1-кы бӧлӱк
Кудай бистерди чын ла кичееп турган ба?
1, 2. Улус Кудай керегинде кандый сурактар сурагылайт ла нениҥ учун?
ЈӰРӰМИҤДИ јӱрӱп тура, сен качан-бирде сураган болорыҥ: «Бистерди чын ла кичееп турган Кудай бар болзо, нениҥ учун Ол мындый кӧп кыйын-шыраны токтотпой турган?» Бис ончобыс шырага бастыртканыс эмезе шырага бастырткан та кемди де билерис.
2 Чын, бастыра тӱӱкиликтиҥ туркунына јуулардаҥ, казыр болгонынаҥ, јаман керектердеҥ, чындык эмезинеҥ, јоксыраштаҥ, оорулардаҥ ла јуук кижи божогонынаҥ улам улус ооруп, кӧгӱстери сыстап, шыралагылады. Јаҥыс ла бистиҥ ХХ чакта јууларда 100 миллионноҥ кӧп улус ӧлтӱрткен. Оноҥ башка јӱстер миллиондор улус шыркаладып, эмезе айлы-јурты ла јӧӧжӧзи јок арткылады. Эмдиги бистиҥ ӧйдӧ кижи коркыыр коркышту кӧп керектер болот, оноҥ улам тоозы јок улус тереҥ кунугып, ыйлап-сыктап, ижемјизи јогын сезет.
3, 4. Кудай кыйын-шыраны токтотпой турганына кӧп улус канайда сананат?
3 Кезиктери казырланып: «Кудай бар да болзо, Ол чынынча бистерди керексибей јат» — деп санангылайт. Эмезе олор Кудайды чек јок деп санангылаар болор. Темдектезе, баштапкы телекейлик јуу ӧйинде этнический истежӱге табартырып, оноҥ улам најыларын ла билезин јылыйткан бир эр кижи сурады: «Бис Кудайдыҥ болужын керексинеристе Ол кайда болгон?» База бир кижи экинчи телекейлик јуу-согушта миллиондор улус нацисттерге ӧлтӱртерде, ол тирӱ артып, кӧргӧн шыралардаҥ коркуш тыҥ ачурканып айткан: «Слер мениҥ јӱрегимди јалап кӧргӧн болзор, корондолып калар эдер».
4 Анайдарда, Кудай јакшы болзо, нениҥ учун Ол јаман керектерди токтотпой турганы кӧп улуска јарт эмес. Кудай бистерди чын ла кичееп турганына эмезе Ол бар деп, олор алаҥзыгылап јат. Ол улустыҥ кӧп сабазы шыра јаантайын улустыҥ јӱрӱминде болор деп санангылайт.
[2, 3 бӱктердеги јурук]
Кыйын-шыранаҥ айрылган јаҥы телекей јуук па?