Бойыныҥ амадузына јединип турган јарлаар иштиҥ туштажулары
1. Јарлаар иштиҥ туштажулары кандый амадулу ӧткӱрилет?
1 Бир катап, јарлап барарына ийердеҥ озо, Иисус бойыныҥ 70 ӱренчигиле кожо јуулышкан (Лука 10:1—11). Олор јаҥыскан болбос деп, Иисус эске алындырып тыҥыткан, не дезе олорды «кыраныҥ Бийи» — Иегова башкарып апарар. Анайда ок, Ол олорго јарлаар ишти канайып бӱдӱрери керегинде јакарулар берип, «экидеҥ» ийди. Јарлап барардаҥ озо ӧткӱрип турган туштажуларыс андый ла амадулу: кӱӱнин кӧдӱрер, таскадар ла башкарту берер.
2. Јарлаар иштиҥ туштажузы канча минутка ӧдӧр учурлу?
2 Эмди јарлаар иштиҥ туштажулары 10—15 минутка улалат, ондо јарчыларды экидеҥ бӧлийт, олорго участоктор берилет ле мӱргӱӱл айдылат. Бу јаҥжыгуга солунта кийдирилип јат. Кандык айдаҥ ала јарлаар иштиҥ туштажулары 5—7 минутка болор. Јарлаар иштиҥ туштажузы јуунндардыҥ кийнинеҥ ӧткӱрилетен болзо, оноҥ кыска болор учурлу, нениҥ учун дезе бӱдерин тыҥыдатан библиялык шӱӱлтелерди јуулган улус јаҥы ла уккан. Јарлаар иштиҥ кыска туштажулары јарлаар иште кӧп иштенер арга берет. Анайда ок, пионерлер эмезе јарчылар јарлаар иштиҥ туштажузынаҥ озо јарлап баштап салган болзо, олор јарлаар ишти узак ӧйгӧ токтотпос ине.
3. Јарлаар иштиҥ туштажулары јаан туза экелзин деп, канайып ӧткӱрерге јараар?
3 Јарлаар иштиҥ туштажулары јарчыларга јаан туза экелзин деп аайлу-башту ӧдӧр учурлу. Кӧп сабада, јарлаар иштиҥ кажы ла бӧлӱги ӧскӧ бӧлӱктерге бирикпей, бойыныҥ туштажуларын ӧткӱрзе јакшы болор. Мынайып этсе, јарчыларга јарлаар иштиҥ туштажуларына ла участокторына једерге јеҥил болор. Анайда ок, јарчыларды экидеҥ бӧлиирге јеҥил болор ло бӧлӱктиҥ кӧрӧӧчизине берилген јарчыларга ајару эдерге арга болор. Аксагалдардыҥ јӧби јербойыныҥ айалгаларын ајаруга алып, канайып этсе артык болор деп, јӧп чыгарар. Туштажу мӱргӱӱлле божордоҥ озо, јарчылар ончозы кемле, кайдӧӧн баратанын билер учурлу.
4. Јарлаар иштиҥ туштажулары ӧскӧ туштажуларга кӧрӧ тузазы ас деп сананары нениҥ учун јастыра?
4 Јуунныҥ ӧскӧ туштажуларына кӧрӧ тузазы ас эмес. Јарлаар иштиҥ туштажулары, јарлап барарга јазанган улуска ӧткӱрилип турганынаҥ улам, ого кӧп сабада ончо улус келбей јат. Је бу туштажулардыҥ, јуунныҥ ӧскӧ туштажуларына кӧрӧ, тузазы ас деп сананып, јаан керекке албай турзын дегенин темдектебей јат. Канайып ӧскӧ туштажулар анайып ла јарлаар иштиҥ туштажулары — бу бой-бойыбысты сӱӱшке ле јакшы керектерге кӱӱнзедип турар Иегованыҥ аргалары (Евр. 10:24, 25). Оныҥ учун туштажуны ӧткӱрер кижи, шӱӱжери Иеговага мак экелзин деп ле ончо јуулган улуска туза экелзин деп, јакшы белетенер учурлу. Јарлаар ишке јазанган јарчылар, канча кире аргазы бар, бу туштажуларда болорго албаданар учурлу.
5. а) Јарлаарыныҥ кӧрӧӧчизине јарлаар иштиҥ туштажуларын канайда ӧткӱрер керек? б) Јарлаар иштиҥ туштажуларын эје канайда ӧткӱрер учурлу?
5 Ӧткӱреечи канайып белетенет. Јуунда пунктты јакшы ӧткӱререге ака јакылтаны озодоҥ алар учурлу. Мынайып ла эдери јарлаар иштиҥ туштажуларына база кирет. Качан јарлаар иштиҥ туштажуларыныҥ бӧлӱктери бой-бойынаҥ башка јуулза, туштажуны бӧлӱктиҥ кӧрӧӧчизи эмезе оныҥ болушчызы ӧткӱрер эмей. Је канча да бӧлӱк јуулып, туштажуны кожо ӧткӱрзе, ӧткӱретен кижини јарлаарыныҥ кӧрӧӧчизи кӧстӧйт. Кезик јарлаарыныҥ кӧрӧӧчилери туштажулардыҥ расписаниезин ончо ӧткӱреечилерге ӱлеп, оны јарлардыҥ доскозында илип салат. Јарлаарыныҥ кӧрӧӧчизине, ӧткӱреечилерди кӧстӧӧринде керсӱ болор учурлу, нениҥ учун дезе, туштажулардыҥ чыҥдыйы ӧткӱреечилердиҥ ӱредер ле башкарар аргаларынаҥ камаанду. Туштажуны кандый бир кӱнде аксагалга, болушчы ишчиге эмезе јарагадый чӧҥӱрилген ӧскӧ акага ӧткӱрерге келишпей турза, јарлаарыныҥ кӧрӧӧчизи јарагадый чӧҥӱрилген эјени кӧстӧп салар. («Качан эје ӧткӱрип турза» деген јӧрмӧлди кӧр.)
6. Јарлаар иштиҥ туштажузын ӧткӱрер деп кӧстӧлгӧн кижи нениҥ учун јакшы белетенер учурлу?
6 Качан бис Теократиялык иштиҥ сургалына эмезе Агару иштиҥ туштажузына јакылта алзас, ого ајару эдип јакшы белетенип јадыбыс. Бис јуунга барып јаткан ӧйдӧ белетенбей јадыс ине. Јарлаар иштиҥ туштажуларына андый ла кӧрӱмдӱ болор керек. Јарлаар иштиҥ туштажузы кыска ӧйгӧ болотон болзо ого јакшы белетенери јаан учурлу болот: мынаҥ улам туштажуда кӧп шӱӱлтелер болор ло ол ӧйинде божоор. Јакшы белетенери дегени, јарлаар иштиҥ участокторын озолондыра белетеп салганын темдектейт.
7. Ӧткӱреечи нени шӱӱжип кӧрӧр аргалу?
7 Нени шӱӱп кӧрӧр. Кажы ла јердиҥ айалгалары башка-башка болгонынаҥ улам бӱдӱмјилӱ кул јарлаар иштиҥ кажы ла туштажузына план бербей јат. «Јарлаар иштиҥ туштажузында шӱӱп кӧрӧргӧ јараар» деген рамкада кезик аргалар берилет. Туштажулар јаҥжыккан аайынча сурактардыҥ ла каруулардыҥ болужыла ӧдӧр учурлу. Кезикте туштажуларда јакшы белетелген кӧргӱзӱ эмезе јарагадый кӧрӱлмени кӧргӱзерге јараар. Ӧткӱреечи, јарлаар иштиҥ туштажузына белетенип тура, јарчылардыҥ кӱӱн-санаазын не кӧдӱрер ле јарлаар иште бу ла кӱнде олорго не тузалу болорын сананат.
8. Суббот ло воскресень кӱндерде, јарлаар иштиҥ туштажуларында нени шӱӱп кӧрӧргӧ тузалу болор эди?
8 Темдектезе, суббот кӱнде јарчылардыҥ кӧбизи айдыҥ брошюраларын таркадып јадылар. Суббот кӱнде јарлаар ишке туружып тургандардыҥ кӧбизи неделениҥ ӧскӧ кӱндеринде јарлабай турган, оныҥ учун билелик бажырышта белетеп алган куучын баштайтан аргазын эске аларга кӱч болордоҥ айабас. Оныҥ учун ӧткӱреечи, «Бистиҥ агару ижибистиҥ» калганчы бӱгиндеги куучын баштаар аргалардыҥ бирӱзин эске алза тузалу болор деп, сананар болор. Анайда ок брошюрада берилген куучын баштаар арганы јербойыныҥ солундарына, байрамдарына ла учуралдарына келиштире канайып куучындаарын шӱӱп кӧрӧргӧ јараар эмезе кижи брошюраларды алып турза, такып келерге тӧзӧлгӧни канайып белетеер. Јарлаар иштиҥ туштажузында јарчылардыҥ кезиги айдыҥ брошюраларын таркадып баштап салган болзо, ӧткӱреечи олорды кӱӱн кӧдӱргедий јилбилӱ болгон учуралдарды куучындап берзин эмезе ченемелиле ӱлешсин деп сураар аргалу. Воскресень кӱнде, ӧткӱреечи, айдыҥ туркунына таркадар бичиктерге мындый ла арганы тузаланар болор. Ӱредӱ ӧткӱрерине керектӱ бичикти улуска кажы ла кӱн берерге јараар, оныҥ учун ӧткӱреечи мындый бичиктердиҥ бирӱзин кижиге канайып беретенин кыскарта кӧргӱзип ийер аргалу.
9. Јуун аҥылу кампанияга туружып турган болзо, амыраар кӱндерде нени шӱӱп кӧрӧргӧ јараар?
9 Јуун аҥылу кампанияга туружып турган болзо, ӧткӱреечи амыраар кӱндерде айдыҥ брошюраларын кычыртула эмезе буклеттерле эмезе кижи јилбиркей берзе, канайып беретенин шӱӱп кӧрӧр аргалу. Анайда ок, мындый кампаниялардыҥ баалузын аҥылап кӧргӱскен учуралдарла ӱлежерге јараар.
10, 11. Јарлаар иштиҥ туштажуларыныҥ једими канайып јарчылардаҥ камаанду болот?
10 Јарчылар канайып белетенет. Јарлаар иштиҥ туштажуларыныҥ једими јарчылардаҥ база камаанду. Темдектезе, олор билелик бажыруныҥ ӧйинде озолодоҥ белетенип турган болзо, тузалу шӱӱлтелерди ӧскӧ јарчыларга куучындаар аргалу болор эди. Белен болорго, айдыҥ брошюраларын ла бичиктерди артыгынча белетеп, јарлаар иштиҥ туштажузына келердеҥ озо кожо алар керек. Ол тушта јарлаар ишке ончозы тургуза ла барар аргалу.
11 Јарлаар иштиҥ туштажузына канча да минут озо келер керек. Бис јуунныҥ ончо туштажуларына ӧйинде келерге албаданадыс ине. Је качан јарлаар иштиҥ туштажузына кем де оройтып турза јаан чаптыгын јетирет. Нениҥ учун? Јуулган улусты ончозын јарлап ийердеҥ озо ӧткӱреечи кезик шылтактарды ајаруга алат. Јарчылар ас јуулган болзо, ол олорды, кезик тураларын ӧдӱп койгон участокко барып иштезин деп айдар аргалу. Кезик улус туштажуга јойу келген болзо, је участок ыраак јерде болзо, ол бу јарчыларды кӧликтӱ улусла кожо јарлап барзын деп ийер аргалу. Участок јеткерлӱ јерде болзо, ол акаларды эјелерле кожо эмезе олордыҥ јанында иштензин деп сураар аргалу. Ол, суу-кадыгы уйадай берген јарчыларды тӧҥди ӧрӧ чыкпайтан эмезе тепкишле кӧп баспайтан тураларга иштензин деп јакару берер аргалу. Јарчы болгоны јаан удабаган улус ченемелдӱ јарчыларла иштенер аргалу. Јарчылар оройтып турза, кӧп сабада та нени де солыырга эмезе тургузып алган планды ойтодоҥ шӱӱп сананар керек. Је бистиҥ кезикте оройтып турганыста шылтактар тӧзӧлгӧлӱ болордоҥ айабас. Андый да болзо, бис јаантайын оройтып турзас шылтактарды шиҥдеп кӧргӧнис јакшы болор эди, туштажулар учун бисте быйаныс јетпей турган болор эмезе бойыстыҥ керектеристи аайлу-башту этпей турганыстаҥ улам.
12. Темиккен аайынча јарлаар иштиҥ туштажуларынаҥ озо куучындажып алып турган улус, кандый амадулар тургузар аргалу?
12 Јарлаар иштиҥ туштажузына келип турган јарчылар бой-бойлорыныҥ ортозына озолондыра куучындажып алар аргалу эмезе бу туштажуда олорго ээшти кӧстӧп берер аргалу. Темиккен аайынча сен эртедеҥ куучындажып алып тургаҥ болзоҥ, јаҥыс ла јуук најыларыҥла эмес, је ӧскӧ дӧ улусла кожо јарлаар аргаҥ бар ба? (2 Кор. 6:11—13). Сен кезик ӧйдӧ бу јуукта јарчы болуп калган улусла иштеерге ле ого ӱредӱ ӧткӱрер аргаларын ӧскӱрерине болужар аргаҥ бар ба? (1 Кор. 10:24; 1 Тим. 4:13, 15). Сеге јакарулар берзе, оны лаптап ук, темдектезе кайдаҥ јарлап баштайтанын. Туштажу божой берзе, сениле кожо барзын деп кӧстӧлгӧн јарчыны ла участокты солыбаска албаданып, тургуза ла јарлап бар.
13. Јарлаар иштиҥ туштажуларына ончозы јакшы туружып, ого јазап белетенип турза, кандый туза экелер?
13 Иисустыҥ јарлап ийген 70 ӱренчиги «сӱӱнчилӱ јанып келгиледи» (Лука 10:17). Јарлап баштаардаҥ озо, Иисустыҥ олорго берген јакарулары једимге јединерге болушкан деп, алаҥзу јок. Бӱгӱн јарлаар иштиҥ туштажулары анайып ла тузалу болор аргалу. Јарлаар иштиҥ туштажуларына ончозы јакшы туружып, ого јазап белетенип турза, «ончо калыктарга кере» берер деген јакылтаны бӱдӱрерге бистерди кӧкӱдер, таскадар ла башкарту берер (Матф. 24:14).
[4 бӱк, кийдирӱ]
Јарлаар иштиҥ туштажуларына јаан ајару эдип, олорды јуунныҥ туштажуларына кӧрӧ тузазы ас деп сананбас керек
[5 бӱк, кийдирӱ]
Ӧткӱреечи јарлаар иштиҥ туштажузына белетенип тура, јарлап баратандардыҥ кӱӱн-санаазын не кӧдӱрер ле не тузалу болор деп сананар
[6 бӱк, рамка]
Качан эје ӧткӱрип турза
Јарлаар иштиҥ туштажузын эје ӧткӱрип турза, ол бойыныҥ бажын јабар учурлу. Ол, туштажуны јаҥжыгу аайынча отургышка отырып алала ӧткӱрер. Ол эје ака ӧткӱрер болгон немени ӧткӱрер аргалу. Ол, туштажуны сурактардыҥ ла каруулардыҥ болужыла ӧткӱрер аргалу, је отурган улусты ӱредип туру деп билдирбес учурлу. Бу эје ӧскӧ эјени мӱргӱп ийзин деп сураза, ол эје база бойыныҥ бажын јабар учурлу. Туштажу башталганыныҥ кийнинеҥ сууга чӧҥӱрилген ака келзе, эје ого туштажуны оноҥ ары ӧткӱрип, божодып ийзин деп арга берер. Јарлаарыныҥ кӧрӧӧчизи эби јок учурал боло берерин озолодо кӧрӱп, андый учуралдардаҥ, канча кире арга бар, кыйып турарга, башкартуны белетеп саларга албаданар. Темдектезе јарлаар иштиҥ туштажузына 10—12 јашту сууга чӧҥӱрилген јиит карындаш келер, је аксагалдардыҥ кӧрӱмиле ол туштажуларды эм туругуза ӧткӱрип болбос, оны эје ӧткӱрер. Мындый айалгада јарлаарыныҥ кӧрӧӧчизи олордыҥ экилезине, туштажуны эје ӧткӱрер, је мӱргӱӱлди, аксагалдар јараткан болзо, карындаш айдар деп, айдып салар. Кезикте туштажуда јажы јаан ака болордоҥ айабас, аксагалдар билер кандый бир шылтактардаҥ улам, ого јуундарды ӧткӱрерге ле мӱргӱӱрге јарабас. Аксагалдар јажытту јетирӱни ачпай, ол ака јуулгандардыҥ ортозында отурган да болзо, туштажуны кӧстӧгӧн эје ӧткӱрер ле мӱргӱӱр учурлу деп айдып салар. Аксагалдар ол акага јарлаар иштиҥ туштажузын эје качан ӧткӱрерин база айдып салар болор.
[6 бӱк, рамка]
Јарлаар иштиҥ туштажузында шӱӱжерге јараар:
• «Бистиҥ агару ижибистеҥ» алынган куучын баштаар арганы
• Јарлаар иш керегинде кӧрӱлмени
• Куучын баштаар арганыҥ кандый бир бӧлӱгин, темдектезе: куучынды канайып тузалу эдип баштаар, такып келерине тӧзӧлгӧ болзын деп нени эдер эмезе качан кижи бичиктерди алып турган болзо, сый эдип акча берер керегинде арганы канайып айдарын
• Јарлаар ишке тузалангадый кӱн-санааны кӧдӱрер эмезе тузалу ӱлгерди
• Јарлаар иште болгон, јербойында эмезе бистиҥ бичиктерде бичилген учуралды
• «Бистиҥ агару ижибисте» бичилген јӧрмӧлдӧги јетирӱни
• Агару иштиҥ туштажузында бу јуукта болгон пунктаҥ алылган јетирӱни
• Брошюранаҥ алынган јарлаар ишле колбулу јетирӱни
• «Школа служения» деген бичиктеҥ алынган јарлар ишле колбулу јетирӱни
• «Первое знакомство со Словом Бога» деп брошюранаҥ алынган јетирӱни
• Јарлаар иште туштап турган улусла, темдектезе: атеисттерле, эволюционисттерле, индуисттерле эмезе буддисттерле куучынды канайып баштаарын
• Кандый бир јӧпсинишпеске карууны канайып берерин
• Кожо иштеген ишчиге айылдар сайын тузалу јарлаарга канайып болужарын
• Ӧскӧ тилге куучындап турган кижиге туштазас нени эдерин
• Јарлаар иштиҥ кандый бир бӱдӱмине: телефон ажыра јарлаарына, слердиҥ јуунныҥ эмезе бӧлӱктиҥ тилине куучындап турган улусты бедиреерине, кӧп улусту јерлерде јарлаарына, такып келерине ле Агару Бичикти ӱренерине канайып туружарын
• Јеткер јогы керегинде, тапкыр болоры, јакшы темигӱлер, чын кӱӱн-санаа эмезе ого тӱҥей не неме керегинде эске алындырарын