Јебрен судур ла бис

1. Адам ла Еваныҥ кинчек эткен кийнинде Иегова нени эткен? (Башталганы 3:15).

АДАМ ла Еваныҥ кинчек эткен кийнинеҥ, удабай ла Иегова кайкамчылу судур айткан. Бу судур олордыҥ бала-барказына ижемји сыйлаган. Ол Башталганы 3:15-те (кычырыгар, ЈТ) бичилип калган.

2. Башталганы 3:15-теги судурдыҥ нези кайкамчылу?

² Бу судур Агару Бичиктиҥ эҥ ле бажында айдылат. Ол Агару Бичиктиҥ ӧскӧ дӧ бичиктериле колбулу. Бастыра бӱктерди бир бичикке бириктирип салганы чылап, Башталганы 3:15-теги судур бастыра библиялык бичиктерди бириктирип, бир јетирӱ болуп јат. Бу судурдыҥ учурыла болзо, Кудай Дьяволды ла оныҥ калдыгын јоголторго, Јайымдаачы ийерb. Ол тушта Иегованы сӱӱп турган улус тыҥ сӱӱнгилеер!

3. Бу јӧрмӧлдӧ бис нени шӱӱжерис?

³ Бу јӧрмӧлдӧ бис Башталганы 3:15-теги судурла колбулу сурактар шӱӱжип ийерис: Анда кемдер керегинде айдылат? Ол канай бӱдӱп јат? Биске нениҥ учун оны билер керек?

БУ СУДУРДА КЕМДЕР КЕРЕГИНДЕ АЙДЫЛАТ?

4. Башталганы 3:14, 15-теги «јылан» ол кем? Бис оны кайдаҥ билерис?

⁴ Башталганы 3:14, 15-те «јылан» ла «оныҥ калдыгы», «ӱй кижи» ле «оныҥ калдыгы» керегинде айдылат. Агару Бичик бу кемдер болуп турганын биске чын оҥдоп аларга болужатc. Је озо «јыланнаҥ» баштактар. Бу чын јылан болгон болзо, Эдем садта Иегованыҥ сӧзин ол оҥдобос эди. Айдарда, Иегова сагышту јайаанга јаргы чыгарган. Је бу јылан кем болотон? Бу сурактыҥ каруузы Ачылта 12:9-та берилген: «Јебрен јылан» — ол Дьявол. Је јыланныҥ «калдыгы», олор кемдер?

5. Јыланныҥ «калдыгына» кем кирет?

⁵ Кезикте Агару Бичикте «калдык» деген сӧс, адазына тӱҥей болорго турган балдар чылап та кемнеҥ де тем аларга тургандар керегинде айдылза тузаланылат. Сатананыҥ «калдыгы» — кӧскӧ кӧрӱнбей турган јайаандар ла Иеговага ла оныҥ албатызына удурлажып турган улус. Кӧскӧ кӧрӱнбей турган јайаандар — ол дезе Нойдыҥ ӧйинде теҥеридеҥ јерге тӱшкен ангелдер. А улус — Сатана Дьявол адазы чылап калју-казыр керектер эдип турган улус (Баш. 6:1, 2; Иоанн 8:44; 1 Иоанн 5:19; Иуда 6).

6. Нениҥ учун судурдагы «ӱй кижи» ол Ева эмес?

⁶ Бу судурда айдылган «ӱй кижи» ол кем? Бу Ева эмес. Нениҥ учун дезе судурда айдылганыла болзо, ӱй кижиниҥ калдыгы јыланныҥ бажын јара чабар учурлу. Бистиҥ билип алганысла болзо, јылан — ол калју ангел Сатана. Је Еваныҥ бала-барказынаҥ кемизи-кемизи јыланныҥ бажын јара чабып болор бо? Јок эмей! Айса Сатананы кем јоголтор?

7. Башталганы 3:15-теги «ӱй кижи» ол кем? (Ачылта 12:1, 2, 5, 10).

⁷ Башталганы 3:15-те айдылган «ӱй кижи» кем болуп турганын билип аларга, Ачылта деп бичикти кӧрӱп ийектер. (Ачылта 12:1, 2, 5, 10 кычырыгар.) Бу ӱлгерлердеги ӱй кижи чын ӱй кижи эмес. «Оныҥ бут алдында ай, бажында он эки јылдысту ӧрӱмел». Бу ӱй кижи тегин баладый эмес бала тапкан — ол Кудайдыҥ Каандыгы. Бу Каандык теҥериде. Айдарда, ӱй кижи база теҥериде болор учурлу. Бу ӱй кижи чындык ангелдердеҥ турган Кудайдыҥ теҥеридеги организациязы болуп јат (Гал. 4:26).

8. Ӱй кижиниҥ «калдыгы» кем болуп јат? Ол качан чыгып келген? (Башталганы 22:15—18).

⁸ Агару Бичик биске ӱй кижиниҥ «калдыгы» кем болорын оҥдоп аларга болужат. Ӱй кижиниҥ «калдыгы» Авраамныҥ ӱйезинеҥ чыгар учурлу болгон. (Башталганы 22:15—18, кычырыгар, ЈТ.) Бу судур чике ле Авраамныҥ ӱйезинеҥ келген Иисус Христоско бӱткен (Лука 3:23, 34). Је Башталганы 3:15-те судурлалган «калдык», учы-тӱбинде Сатананы ӧлтӱрер учурлу болгон. Айдарда, бу «калдык» тегин кижи болор аргазы јок. Оныҥ учун Иисуска 30 јаш кире болордо, Иегова Кудай оны майлап саларда, ол Кудайдыҥ кӧгӱс Уулы болуп калган. Шак ла майлалган ӧйдӧ Иисус ӱй кижиниҥ калдыгы болуп јат (Гал. 3:16). Соҥында Иисус божойло, теҥеридӧӧн барарда, Кудай ого «мактыҥ ла кӱндӱниҥ кайралын» берген. Анайда ок Кудай «кӧрмӧстиҥ [«Дьявол», ЈТ] керектерин бузарга», Иисуска «теҥери ле јерде ончо јаҥды» берген (Евр. 2:7, ЈК 2003; Матф. 28:18; 1 Иоанн 3:8).

9, 10. а) Ӱй кижиниҥ «калдыгына» база кем кирет? Олор кандый ӧйдӧҥ ала ӱй кижиниҥ «калдыгы» болуп калат? б) Оноҥ ары нени шӱӱжерис?

⁹ Бу ӱй кижиде база да «калдыктар» болор учурлу. Апостол Павел бу керегинде еврей де, еврей эмес те майлаткан христиандарга бичиген: «Је Христостыйы болзогор, слер — Авраамныҥ калдыгы, Кудайдыҥ берген сӧзиле энчиленеечилер» (Гал. 3:28, 29). Иегова бойыныҥ чындык ишчизин майлап салза, ол — «ӱй кижиниҥ» калдыгы болуп калат. Айдарда, ӱй кижиниҥ калдыктары — Иисус ла оныла кожо башкаратан 144 000 (Ачыл. 14:1). Олор теҥеридеги Иегова Адазындый кӧрӱм-санаалу јӱрерге албаданат.

¹⁰ Эмди бис Башталганы 3:15-те кем кемди темдектеп турганын билип алдыс. Оноҥ ары Иегова бу судурын канай бӱдӱрип турганын ла биске оны нениҥ учун билер керек деп, кыскарта шӱӱжип ийектер.

БУ СУДУР КАНАЙЫП БӰДӰП ЈАТ?

11. Ӱй кижиниҥ калдыгы чоҥчойын чактыртар дегени нени темдектейт?

¹¹ Башталганы 3:15-те јылан ӱй кижиниҥ калдыгыныҥ чоҥчойына чагып ийер деп айдылган. Бу сӧстӧр Сатана Иисусты еврейлер ле римляндар ажыра ӧлтӱрген тужында бӱткен (Лука 23:13, 20—24). Темдектезе, кижи чоҥчойын та неге де јарып алган болзо, канча да кире кӱнниҥ туркунына базып болбой јат. Анайып ла Иисус божоп каларда, ондо ӱч кӱнниҥ туркунына нени де эдер аргазы јок болгон (Матф. 16:21).

12. Јыланныҥ бажы качан ла канайып јара чабылар?

¹² Башталганы 3:15-ле болзо, Иисус сӧӧк салар јерде јаантайынга артпас учурлу болгон. Нениҥ учун? Нениҥ учун дезе судур аайынча болзо, ӱй кижиниҥ калдыгы јыланныҥ бажын јара чабар учурлу. Айдарда, Кудайдыҥ Уулы тирилер керек болгон. Оныҥ учун Кудай ӱчинчи кӱнде Иисусты тиргизип ийеле, качан да ӧлбӧйтӧн теҥеридеги јӱрӱм берген. Удабас келер ӧйдӧ, Кудайдыҥ тургузып салган ӧйинде Иисус Дьяволды јоголтып койор (Евр. 2:14). Иисус ла оныла кожо башкарып тургандар, Кудайдыҥ ӧштӱлерин, ол эмезе јыланныҥ калдыктарын, јердиҥ ӱстинеҥ ӱзе јоголтып салар (Ачыл. 17:14; 20:4, 10)d.

БУ СУДУРДЫ БИСКЕ НЕНИҤ УЧУН БИЛЕР КЕРЕК?

13. Бу судурдыҥ бӱдӱп јатканы бистерге кандый туза берет?

¹³ Слер Иеговага бажырып турган болзоор, бу судурдыҥ бӱдӱп јатканы слерге јаан тузазын јетирет. Оныҥ тузазын бис кайдаҥ кӧрӧдис? Ӱй кижиниҥ калдыгы, Иисус, јерде кижи болуп јӱрерде, Адазыныҥ темиле чике јӱрген (Иоанн 14:9). Оноҥ улам бис Иеговала таныжып, оны сӱӱп баштаганыс. Анайда ок Иисустыҥ ӱредӱлеринеҥ ле јуундарды башкарып турганынаҥ јаан туза аладыс. Иисус бисти Иегованы сӱӱндирип јӱрзин деп ӱредип јат. Кудайдыҥ Уулы чоҥчойына чактыртып ийерде, ӧскӧртӧ айтса божоп каларда, бистерге келер ӧйлӧргӧ јаан ижемји ачылган. Нениҥ учун дезе Иисус божойло тирилерде, Иеговага толынты тайылганыҥ баазын экелип берген. Бу тайылга «бисти кандый ла кинчектеҥ арутайт» (1 Иоанн 1:7).

14. Иегованыҥ Эдем садта айткан судуры ол ло тарый бӱтпеген деп, бис кайдаҥ билерис?

¹⁴ Айдарда, Эдемдеги Иегованыҥ айткан судуры, ол ло тарый бӱтпеген эмтир. Нениҥ учун дезе канча да ӧй ӧдӧр керек болгон. Сӱрлеп айткан ӱй кижиге ак јарыкка калдык чыгарар керек болгон. Анайып ла Сатанага да бойыныҥ јанындӧӧн калдык јуур керек. Кийнинде олордыҥ ортозында ӧштӧжӱ башталар. Бу судурды биске јакшы билип алар керек. Нениҥ учун дезе анда Сатананыҥ телекейи Иегованыҥ ишчилерин јаман кӧрӧр деп айдылган. Кийнинде Иисус та база анайып ла айткан (Марк 13:13; Иоанн 17:14). Бу судурдыҥ бир бӧлӱгиниҥ, анчада ла калганчы 100 јылдыҥ туркунына, бӱдӱп турганын бис бойыстыҥ кӧзисле кӧрӱп јадыс.

15. Нениҥ учун бу телекей бисти там ла там јаман кӧрӧт? Је бистерге нениҥ учун Сатананаҥ коркыбас керек?

¹⁵ 1914 јылда Иисус Каан болуп отурганыныҥ ла кийнинеҥ Сатананы јердӧӧн таштап ийген. Эмди Сатанада јердеҥ ыраап барар аргазы јок. Анайда ок оны ӧлӱм сакып јат (Ачыл. 12:9, 12). Је ол Иегованыҥ албатызына бойыныҥ чугулын оноҥ тыҥ тӧгӱп баштаган (Ачыл. 12:13, 17). Бот нениҥ учун бу телекей Кудайдыҥ албатызын там ла там јаман кӧрӧт. Је бистер Сатананыҥ ла оныҥ калдыгынаҥ бир де коркыбай јадыс. Нениҥ учун дезе апостол Павелдиҥ: «Кудай бис учун болзо, кем биске удура?» — деген сӧстӧрине бӱдедис (Рим. 8:31). Бис Иегова Кудайдыҥ берген сӧзине бир де алаҥзыбай јадыс. Бого ло коштой Башталганы 3:15-теги айдылган судурдыҥ кӧп сабазы бӱдӱп калган.

16—18. Башталганы 3:15-теги судурды оҥдогоны Кёртис, Урсула ла Джессиканыҥ јӱрӱмине канайып болужып јат?

¹⁶ Башталганы 3:15-теги судур јӱрӱмисте кандый ла кӱчтер болзо, Иеговага турумкай артарга болужат. Гуам деп јерде јадып турган Кёртис деп миссионер мынайда айдат: «Кезикте кӱчтердеҥ улам, Иеговага турумкай артарга чек кӱч болот. Је Башталганы 3:15-теги судурды шӱӱп сананып турзам, Иеговага турумкай артарга болужат». Кёртис Иегованыҥ кыйын-шыраны качан јоголторын энчикпей сакып јат.

¹⁷ Баварияда јадып турган Урсула эјеге Башталганы 3:15-теги судур Агару Бичик Кудайдыҥ тыныла бичилген деп бӱдерге болушкан. Ол бу судурдыҥ Агару Бичиктиҥ ӧскӧ дӧ судурларыла колбулу болгонын кӧрӧлӧ, сӱреен тыҥ кайкаган. Урсула мындый сӧстӧр айдып јат: «Баштапкы улус кинчекти эдип ле ийерде, Иегова тӱрген ле бӱдӱн кижиликке ижемји берген деп оҥдоп ийеле, сӱреен тыҥ сӱӱнгем».

¹⁸ Микронезияда јадып турган Джессика деп эје мынайда куучындайт: «Чындыкты таап алгам деп оҥдогон тужымды качан да ундыбазым. Башталганы 3:15-теги судур мениҥ ле кӧзиме бӱдӱп јат! Анайда ок Кудай бисти шыралап јӱрзин деп, бир де кӱӱнзебегенин ундыбай јӱрерге болужат. Бу судур Иеговага иштеп јӱрген ӧйлӧр эҥ ле јакшы деп, анайда ок келер ӧйдӧ мениҥ сакып турганымнаҥ Иегова јӱс катап кӧп берер деп, бӱдӱмјимди тыҥыдат».

19. Бис Башталганы 3:15-теги судур учына јетире бӱдӱп калар деп нениҥ учун алаҥзыбас аргалу?

¹⁹ Бис бу јӧрмӧлдӧҥ Башталганы 3:15-теги судурдыҥ бӱдӱп турганын кӧрдис. Ӱй кижиниҥ калдыгы кемдер болгонын ла јыланныҥ калдыгы кемдер болгонын билип алдыс. Ӱй кижиниҥ калдыгы — Иисус — чоҥчойына чактыртып алала, эмди качан да ӧлбӧйтӧн кӱчтӱ Каан болуп јат. Анайда ок Иегова ӱй кижиниҥ калдыгыныҥ кӧп сабазын јууп алган. Айдарда Башталганы 3:15-теги судурдыҥ баштапкы бӧлӱги бӱдӱп каларда, бу судурдыҥ экинчи бӧлӱгиниҥ бӱдерине алаҥзыырыс па? Јок. Нениҥ учун дезе ӱй кижиниҥ калдыгы јыланныҥ бажын јара чабар дегенине бир де алаҥзу јок! Качан Сатананы јажын-чакка јоголтып койзо, Кудайдыҥ чындык улузына андый тыҥ сӱӱнчи болор. Оныҥ учун кару ака-эјелер, сурап турус, оноҥ ло ары тартыжыгар! Иегова Кудайыс айткан сӧзин бӱдӱрип салар. Ого бӱдер керек. Анайып ӱй кижиниҥ калдыктары ажыра «јердиҥ ончо калыктары» Иегованыҥ тӱгенбес алкыштарын алар (Баш. 22:18).