Кудайды канайып јакшы билип алар

СЛЕРГЕ јӧп керек болзо, кемге баштанадар? Слер бӱдӱмјилӱ кижиге баштанып турган болорор. Оныҥ јӧби кандый туза экелерин билбес те болзогор, тӱҥей ле оныҥ айтканын угар болорор. Агару Бичиктиҥ јӧптӧринеҥ туза аларга турган болзогор, слерге оныҥ Чӱмдеечизиле таныжар керек. Анайда ок слер Оныҥ «најызы» болор аргалу! (Исаия 41:8).

² Слер кемле де најылажарга турган болзогор, озо баштап оныҥ адын сурап угарар. Агару Бичиктиҥ Чӱмдеечизинде ады бар ба? «Мен Иегова. Бу мениҥ адым, мен Бойымныҥ магымды ӧскӧ кемге де, мактаарын кезип эткен чалуларга да бербезим» — деп, Ол айткан (Исаия 42:8). Оныҥ ады — Иегова. Еврей тилде ол יהוה (оҥ јанынаҥ сол јанындӧӧн кычырылып јат) деп бичилет. Еврей Бичимелдерде бу ат 7000 кире катап туштайт. Кудайдыҥ адыныҥ учуры — «Ол болорго берет» дегенин темдектейт. Бу дезе, Иегова Бойыныҥ амадузын бӱдӱрерге, Ого кем болор керек, ол ло боло берет, анайда ок јайалгандарына Оныҥ табын бӱдӱрерге, кем эмезе не болор керек, ол ло болорго берет дегенин темдектейт. Анайда ок Оныҥ ады еврей тилде узак ӧйгӧ улалып турган грамматикалык бӱдӱминде турат. Бу нени кӧргӱзет? Иегова эмдиге јетире Бойыныҥ амадузыныҥ бӱдерине «болорго берет». Ол кандый да куру ийде эмес, ол — тирӱ Кудай!

³ Иегова ончо бар немениҥ Јайаачызы (Башталганы 1:1). Ол — «теҥери ле јерди, талайды ла олордо барын јайаган тирӱ Кудай» (Апостолдордыҥ ижи 14:15). Иегова баштапкы эки кижини — Адам ла Еваны, анайда ок ончо бар немени јайаган. Оныҥ учун Кудай — «јӱрӱм береечи» (Сарын 36:9). Анайда ок Ол јӱрӱмди кичееп кӧрӱп турган. «Ол Бойы керегинде керелеп, быйан эдип, теҥеридеҥ слерге јаҥмыр јаадырып, тӱжӱм, аш-курсак берип, јӱректереерди сӱӱнчиле толтырган» (Апостолдордыҥ ижи 14:17). Африка ла Азияда кӧп улус ада-ӧбӧкӧлӧрине бажыргылайт, нениҥ учун дезе олорго јӱрӱмди ада-ӧбӧкӧлӧри берген. Бу улус јӱрӱмди берип, оны кичееп кӧрӱп турганга, анайда ок баштапкы эр ле ӱй кижини јайап, бала баркалу болзын деп јайаганга не быйанду болбос?! Мыны шӱӱп сананганыс бисти: «Кайракан ла Кудайыс, макты, кӱндӱни ле кӱчти аларга Сен јарамык, нениҥ учун дезе Сен ончоны јайагаҥ, Сениҥ табыҥла ончозы јӱрет ле ончозы бӱткен» — деп, Иегованы мактаарга кӱӱнзедет (Ачылта 4:11).

⁴ Агару Бичиктеҥ бисти јайаган Иегова Кудайла таныжып, Ол кандый Кудай деп билип алар арга бар. Агару Бичик: «Кудай — ол сӱӱш» — деп айдат (Иоанныҥ 1-кы самаразы 4:16; Чыгыш 34:6, 7). Слер Агару Бичикти Башталганынаҥ ала Ачылтага јетире кычырып, Кудай чыннаҥ сӱӱштӱ деп, кӧп керелер таап аларар. Јайаачыны оноҥ јакшы билип аларга Кудайдыҥ Сӧзин кӱнӱҥ ле кычырып турарга не албаданбас? Агару Бичикти јакшы билер улустыҥ болужын алып, оны лаптап ӱренигер (Апостолдордыҥ ижи 8:26—35). Анайып слер Кудай чындык, јаманды ӱргӱлјиге болдыртпас деп, оҥдоп аларар (Јаҥды такыганы 32:4). Улуска бир ле ӧйдӧ сӱӱштӱ ле чындык болорго кӱч, је Иегова Кудай сӱӱшти ле чындыкты ойгор тузаланат (Римдегилерге 11:33; 16:27). Кӱчтӱдеҥ Кӱчтӱ Кудайда бойыныҥ амадаганын бӱдӱрерге ийде-кӱчи бар (Башталганы 17:1). Библиялык ойгор јӧптӧрди тузаланзар, бу јӧптӧр јаан туза экелип турганын кӧрӧригер, ол тушта слер Јайаачыга јаан быйанду болорор.

⁵ Кудайга јууктайтан база бир арга — мӱргӱӱл. Иегова — «мӱргӱӱлдерди Угаачы» Кудай (Сарын 65:2). Ол «нени сураганыстаҥ эмезе сананганыстаҥ чик-јок кӧпти эдер аргалу» (Ефестегилерге 3:20). Је јӱк ле болуш аларга келип турган «најы» керегинде слер нени айдарар? Мындый кижи најы эмес. Анайып ла Кудайга мӱргӱйтен арганы баалап турзас, јӱк ле керектӱзин сурабай, је быйанзак болуп, мактаарыс (Филиппыдагыларга 4:6, 7; 1 Фессалоникадагыларга 5:17, 18).