Кудайдыҥ ӱредӱлерине келишпей турган кандый ла кӧрӱм-шӱӱлтелерди јоголтыгар!

1. Майлаткан христиандарды элчи Павел неге кӱӱнзеткен?

ЭЛЧИ Павел баштапкы чактыҥ христиандарын: «Бу телекейге эптешпегер» — деп кӱӱнзеткен (Рим. 12:2). Павел бу сӧстӧрди јӱрӱмин Кудайга учурлап салган майлаткан ака-эјелерге нениҥ учун айткан? (Рим. 1:7).

2, 3. Сатана бисти Иегованаҥ туура апарарга нени тузаланат? Санаабыска тереҥ кирип калган кӧрӱмнеҥ айрыларга, биске нени эдер керек?

² Павел кезик христиандарды бу телекейдиҥ кӧрӱм-санаазын алынып турган деп санааркаган (Еф. 4:17—19). Андый ла ок неме бисле де болордоҥ айабас. Бу телекейдиҥ башкараачызы бисти Иегованаҥ туураладарга, башка-башка эп-аргалар тузаланат. Темдектезе, ол бистиҥ бойысты ӧйинеҥ ӧткӱре сӱӱп турганысты эмезе улустаҥ јаан ајару аларга турганысты тузаланардаҥ айабас. Ол бисти бойына тартарга, керек дезе, јаштаҥ ала кандый айалгада чыдаганысты, кандый ӱредӱ алганысты ла культурагысты да тузаланардаҥ айабас.

³ Андый болзо, тереҥ тазылданып калган кӧрӱм-санаабысты солыыр арга бар ба? (2 Кор. 10:4). Павелдиҥ бичигенине ајарып ийектер: «Кудайды билип аларга удурлажып турган тӱп-шӱӱлтелерди ле улуркашты јайрадып, кандый ла умзанышты Христоско уккур эдерге олјолойдыс» (2 Кор. 10:5). Эйе, Иегованыҥ болужыла кандый ла јастыра кӧрӱмнеҥ айрылар арга бар. Канайып кандый бир эм-тус коронныҥ каршузын токтодып ийет, анайып ла Кудайдыҥ Сӧзи Сатананыҥ телекейиниҥ каршузын јоголтып салар аргалу.

«САНААГАРДЫ ЈАҤЫРТЫП, БОЙЫГАРДЫ СОЛЫГАР»

4. Бистиҥ кӧбизис чындыкты билип алала, кандый солынталар эткен?

⁴ Кудайдыҥ Сӧзиндеги чындыкты билип алала, Иеговага иштеп баштаарга, кандый солынталар эткенигерди эске алып ийзегер. Бистиҥ кӧбизиске темигип калган јӱрӱмисти солыырга келишкен (1 Кор. 6:9—11). Иегова биске кинчектиҥ јолын артыргызарга болушканына јаан быйанду болодыс.

5. Римдегилерге 12:2-ле болзо, биске кандый эки алтам эдер керек?

⁵ Је биске бир де јайымжыбас керек. Бистер христиан болуп калала, уур кинчектер этпей де турган болзоос, ойто ло јаман кылыкка кӱӱнзеткедий не ле немедеҥ оноҥ ло ары тууралаар керек. Биске не болужар? Элчи Павел христиандарга: «Бу телекейге эптешпегер, је санаагарды јаҥыртып, бойыгарды солыгар» — деп айткан (Рим. 12:2). Анайдарда эки алтам эдер керек. Баштапкызында, бу телекейге эптешпес керек, ӧскӧртӧ айтса бу телекейдиҥ кӧрӱмине кирбей јадыс. Экинчизинде, санаабысты јаҥыртып, бойысты солыыр керек, ӧскӧртӧ айтса, кӧрӱмисти солып јадыс.

6. Матфей 12:43—45-те бичилген Иисустыҥ сӧстӧринде кандый ӱредӱ бар?

⁶ Павел солыныгар деп сӧслӧ јӱк ле тыш јанысты солыырын эмес, је ич јанысты бӱткӱлинче солыырын айткан. («Тыш бӱдӱмигерди эмес, ич јаныгарды солыгар» деп рамканы кӧрӱгер.) Биске санаагысты солыыр керек — бу дезе кӧрӱмисти, кылык-јаҥысты, анайда ок неге кӧп тартылып турганысты солыырын кӧргӱзет. Оныҥ учун кажыбыска ла бойыстаҥ мынайып сураар керек: «Мен јӱк ле тыш јанымды солыйдым ба эмезе ич јанымды база солыйдым ба?» Бу јаан учурлу сурак. Матфей 12:43—45-те Иисус бистеҥ не некелип турганын јартап берген. (Кычырыгар.) Бу сӧстӧрдӧ јаан учурлу ӱредӱ бар: јастыра санаалардаҥ јӱк ле айрылар керек эмес, је айрылган санаалардыҥ јерин Кудайды сӱӱндиретен санааларла толтырар керек.

САНААГЫРДЫ СОЛЫЫРГА КӰӰНЗЕДЕТЕН ИЙДЕ-КӰЧ АЛЫНЫГАР

7. Бойыстыҥ ич јанысты солыырга нени эдер керек?

⁷ Је бисте бойыстыҥ ич јанысты солыйтан арга бар ба? Кудайдыҥ Сӧзинде мынайып айдылат: «Санаагарды тынла јаҥыртып [санаагарды солыырга кӱӱнзедип турган ийде-кӱч алынып, ЈТ], Кудайга тӱҥейлеп, чындаптаҥ акту ла агару эдип јайалган јаҥы кижини бойыгарга алынарга ӱрендигер» (Еф. 4:23, 24). Эйе, андый јаан солынталар эдерге кӱч те болзо, је солынатан арга бар. Биске јӱк ле јастыра кӱӱнисти токтодып, бир де јаман неме этпей турар керек эмес, је сагыжысты солыырга кӱӱнзедетен ийде-кӱч алынар керек, ӧскӧртӧ айтса бойыстыҥ кӧрӱм-санаабысты солыыр керек. Кӧрӱм-санааны солыырга кылык-јаҥысты, кӱӱнисти, анайда ок кандый бир немени недеҥ улам эдип турганысты солыыр керек. Мындый солынталарды јаантайын эдер керек.

8, 9. Бойыстыҥ кӧрӱм-санаабысты солыыры јаан учурлу деп, бир аканыҥ теминеҥ канайып кӧрӱнет?

⁸ Алдында јаантайын согужып туратан бир акала болгон учурал кӧрӱп ийектер. Бу ака аракызын таштап, согушпай барарда, оныҥ јадып турган деремнезине бу јаан кере болгон. Је бир катап эҥирде, чӧҥӱрилген кийнинеҥ јаан удабай, сакыбаган јанынаҥ бир учурал болды. Оныҥ айылына эзирик кижи базып келеле, акала согужарга турарда, ака озо баштап бойын тудунып турды. Је байагы эзирик кижи Иегованы јамандап баштаарда, ол чыдажып болбой, айылынаҥ чыгып, оны токпоктоп салган. Бу ака бойын нениҥ учун тудунып болбогон? Нениҥ учун дезе ол Агару Бичикти ӱренип турала, чугулданбай тудунып турарына ӱренип те алган болзо, је оныҥ кӧрӱм-санаазы солынбай артып калган.

⁹ Је ака бойынаҥ чӧкӧбӧгӧн (Укаа 24:16). Аксагалдардыҥ болужыла ол чыннаҥ ла солынып, кийнинде аксагал болуп калган. Канча јылдар ӧдӧ берерде, мындый учурал ойто ло катап болды. Бир катап эҥирде Каандыктыҥ Туразыныҥ јанында эзирик кижи бир аксагалды согорго сананган. Ака нени этти? Ол байагы кижиле јымжак, тоомјылу куучындажып, оны токунадып ийеле, айылына јетире ӱйдежип салган. Бу ака недеҥ улам мынайып эткен? Ол Иегованыҥ болужыла бойыныҥ кӧрӱм-санаазын бӱткӱлинче солып, јобош болорына ла улусла амыр јӱрерине ӱренип алган.

10. Бойыстыҥ ич јанысты солыырга, база нени эдер керек?

¹⁰ Је андый солынталар тӱрген болбой јат. Оныҥ учун бойыстыҥ јаныстаҥ ончо кӱчисти салып солынарга, канча јылдар керек болордоҥ айабас (2 Петр 1:5). Мынайып солынарга, «чындыкта болгонысла» болорзынбай, бойыстыҥ кӧрӱм-санаабысты албаданып солыыр керек. Бу јанынаҥ биске не болужарын шӱӱжип ийектер.

КӦРӰМ-САНААБЫСТЫ КАНАЙЫП СОЛЫЫР?

11. Мӱргӱӱл биске бойыстыҥ кӧрӱм-санаабысты солыырга канайып болужат?

¹¹ Баштапкызында, мӱргӱӱр керек. Јакшы темди биске сарнаачы кӧргӱскен. Ол мынайып бичиген: «О-о Кудайым, меге ару јӱрек берзеҥ. Јалтанбас, јаҥы кӱӱн-санаа берзеҥ» (Сар. 51:10). Бис Иегованыҥ болужы јогынаҥ бойыстыҥ кӧрӱм-санаабысты солып болбозыс. Је Иегова биске солынарга болужар деп, нениҥ учун алаҥзыбаска јараар? Иегова Иезекииьлдиҥ ӧйинде јаткан кедер Израиль албатыга нени айтканын сананып ийектер: «Мен олорго бир јӱрек берерим, јаҥы кӱӱн-санаа берерим. Мен... олорго эт јӱрек берерим [ӧскӧртӧ айтса Кудайдыҥ сӧзине уккур јӱрек]» (Иез. 11:19). Иегова израильтяндарга солынзын деп, болужарга кӱӱнзеген. Ол биске де анайып ла болужарга кӱӱнзейт.

12, 13. а) Сарын 119:59-ла болзо, биске нени шӱӱп сананар керек? б) Бойыстаҥ кандый сурактар сураарга јараар?

¹² Экинчизинде, шӱӱп сананар керек. Агару Бичикти кажы ла кӱн лаптап кычырып, кандый санаалардаҥ ла кылык-јаҥнаҥ айрыларын шӱӱп сананар керек. (Сарын 119:59 кычырыгарb; Евр. 4:12; Иак. 1:25.) Биске бу телекейдиҥ кӧрӱминеҥ улам неге кӧп тартылып турганысты эмезе нени кӧп кӱӱнзеп турганысты билип алар керек. Анайда ок бойыстыҥ уйан јандарысты јобош алынып, олорло бастыра кӱчистеҥ тартыжар керек.

¹³ Темдектезе, бойыстаҥ мынайып сураарга јараар: «Мен бир эмеш те болзо, кӱйӱнип эмезе бийиркенип тургам ба? (1 Петр 2:1). Мен бойымныҥ угы-тӧзимле, алган ӱредӱӱмле эмезе арга-чагымла улуркайдым ба? (Укаа 16:5). Менеҥ јокту улусты јабыс кӧрӧдим бе? Ӧскӧ укту улусты јаман сананбайдым ба? (Иак. 2:2—4). Сатананыҥ телекейинде мени не-не јилбиркедет пе? (1 Иоанн 2:15—17). Балыр јӱрӱмле эмезе улусты базынып согорыла колбулу соот-јыргалдар меге јарап турган ба? (Сар. 97:10; 101:3; Ам. 5:15)». Бу сурактардыҥ каруулары биске кандый јанысты солыйтанын кӧргӱзип берер. Мындый тереҥ кирип калган кӱӱн-санаабысты ла кылык-јаҥысты солып салзаас, бис теҥеридеги Адабысты сӱӱндирерис (Сар. 19:14).

14. Најыларды нениҥ учун чын талдаар керек?

¹⁴ Ӱчинчизинде, најыларды чын талдаар керек. Биске јуук куучындажып турган улузыс билдирбезинеҥ каршузын эмезе камаанын јетирип јат (Укаа 13:20). Иште эмезе школдо бисле куучындажып турган улусты, биске Кудайды сӱӱндирип турган санаалар сананарга болужып турган деп айдып болбозыҥ. Је христиан туштажуларда бис сӱрекей јакшы најылар табып алар аргалу. Анда бис «сӱӱрге ле јакшы керектер эдерге» кӱӱнзедиледис (Евр. 10:24, 25).

«БӰДЕРИНДЕ ТЫҤЫДЫНЫГАР»

15, 16. Сатана бистиҥ кӧрӱм-санаабысты солыырга канайып албаданат?

¹⁵ Сатана бистиҥ кӧрӱм-санаабысты солыырга албаданат деп ундыбагар. Ол Кудайдыҥ Сӧзиндеги чындык биске тузазын јетирип турган деп билер, оныҥ учун бистиҥ санаабысты солыырга, јӱзӱн-јӱӱр санаа-шӱӱлтелер ажыра бисти неде-неде алаҥзый берзин деп албаданат.

¹⁶ Сатана Евага: «Кудайдыҥ айтканы „чын эмеш пе“?» — деп, берген сурагын биске де берет деп айдарга јараар (Баш. 3:1). Сатананыҥ телекейинде бисти алаҥзыткадый шӱӱлтелерди јаантайын угадыс, темдектезе: «Кудай гомосексуализмди јаратпай турганы чын эмеш пе? Кудай Рождествоны ла чыккан кӱнди байрамдабазын деп турганы чын эмеш пе? Кудай слерди кан урдырбазын деп айтканы чын эмеш пе? Улусты тыҥ сӱӱп турган Кудай, слерди јууннаҥ чыгарылган тӧрӧӧндӧригерле эмезе најылараарла куучындашпазын деп турганы чын эмеш пе?».

17. Биске бӱдеристи алаҥзуга тургускадый сурактар берилзе, нени эдер керек? Колоссыдагыларга 2:6, 7-ле болзо, биске неге јӱткӱӱр керек?

¹⁷ Бистиҥ бӱдӱп турганыста алаҥзу болбос керек. Бӱткенисле колбой јаан учурлу сурактардыҥ каруузын албай турзаас, бисте јаан алаҥзыштар башталардаҥ айабас. Мындый алаҥзыштар учы-учында бистиҥ кӧрӱм-санаабысты корондоп, Кудайга бӱдӱп турганысты бузар болор. Андый неме болбозын деп, нени эдер керек? Агару Бичик бисти санаагысты солызын деп мынайып кычырат: «Кудай... нени кӱӱнзеп турганында, не Ого јакшы, не јарап турганында, Оныҥ толо кеми не болгонында бӱдӱмјиленип туругар» (Рим. 12:2, ЈТ). Кудайдыҥ Сӧзин ле ого тӧзӧлӧнгӧн бичиктерди јаантайын ӱренип турзаас, алган билгирлеристиҥ чынында ла Иегованыҥ нормаларында бир де јазык јок деп бӱдӱмјиленип аларыс. Ол тушта Кудайга бӱдӱп турганыс тереҥ тазылданган агаштый бек болор. Анайып бис турумкай болорыс. (Колоссыдагыларга 2:6, 7 кычырыгар.)

18. Сатананыҥ телекейиниҥ каршулу салтарына кирбеске не болужар?

¹⁸ Кудайга бӱдӱп турганаарды тыҥытпазагар, слер учун оны кем де тыҥыдып болбос. Оныҥ учун бойыгардыҥ кӧрӱм-санаагарды оноҥ ло ары солыгар. Иеговага мӱргӱп, агару тыҥ сураарын токтотпогор. Нени кӱӱнзеп турганаарды ла неге кӧп тартылып турганаарды шиҥдеп туругар, шӱӱп сананарга ӱренигер. Најыларды чын талдагар, кӧрӱм-санаагарды јакшы јанындӧӧн солыырга болужатан улусла куучындажыгар. Ол тушта «Кудайды билип аларга удурлажып турган тӱп-шӱӱлтелерди ле улуркашты јайрадып» турарыгар. Анайып, Сатананыҥ телекейи слерди корондоп болбос (2 Кор. 10:5).