Бис нениҥ учун Иегованыҥ Керечилери деп аданып турганыс?

Кӧп улус Иегованыҥ Керечилери дегенин кандый да јаҥы кудай јаҥныҥ ады деп бодогылайт. Је сок јаҥыс чындык Кудайдыҥ ишчилери азыйда 2 700 јылдаҥ кӧп ӧйдӧҥ озо, Оныҥ «керечилери» деп адалган (Исаия 43:10—12). Бис 1931 јылга јетире Агару Бичиктиҥ Шиҥдеечилери деп, јарлу болгоныс. Бис Иегованыҥ Керечилери деп, нениҥ учун аданып баштаганыс?

Иегованыҥ Керечилери деп аданганыс, бистиҥ Кудайыс кем деп кӧргӱзет. Јебрен колбичимелдердеги бичилгениле болзо, Агару Бичикте Кудайдыҥ ады Иегова деп, канча муҥ катап туштайт. Агару Бичиктиҥ кӧп кӧчӱрмелеринде Кудайдыҥ адыныҥ ордына Кайракан эмезе Кудай деп бичилген. Је чындык Кудай Моисейге Бойыныҥ адын Иегова деп ачкан. Ол «Бу мениҥ адым чактыҥ-чакка» — деп, јарт айткан (Чыгыш 3:15). Анайып, Ол бойын тӧгӱн кудайлардаҥ башкалаган. Бис Кудайдыҥ агару адын аданып јӱргениске оморкоп јадыбыс.

Иегованыҥ Керечилери деп аданганыс, бис кандый иш эдип турганысты кӧргӱзет. Јебрен ӧйлӧрдӧ чындык Авелдеҥ ала Кудайдыҥ сӱреен кӧп ишчилери Иеговага бӱдӱп тургандары керегинде керелеген. Јӱс јылдардыҥ туркунына Ной, Авраам, Сарра, Моисей, Давид ле Кудайга бӱткен оноҥ до ӧскӧ чындык эр ле ӱй улус «андый кӧп керечилердиҥ» тоозына кирген (Еврейлерге 11:4—12:1). Јаргыныҥ ӧйинде бурузы јок кижини актаарга болушкан керечи чилеп, бис улуска Иегова Кудайыс керегинде јалтанбазынаҥ јарлайдыс.

Бис Иисустыҥ темиле јӱредис. Агару Бичик Оны «чындык ла чын керечи» деп адайт (Ачылта 3:14). Ол, улуска Кудайдыҥ адын ачкан ла Адазы керегинде чындыкты куучындаарга јерге келген (Иоанн 17:26; 18:37). Оныҥ учун Христостыҥ ӱренчиктери Иегованыҥ адын аданып, улуска Оны куучындаар учурлу. Иегованыҥ Керечилери анайып ла эдерге албадангылайт.

• Агару Бичиктиҥ Шиҥдеечилери Иегованыҥ Керечилери деп, нениҥ учун аданып баштаган?

• Иегова Кудайдыҥ керечилери кандый ӧйдӧҥ бери бар?

• Иегованыҥ эҥ ле улу Керечизи деп, кемди айдарга јараар?