Самуил јаантайын чынды эдип јӱрген

Самуи́л јаш тужынаҥ ала агару чадырда јадып иштеген. Улус ары Иеговага бажырарга келип туратан болгон. Самуил агару чадырда канайып иштеп баштаганын сен билериҥ бе? Је озо баштап оныҥ энезиле, Аннала, таныжып алак.

Узак ӧйгӧ Анна бала јок јӱрген, је балалу болорго ол тыҥ кӱӱнзеген. Оныҥ учун ол Иеговага мӱргӱп, болуш сураган. Уул бала чыкса, оны агару чадырга иштеерге берерим деп, Анна сӧзин берди. Иегова Аннаныҥ мӱргӱӱлине каруу берген, ол уулду болуп калды. Ол оны Самуил деп адаган. Качан ого ӱч эмезе тӧрт јаш болордо, Анна берген сӧзи аайынча, Самуилди агару чадырда Кудайга иштезин деп берген.

Ол ӧйдӧ И́лий Кудайдыҥ чадырында улу абыс болгон. Оныла кожо оныҥ эки уулы иштеген. Агару чадыр Кудайдыҥ туразы болгон, ондо иштеп турган улустыҥ ончозы, јакшы керектер эдер учурлу болгон. Је Илийдиҥ уулдары коркышту јаман керектер эткен. Самуил мыны ӱзе кӧргӧн. Самуил Илийдиҥ уулдары чылап јаман керектер эткен бе?~ Јок. Ол јаантайын јакшы керектер эткен — мынайып оны ада-энези ӱредип салган.

Илий бойыныҥ эки уулын канайдар учурлу болгон, сен нени сананып туруҥ?~ Ол олорды кату каруузына тургузып, Кудайдыҥ туразында база иштебезин деп, токтодор учурлу болгон. Је Илий мыны этпеген. Оныҥ учун Иегова Илийге ле оныҥ уулдарына ачынган. Ол олорды кату каруузына тургузарга јӧп чыгарган.

Бир катап тӱнде, Самуил уйуктап јадарда, кем де оны: «Самуил!» — дегенин угуп ийди. Ол Илийге јӱгӱрди, је ол ого: «Мен сени кычырбадым» — деп, айтты. Анайда база эки катап болды. Ол тушта Илий Самуилга: «Эмди катап ла ӱн угулза, „Иегова, айт, мен сени угуп јадым“» — деп, айтсын деди. Самуил анайып ла этти. «Мен оныҥ билезин јаман керектери учун кату каруузына тургузарымды, Илийге јетир» — деп, Иегова Самуилга јакарды. Самуилга бу јакаруны бӱдӱрерге јеҥил болгон бо, сен канайып сананып туруҥ?~ Јеҥил эмес эмей. Самуилга коркымчылу да болгон болзо, Иегова ого нени айтканын ол ӱзе бӱдӱрген. Иегованыҥ бастыра сӧстӧри бӱдӱп калды! Илийдиҥ эки уулы божоп калды, оноҥ Илий бойы да божоды.

Самуил — биске јакшы тем. Айландыра улус јаман керектер эдип турган да болордо, ол чынды эткен. Је сен канайдарыҥ? Самуил чылап јаантайын чынды эдериҥ бе? Эйе болзо, Иегованы ла ада-энеҥди де сӱӱндирериҥ.