге болужып турзабыс, база Иеговала иштеп јадыс. Мындый тӱбекке тӱшкен улуска, кезик ака-эјелер акча-јӧӧжӧлӧ болужып јат (Иоанн 13:34, 35; Ап. ижи 11:27—30). Кезиги ар-бӱткенниҥ тӱбегинеҥ улам болгон чыгымды орныктырар иштерде туружат. Бир тем кӧрӱп ийектер. Польшада суу кӧдӱрилерде, Габриела деген эјениҥ туразы бузылып калган. Мынаҥ улам јуугындагы јуундардыҥ акалары ого болужып келерде, Габриела тыҥ сӱӱнген. Ол мындый сӧстӧр айдат: «Јылыйткан јӧӧжӧни не карамдаар, карын јаан кирелте алганымга сӱӱнип јадым. Нениҥ учун дезе бу учурал мени јаан христиан јуунга кирип турганымга бӱдӱмјилеген ле кӧгӱс јанымды тыҥыткан». Бого тӱҥей айалгада болгон ака-эјелерде база мындый сезимдер болот. А мындый иштерге турушкан ишчилер, Иеговала кожо иштенгенинеҥ улам, сӱрекей јаан сӱӱнчи алат. (Апостолдордыҥ ижи 20:35; 2 Коринфтегилерге 9:6, 7 кычырыгар.)

13. Улуска акту кӱӱнистеҥ болушканыс, бисти Иеговага канайып јууктадат? Тем куучындап беригер.

¹³ Стефани деген эје, анайда ок ӧскӧ дӧ ака-эјелер база Иеговала иштенген: олор јуу-чактаҥ улам тӧрӧл јерин артыргызып, США-дӧӧн кӧчкӧн Керечилердиҥ билелерине болушкан. Олор андый билелерге тура ла керектӱ јӧӧжӧ таап берген. Стефани мынайып куучындайт: «Ака-эјелердиҥ, телекейлик карындаштыктыҥ сӱӱжин кӧрӱп, сӱреен тыҥ сӱӱнгени ле сӱреен јаан быйанын айтканы бистиҥ јӱрегисти томулткан. Олор бисти олорго болушкан деп сананган, је чынынча болзо, олор биске канча киреге кӧп болушкан. Олордыҥ сӱӱжин, бирлигин, Кудайга бӱдерин ле иженип турганын кӧрӱп, бис Иегованы оноҥ тыҥ сӱӱп баштаганыс. Бис, Иегованыҥ организациязы ажыра берилип турган ончо неме учун, сӱреен тыҥ быйанду болодыс».

АГАРУ ИШТЕ КӦПТӦДӦ ТУРУЖЫГАР

14, 15. а) Судурчы Исаия кандый кӧрӱмдӱ болгон? б) Каандыктыҥ јарчылары судурчы Исаиянаҥ кандый тем алар аргалу?

¹⁴ Слер Иеговала кӧптӧдӧ иштеерге кӱӱнзейдеер бе? Јарчылар јетпей турган јерлерге кӧчӧр аргагар бар ба? Мындый ишке туружарга айылдаҥ ыраак барбай да иштеерге јараар, је кезик ака-эјелердиҥ айалгазы олорго айылынаҥ ыраак јерлерде иштеер арга берет. Олордыҥ кӧрӱм-санаазы судурчы Исаияныҥ кӧрӱмине тӱҥей. Качан Иегова: «Кемди ийейин? Бис учун кем барар?» — деп сураарда, Исаия — «Мен белен! Мени ий!» — деп каруу јандырган (Иса. 6:8). Слерде де болуш керектӱ јерге кӧчӧтӧн кӱӱн ле арга бар ба?

¹⁵ Иисус јарлаар иш ле ӱренчиктер белетеери керегинде айдып, мындый сӧстӧр айткан: «Кезер аш кӧп эди, ишчилер дезе ас. Анайдарда, кыраныҥ Бийин јайнагар, кыразына ишчилер ийзин» (Матф. 9:37, 38). Слерде јарчылар јетпей турган јерлерге кӧчӱп, пионер болотон арга бар ба? Јок болзо, андый аргалу улуска слер канайып болужар эдеер? Кӧп ака-эјелер, Иеговага ла јуугыска сӱӱжисти кӧргӱзетен эҥ јакшы арга — кезер ажы кӧп, је ишчилери ас јерде пионер болуп иштеери деп айдат. Јаан сӱӱнчи экелип турган агару иште кӧптӧдӧ туружатан база кандый аргалар бар?

16, 17. Агару иште кӧптӧдӧ туружарга, база нени эдерге јараар?

¹⁶ Слер Бет-Элде эмезе теократиялык туралар тударында бир эмеш ӧйгӧ иштеерге эмезе внештатный ишчи болорго кӱӱнзейдеер бе? Кудайдыҥ организациязында кандый ла ишти бӱдӱрерге белен улус, ӧскӧ дӧ ишке иштеген болзо, јаантайын керектӱ болот. Иегова болуш керек јерлерде иштеерге белен ака-эјелерди тыҥ баалап јат (Сар. 110:3).

¹⁷ Айса болзо, агару иште оноҥ тузалу болорго, кандый бир ӱредӱ аларга кӱӱнзейдеер бе? Андый болзо, слер Каандыктыҥ јарчыларыныҥ сургалына (Школа благовестников Царства) заявление бичиир аргалу. Бу сургал ӧйин толо берип иштеп турган, кӧгӱзи тереҥ јарчыларга Иеговага оноҥ кӧп иштеерге болужат. Бу сургалга ӱренерге тургандар, кӧстӧткӧн јерге барып иштеерге белен болор учурлу. Андый арганы не тузаланбас? (1 Кор. 9:23).

18. Иеговала кӱнӱҥ сайын иштеп турган улусты кандый кайрал сакыйт?

¹⁸ Иегованыҥ ишчилери болгон адыста, бис улусты сӱӱп, олорго јалакай болуп, бойысты кысканбай, олорго кӱнӱҥ сайын болужадыс. Анайып, бис амыр ла сӱӱнчи аладыс (Гал. 5:22, 23). Слердиҥ айалгагар кандый да болзо, Иегованыҥ кысканбазынаҥ тем алып, јаантайын оныла кожо иштенигер. Ол тушта кӧп алкыштар аларыгар! (Укаа 3:9, 10).