Хульда санаазына јединет

БИР КАНЧА јылдар кайра слер Индонезияда Санги́хе деп ортолыкта болгон болзоор, јаратта бистиҥ ӱч эјени кӧрӱп ийер эдеер. Анда јадып турган улус олорды јакшы билер. Нениҥ учун дезе олор андагы улуска Агару Бичикти јакшы билерге болужат. Је бир ӧйдӧ олор чек ӧскӧ иш эткен.

Озо баштап олор талайдаҥ јаан таштар чыгаратан. Кезик таштардыҥ јааны футбольный мячтый болгон. Оноҥ эјелер агаш отургыштарга отурып алала, ол таштарды такааныҥ јымыртказынаҥ кичинек этире ооткылап туратан. Оодып алган таштарын олор сабаттарга јууйла, тепкишле чыгып, айылдарына апаратан. Оныҥ кийнинде таштарды јаан таарларга уруп, машинага салала, јолдор тудуп турган јердӧӧн јетиретен.

Бу эјелердиҥ бирӱзи Ху́льда болгон. Алдында ол акчаны јӱк ле билезине једер эдип иштеген. Је эмди ол бойына планшет садып алар деп сананган. Анайып ол JW Library^® приложениеле тузаланар эди. Нениҥ учун дезе Хульда ол приложениедеги видеолор ло ӧскӧ дӧ материалдар ого эрчимдӱ јарлаарга ла Агару Бичикти јакшы оҥдоорго болужар деп билген.

Хульда бӱдӱн јарым айдыҥ туркунына кажы ла эртен тура эки часка кӧп иштеген. Ол бир кичинек грузовой машинаны толтырып ийгедий таш оодып койгон. Учы тӱбинде Хульда планшетке акчаны јууп алды.

Ол куучындайт: «Таштар оодоры јеҥил иш эмес. Мен тыҥ арып, ончо ӱйе-сӧӧгим оорып туратан. Је јаҥы планшетти колыма алган кийнинде ончо оору-јоболымды ундып салгам! Планшеттӱ болуп каларымда, меге јарлаарга ла туштажуларга белетенерге јеҥил боло берген». Анайда ок Хульда пандемияныҥ ӧйинде, јуунныҥ туштажулары ла јарлаар иш интернет ажыра ӧдӱп турарда, планшет сӱреен керектӱ болуп калган деп айдат. Бис Хульда эјеле кожо, санаазына једингени учун, сӱӱнип јадыс.